‘Ngaihven Reng Rawh U’—Rorêl Hun A Lo Thleng Ta!
‘Ngaihven Reng Rawh U’—Rorêl Hun A Lo Thleng Ta!
He zirlai thuziaka thute hian khawvêl pumpuia neih kum 2004/05 district inkhâwmpuia tlângzarh, Ngaihven Reng Rawh U! tih a ṭanchhan a ni.
“Ngaihven rawh u, eng niah nge in Lalpa a lo kal dâwn in hre si lo.”—MATTHAIA 24:42.
1, 2. Isua’n a lo kalna chu eng nên nge inâwm taka a tehkhin?
RUKRU chu in ṭhenawmah a hrângin, inte a rawk ṭhîn tih hre ta la eng nge i tih ang? I chhûngte leh i thilneih hlute vênghim tûrin i harhvâng ngei ang. Tihah chuan, rûkru chuan i lo chân theih nân lehkha thawnin a lo kal hun tûr a puang si lo. Chu mi nêna inkalh takin, a rûk thei ang ber leh rin loh takin a lo kal zâwk a ni.
2 Isua chuan rûkru thil tih dân chu tehkhin thu atân vawi khat aia tam a hmang a. (Luka 10:30; Johana 10:10) Ani chuan tâwpna huna thil lo thleng tûrte chungchâng leh rorêl tûra a lo kal hmaa thilthleng tûrte chungchângah, he vaukhânna hi a pe a: “Chutichuan ngaihven rawh u, eng niah nge in Lalpa a lo kal dâwn in hre si lo. Nimahsela, hei hi hre rawh u, rûkru a lo kal hun tûr in neituin hria sela, a vêng ang a, a in a reh pawhtîr lo vang,” tih hi. (Matthaia 24:42, 43) Heti hian, Isua chuan a lo kal hun tûr chu rûkru, beisei loh taka lo kal nên a tehkhin a ni.
3, 4. (a) Isua lo kalna chungchânga vaukhânna ngaihsaknaah hian eng thil nge tel? (b) Eng zawhnate nge lo chhuak?
3 Isua lo kal ni chiah tûr hriat a nih dâwn loh avângin, he tehkhin thu hi inchawih tak a ni. A hmain, he hrilh lâwknaah bawk hian, Isua chuan: “Chu mi nî leh a hun thu chu Pa chauh lo chuan tuman, vâna vântirhkohte pawhin, Fapa pawhin an hre lo,” tiin a sawi. (Matthaia 24:36) Chuvângin, Isua chuan a thu ngaithlatute chu: “Inring rengin awm rawh u,” tiin a fuih a ni. (Matthaia 24:44) Isua chu eng hunah pawh Jehova Rorêltu angin lo thleng se, a vaukhânna ngaihsaktute chu an inpeihin, an awm ṭha reng ang.
4 Zawhna pawimawh ṭhenkhat a lo chhuak a: Isua pêk vaukhânna thu hi khawvêl mite tân chauh em ni, nge Kristian dikte tân pawh ‘ngaihven renga awm’ a ngai? Engvângin nge ‘ngaihven renga awm’ chu a hmanhmawhthlâk a, engtin nge kan ngaihven reng theih ang?
Tute Tâna Vaukhân Nge?
5. ‘Ngaihven reng rawh u,’ tih vaukhânna hi Kristian dikte tân a ni tih engtin nge kan hriat?
5 Khawvêl mi, chhiatna lo thleng tûr vaukhânna laka an beng huptute tân chuan Lalpa nî chu rûkru angin a lo thleng ngei ang. (2 Petera 3:3-7) Amaherawhchu, Kristian dikte tân rûkru angin a lo thleng ve ang em? Tirhkoh Paula chuan a Kristian puite hnênah: “Lalpa Nî chu zânah rûkru angin a lo thleng dâwn tih nangmahni ngeiin chiang takin in hre si a,” tiin a ziak a ni. (1 Thessalonika 5:2) Kan rilruah ‘Lalpa Nî chu a lo thleng dâwn’ tih rinhlelhna rêng a awm lo. Mahse, chu chuan ngaihven renga kan awm a ṭûlna a tinêp em? Isua’n: “In rin loh hunah Mihring Fapa a lo kal dâwn si a,” a tih kha a zirtîrte hnêna a sawi a ni tih chhinchhiah ang che. (Matthaia 24:44) Tûn hmaa Lalram zawng hmasa zêl tûra a zirtîrte a fuih pawh khân, Isua chuan: “Inring rengin awm rawh u, in rin loh hunah Mihring Fapa a lo kal dâwn si a,” tiin a lo vaukhân lâwk tawh bawk. (Luka 12:31, 40) ‘Ngaihven reng rawh u,’ tia a vaukhân khân, Isua rilruah a hnungzuitute an awm tih a chiang hle a ni lâwm ni?
6. Engvângin nge ‘ngaihven renga kan awm’ a ngaih?
6 Engvângin nge ‘ngaihven reng’ leh ‘inring renga’ kan awm a ngaih? Isua chuan heti hian a hrilhfiah a ni: “Chu mi hunah chuan lovah mi pahnih an awm ang a; pakhat chu kal bopuiin a awm ang a, pakhat chu hnutchhiahin a awm ang. Hmeichhe pahnih buh râwt sawmnaah chuan buh râwt sawmin an awm ang a, pakhat chu kal bopuiin a awm ang a, pakhat chu hnutchhiahin a awm ang,” tiin. (Matthaia 24:40, 41) Inring renga awmte chu, Pathian ngaihsak lo khawvêl hi tihchhiat a nih hunah chuan “kal bopui,” a nih loh leh chhandam an ni ang. A dangte chu mahni hmasial taka an nun kawng duhzâwng chauh an ûm avângin, tihboral tûra “hnutchhiah” an ni thung ang. Hêng zîngah hian thutak hre tawh a, ngaihven renga awm lote pawh an tel ngei a rinawm.
7. Tâwpna lo thlen hun tûr kan hriat lohna chuan eng nge min tihtîr thei?
7 He kal hmang hlui tâwpna hun tûr chiah kan hriat lohna hian rilru dik tak pua Pathian rawng kan bâwlzia târ lanna hun ṭha min pe a ni. Engtin nge min pêk? Tâwpna lo la thleng lawk dâwn lo niin a lang mai thei a. Sawi hrehawm takin, hetiang zâwnga thlîrtu Kristian ṭhenkhat chuan Jehova rawngbâwlnaa an ṭhahnemngaihna chu an tidai a ni. Mahse, kan inpumpêkna hmangin tiam chin awm lova a rawngbâwl tûrin Jehova hnênah kan inpe tawh a. Jehova hretute chuan a dâwn ṭêpa ṭhahnemngaihnain a rilru a khawih dâwn lo tih an hria a ni. Jehova chuan thinlung lam a en zâwk ṭhîn si a.—1 Samuela 16:7.
8. Engtin nge Jehova hmangaihnain ngaihven renga awm tûrin min chêttîr?
8 Jehova kan hmangaih tak zet avângin, a duhzâwng tihnaah hian lâwmna nasa ber kan nei a. (Sâm 40:8; Matthaia 26:39) Tin, kumkhuaa Jehova rawngbâwl chu kan duh bawk a ni. Kan beisei aia rei kan nghah a ngaih avâng maiin kan beiseina chuan a hlutna a hloh ṭhen chuang lo. A pawimawh berah chuan, Jehova nîin a thiltumte a tih famkim dân tûr chu kan nghahhlelh êm avângin ngaihven rengin kan awm a ni. Pathian tihlâwm kan duh tak zetna chuan a Thua fuihna awmte zâwm tûrin leh kan nuna a Lalram dah hmasa ber tûrin min chêttîr a ni. (Matthaia 6:33; 1 Johana 5:3) Ngaihven renga awmnain kan thutlûkna siam leh kan nî tin nun kan hmanna a nghawng dân tûr i lo ngaihtuah ang u.
I Nun Hian Khawi Lam Nge A Pan?
9. Engvângin nge kan hun pawimawhna hre thiam tûra khawvêl mite an harh chhuah vat a ngaih?
9 Tûn laiah mi tam takte chuan harsatna khirh tak leh thilthleng thin tiṭhâwng takte chu nî tina thilthleng a ni ta mai tih chu an hriain, anmahni nun ngeiin a pan lamah chuan an lungni lo thei a. Amaherawhchu, khawvêl dinhmun awmze dik tak chu an hria em? “Khawvêl tâwpna” hunah kan awm tih an hria em? (Matthaia 24:3) Mahni hmasialna, tharum thawhna, leh Pathian ngaihsak lohna hluar takte hian he hun hi ‘ni hnuhnung’ a nihzia a chhinchhiah tih an hria em? (2 Timothea 3:1-5) Hêng thil zawng zawngte pawimawhna hre thiam tûr leh an nunin a pan lam ngaihtuah tûra an harh chhuah vat a ngai a ni.
10. Ngaihven rengin kan awm tih tichiang tûrin eng nge kan tih ang?
10 Keini ve hi engtin nge ni? Kan hnathawhna te, kan hrisêlna te, kan chhûngkua te, leh kan biakna te chungchâng nêna inkaihhnawih thutlûkna siam tûr nî tin kan tâwk a. Bible-in a sawi chu kan hria a, nunpui kan tum tlat bawk a ni. Chuvângin, heti hian kan inzâwt tûr a ni: ‘Damchhûng khawsak lungkhamna chuan ka kawng zawh lai ata min pêntîr em? Khawvêl finnate leh a ngaih dânte’n ka duhthlanna siam a khawih buai em?’ tiin. (Luka 21:34-36; Kolossa 2:8) Kan thinlung zawng zawngin Jehova chu kan ring a, kan hriatnaah kan innghat lo tih kan târ lan zêl a ngai a ni. (Thufingte 3:5) Chutiang kawng chuan, Pathian khawvêl thara chatuan nunna—nunna taktak—chu kan vuan nghet tlat dâwn a ni.—1 Timothea 6:12, 19.
11-13. (a) Nova hun laia thilthleng aṭang hian eng nge kan zir theih? (b) Lota hun laia thilthleng aṭang hian eng nge kan zir theih?
11 Bible-ah hian ngaihven renga awm tûra min ṭanpui thei vaukhânna târ chhuah tam tak a awm a. Nova hun laia thilthleng kha ngaihtuah teh. A thlen hma daih aṭang tawhin, Pathian chuan vaukhânna a pêktîr a. Mahse, Nova leh a chhûngte bâk chuan engmah an hre duh lo. (2 Petera 2:5) He mi chungchângah hian, Isua chuan: “Nova dam lai ang bawk kha Mihring Fapa lo kal lehna chu a ni ang. Chûng nî tuilêt hmate chuan Nova lawnga a luh nî thlengin an eiin an bâr a, nupui pasal an innei ṭhîn; tui a lo lêt a, an zaa a lâk bo vek hma loh chuan engmah an hre [duh] lo va; Mihring Fapa lo kal lehna chu chutiang bawk a ni ang,” tiin a sawi a ni. (Matthaia 24:37-39) Chu mi aṭang chuan eng nge kan zir theih? Kan zînga tupawhin thil pângngai—kan nuna kan thiltih ṭhinte pawh—hi Pathianin dah hmasa tûra min fuih, thlarau lam thiltihte kan luahlantîr a nih chuan, kan dinhmun ngun taka kan ngaihtuah a ngai ang.—Rom 14:17.
12 Lota hun lai pawh kha ngaihtuah bawk teh. Lota leh a chhûngte awmna Sodom khawpui chu sum leh pai lamah hausa viau mah se, an nungchang a tlachhe hle a. Jehova chuan chu mi hmun tichhe tûrin a vântirhkoh a tîr a. Vântirhkohte chuan Lota leh a chhûngkua chu Sodom khua ata tlânchhiaa, hnung lam hawikîr hauh lo tûrin an hrilh a ni. Vântirhkohte’n an fuih avângin khawpui chu an chhuahsan ta ngei a. Mahse, Lota nupui chuan Sodoma an in leh lo chu a ngaihtuah reng a. Thuawih lo takin a hawi kîr a, a nun a chân phah ta a ni. (Genesis 19:15-26) Isua chuan kan nakin hun atâna min vaukhânin: “Lota nupui hre reng rawh u,” a ti. Chu vaukhânna ang chuan chêt kan thawh em le?—Luka 17:32.
13 Pathian vaukhânna ngaithlatute chu zuah an ni a. Chu chu Nova leh a chhûngte, leh Lota leh a fanute chungchângah a thleng dik a ni. (2 Petera 2:9) Hênga vaukhânna thute kan ngaihtuah hian, felna ngainatute tâna chhanchhuahna thu awmte hian min tichak bawk a ni. Chu chuan Pathian thutiam “vân tharte leh lei thar, a chhûnga felna awmte” a lo thleng ngei dâwn tih beiseina min neihtîr tlat a ni.—2 Petera 3:13.
‘Rorêl Hun A Lo Thleng Ta’!
14, 15. (a) Eng nge rorêl “hun” chuan a huam tel? (b) ‘Pathian hlauhna leh chawimawinaah’ chuan eng nge tel?
14 Ngaihven renga kan awm hian, eng nge kan beisei theih? Thu Puan bu hian a intahtawl zêla Pathian thiltum a thlen famkim dân a sawi lang a. Inring renga awm tûr chuan chu a thil sawite mila chêt lâk chu a pawimawh êm êm a ni. Hrilh lâwkna chuan “Lalpa nî,” kum 1914-a Krista lala ṭhuttîr a nih aṭanga inṭana thilthleng tûr chungchâng fiah takin a sawi a. (Thu Puan 1:10) Thu Puan chuan ‘tlângaupui tûr chatuana Chanchin Ṭha’ nei vântirhkoh chungchâng min hrilh a ni. Ani chuan aw ring takin: “A rorêl hun chu a lo thlen tâk avângin Pathian chu hlau ula, chawimawi rawh u,” tiin a puang a. (Thu Puan 14:6, 7) Chu rorêlna “hun” chu rei lo te chhûng a ni; chutah chuan he hrilh lâwknaa târ lan Pathian rorêlna puan chhuahna leh a taka rorêlna a tel ve ve a. Tûnah hian chu mi hunah chuan kan awm mêk a ni.
15 Tûn hun, rorêl hun a ral hma ngei hian: Thufingte 8:13) Pathian kan chawimawi chuan, zahna thûk tak nên a thu kan ngaithla ang. A Thu, Bible chhiar ziah tûrin kan buai lutuk lo vang. Kristian inkhâwma tel tûra a fuihna chu kan ngaihnêpsak lo vang. (Hebrai 10:24, 25) Pathian Messia Lalram chanchin ṭha puan chhuah theihna chanvo hlu tak kan neih chu kan ngaihluin, phûr takin kan puang chhuak bawk ang. Englai pawhin, kan thinlung zawng zawngin Jehova chu kan ring tlat ang. (Sâm 62:8) Jehova chu lei leh vâna lalchungnungber a ni tih hriain, amah chu kan nuna lalchungnungber anga duh taka intukluhna hmangin kan chawimawi a ni. Pathian chu i hlau tak zetin, hêng kawng zawng zawng hmang hian i chawimawi em?
“Pathian chu hlau ula, chawimawi rawh u,” tia fuih kan ni. Hei hian eng nge a kaihhnawih le? Pathian hlauhna ṭha chuan thil sual min hawisantîr tûr a ni. (16. Engvângin nge Thu Puan 14:8-a sawi Babulon Khaw Ropui chunga rorêlna chu a thleng famkim tawh kan tih theih?
16 Thu Puan bung 14 chuan rorêl huna thleng tûr thil dang pawh a sawi belh a. Babulon Khaw Ropui, khawvêl sakhaw dik lo lalram chu sawi hmasak a ni: “Vântirhkoh dang a pahnihna chuan, ‘Babulon khaw ropui . . . chu a tlâwm ta, a tlâwm ta,’ tiin a rawn zui a,” tiin. (Thu Puan 14:8) Ni e, Pathian thlîrna aṭang chuan, Babulon Khaw Ropui chu a tlâwm der tawh a ni. Kum 1919 khân, Jehova chhiahhlawh hriak thihte chu kum sâng têl chhûng mite leh ramte lo awpbettu Babulon thurinte leh thiltihte aṭang chuan an zalên tawh a ni. (Thu Puan 17:1, 15) Chuta ṭang chuan biakna dik chawisâng tûrin an inpe thei tawh a. Khawvêl pum huapa Pathian Lalram chanchin ṭha hrilhna chu neih ṭan a lo ni ta a ni.—Matthaia 24:14.
17. Babulon Khaw Ropui aṭanga chhuahnaah chuan engte nge tel?
17 Babulon Khaw Ropui chunga Pathian rorêlna chu heti mai hi a ni lo. Tihboral hlenna chu a lo thleng thuai dâwn. (Thu Puan 18:21) Chhan ṭha tak avângin, Bible chuan hmun tina awm mite chu: “A sualnaahte in tel lohna . . . tûrin, [Babulon Khaw Ropui] chhûng ata chhuak rawh u,” tiin a fuih a ni. (Thu Puan 18:4, 5) Engtin nge Babulon Khaw Ropui ata chu kan chhuah? Hei hian biakna dik lo nêna inzawmna engpawh tihtâwp aia tam a huam a ni. Babulon Khaw Ropui chuan kût leh thil chîn lâr tak takte, khawvêl mipat hmeichhiatna lama rilru pawlawh takte, thlarau zâwlna telna nun dân leh intihhlimnate, leh thil dang dangte a thunun tel a ni. Ngaihven renga awm tûr chuan, kan chêtzia leh kan thinlung duhzâwngahte pawh hian, kawng engkima Babulon Khaw Ropui laka kan inlâk hranzia kan lantîr a pawimawh a ni.
18. Thu Puan 14:9, 10-a sawite ngaihtuahin, Kristian harhfîmte’n eng nge pumpelh tûra an fîmkhur?
18 Thu Puan 14:9, 10-ah chuan, “rorêl hun” chungchâng thil dang sawi a ni a. Vântirhkoh dang chuan: “Tupawhin sakawlh leh a lem chibai bûkin an chalah emaw an kutah emaw chhinchhiahna an neih chuan, chu mite ngei chuan Pathian thinurna uain, . . . chu an in ang,” tiin a sawi a ni. Engvângin nge? “Sakawlh leh a lem” chuan Jehova lalchungnunna pawm duh lo mihring rorêlna a entîr vâng a ni. Kristian harhfîm renga awmte chuan an rilru put hmang emaw, an thiltih emaw hmanga Pathian dik, Jehova lalchungnunna sâng ber pawm duhlotute bâwih anga awm emaw, chhinchhiah emaw ni lo tûrin an fîmkhur a ni. Kristiante chuan Pathian Lalram chu vânah din a ni reng tawh a, chu chuan mihring rorêlna zawng zawng hi a titâwp vekin, Lalram chu kumkhuain a ding reng dâwn tih an hria a ni.—Daniela 2:44.
A Hmanhmawhthlâkzia I Hriatna Hloh Suh!
19, 20. (a) Ni hnuhnûnga tâwpna kan hnaih tial tial hian, Setana’n eng tih nge a tum dâwn tih kan chian theih? (b) Eng nge tih kan tum tlat ang?
19 Ni hnuhnûnga tâwpna kan hnaih tial tial hian, nêksâwrna leh thlêmnate chu a zual zêl dâwn a. He hun hluia kan la awm chhûng leh kan ṭhat famkim hma loh chuan hrisêl lohna te, tarna te, lusûnna te, rilru natna te, Pathian Thu kan hrilhnaa min ngaihsak lotute avânga lunghnualna te, leh thil dang dangte chu kan tuar a ni. Setana chuan nêksâwrna kan tawrhte chu thuhrilhna min bânsantîr nân emaw, Pathian tehnate mila kan nun tawh loh nân emawa hman chu a duh hle tih theihnghilh ngai suh. (Ephesi 6:11-13) Kan hun ngaihtuah hian, tûn hi a hmanhmawhthlâkzia hloh hun a ni lo!
20 Isua chuan tlâwm tûrin nêksâwrna nasa tak kan tâwk dâwn tih hriain: “Ngaihven rawh u, engniah nge in Lalpa a lo kal dâwn in hre si lo,” tiin min zilh a ni. (Matthaia 24:42) Chuti a nih chuan, kan awmna hun hmâwr tawhzia i hre reng ang u. Min tichau thei leh min bânsantîr thei Setana thangte lakah chuan i invêng tlat ang u. Pathian Lalram chanchin ṭha chu ṭhahnemngaihna leh tumruhna nasa lehzual nêna hrilh i tum tlat bawk ang u. A ni, Isua vaukhânna: ‘Ngaihven reng rawh u,’ tih chu zâwmin, a hmanhmawhthlâkzia kan hriatna chu i vawng zêl ang u. Chutianga kan tih chuan, Jehova kan chawimawi ang a, a chatuan malsâwmna dawng tûrte zîngah kan tel ve thei ang. (w05 10/1)
Engtin Nge I Chhân Ang?
• Isua vaukhânna thu ‘ngaihven reng rawh u’ tih chu Kristian dikte tân a ni tih engtin nge kan hriat?
• Bible entîrna engte’n nge ‘ngaihven reng’ tûra min ṭanpui thei?
• Eng nge rorêl hun chu ni a, chu hun a tâwp hmain eng ti tûra fuih nge kan nih?
[Zirlai Atâna Zawhnate]
[Phêk 24-naa milem]
Babulon Khaw Ropui tihchhiatna a hnai
[Phêk 25-naa milemte]
Ṭhahnemngaihna leh tumruhna nasa lehzual nêna thu hrilh chu i tum tlat ang u