‘Pathian Lamah I Hausa’ Em?

ISUA Krista sawi ngaihtuahna chawk tho thei tehkhin thu tam takte zîngah chuan ram neitu mi hausa chungchâng a tel a. A nakin hun atâna a dinhmun sawh ngheh nân, ram neitu chuan buh in lian zâwk sak a tum a. Mahse, Isua tehkhin thuah chuan chu pa chu “mi â,” tia koh a ni. (Luka 12:16-​21) Engvângin nge chutianga a chungthu rêl a nih?

A lan dânah chuan, he mi hausa pa thil tumah hian Pathian a tel lo niin a lang a; thlai a thar ṭhatna lah Pathian ṭanpuina vâng niin a sawi bawk hek lo. (Matthaia 5:​45) Chu ai mahin: “Thlarau, kum tam tak chhûng atân sum tam tak i khâwl hi; châwl la, eiin bâr la, hlim takin awm rawh,” tiin a chapo zâwk a ni. Ni e, a thawh rimna rah chhuah chuan “kulh pui” angin a vên a ring tlat a ni.​—⁠Thufingte 18:11.

Chutiang chapona rilru laka vaukhânin, zirtîr Jakoba chuan: “Tûnah ngai teh u khai, nangni, ‘Vawiinah emaw, naktûkah emaw, chu mi khawpuiah chuan kan kal ang a, chutah chuan kum khat kan va thang ang a, kan sum dâwng ang a, hlâwkna kan hmu ang,’ titute u. Naktûkah chuan engnge lo awm dawn in hre si lo. In nunna chu eng nge ni? Chhûm rei lo tê lo lang a, ral leh ta mai ṭhîn ang hi in ni si a,” tiin a ziak a ni.​—⁠Jakoba 4:​13, 14.

Hêng thute ang ngei hian, Isua tehkhin thua mi hausa pa chu: “Mi â, zâninah hian i thlarau an lâksak dâwn che a ni; i thil dehchhuahte kha tu ta nge ni ta ang le?” tia hrilh a ni. Mi hausa pa chu chhûm ral leh ta mai ṭhîn ang hian, a suangtuahna a thlen famkim hmain a thi dâwn a ni. A zirtîr kan hre thiam em? Isua chuan: “Mahni tâna sum khâwla Pathian lama ngah si lo chu, chuti chu a ni ṭhîn,” tiin a sawi a ni. ‘Pathian lamah i hausa’ em? (w05 10/1)