Pathian Thinlung Tilâwmtu Thawhlâwmte

THAWNTHU ngaihnawm tak zawng a ni hauh lo. Lalnu Athali chuan bumna leh tualthahna hmangin Juda lalṭhutthlêng chu a chuh a. Roluahtu tûr zawng zawng chu thah vek tawh nia ngaiin, lalnuah a insiam a ni. Hmeichhe dang, Jehova leh a Dân hmangaih êm êmtu, lal fanu Jehosebi chuan huaisen takin lal fapa nausên Joasa chu a thukru a. Jehosebi leh a pasal, Puithiam Lal Jehoiada chuan roluahtu tûr chu biak ina rawngbâwltute chênna hmunah kum ruk an thukru a ni.​—⁠2 Lalte 11:​1-3.

Joasa kum sarih a tlin chuan, Puithiam Lal Jehoiada chu dik lo taka lâk lalnu nihna aṭanga Athali paih thla tûrin a inpeih dêr tawh a. Naupang an thuhrûk thu puang chhuakin, roluahtu tûr dik tak lalah a siam a. Lalnu suaksual Athali chu biakin pâwn lama hnûk chhuakin, lal vêngtute’n an that a, chu chuan mipui tân hahdamna leh hlimna a thlen a ni. Jehoiada leh Jehosebi chuan an thiltih hmangin Judai rama biakna dik din thar lehna chu nasa takin an ṭanpui a. Mahse, chu aia pawimawh zâwk Messia thlahtu tûr Davida lal thlah awm chhunzawm zêl tûrin an ṭanpui a ni.​—⁠2 Lalte 11:​4-21.

Lal siam thar pawhin Pathian thinlung tilâwmtu thil pawimawh tak a ti bawk. Jehova in chu siam ṭhat a ngai nasa hle a. Athali’n Judai rama rorêl a châkna a khuahkhirh loh avângin, biak in chu ngaihthah mai ni lovin, rawk a ni bawk. Chuvângin, Joasa chuan biak in sak ṭhat leh a, din thar leh chu a tum nghet tlat a. Tichuan, Jehova in ngai awhtîr leh tûra mamawh sum khawnkhâwm tûr chuan thu a pe ta nghâl a ni. Ani chuan: “LALPA ina lâk luh thil serh tlanna sum zawng zawng, chhiar tawhte zînga kal apiangte tâna tuk, an nun tlanna sum te, tupawhin LALPA ina lâk luh an phal sum zawng zawng te chu, puithiamten an hmêlhriatte hnên aṭangin lo la ṭheuh sela; tichuan in chhia a chhe lai apiang, siam rawh se,” tiin a sawi.​—⁠2 Lalte 12:​4, 5.

Mipui chuan phal takin an thawh a. Mahse, puithiamte chuan biak in sa ṭha tûra an mawhphurhna chu tih tak zetin an hlen chhuak lo. Chuvâng chuan, lal chuan hna chu amah ngeia hma lain, thawhlâwm zawng zawng chu a bâwm bîka thlâk tûrin thu a pe a. Jehoiada chu hotuah a dah a, thuziak chuan: “Puithiam Jehoiadan bâwm a la a, a chhîn a rek pawp a, LALPA ina luha ding lampang, maichâm bulah a hûng a; chutah chuan LALPA ina tangka rawn lâk luh zawng zawng chu kawngkhâr vêngtu puithiamte chuan an la dah zêl a. Tin, heti hi a ni a, bâwmah chuan tangka a tam ta hle tih an hriatin, lal lehkha ziaktu leh puithiam lalber chu an han kal a, an fûn a, LALPA ina tangka awm chin chu an chhiar a. Tin, an tangka chhiar chu hnathawkho,  LALPA in satute chunga hotute an pe a, anni chuan LALPA in beitu, themthiamte leh in satute hlawhah te, lung chhertute leh lung lai chhuaktute hlawhah te, LALPA in chhe laite siamna tûr thing leh lung chherah te leh in siam nâna mamawh apiangahte an hmang ṭhîn a,” a ti.​—⁠2 Lalte 12:​9-12.

Mipuite chuan tih tak zetin an chhâng lêt a. Jehova in chu din thar leh a nih avângin, a biakna chu zahawm taka chhunzawm leh a ni. Chuvângin, thawhlâwma tling khâwm zawng zawng chu ṭha taka hman a ni a. Chutiang ni tûr chuan lal Joasa ngeiin a enkawl a ni!

Tûn laia, Jehova inawpna pâwl hmuh theih chuan thawhlâwm zawng zawng chu Jehova biakna tihhmasâwn nâna ṭha taka hman ni tûrin fîmkhur takin a enkawl a, Kristian dikte chuan hmân lai Israelte ang chiahin, tih tak zetin, an chhâng lêt bawk a ni. Nang ngei pawhin rawngbâwl kum kalta chhûng khân Lalram hmakhaw tihhmasâwn nân thawhlâwm i thawh a ni thei a. I thawhlâwm thawhte hman a nih dân ṭhenkhat ilo thlîr ang u.

LEHKHABU CHHUT CHHUAHNA LAM

Khawvêl pumah, a hnuaia thu leh hla chhuahte hi zir atân leh sem chhuah atâna chhut chhuah a ni:

• Lehkhabu: 47,490,247

• Lehkhabutê: 6,834,740

• Brochure: 167,854,462

• Calendar: 5,405,955

• Magazine: 1,179,266,348

• Tract: 440,995,740

• Video: 3,168,611

Chhut chhuahna hna chu Africa, North, Central, leh South America, Asia, Europe, leh Pacific thliarkâr ram​—⁠ram 19-a neih a ni.

“Ka hming chu Katelyn May-i a ni a. Kum riat mi ka ni. Hei Dollar 28, ka nei a, hei hi lehkha chhutna khâwl leina ṭanpui nâna pêk che u ka duh a ni. In unaunu, Katelyn-i.”

“Lehka chhutna khâwl thar chungchângah chhûng inkhâwmna kan nei a. Kum 11 leh kum 9 mi kan fate chuan, an pawisa khâwl la chhuaka anmahni puala thawhlâwm thawh chu an tum a ni. Kan thawhlâwm rualin an thawhlâwm chu lâwm takin kan rawn thawn a che u.”

 IN SAKNA LAM

A hnuaia mite hi Jehova Thuhretute rawngbâwlna ṭanpuitu atâna in sak lai mêk ṭhenkhatte a ni:

• Ram retheia Kingdom Hall sak zât: 2,180

• Assembly Hall: 15

• Branch: 10

• Ram hrang hrang aṭanga lo kal hunbi kima inpe zât: 2,342

“Tûn chawlhkâr tâwp khân kan Kingdom Hall tharah inkhâwmna hmasa ber kan nei a. Kan Pa, Pathian Jehova chawimawina tûr hmun ṭha tak kan neih avângin kan lâwm hle a ni. Kingdom Hall sak belhna hmanga kan mamawhte in ngaihsak avângin Jehova leh in chungah kan lâwm hle mai. Kan Kingdom Hall chuan vêngchhûng a timawi tak zet a ni.”​—Chile.

“Jehova inawpna pâwl hmanga pêk ṭanpuina chu unaute’n an hlut hle a. Tûn thlengin, in satu pâwl nêna hun nuam tak kan hmante chu kan sawi bâng thei lo.”​—Moldova.

“Tûn hnai mai khân ka nupui nên chuan kan inneih champha 35-na kan hmang a. Chu hun atâna thil inpêk tûr chu kan ngaihtuah a, tin Jehova leh a inawpna pâwl hnêna thil engemaw pêk lêt chu kan tum bawk a, an ṭanpuina tel lovin, inneihna hlawhtling kan neih dâwn loh avângin. Hêng pawisate hi ram retheia Kingdom Hall sakna ṭanpui nâna hman atân kan rawn thawn e.”

“Tûn hnai mai khân ro ka chang a, ka thil ‘duhte’ a tlêm a, ka ‘mamawh’ a tlêm lehzual avângin, he sum hi ram tam taka Kingdom Hall sak mamawh ngawih ngawihte ṭanpui nân ka pe duh a ni.”

 VANDUAINA TAWKTE ṬANPUINA

Hêng ni hnuhnûngah hian, vânduainate chu hriat lâwk lohvin a thleng fo va. Jehova Thuhretu tam takte chuan chutiang hmuna awm an unaute ṭanpui nân thawhlâwm chu nasa takin an thawh belh a ni. Hriattîrna atân, chhiat tâwkte tâna ṭanpuina chu khawvêl pum huap rawngbâwlna zîngah telh a ni. A hnuaia hmun târ lante hi Jehova Thuhretute’n chhiat tâwkte an ṭanpuina hmun ṭhenkhat a ni:

• Africa

• Asia

• Caribbean tuipui bul vêl

• Pacific thliarkârte

“Ka pasal nên chuan hurricane thlipui kan tawrh avânga chhawmdâwlna thil in rawn thawnte avângin kan lâwm hle a. Kan in chung chu kan khuh thar thei a. Rang taka min rawn ṭanpuina chu kan hlut hle a ni.”

“Ka hming chu Connor-a a ni a, kum 11 mi ka ni. Tsunami-in chhiatna a thlen ka hmuhin, ṭanpui ka duh a. Hei hian ka unaute a ṭanpui ka beisei.”

 A BIKA HUNBI KIMA RAWNGBAWLTE

Kristian tam tak chuan hunbi kima chanchin ṭha hrilin emaw, Bethel-ah awmin emaw rawng an bâwl a. Hunbi kima rawngbâwltu ṭhenkhat chu thawhlâwm hmanga chhawmdâwl an ni. A hnuaia mite hi chhûng zînga mite chu an ni:

• Missionary: 2,635

• Bial kantu: 5,325

• Bethel-a awm: 20,092

“Tûnah rih chuan [kum nga mi mipa naupang] Bethel-ah rawng ka la bâwl theih loh avângin, he thawhlâwm hi hmangaihna nasa tak nên ka rawn thawn a ni. Ka puitlin hunah chuan taima taka hna thawk tûrin Bethel-ah ka kal ang.”

Bible Zirtîrna Tihhmasâwn Nân

Isua Krista’n a hnungzuitute chu “hnam tina mi zirtîrahte siam” tûrin thu a pe a. (Matthaia 28:19) Chu thupêk chu zâwmin, Jehova Thuhretute chu ram 235-ah Bible thuchah hrilhna leh zirtîrnaah an buai hle a ni. Bible thu leh hlate chu ṭawng 413-a chhuahin, an sem chhuak bawk.

Dik takin, mi tam zâwkte’n Pathian leh A thiltumte chungchâng zir tûra Kristianin a pêk theih thil hlu ber chu a hun hi a ni. Jehova Thuhretute chuan an vêngte ṭanpui tûrin an hun leh tha tam tak an sêng a. Tin, sum leh pai lamah pawh phal takin an thawh a, kawng chi hrang hranga an thawhlâwm thawh zawng zawng chuan khawvêl puma Jehova hming leh a thiltum hriattîrna a ṭanpui a ni. Jehova chuan a chungchâng mi tam zâwkte’n an zirna tûra an thawhrimna hi malsâwm zui zel rawh se. (Thufingte 19:17) Chutianga phal taka ṭanpuina chuan Jehova thinlung a va tilâwm tak êm!​—⁠Hebrai 13:​15, 16. (w05 11/1)

[Phêk 10-12-naa bâwm]

Ṭhenkhatin An Thlan Pêk Chhuah Dân Kawngte

KHAWVEL PUM HUAP RAWNGBAWLNA THAWHLAWM

Tam tak chuan, “Khawvêl Pum Huap Rawngbâwlna Atâna Thawhlâwm​—⁠Matthaia 24:14.” tih inziak thawhlâwm bâwma an thawh tûr chu an dah hrang, a nih loh leh an bituk a ni.

Thla tinin, kohhrante chuan chûng thawhlâwmte chu an ram chhûng Jehova Thuhretute office-ah an thawn ṭhîn a. Phal taka pêk thawhlâwmte chu hêng office-ah te hian thawn tlang nghâl theih a ni bawk. Branch office address-te chu he magazine phêk 2-naah hian hmuh theih a ni. Cheque hmanga pêk a nih chuan a dawngtu tûr hming ziahnaah “Watch Tower” tih ziah tûr a ni. Rangkachak leh lunghlu emaw, thil hlu dang emaw pawh thawh theih a ni a. Hetiang chi thawhlâwmte hi, thilthlâwnpêk liau liau a nih thu ziakna lehkha nêna thawn tel ngei ngei tûr a ni.

PEK DAN TUR RUAHMANNA SIAM

Khawvêl pum huap Lalram rawngbâwlna atân pawisa fai pêk theih a nih bâkah, pêk dân dang pawh a awm a. Chûng zîngah chuan hêngte hi a tel a ni:

Zângna Dawmna: Watch Tower chu vânduai palh thila zângna dawmna dawngtu tûr atân emaw, hna bânsan hun/pension huna pawisa dawngtu tûr atân emaw a dah theih a ni.

Bank-a Pawisa Dah: Bank-a pawisa dahte, pawisa dah luhna lehkhate, a nih loh leh hnathawh bânsan huna pawisa lâk tûrte chu Watch Tower kawltîr emaw, thih huna pêk atân emawin tualchhûng bank kalhmang milin a dah theih a ni.

Stock leh Bond-te: Stock leh bond-te chu Watch Tower hnêna thil pêk liau liau angin a pêk theih.

In Hmun Lo Ram: In hmun lo ramte chu thil pêk liau liau anga pêk theih a ni a, chênchilhna in a nih chuan, a petu dam chhûng zawnga awm chhun zawm theihna hauh chungin a pêk theih a ni. In hmun lo ram chungchânga inhlan chhâwnna engpawh neih hmain branch office râwn hmasa ang che.

Gift Annuity: Gift annuity tih chu miin pawisa emaw, dahkham thil emaw chu Watchtower corporation tâna dah tûra ruahmanna a siam hi a ni a. Tichuan, a petu, a nih loh leh a petuin a ruat tuemaw chuan a dam chhûng zawngin kum tin an inremsiamna zât pawisa chu a dawng ziah dâwn a ni. Gift annuity a siam kum chuan, a petu tân income-tax tihhniamsak a ni ṭhîn.

Thurochhiah leh Pawisa Inkawltîr: In hmun lo ram emaw, pawisa emaw chu dân ang thlapa siam thuro chhiah hmangin Watch Tower hnênah a hlan chhâwn theih a, a nih loh leh pawisa inkawltîrna thuthlung siama a hlâwkna têl tûrin Watch Tower hming chu a pêk theih a ni. Ram ṭhenkhatah chuan, sakhaw pâwlin a hlâwkna a têl tûr pawisa inkawltîrna chuan chhiah chawi lamah ṭangkaina eng engemaw a nei a, India ramah chuan chutiang chu a ni ve lo.

A hming, “pêk dân tûr ruahmanna siam” tihin a sih hmuh angin, hetiang zâwnga thilpêk pe tûr hian a petu lamah ruahmanna ṭhenkhat siam a ngai a. Hêng pêk dân tûr ruahmanna zînga a engemaw ber hmanga Jehova Thuhretute khawvêl pum huap rawngbâwlna ṭawiâwm duhte ṭanpui nân, brochure pakhat, Charitable Planing to Benefit Kingdom Service Worldwide, * tih chu Sâpṭawng leh Spanish ṭawnga buatsaih a ni. Chu brochure chu tûn la la leh thih huna rochhiah anga thilpêk pe duhte tâna chanchin tam lehzual hriattîrna tûra buatsaih a ni a. Brochure an chhiar zawh hnuah leh dân lama an mi thiamte an râwn hnuah, mi tam tak chuan khawvêl puma Jehova Thuhretute rawngbâwlna chu an ṭanpui thei a, chutih rual chuan chhiah lamah ṭangkaina nasa tak an nei thei bawk a ni.

Chanchin hriat belh nân, a hnuaia address hmangin emaw, i awmna ram enkawltu Jehova Thuhretute branch office-ah emaw chuan lehkha ziakin emaw, telephone-in emaw Jehova Thuhretute chu i be thei ang.

Jehovah’s Witnesses,

Post Box 6440,

Yelahanka,

Bangalore 560 064,

Karnataka.

Telephone: (080) 28468072

[Footnote]

[Phêk 9-naa Thlalâk Hawhtîrtu]

Faithful video: Stalin: U.S. Army photo