Khawvêl Thlâk Danglam Tak Tak Thei An Awm Em?

“Mi retheite’n thil dang zawng aiin remna leh himna​—⁠chu mi dawtah an nun tihchangkân zâwkna hun remchâng an duh thu min hrilh a. An thawhrimnate chu ram hausa leh company hausate luahlan a nih loh nân ram chhûng leh khawvêl puma kalhmang fel tak chu an duh a ni.”

HEI hi mi retheite beiseina leh duhthusâm chungchâng international relief agency-a director sawi dân a ni. A thusawi chuan khawvêla vânduaina leh rorêl dik lohna tuartu zawng zawngte thil duh chu a târ lang chiang hle. An vai hian remna leh himna dik tak awmna khawvêl chu an nghâkhlel ṭheuh a ni. Chutiang khawvêl chu a takin a thleng ngai ang em? Fel hlelhna khawvêl thlâk tûrin tuemaw tal hian thiltihtheihna leh chakna a nei tak zet em?

 Thlâkthleng Tûra Thawhrimna

Mi tam takin an tum chhin tawh a. Entîr nân, kum zabi 19-naa Sâpnu Florence Nightingale-i chuan dam lote tifai tûr leh lainat taka enkawl tûrin a nun a pe a. A hun lai​—⁠antiseptic leh antibiotic awm hmaa⁠—​inenkawl dân chu tûn laia mi ang hi a ni lo. Lehkhabu pakhat chuan chutih laia “nurse-te” chu “lehkha thiam lo, bâl, nungchang bawlhhlawhna leh zu ruih avânga a chhezâwnga hming thang an ni,” a ti. Florence Nightingale-i chuan khawvêla dam lo inenkawl dân thlâk thleng tûra a thawhrimnaah hlawhtlinna chhetê tal a nei em? Nei e. Chutiang bawkin, mahni hmasial lo leh mi ngaihsak tak chhiarsên lohte chuan kawng tam takah​—⁠tlêm tê han sawi ila, ziak leh chhiar thiamna te, zirna te, damdawi lam te, in leh lo te, leh ei leh bâr zawnna kawngahte​—⁠hlawhtlinna chungchuang an nei a. Chuvângin, mi chanhai leh rethei maktaduai têlte nun dân chuan nasa takin hma a sâwn a ni.

Chuti chung pawhin, chu harsatnate chu kan ngaihthah mai thei lo: Mi maktaduai za têlte chuan indona te, dân bawhchhiatna te, natna te, ṭâmna te leh thil thleng dang râpthlâk tak takte chu an la tuar reng tho a ni. Irish aid agency Concern chuan “Retheihnain nî tin mi 30,000-te nun a la,” a ti. Kum zabi engemaw zât aṭanga tihbo an tum sal neih pawh chu kan zîngah a la awm reng a ni. Sumdâwn nâna sal Atlantic tuipui kal tlanga an tawlh hun laia Africa aṭanga mi an rûk zawng zawng aiin tûn laiah sal an tam zâwk,” tiin Disposable People​—⁠New Slavery in the Global Economy chuan a târ lang.

Engin nge inthlâk thlengna pumhlum leh nghet nei tûra mite beihna chu tihlawhchham? Mi hausa leh thiltitheite challanna vâng em ni, nge thil dang vâng zâwk?

Inthlâkthlengna Dâltu

Pathian Thu-in a sawi angin, khawvêl fel tak awmtîr tûra mihringte beihna apiangte dâltu lian ber chu Diabol-Setana a ni. Tirhkoh Johana chuan “khawvêl pumhlûm hi mi sual thu thuin a awm” tih min hrilh a. (1 Johana 5:19) Dik takin, tûnah hian Setana chuan ‘khawvêl zawng zawng hi a bum’ a ni. (Thu Puan 12:⁠9) A thununna sual tak tih boral a nih hma chuan sualna leh rorêl dik lohna a awm reng ang. He dinhmun lungchhiatthlâk tak hi engvânga lo awm nge ni?

Kan nu leh pa hmasaber, Adama leh Evi chu mihring chhûngkua zawng zawngte tâna paradis in ṭha famkim ni tûra siam lei​—⁠khawvêl ‘ṭha êm êm’ chu pêk an ni a. (Genesis 1:31) Engin nge thil awm dân chu thlâk danglam? Setana’n a thlâk danglam a ni. Mipa leh hmeichhiate nun dân tûr rêlsak tûra Pathian dikna neih chu a cho va. Pathian rorêlna chu fel lo angin mei nei takin a sawi a ni. Adama leh Evi chu anmahnia a chhia leh a ṭha an rêl fel theih nân nun kawng zalên chu thlang tûrin a hmin a. (Genesis 3:​1-6) Hei hian felna leh rorêl dikna khawvêl siam tûra mihring thawhrimna dâltu pahnihna​—⁠sualna leh ṭhat famkim lohna chu a rah chhuak a ni.​—⁠Rom 5:12.

Engvângin Nge Phal A Nih?

‘Mahse, engvângin nge Pathianin sualna leh ṭhat famkim lohna pun zêl chu a phal?’ ‘Engvângin nge a thiltih theihna tâwpchin nei lo chu helna tihtâwp nâna hmanga, bul a ṭan ṭhat leh mai loh?’ tiin ṭhenkhat chuan an  zâwt mai thei a. Chu chu a tihvenna awlsam tak niin a lang mai thei. Amaherawhchu, thiltihtheihna hmanna chuan zawhna khûnkhân takte a siam chhuak a ni. Thiltihtheihna hman sualna chu mi retheite tâna tawrhhlelhawm leh khawvêl awpbehna bul ber a ni lâwm ni? Lal nunrâwng ṭhenkhatin, a ruahmanna kalhtute tibo tûra an thiltihtheihna an hman hian mi rilru dikte thinlungah zawhna a siam a ni lâwm ni?

Lal râwng tak, thiltihtheihna hmang khaw lotu A nih lohzia mi rilru dikte rin nghehtîr nân Pathian chuan Setana leh mihring helte’n a dânte leh thu bulte laka an inlâk hran chu​—⁠hun engemaw ti chhûng atân chauh⁠—​a phalsak a. Hun chuan Pathian rorêl dân chauh chu kawng dik awmchhun a ni tih a finfiah ang. Chu chuan kan chunga khapna engpawh a siam chu kan tâna ṭha tûr a ni tih a târ lang dâwn a ni. Dik takin, Pathian rorêlna laka helna rah chhuah lungchhiatthlâk tak chuan chu mi dikzia chu a hril dêr tawh a. Chûng chuan Pathianin a duh huna mi suaksual zawng zawng tihboral nâna a thiltihtheihna ropui tak hmang tûrin chhan ṭha tak a nei tih a finfiah tawh bawk. Chu chu a lo thleng thuai dâwn a ni.​—⁠Genesis 18:​23-32; Deuteronomy 32:4; Sâm 37:​9, 10, 38.

Pathian a chêt hma loh chuan, “rûm leh nauvei na tuarin” he kal hmang fel hlel takah hian kan tâng a. (Rom 8:22) Thil thlâkthleng tûra kan thiltih apiangah, Setana chu kan paih bo thei lo va, hrehawm kan tawrhna zawng zawng bul, ṭhat famkim lohna pawh kan ti reh thei hek lo. Adama hnên aṭanga sual kan rochun chu kan tihven theih piah lam thil a ni.​—⁠Sâm 49:7-9.

Isua Krista’n A Thlâk Danglam Hlen Ang

Hei hian dinhmun chu beisei bo ṭhak tihna a kâwk em? Kâwk hauh lo. Thlâk danglam hlenna thlen tûrin ṭawih thei mihring aia thiltithei zâwk daih tuemaw chu mawhphurhna pêk a ni a. Chu chu tunge? Isua Krista hi a ni. Bible chuan ani chu mihring chhûngkaw chhandamna Siamtu angin a sawi a ni.​—⁠Tirhkohte 5:31.

Ani chuan chêt thawh nâna Pathian ‘hun ruat’ chu tûnah a nghâk mêk a. (Thu Puan 11:18) Eng thil chiah nge a tih ang? ‘Engkim siamṭhat tûr thu Pathianin leilung pian tirh ata a zâwlnei thianghlim awmte kain a sawi tawh’ chu a rawn thlentîr ang. (Tirhkohte 3:21) Entîr nân, Isua chuan, “Pachhiain a auhvin ani chuan a chhanhim ang a, mi rethei, ṭanpuitu nei lo pawh chu, a chhanhim ang a. . . . An nunna chu hnehchhiahna leh nunrâwnna lak ata a tlan ang.” (Sâm 72:​12-16) Isua Krista kal tlangin, Pathian chuan ‘indonate chu kâwlkil thlenga tihreh’ a tiam a ni. (Sâm 46:⁠9) “Chu mi khuaa [a thenfai leia] awm chuan ‘Ka dam lo ve,’ a ti lo vang,” tiin a tiam bawk. Mitdelte, bengngawngte, ke baite​—⁠damlohna leh natna tuartu zawng zawngte​—⁠chu hrisêlna ṭha famkim neihtîr an ni ang a. (Isaia 33:24; 35:​5, 6; Thu Puan 21:​3, 4) Tûn hma kum zabitea lo thi tawhte pawhin an hlâwkpui ang. Rorêl dik lohna leh awpbehna tuartute nunna pawh pekkîr leh a tiam a ni.​—⁠Johana 5:​28, 29.

Isua Krista chuan hleih nei tak leh rei lo te chhûng thlâk danglamna a thlen dâwn lo va. Felna khawvêl awm lo tûra dâltu zawng zawng chu a tiboral vek ang. Sualna leh ṭhat famkim lohna chu a tibovin, Diabol-Setana leh helna nun kawnga amah zuitu zawng zawngte chu a tiboral dâwn a ni. (Thu Puan 19:​19, 20; 20:​1-3, 10) Pathianin rei lo te tâna awm a phal lungngaihna leh hrehawm tawrhna chu a awm “nawn” leh tawh lo vang. (Nahuma 1:​7-9) Hei hi a ni, Isua’n Pathian Ram lo thleng tûr leh Pathian duhzâwng ‘vâna an tih anga leia mi’n ti tûra’ ṭawngṭai dân min zirtîr laia a rilrua awm chu.​—⁠Matthaia 6:10.

‘Mahse, Isua ngeiin “mi retheite chu kumkhuain kan hnênah an awm reng ang” tih a sawi a ni lâwm ni? Chu chuan rorêl dik lohna leh retheihna a awm reng dâwn tihna a kâwk lo vem ni?’ tiin i hnial mai thei. (Matthaia 26:11) Ni e, Isua’n mi retheite chu an awm reng ang a ti ngei mai. Mahse, Pathian Lehkha Thua thutiamte leh a hnu leh a hma lama thu a sawite chuan he kalhmangte awm chhûng hi chuan mi retheite a awm reng dâwn tih a sawina  a ni tih a târ lang. Khawvêl retheihna leh rorêl dik lohna chu tu mihring mahin an tibo thei ngai dawn lo tih a hria a. Chûng zawng zawng chu aman a thlâk thleng dâwn tih a hre bawk. Tawrhna te, natna te, retheihna te, leh thihna te awm tawh lohna “vân tharte leh lei thar”​—⁠kal hmang thar hlak chu a rawn thlen thuai dâwn a ni.​—⁠2 Petera 3:13; Thu Puan 21:⁠1.

‘Thil Tihṭhat Theihnghilh Suh’

Hei hian mi dangte ṭanpui tûra kan tihtheih apiang tih chu a sâwt lo a tihna a ni em? Teh suh e. Bible chuan mite’n harsatna leh lungngaihna an tawn hunah ṭanpui tûrin min fuih a ni. “A phute tân ṭhatna ui suh, i kuta tih theihna a awm phawt si chuan,” tiin hmân lai Lal Solomona chuan a ziak a. (Thufingte 3:27) Tirhkoh Paula chuan: “Thil tihṭhat leh thilphal hi theihnghilh suh u,” tiin a fuih a ni.​—⁠Hebrai 13:16.

Isua Krista ngei chuan mi dangte ṭanpui tûra kan tih theih apiang ti tûrin min fuih a. Ani chuan vuak leh suam tâwktu Samari mi tehkhin thu a sawi a ni. Isua chuan, Samari miin “a khawngaih êm êm” avângin vuak tuartu pem tuam tûr leh an vuakna ata a dam chhuah nâna ṭanpui tûrin a sum a sêng tih a sawi a. (Luka 10:​29-37) Chu Samari mi khawngaih thei tak chuan khawvêl a thlâk danglam lo nachungin, mi dang nunah inthlâk danglamna nasa tak a thlen ngei mai. Keini pawhin, chutiang bawk chuan kan ti thei a ni.

Amaherawhchu, Isua Krista chuan mite ṭanpui aia tam thil a tithei a. Thlâk danglamna chu a thlen theiin, rei lo têah a thlentîr bawk dâwn a ni. A thlentîr hunah chuan, tûn laia rorêl dik lohna tuartute chuan nun ṭha zâwk an chên theiin, remna leh himna tak tak an nei ang.​—⁠Sâm 4:8; 37:​10, 11.

Chu thil thleng tûr chu kan nghah rualin, khawvêl fel lohna tuartu zawng zawng chunga thlarau lam leh tisa lama “thil ṭha” kan tihtheih apiang tih chu i hreh lo vang u.​—⁠Galatia 6:10. (w05 11/1)

[Phêk 5-naa milem]

Florence Nightingale-i chuan khawvêla inenkawl dânah inthlâk danglamna tak tak a siam

[Milem Hawhtîrtu]

Courtesy National Library of Medicine

[Phêk 7-naa milemte]

Krista zuitute chuan mi dangte chungah thil ṭha an ti

[Phêk 4-naa Thlalâk Hawhtîrtu]

The Star, Johannesburg, S.A.