Jehova Chu Min Vêngtu A Ni

“LALPA chu mi vêngtu a ni a; ka tlachham lo vang.”​—⁠SAM 23:⁠1.

1-3. Engvângin nge Davida’n Jehova chu berâm vêngtu nêna a tehkhin chu thil mak a nih loh?

JEHOVA’N a mite a ngaihsak dân sawi tûra tih ni ta la, eng nge i sawi ang? A chhiahhlawh rinawmte duat taka a enkawlna chu eng nên nge i tehkhin ang? Kum 3,000 chuang liam taah khân, fakna hla phuahtu lal Davida chuan a naupan laia a hnathawh chu tehkhin thu atâna hmangin, Jehova chungchâng mawi takin a phuah a ni.

² A tleirâwl laiin, Davida chu berâm vêngtu a ni a, chuvângin, berâmte enkawl dân chu a hria a ni. Ani chuan berâmte anmahnia tlattîr an nih chuan, awlsam têa kal bovin, suam hmang emaw, sakawlh emaw kut an tuar ṭhîn tih chu a hre chiang hle a. (1 Samuela 17:​34-36) Duat taka vêngtu an awm loh chuan, berâmte chuan tlatna hmun leh chaw khamkhawp tûr an hmu lo thei a ni. A upat lamah chuan, Davida chuan rinhlelh rual lohvin berâm hruai nân te, vênhim nân te, leh chaw pêk nân tea a hun hman tam takte chu hlim takin a ngaihtuah lêt leh ngei ang.

³ Jehova’n a mite ngaihsakzia târ lang tûra a thâwk khum khân Davida rilrua berâm vêngtu hnathawh a lo lang hi thil mak a ni lo. Davida ziah Sâm 23-na chu: “LALPA chu mi vêngtu a ni a; ka tlachham lo vang,” tih thuin a inṭan a ni. He thu hi inhmeh tak a nih chhan i lo ngaihtuah ang u. Tichuan, Sâm 23-na ṭanpuinain, berâm vêngtuin a berâm a ngaihsak anga Jehova’n amah chibai bûktute a ngaihsak dân chu kan hmu ang.​—⁠1 Petera 2:25.

Tehkhinna Inhmeh Tak

4, 5. Engtin nge Bible-in berâmte nunphung chu a târ lan?

⁴ Bible chuan Jehova chu nihna chi hrang hrangin a ko va; mahse, berâm “Vêngtu” tia koh chu a duhawm ber zînga mi a ni. (Sâm 80:⁠1) Jehova  chu berâm Vêngtu tia inhmeh taka koh a nih chhan hre thiam lehzual tûrin, kan tân thil pahnih hriat chu a ṭangkai a: pakhatna, berâmte nunphung leh pahnihna, berâm vêngtu ṭha miziate leh hna thawhte chu.

⁵ Bible chuan berâmte nunphung chu, an pu duatna chhâng lêt thuai ang te (2 Samuela 12:⁠3), nunnêm tak ang te (Isaia 53:⁠7), leh humtu nei lo ang tein a târ lang a ni. (Mika 5:⁠8) Kum tam tak berâm enkawltu, ziaktu pakhat chuan: “Ṭhenkhatin an rin angin ‘berâmte chu mahniin an inenkawl thei hlawl lo.’ Ran vulh dangte aiin ngaihsak reng leh fîmkhur taka enkawl chu an mamawh a ni,” a ti. Hêng ran ṭanpui ngaite hian an dam khawchhuah nân duat taka vêngtu an mamawh a ni.​—⁠Ezekiela 34:⁠5.

6. Engtin nge Bible dictionary pakhatin hmân lai berâm vêngtuin nî a hman dân a sawi?

⁶ Hman laia berâm vêngtu chuan engtin nge a nî a hman ṭhin? Bible dictionary pakhat chuan: “Zîng hma takah berâm rual chu a huang aṭanga hruai chhuakin, an tlatna tûr hmun lama kalpuiin hma a hruai a. Chutah chuan nilênga vêngin pakhat mah kal bo lo tûrin a enkawl a, rei lo tê a en loh hlâna kalbo an awm chuan, a hmuh leh hma loh zawng taima taka zawngin a hruaikîr leh a ni. . . . Zânah berâm rualte chu an huangah a hawpui a, kawngkaa an luhin pakhat mah kim lo an awm loh nân a chhiar a. . . . A châng chuan ram sakawlhin a seh loh nân, a nih loh leh rûkrute’n an rûk bo loh nân berâm huang chu zân khuaa a vênhim a ngai a ni,” tiin a sawi. *

7. Engvângin nge berâm vêngtu tân dawhtheihna lantîr leh duatna neih belh a ṭûl ṭhin?

⁷ A bîk takin berâmpui no pai leh a notête chuan dawhthei tak leh duat taka enkawl an ngaih hun a awm a. (Genesis 33:13) Bible hrilhfiahna pakhat chuan: “Berâmte chuan tlâng ram hla takah no an hring ṭhîn a. A vêngtu chuan berâmpuiin no a neih chhûng chu ṭha taka vênghimin, berâm no chu pawmin berâm rual zîngah a hruai ṭhîn a ni. A notê a kal theih hma ni engemaw zât chu pawmin emaw, a kawr chung thâwlah dahin emaw a kalpui ṭhîn. (Isaia 40:​10, 11) Chiang takin, berâm vêngtu ṭha chuan chakna leh nunnêmna mizia a mamawh ve ve a ni.

8. Davida’n Jehova a rinngam chhan engte nge a târ lan?

⁸ “LALPA chu mi vêngtu a ni a”​—⁠hei hi kan Pa vâna mi nihna sawi nân a inhmeh hle lo maw? Sâm 23-na kan bihchian hian, Pathianin berâm vêngtu chakna leh duatna nêna min ngaihsak dân chu kan hmu ang. Châng 1-naah Davida chuan Pathianin A berâmte “tlachham lo” tûrin an mamawh zawng zawng a pe ang tih a rinzia a sawi a ni. A dawtah chuan, Davida’n he a rinngam chhan pathum: Jehova’n A berâmte a hruaina, a vênhimna, leh a châwmna te chu a târ lang a ni. Hêngte hi a mal malin lo bih chiang ta ila.

“Mi Hruai Ṭhîn”

9. Eng hmun râlmuang tak nge Davida’n a târ lan a, engtin nge berâmte chu chutiang hmunah an lo awm theih?

⁹ A hmasain, Jehova’n a mite a hruai a ni. Davida’n: “Ani chuan hlobet hring dup hmunahte mi bawhtîr ṭhîn a: chawlhna tui kamahte mi hruai ṭhîn. Ka nunna hi mi siam ṭhat ṭhîn a, ama hming avângin felna kawngahte mi hruai ṭhîn,” tiin a ziak a. (Sâm 23:​2, 3) Berâm rual chu râlmuang takin hlobet hring dup hmunah an bawk a​—⁠Davida chuan hêng thute hmangin lungawina te, chawlhhahdamna te, leh himna te chu a târ lang  a ni. Hebrai thu mal, ‘hlobet hring dup hmun’ tia lehlin chu “hmun nuam tak” tihna a ni thei a. Berâmte chuan anmahni ngawt chuan hmun râlmuang tak, an chawlhhahdamna tûr hmun chu an zawng hmu dâwn lo niin a lang. Anmahni vêngtu chuan chutiang ‘hmun nuam takah’ chuan a hruai a ngai a ni.

10. Engtin nge Pathianin keimahni min rinzia a târ lan?

¹⁰ Engtin nge Jehova’n tûn laiah min hruai? Min hruai dân kawng khat chu entawn tûr siamna hmangin a ni. A Thu chuan “Pathian awm dân latute ni” tûrin min fuih. (Ephesi 5:⁠1) He thute târ lanna bulvêlah hian lainatna te, ngaihdamna te, leh hmangaihna te chu sawi lan a ni. (Ephesi 4:32; 5:⁠2) Chiang takin, Jehova chuan chûng mize duhawm takte lantîrna kawngah chuan entawn tûr ṭha ber a siam a. Amah entawn tûra min ti hi a âwm lo viau em? Awm lo lo ve. A dik a dik chuan, chu thâwk khum fuihna thu chu keimahni min rinzia a târ lanna ropui tak a ni. Eng kawngin nge? Pathian anpuia siam kan ni a, chu chu nungchang ṭhatna leh thlarau lam thilte ngaihtuah theihna pêk kan ni tihna a ni. (Genesis 1:26) Chuvângin, Jehova chuan kan famkim lo chung pawhin, a mizia angte kan nei thei tih a hria a ni. Han ngaihtuah teh​—⁠hmangaihna nei kan Pathian chuan amah kan ang thei tih a ring a nih chu. A entawn tûr siam kan zui chuan, ‘hmun nuam takah’ min hruai dâwn a tih theih a ni. Tharum thawhna he khawvêl kârah hian, Pathian pawm nia inhriatna aṭanga lo awm thlamuanna chu neiin ‘him takin kan awm’ ang.​—⁠Sâm 4:8; 29:11.

11. A berâmte a hruainaah, Jehova’n eng nge a ngaihtuah a, chu chu a thil min phûtah hian engtin nge a lan?

¹¹ Min hruainaah hian, Jehova chuan min duatin kan chungah a dawhthei hle a. Berâm vêngtu chuan a berâmte tlin tâwk a ngaihtuah a, ‘ran kal theih tâwk ang zêlin’ a hruai a ni. (Genesis 33:14) Chutiang bawkin, Jehova’n a berâmte chu an ‘kal theih tâwk ang zêlin’ a hruai a ni. Kan theihnate leh kan dinhmunte chu a ngaihtuah tel a. Dik takin, kan kal theih tâwk anga amah insiamremin, kan pêk theih aia tam min phût ngai lo. Kan hnên aṭanga a thil phût chu thinlung zawng zawnga kan tih hi a ni. (Kolossa 3:​23, 24) Mahse, i lo tarin, tûn hmaa i tih angin ti thei tawh lo ta la, engtin nge ni ang? A nih loh leh natna khirh tak avângin i duh ang tâwkin thawk thei lo ta la? Tah tak chuan thinlung zawng zawnga ti tûra min phûtna duhawmzia chu a lo lang a ni. Mi pahnih chu an inang chiah chiah thei lo va. Thinlung zawng zawnga rawngbâwl tih chu Pathian rawng i bâwlnaa theihtâwp chhuaha i chakna leh thahrui zawng zawng hmang tihna a ni. Natnain min tlâkbuak mah se, Jehova’n tih tak zeta chibai kan bûkna chu a hlut a ni.​—⁠Marka 12:​29, 30.

12. Mosia Dân-a eng hian nge Jehova’n a berâmte chu an ‘kal theih tâwk ang zêlin’ a hruai tih târ lang?

¹² Jehova’n a berâmte chu an ‘kal theih tâwk ang zêla’ a hruai dân entîr nân, Mosia Dân-a bawhchhiat thawina thilhlan chungchâng hi han ngaihtuah teh. Jehova’n lâwmna thinlung aṭanga pêk thilhlan ṭhate chu a duh a. Chutih rualin, thilhlante chu a hlântu theih dân ang zêla ṭhen hran a ni. Dân chuan: “A neihin berâm no a tlin loh chuan . . . ṭhuro pahnih emaw pârva no pahnih emaw a rawn keng tûr a ni,” a ti a. A neihin pârva no pahnih tlin lo ta se? Chutiang a nih chuan “chhangphut dip” a rawn keng thei a ni. (Leviticus 5:​7, 11) Hei hian Pathianin a hlântu tlin loh chu a phût lo tih a târ lang a. Pathian chu a inthlâk danglam loh avângin, kan pêk theih aia  tam min phût ngai lo tih hriatnaah chuan thlamuanna kan hmu thei a; kan pêk theih tâwkah a lâwm zâwk a ni. (Malakia 3:⁠6) Mi hre thiam tak berâm Vêngtu hnuaia awm chu a va nuam tak êm!

“Thil Ṭha Lo Rêng Rêng Ka Hlau Lo Vang; Nang Ka Hnênah I Awm Si A”

13. Sâm 23:​4-ah, engtin nge Davida’n nêl lehzuala thu a sawi a, engvângin nge chu chu a mak loh?

¹³ Davida chuan Pathian a rinngam chhan pahnihna a pe: Jehova chuan a berâmte a vênghim, tiin. Heti hian kan chhiar: “A ni, thihna hlim kawr ruam zawh mah ila, thil ṭha lo rêng rêng ka hlau lo vang; nang ka hnênah i awm si a.” (Sâm 23:⁠4) Tûnah chuan Davida chuan Jehova chu “ani,” tih hmang tawh lova “nang” tih hmangin, nêl takin a ko va. Hei hi thil mak a ni lo, Davida chuan harsatna tuar chhuak tûra Pathianin a ṭanpui dân a sawi vâng a ni. Ani chuan thihna hlim kawr ruam​—⁠a nunna ngei pawh dinhmun hlauhawma awm hun tam tak a pal tlang a. Mahse, hlauhnain a thunun tlat lo, Pathian chu​—⁠a ṭûl huna ṭanpui tûrin “talhtum” leh “tiangin” a inring reng tih a hriat avângin. Chutianga vênhim a nihzia a inhriatna chuan a thlamuanin, rinhlelh rual lohvin, Jehova a hnaih zualtîr a ni. *

14. Jehova vênhimna chungchângah Bible-in eng tiamkamna nge min pêk a; mahse, eng tihna nge a nih loh?

¹⁴ Engtin nge tûn laiah Jehova’n a berâmte a vênhim? Lei aṭanga a berâmte nuaibo tûrin dodâltu tumah​—⁠ramhuaite emaw, mihringte emaw pawh ni se​—⁠an hlawhtling ngai dâwn lo tih Bible chuan a tiam a. Jehova chuan chu mi chu a thlen a phal ngai lo vang. (Isaia 54:17; 2 Petera 2:⁠9) Amaherawhchu, min Vêngtuin chhiatna zawng zawng lakah min vênghim dâwn tihna erawh a ni lo. Mihringte harsatna tawn ṭhinte chu kan tâwk ve a, Kristian dik zawng zawng chunga thleng tihduhdahna chu kan tâwk bawk. (2 Timothea 3:12; Jakoba 1:⁠2, 3) “Thihna hlim kawr ruam zawh” anga sawi theih hun kan tâwk thei a ni. Entîr nân, tihduhdahna vâng emaw, hrisêlna lama harsatna vâng emawin kan thi ṭhelh pawh a ni thei a. A nih loh leh kan hmangaih tuemaw chu a thi ṭêp emaw, a thi emaw hial pawh a ni thei bawk. Hun thim tak anga langah hian min Vêngtu chu kan hnênah a awmin, ani chuan min vêng reng ang. Engtin nge?

15, 16. (a) Eng kawngtein nge Jehova’n kan tawn theih harsatnate hmachhawn thei tûra min ṭanpui? (b) Jehova’n fiahna kan tawh laia min ṭanpui dân târ langtu thiltawn pakhat sawi rawh.

¹⁵ Jehova chuan thilmak tihna hmanga inrawlh tûrin min tiam lo. * Mahse, hei hi kan chiang thei a ni: Harsatna kan tawh engpawh hmachhawn thei tûrin Jehova chuan min ṭanpui ang tih chu. Ani chuan “thlêmna tinrêng” tuar thei tûrin finna min pe thei a ni. (Jakoba 1:​2-5) Berâm vêngtu chuan a talhtum emaw, a tiang emaw chu berâm seh tumtu sa dangte hnawh bo nân chauh ni lovin, berâmte kawng dika kal tûra zawi têa nawr nân pawh a hmang a ni. Kan dinhmun nasa taka thlâkthleng thei tûr Bible ṭanchhan zilhna nunpui tûrin, Jehova chuan kan chibai bûkpuite chu hmangin, ‘zawi têin min nawr’ thei a. Chu bâkah, Jehova chuan chhel tûrin chakna min pe thei bawk a ni. (Philippi 4:13) Ani chuan a thlarau thianghlim hmangin, ‘thiltihtheihna nasa takin’ min thuam thei a. (2 Korinth 4:⁠7) Chu Pathian thlarau chuan kan chunga Setana’n a thlentîr theih fiahna engpawh min tawrh chhuahtîr thei a ni. (1 Korinth 10:13) Jehova’n englai pawhin min ṭanpui a peih reng tih hriat chu a thlamuanthlâk hle a ni lâwm ni?

¹⁶ Ni e, eng ang thihna kawr ruam thimah  pawh ding mah ila, mahni chauhva kan pal tlang a ngai lo. Min Vêngtu chu kan hnênah a awm a, atîra kan hriat thiam chiah loh kawngtein min ṭanpui a ni. Thluaka thil chawr awm (brain tumor) natnain a tlâkbuak Kristian upa thiltawn hi han ngaihtuah teh. “Atîr chuan ka chungah Jehova a thinrim emaw, min hmangaih lo emaw ni tein ka ngaihtuah hial a. Mahse, Jehova kalsan loh chu kan tum tlat a. A hnênah ka lungngaihna chu ka thlen zâwk mah a ni. Tichuan, Jehova chuan min ṭanpuiin, ka Kristian unaute kal tlangin mi thlamuan fo va. Tam tak chuan natna khirh tak anmahni ngeia an tawrhte aṭangin thu ṭangkai tak takte chu min hrilh a. An thusawi inbûk tâwk takte chuan ka tawrh hi thil pângngai lo a ni bîk lo tih min hriatchhuahtîr a ni. Lainat taka thu min fahna pawh tiamin, ṭanpuina ṭangkai tak tak min pêkte chuan, Jehova chu ka chungah a lâwm lo lo tih min hriat chiantîr a ni. Ka natna chu ka do zawm zêl a la ngai ang a, engtin nge ka awm dâwn ka hre lo. Mahse, Jehova chu ka hnênah a awm a, he fiahna ka tawrh chhûng hian min ṭanpui zêl dâwn tih kan ringnghet tlat a ni.”

“Ka Hmâah Hian Dawhkân I Buatsaih Ṭhîn”

17. Engtin nge Davida’n Sâm 23:​5-ah Jehova chu a târ lan a; engvângin nge chu chu berâm vêngtu tehkhin thu nêna a inkalh loh?

¹⁷ Tûnah Davida chuan amah Vêngtu a rinngam chhan a pathumna chu a târ lang: Jehova’n a berâmte hnianghnâr takin a châwm a ni, tih chu. Davida chuan: “Mi dotute mit hmuhah ka hmâah hian dawhkân i buatsaih ṭhîn a: ka lû hi hriak i thih tawh a, ka novah hian a liam reng a,” tiin a ziak a ni. (Sâm 23:⁠5) He mi chângah hian, Davida chuan amah Vêngtu chu mikhual thlengtu thil phal tak, ei leh in tûr hnianghnâr taka hluitu angin a sawi a ni. Tehkhin thu pahnih​—⁠berâmte duat taka vêngtu leh mikhual thlengtu thil phal tak​—⁠hi a inkalh lo. Tihah chuan, berâm vêngtu ṭha chuan a berâmte “tlachham lo” tûrin ran tlatna hmun ṭha leh tui in tûr tamna hmun chu a hriat a ngai si a.​—⁠Sâm 23:​1, 2.

18. Engin nge Jehova chu mikhual thlengtu thil phal tak a nihzia târ lang?

¹⁸ Min Vêngtu hi mikhual thlengtu thil phal tak a ni bawk em? Tehrêng mai! Tûna kan chen mêk thlarau lam chaw a tam lam te, a ṭhat lam te, leh chi hrang hrang a tam lam te hi han ngaihtuah teh. Jehova chuan bâwih rinawm leh fing tak pâwl kal tlangin thu leh hla chhuah ṭangkai tak tak leh inkâwmnaah te, inkhâwmpuinaah te chuan thusawi ṭha tak takte min pe a​—⁠hêng zawng zawngte hian kan thlarau lam mamawh a phuhru a ni. (Matthaia 24:​45-47) Thlarau lam chaw khawp kham lohna a awm lo rêng rêng a. “Bawi rinawm, fing tak” chuan Bible leh Bible zirna ṭanpuitu lehkhabute chu maktaduai têlin an chhuah a, chûng thu leh hla chhuahte chu tûnah ṭawng 413-a hmuh theih a ni. Jehova chuan he thlarau lam chaw hi chi tam tak​—⁠“hnute,” Bible zirtîrna thu bulte aṭangin, “chaw rum,” thlarau lam hriatna thûk zâwk thlengin a pe chhuak a ni. (Hebrai 5:​11-14) Chuvângin, buaina kan tawh emaw, thu tlûkna kan siam emaw dâwn hian kan mamawh tak thu chu kan hmu thei ṭhîn. Chûng thlarau lam chawte tel lo chuan khawiah nge kan awm theih ang? Mi Vêngtu chu mi thil phal ber a va ni tak êm!​—⁠Isaia 25:6; 65:13.

‘LALPA Inah Ka Awm Ang’

19, 20. (a) Sâm 23:​6-ah Davida’n eng rinngamna nge a sawi chhuah a, chu rinngamna chu engtin nge kan neih ve theih ang? (b) A dawta thuziakah hian eng nge kan sawiho vang?

¹⁹ Amah Vêngtu leh Châwmtu thiltih dân kawngte a ngaihtuah hnuah, Davida chuan: “Matheilovin ṭhatna leh ngilneihnain ka dam chhûng zawng hian mi zui zêl ang a: tichuan  LALPA inah kumkhuain ka awm reng ang,” tiin a titâwp a. (Sâm 23:⁠6) Davida chuan lâwmna leh rinnaa khat thinlung​—⁠thil kal tawhte ngaihtuah lêtna aṭanga lâwmna leh nakin hun tûr thlîrna aṭanga rinna nei thinlung​—⁠aṭangin a sawi a ni. He berâm vêngtu lo ni tawh ṭhîn Davida hian amah Vêngtu vâna mi chu A ina awm ang maia a hnaih phawt chuan, Jehova ngaihsakna duhawm tak dawngtu a ni reng dâwn tih a hriatnaah a him a ni.

²⁰ Sâm 23-naa hêng thu chhinchhiah mawi takte avâng hian kan va lâwm tak êm! Davida chuan Jehova’n a berâmte a hruai dân, a vênhim dân, leh a chhawmdâwl dânte târ lan theih dân tûr ṭha zâwk a hmu lo vang. Keini pawhin Jehova chu min Vêngtu angin kan nei thei tih rinngamna min pe tûrin, Davida thusawi duhawm takte hi vawn ṭhat a ni. Ni e, Jehova kan hnaih phawt chuan, ani chuan Vêngtu hmangaihna ngah tak angin, min ngaihsak “reng” ang, chatuan thleng pawhin. Amaherawhchu, a berâmte kan nih angin, min Vêngtu ropui, Jehova nêna lêng dûn tûrin mawhphurhna kan nei a. Chuta thil telte chu a dawta thuziakah sawi a ni ang. (w05 11/1)

[Footnote-te]

I Hre Chhuak Em?

• Davida’n Jehova chu berâm vêngtu nêna a tehkhin chu engvângin nge a inhmeh?

• Engtin nge Jehova’n hriatthiamna nêna min hruai?

• Eng kawngtein nge Jehova’n fiahnate laka chhel tûra min ṭanpui?

• Engin nge Jehova chu mikhual thlengtu thil phal tak a nihzia târ lang?

[Zirlai Atâna Zawhnate]

[Phêk 24-naa milem]

Israel rama berâm vêngtu angin, Jehova’n A berâmte a hruai