Chhinchhiahnate Hrilhfiah Chu Thil Pawimawh Tak A Ni!

“Atîr chuan kan fapa Andrea chu a lu a na satliah mai emaw ka ti a. Mahse, chaw châkna a hloh va, a khawsik a sâng bawk a. A lu na chuan zual lam a pan zêl a, ka mangang ṭan ta a. Ka pasal a lo haw chuan Andrea chu Doctor kan panpui a. Doctor-in natna inlâr dân a endik hnuah chuan, damdawi inah a thawn nghâl vat a. A natna chu lu na mai aiin a lo hlauhawm zâwk a ni. Andrea chuan thluak leh spinal cord tuamtu râng natna (meningitis) a lo nei reng a. Enkawl a ni a, a lo ṭha chhuak leh ta thuai a ni.”​—⁠Gertrud-i, Germany-a nu pakhat.

GERTRUD-I thiltawn hi nu leh pa tam takte tân chuan thil thar a ni lo mai thei. Anni chuan naupang dam lohna hriltu chhinchhiahnate chu an zawng ṭhîn. Dam lohna zawng zawng hi hlauhawm vek kher lo mah se, nu leh pate chuan an fate hrisêl lohna hriltu thilte chu an ngaihthah mai thei lo. Chhinchhiahnate en a, a ṭûl anga hma lâkna chuan kawngro nasa takin a su thei a. Thil pawimawh tak a ni.

Hei hi hrisêlna chungchângah chauh lo pawh a dik teh meuh mai. India Tuipui hual vêla awmte chunga December 2004-a tsunami chhiatna thleng hi entîrna inâwm tak pakhat chu a ni. Australia leh Hawaii hmuna sawrkâr thuneitu pâwlte chuan Sumatra hmâr lama lîrnghîng nasa tak chu an hre nghâl a, chu lîrnghîng avânga lo awm thei tûr thil hlauhawm pawh an hmu lâwk a. Mahse, chu hmun hlauhawm laia awmte tân chuan vaukhânna dawn theih dân leh chhân lêt theih dân tûr kawng a awm hlawl si lo. Chuvângin, mi 2,20,000 aia tamte chuan an thih phah a ni.

Nasa Taka Pawimawh Zâwk Chhinchhiahna Chu

Isua Krista’n leia a awm lai khân, chhinchhiahnate hmuh leh chu mi mila thiltih chungchângah zir tûr a thu ngaithlatute hnênah a pe a. Thil pawimawh tak chungchâng a sawi a ni. Bible chuan heti hian a sawi: “Pharisaite leh Saddukaite an lo kal a, amah fiah nân vân ata chhinchhiahna anmahni entîr tûrin an dîl a. Nimahsela ani chuan, an hnênah, ‘Tlai lam a lo nihin “Khua-a ṭha dâwn a ni ang, kâwl a sen êm mai” in ti ṭhîn a. Tin, zîngah chuan “Vawiin chu khua a chhe dâwn a ni ang, kâwl a sen a, khua a dûr êm mai” in ti ṭhîn a. Vân  awmzia in hre fiah thiam si a, nimahsela hun chhinchhiahnate hi in hre fiah thei lo,’” tiin a sawi a ni.​—⁠Matthaia 16:​1-3.

Isua chuan “hun chhinchhiahnate” sawi langin, kum zabi khatnaa a thusawi ngaithlatu Judate chuan an hun hmanhmawhthlâkzia an hriatthiam a ngaih thu a târ lang a ni. Juda kal hmang chu a tâwp thuai dâwn a, chu chuan an vaiin a nghawng dâwn a ni. Isua chuan a thih hma lawk khân chhinchhiahna dang​—⁠a lo awm lehna chhinchhiahna chu a zirtîrte hnênah a hrilh a. Chu mi ṭuma a thil sawite chu tûn laia mi zawng zawngte tân thil pawimawh tak a ni. (w05 10/1)