Pathian Nên I Lêng Dûn Ang Em?
Pathian Nên I Lêng Dûn Ang Em?
‘Pathian nên thuhnuairawlh takin lêng dûn rawh.’—MIKA 6:8.
1, 2. Kan laka Jehova rilru neih chu pa ber naupang kal dân zirtîrna nên eng anga khaikhin theih nge a nih?
NAUTE chu nghet lo taka dingin, a nu leh pa kut chelh tumin a vawi khatna atân a pên ṭan beuh beuh va. Chu chu thil ho tê angin a lang mai thei; mahse, a nu leh pa tân chuan nakin hun tûr tiamtu hun pawimawh tak a ni. Nu leh pate chuan thla leh kum lo la awm tûra an fate nêna kut invuana an lên dun hlân chu an nghâkhlel êm êm a. Nakin hun rei tak thlenga kawng tam taka an fate tân kaihhruaina leh chhawmdâwlna pêk chu an inbeisei a ni.
2 Pathian Jehova’n chutiang bawk rilru chu a lei lam fate chungah chuan a pu a. Ṭumkhat chu a mi Israelte, a nih loh leh Ephraimte chungchângah heti hian a sawi a ni: “Ephraim chu ka bâna dawmin kal ka zirtîr a, . . . Mihring hruihrual, hmangaihna hruite chuan anmahni ka kai a,” tiin. (Hosea 11:3, 4) Hetah hian, Jehova chu hmangaihna ngah tak pa ber, dawhthei taka a fa kal dân zirtîrtu, a tlûk huna Pawm ṭhîntu angin a intâr lang a. Jehova, Pa ṭha ber chuan kal dân tûr min zirtîr chu a châk hle a ni. Hma kan sâwn chhoh zêl angin, keimahni nêna lên dun chu nuam a ti bawk. Kan thupui Bible chângin a târ lan angin, Pathian nên kan lêng dûn thei a ni. (Mika 6:8) Mahse, Pathian nêna lêng dun tih hi eng tihna nge ni? Engvângin nge chutianga kan lên dun a ngaih? Engtin nge kan lên dun theih ang? Pathian nêna lên dunna aṭang chuan eng malsâwmnate nge lo awm? Hêng zawhna palite hi a mal malin ilo bih chiang ang u.
Pathian Nêna Lêng dûn Tih Hi Eng Tihna Nge Ni?
3, 4. (a) Pathian nêna lêng dûn tih thu malin a târ lan chungchângah eng nge chhinchhiah tlâk? (b) Pathian nêna lêng dûn tih hi eng tihna nge ni?
3 Tisa leh thisen nei mihringte tân thlarau mi Jehova nêna a ngial a ngana lên dun chu thil theih a ni hauh lo va. (Exodus 33:20; Johana 4:24) Chuvângin, Bible-in mihringte Pathian nêna lêng dûn anga a sawi hian, entîr nei ṭawngkam a hmang tihna a ni. Hei hian hnam leh pian leh mûrnain a khuahkhirh loh leh eng hun pawha hman tlâk a ni tih a târ lang. Dik takin, mi dang nên inthuruala lêng dûn tih chu khawi hmun emaw, hun emawa miin nge hre thiam lo tehlul ang? He thu hian nêlawmna leh inhnaihna a târ lang a ni lâwm ni? Chûng chuan Pathian nêna lêng dûn tih awmzia hriatthiamna ṭhenkhat min pe a ni. Mahse, i sâwrzîm zâwk ang u.
4 Mi rinawm Enoka leh Nova te kha hre reng la. Engvângin nge Pathian nêna lêng dûn anga târ lan an nih? (Genesis 5:24; 6:9) Bible-a, “lêng dûn” tih thu mal hian kalhmang engemaw tak zui tih a kâwk fo ṭhîn a. Enoka leh Nova chuan Pathian Jehova duhzâwng nêna inmil nun kawng chu an thlang a ni. Chutih laia an chhehvêla awmte ang lo takin, Jehova kaihhruaina pêk chu zawngin, a kawhhmuhna chu an zâwm a. Amah chu an ring tlat a ni. Chu chu Pathianin an thu tlûkna siam tûrte a siamsak tihna a ni em? Ni lo ve. Jehova chuan mihringte hnênah zalên taka duhthlan theihna chu a pe a, ani chuan chu thilpêk chu “ngaihruat thiamna” nêna hmang tûrin min duh a ni. (Rom 12:1, NW) Amaherawhchu, thu tlûknate kan siamin, inngaitlâwm takin kan ngaihruat thiamna chu Jehova ngaihtuahna chungnung ber kan inkaihhruaitîr a. (Thufingte 3:5, 6; Isaia 55:8, 9) Dik takin, nun kawng kan zawh hian, Jehova nên kan zawh dûn tlat a ni.
5. Engah nge Isua’n dam chhûng huna tawng khat belh chhah chungchâng a sawi?
5 Bible chuan nun hi zin kawng emaw, kawnga kal emaw nên a tehkhin fo va. Ṭhenkhatah chuan, chu tehkhinna chu a ngial a ngana hman a ni a, a ṭhenah erawh awmze dang neia hman a ni. Entîr nân, Isua chuan, atîra ziak Bible-ah: “Nangni zîngah lungkham avângin tuin nge mahni dam chhûng hun tawng khata belh chhah thei?,” tiin a sawi a. (Matthaia 6:27, NW) Hêng thute hian a ngaihna a tihre lo mai thei che a ni. Engah nge Isua’n thil seizâwng tehna ‘tawng khat’ tih chu hun hmanga teh mihring ‘dam chhûnga’ belh chhah anga a sawi? * Isua chuan nun chu zin kawng angin a târ lang tih a chiang hle a ni. Dik takin, ani chuan lungkhamnain i nun kawng i zawhnaah pên khat lek pawh belh chhah tûrin a ṭanpui dâwn lo che tih a zirtîr a ni. Mahse, Pathian nêna kan lên dun hun reizâwng chungchângah engmah tihtheih kan nei lo tihna a ni em? Ni lo ve! Chu chuan, Engvângin nge Pathian nêna kan lên dun a ngaih? tih kan zawhna pahnihnaah min hruai thleng a ni.
Engvângin Nge Pathian Nêna Kan Lên Dun A Ngaih?
6, 7. Mihring ṭha famkim lote’n eng thil mamawh ngawih ngawih nge an neih a, chu mamawhna phuhru tûrin engvângin nge Jehova kan pan ang?
6 Pathian Jehova nêna kan lên dun a ngaih chhan pakhat chu Jeremia 10:23 thu: “Aw LALPA, mihring awm dân chu, mahni thu mai a ni lo tih ka hre ta: tungchhova kal mihringah hian, a pheikhai hruai tûr a awm lo,” tih hian a hrilhfiah a ni. Chuvângin, keini mihringte hian kan nun kawng mahnia hruai tûrin theihna kan nei lo va, dikna lah kan nei hek lo. Kaihhruaina chu kan mamawh hle a ni. Chuvângin, Pathian laka inla hrang a, mahnia kal tum tlattute chuan, Adama leh Evi ang bawkin thil an tisual a ni. Nupa hmasa berte chuan anmahni tâna a chhia leh a ṭha thutâwp siam tûrin dikna neiah an inngai tlat a. (Genesis 3:1-6) Chu dikna chu kan ta “a ni lo” ringawt mai a ni.
7 I nun kawngah hian kaihhruaina mamawhin i inhria em? Nî tinin, thu tlûkna tê tham leh lian tham tak takte pawh kan hmachhawn a. Hêng zînga ṭhenkhat phei hi chu a harsain, chûng chuan kan nakin hun tûr—kan hmangaihte nakin hun tûr pawh tiamin—a nghawng thei a ni. Mahse, han ngaihtuah lawk teh, keimahni aia upa zâwk leh fing zâwk tuemawin chûng thu tlûknate siamnaah chuan kaihhruaina min pêk a duh a nih chu! Lungchhiatthlâk takin, tûn laia mi tam zâwkte chuan mahni thu tlûkna siam rin leh mahnia pheikhai inhruai chu an thlang zâwk a ni. Thufingte 28:26-a târ lan thu dik chu an hnâwl a ni: “Mahni rilru ring maitu chu mi â a ni a, fing taka chetla mi erawh chu chhan chhuah a ni ang,” tih chu. Jehova chuan mihring thinlung bumhmang tak rinna aṭanga lo awm chhiatna laka min chhan chhuah chu a duh a ni. (Jeremia 17:9) Kaihruaitu leh Zirtîrtu fing anga amah ring a, fing taka chetla tûrin min duh a ni. Chutianga kan tihin, kan nun zin kawng chu a him a, a lungawithlâkin, a hlawhtling a ni.
8. Sual leh ṭhat famkim lohnain mihringte chu khawiah nge a hruai ṭhin a; mahse, Jehova’n kan tân eng nge min duhsak?
8 Pathian nêna kan lên dun a ngaih chhan dang lehah chuan kan kal thui duhzâwng a tel a ni. Bible chuan thu dik duhawm lo tak chu a târ lang. Mihring ṭha famkim lo zawng zawngte chuan tum ram thu hmun an pan vek a tih theih a. Tar avânga lo awm harsatnate chu târ langin, Thuhriltu 12:5 chuan: “Mi chu a chatuan in lamah a hâwngin, lusûnte chu kawtthlêrah an vak vêl si a,” a ti. Eng nge chu “chatuan in” chu ni ta? Sual leh ṭhat famkim lohnain a thlen ṭhin thlân hi a ni. (Rom 6:23) Amaherawhchu, Jehova’n pian hun aṭanga thih thleng, buainaa khat rei lo te chhûng lên dun mai aia tam min duhsak a. (Joba 14:1) Pathian nêna lên dunna aṭang chauhvin, aman kan ruala lên dun a duh chen—chatuan—thlenga lên dun chu kan beisei thei a ni. Chu chu i duhzâwng tak a ni lâwm ni? A nih chuan, i Pa nêna in lên dun a ngai tih a chiang hle.
Engtin Nge Pathian Nên Kan Lên Dun Theih Ang?
9. Engvângin nge Jehova chuan a mite laka bihrûk châng a neih a; mahse, Isaia 30:20-a sawi angin eng thutiam nge a pêk?
9 Zawhna pathumna kan ngaihtuahna tûr hian fîmkhur taka ngaihtuah a phu ber a ni. Chu chu, Engtin nge Pathian nên kan lên dun theih ang?, tih a ni. A chhânna chu Isaia 30:20, 21-ah kan hmu a ni: “In [“Zirtîrtu Ropui Ber,” NW] chu biruin a awm tawh lo vang a, in mitin in [“Zirtîrtu Ropui Ber,” NW] chu a hmu zâwk tawh ang: tin, ding lama in pên veleh emaw, vei lama in pên veleh emaw, in bengin in hnung lama thu, ‘Hei hi kawng a nih hi, tah hian kal rawh u,’ tiin a hre zêl ang.” He thu phûrawm takah hian, châng 20-naa chhinchhiah Jehova thu chuan a mite a laka an hel hian, ani chu an lakah a biru ṭhîn tih a hriattîr ngei ang. (Isaia 1:15; 59:2) Mahse, he Bible chângah hian, Jehova chu biru ang ni lovin, a mi rinawmte hmaa langsâr taka ding angin a inlantîr zâwk mah a. Zirlaite hmaa ding zirtîrtu, an zir atâna a duhte entîrtu angin kan ngaihtuah thei a ni.
10. Eng kawngin nge Zirtîrtu Ropui Ber hnên aṭanga “hnung lama thu” i hriat?
10 Châng 21-ah chuan, thu dang daih sawi a ni leh a. Jehova chu a mite hnung lama kalin, kawng dika kal tûra kawhhmuhtu anga târ lan a ni. Bible lama mi thiamte chuan he ṭawngkam hi berâmpuin a chânga a berâmte hnunga kala kawng dik lo zawh lo tûra a kaihhruai dân aṭanga lâk a ni thei ang an ti a. Engtin nge he thu hi kan tâna hman theih a nih? Aw le, min kaihruai tûra Pathian Thu lam kan hawiin, kum sâng têl liam taa chhinchhiah thute chu kan chhiar a ni. Rei tawh taka chhinchhiahte chu kan hnung aṭanga lo chhuak ang a ni a tih theih ang. Mahse, ziak an nih lai hun ang chiah khân, tûn laiah pawh a pawimawh a. Bible zilhna thute chuan nî tina kan thu tlûkna siamte a kaihruai thei a, kan nakin huna kan nun kawng zawh tûr duang tûrin min ṭanpui thei bawk a ni. (Sâm 119:105) Chutiang zilhnate tih tak zeta kan zawn a, kan nunpui hian, Jehova chu min Hruaitu a lo ni a. Pathian nên kan lêng dûn a ni.
11. Jeremia 6:16-in a sawi angin, Jehova’n a mite tân eng thu duhawm tak nge a sawi a; mahse, engtin nge an chhân lêt?
11 Pathian Thu chu chutiang takin kan inkaihhruaitîr tak tak em? A châng chânga tih tak zeta mahni inenfiah chu a manhla a ni. Chutianga ti tûra min ṭanpuitu tûr Bible châng pakhat chauh han ngaihtuah teh: “LALPA chuan heti hian a ti: Kalkawngahte ding ula, en rawh u, kawng ṭha awmna kawng hlunte chu zâwt rawh u, tah chuan kal ula, in thlarau tân chawlhna in hmu ang,” tih chu. (Jeremia 6:16) Hêng thute hian kawng ṭhuama châwla a pan lam tûr zâwt khual zin mi chu min hriat chhuahtîr thei a. Thlarau lam thila sawi chuan Israel rama hel hmang Jehova mite chuan chutiang bawka an tih chu a ngai a ni. Anni chuan “kawng hlunte” an zawn a ngai a. Chu “kawng ṭha” chu Israel hnamin âtthlâk taka a pênsan tâk, an pi leh pu mi rinawmte lo zawh tâk kawng hi a ni. Lungchhiatthlâk takin, Israel chuan he Jehova hriattîrna duhawm tak hi luhlul takin a chhâng lêt a. Châng ngai bawk chuan, heti hian a sawi zawm a ni: “‘Tah chuan kan kal lo vang,’ an ti a,” tiin. Mahse, tûn laia Pathian mite’n chu zilhna an chhân lêt dân chu a dang daih thung a ni.
12, 13. (a) Engtin nge Jeremia 6:16-a thurâwn hi Krista hnungzui hriak thihte’n an chhân lêt? (b) Engtin nge tûn laia kan kawng zawh chungchângah kan inenfiah ang?
12 Kum zabi 19-na tâwp dâwn lam aṭang khân, Krista hnungzui hriak thihte chuan Jeremia 6:16-a thu hi an nunpui a. A pâwl angin, ‘kawng hluntea’ kîr lehnaah thatho takin hma an hruai a ni. Kristianna rama kal pêngte ang lo takin, Isua Krista’n a lo din “thu dik dân,” C.E. kum zabi khatnaa a hnungzuitu rinawmte vawn tlat chu rinawm takin an zâwm a. (2 Timothea 1:13) Vawiin thlengin, hriak thihte chuan Kristianna ramin a hnâwl tâk, nun hlimawm leh ṭha chu ûm tûrin an hriak thih nihpuite leh an ṭhian “berâm dang” te chu an ṭanpui a ni.—Johana 10:16.
13 Bawi rinawm pâwl chuan thlarau lam chaw a hun apianga pêkna hmangin, mi maktaduai têlte chu “kawng hlun” zawng hmu tûr leh Pathian nêna lêng dûn tûrin an ṭanpui a. (Matthaia 24:45-47) Chûng maktaduai têlte zînga mi chu i ni ve em? I nih chuan, mahni duhzâwnga kîr leh a, tawlh bo lo tûrin eng nge i tih theih? A châng chânga kan nun kawng zawh inenfiah leh ṭhin chu a finthlâk a ni. Rinawm taka Bible leh Bible ṭan chhan thu leh thla chhuahte i chhiar a, tûn laia hriak thihte bul tum zirtîrnaa i tel chuan, Pathian nêna lêng dûn tûrin zirtîrna i dawng tihna a ni a. Tin, zilhna thu i dawnte inngaitlâwm taka i nunpui hian, “kawng hlun” chu zawhin, Pathian nên inlêng dûn tihna a ni bawk.
‘Hmuh Theih Lohva Chu Hmu’ Anga Kalin
14. Jehova chu kan tâna a tak chuan, engtin nge chu chu kan mi mal thu tlûkna siamah a lan ang?
14 Jehova nêna lêng dûn tûr chuan, kan tân ani chu a tak tûr a ni. Jehova chuan hmân lai Israel mi rinawmte hnênah an laka inthup loh a tiam tih hre reng rawh. Tûn laiah pawh, chutiang bawkin a mite hnênah Zirtîrtu Ropui Ber a nihzia a puang a ni. Nangmah zirtîr tûra i hmaa ding ang maiin, Jehova chu i tân a tak em? Chutiang rinna chu a ni, Pathian nêna kan lên dun nâna kan mamawh chu ni. Mosia’n chutiang rinna chu neiin, “hmuh theih lohva chu a hmuh avângin a tuar ṭan ṭan a ni.” (Hebrai 11:27) Jehova chu kan tâna a tak chuan, thu tlûkna kan siam hunah amah chu kan ngaihtuah tel dâwn a ni. Entîr nân, thil sual tih leh kan sualna Kristian upate emaw, chhûngte emaw hnêna thup chu a ngaihtuah pawhin kan ngaihtuah lo vang. Mi dangte’n min hmuh loh hunah pawh Pathian nêna lên dun chu kan tum tlat zâwk ang. Hmân lai Lal Davida angin: “Ka in chhûngah thinlung ṭha famkim puin ka awm ang,” tih chu kan tum tlat a ni.—Sâm 101:2.
15. Engtin nge kan Kristian unaute nêna inkawmna chuan kan tân Jehova chu a tihtak lehzual ang?
15 Jehova chuan ṭha famkim lo leh tisa pu thil siam kan ni tih a hria a, a chângin kan thil hmuh theih lohte rin chu harsa kan ti dâwn tih a hria a ni. (Sâm 103:14) Ani chuan chutiang chak lohnate hneh tûrin nasa takin min ṭanpui a. Entîr nân, “ama hming pu atân” leia hnam tin aṭangin mite a hruai khâwm a ni. (Tirhkohte 15:14) Inlungrual taka rawng kan bâwl tlânin, kan intichak tawn a. Jehova’n kan thlarau lam unau tuemaw chu chak lohna ṭhenkhat hneh tûr emaw, fiahna harsa tak ṭhenkhat hneh tûr emawa a ṭanpui dân hriatna chuan kan tân Pathian chu a titak lehzual a ni.—1 Petera 5:9.
16. Engtin nge Isua chanchin zirna chuan Pathian nêna lêng dûn tûra min ṭanpui?
16 A pawimawh berah chuan, Jehova’n entawn tûr atân a fapa min pe a. Isua chuan: “Keimah hi kawng leh thutak leh nunna ka ni; keimaha kal lo chu tumah Pa hnênah an thleng ngai lo,” a ti a. (Johana 14:6) Leia Isua nun kawng zawh chanchin zirna chu kan tân Jehova tihtak lehzual dân kawng ṭha ber pakhat a ni. Isua thusawi emaw, thiltih emaw engkim mai chu vâna a Pa mizia leh kawngte lantîrtu ṭha famkim a ni. (Johana 14:9) Thu tlûknate kan siamin, Isua’n chûng buainate a chinfel dân tûr chu fîmkhur taka kan ngaihtuah a ngai a. Kan thu tlûknate chu fîmkhur tak leh ngun taka ngaihtuaha siam a nih chuan, Krista hniakhnung kan zui tihna a ni a. (1 Petera 2:21) Chuta ṭang chuan, Pathian nên kan lêng dûn a ni.
Eng Malsâwmnate Nge A Rahchhuah?
17. Jehova kawng kan zawh chuan, kan thlarau tâna eng “chawlhna” nge kan hmuh ang?
17 Pathian Jehova nêna lên dun chu nun lungawithlâk neihna a ni a. Jehova’n “kawng ṭha” zawngtu a mite hnêna a thutiam kha hre reng rawh. Ani chuan: “Tah chuan kal ula, in thlarau tân chawlhna in hmu ang,” a ti. (Jeremia 6:16) “Chawlhna” tih hi eng tihna nge ni? Nawmsakna leh hahdamnaa khat nun awlsam tak a ni em? Ni lo ve. Jehova chuan, mi hausa berte neih khât êm êm thil hlu zâwk daih engemaw tak chu a pe a ni. Thlarau tâna chawlhna hmu tih chu chhûngrila remna, hlimna, lungawina, leh thlarau lama famkimna hmuh hi a ni a. Chutiang chawlhna chu nun kawng ṭha ber i thlang tih rinngamna i neih hi a ni bawk. Chu rilrua thlamuanna chu buainaa khat he khawvêlah hian malsâwmna a va ni tak êm!
18. Eng malsâwmna nge Jehova’n pêk a duh che a, eng nge i tum tlat ang?
18 Nunna ringawt pawh hi malsâwmna ropui tak zawng a ni ngei mai a. Rei lo te chhûng nun pawh hi nun miah loh ai chuan a ṭha zâwk daih a ni. Amaherawhchu, Jehova chuan i tân vânglai nî aṭanga târ kûn thleng nun kawng tâwi tê chauh zawh tûrin a ruat lo rêng rêng. Ani chuan malsâwmna ropui ber i neih a duh zâwk a. Amah nêna chatuana lêng tûrin a duh che a ni! Hei hi Mika 4:5 a tîra ziak hian a sawi chiang hle: “Hnam tinte chu mahni pathian nên ṭheuh an lêng ang a; keini erawh Jehova kan Pathian hmingin kumkhuain kan lêng ang,” tiin. He malsâwmna hi i duh em? Jehova’n “nunna taktak” tia a koh nun duhawm tak i nei duh em? (1 Timothea 6:19) I duh chuan, Jehova nêna vawiin, naktûk, leh nî tin, chatuan thleng pawha lên dun chu tum tlat ang che! (w05 11/1)
[Footnote]
^ par. 5 Bible lehlin ṭhenkhat chuan he chânga “tawng” tih hi hun tehna, “rei lo tê” (The Emphatic Diaglott) emaw, “minute khat” (A Translation in the Language of the People, by Charles B. Williams) emawin an thlâk a. Amaherawhchu, atîra ziak thu mal hian inchi 18 vêla sei, tawng khat tih chu a kâwk ngei a ni.
Engtin Nge I Chhan Ang?
• Pathian nêna lêng dun tih hi eng tihna nge ni?
• Engvângin nge Jehova nêna lên dun ngai i tih?
• Engin nge Pathian nêna lêng dûn tûrin ṭanpui dâwn che?
• Pathian nêna lêng dûnte tân eng malsâwmna nge awm?
[Zirlai Atâna Zawhnate]
[Phêk 29-naa milemte]
Bible hmangin, kan hnung aṭanga Jehova aw, “Tah hian kal rawh u” tih chu kan hria
[Phêk 31-naa milem]
Inkhâwmnaahte hian, a hun takah thlarau lam chaw kan dawng