“Ṭawng Tinrêng Aṭanga Lo Chhuakte” Chuan Chanchin Ṭha An Hria

“Mi sâwm, hnam ze [“ṭawng,” NW] tinrêng aṭanga lo chhuakte chuan, . . . I hnênah Pathian a awm tih kan hriat avângin i hnênah kan kal ve dawn e, an ti ang.”​—⁠ZAKARIA 8:23.

1. Engtin nge Jehova’n ṭawng hrang hrang hmanga khawvêl pum huapa thu hrilh nân hun leh hmun ṭha ber a pêk?

A HUN leh hmun chu duhthusâm a ni a. C.E. 33 Pentikost nî a ni. Chu mi hma chawlhkâr engemaw zâtah chuan a tlêm berah pawh Rom Awpna ram bial 15 aṭanga Judate leh saphunte chu Jerusalemah Kalhlen Kût hmang tûrin an lo kal khâwm a. Chu pentikost nîah chuan, hmân lai Babel in sak hun laia mi ang ni lovin, mi narante chu thlarau thianghlima lo khatin, hriat thiamna nêna ram chhûnga hman ṭawng chi hrang hranga chanchin ṭha an puang chhuak chu mi sâng tam takin an hmu a ni. (Tirhkohte 2:​1-12) Chu hun chu Kristian kohhran lo pian chhuahna leh ṭawng hrang hrang hmang khawvêl pum huap zirtîrna vawiin nî thlenga neih chhoh zêl bul inṭanna a ni.

2. Engtin nge C.E. 33 Pentikost nî khân Isua zirtîrte chuan an thusawi ngaithlatu mipui chi hrang hrangte chu ‘mak’ ti taka an siam?

² Isua zirtîrte chuan an hun laia ṭawng hman ber, Grik ṭawng chu an thiam ngei a rinawm a. Biak ina an ṭawng hman Hebrai ṭawng pawh an thiam bawk a ni. Amaherawhchu, chu Pentikost nîah chuan, chuta awm mipui chi hrang hrangte chuan anmahni pianpui ṭawng hmanga an ṭawng avângin “mak an ti hle” a. Eng nge a rah chhuah? Anmahni pianpui ṭawng ngeia an han hriat chuan a ngaithlatute thinlung chu thutak pawimawh tak chuan a khawih a. Tlai lamah chuan, zirtîr pâwl tlêm tête chu pâwl lian tak, mi 3,000 aia tam an lo ni chho ta hial a ni!​—⁠Tirhkohte 2:​37-42.

3, 4. Engtin nge Jerusalem, Judai, leh Galili ram aṭanga an pêm chhuah chuan, thuhrilhna hna chu a darh zau zêl?

³ Chu hun pawimawh tak a thlen hnu lawkah chuan, Jerusalemah tihduhdahna a lo thleng a, “a darhte chu khaw tinah an kal a, thu chu an hril zêl a.” (Tirhkohte 8:​1-4) Entîr nân, Tirhkohte bung 8-ah chuan Grik ṭawng hmang ni awm tak thuhriltu Philipa chungchâng chu kan chhiar a ni. Ani chuan Samari mite hnênah thu a hril a. Ethiopia mi lal tak pakhat hnênah pawh thu a hril a, ani chuan Krista thu chu a pawm a ni.​—⁠Tirhkohte 6:​1-5; 8:​5-13, 26-40; 21:​8, 9.

⁴ Kristiante’n Jerusalem, Judai, leh Galili ram zîm tak an han pêm chhuahsan chuan, hnam thar leh ṭawng dang hmangte chu an tâwk a. An zînga ṭhenkhat chuan Judate hnênah chauh thu an hril a ni thei. Amaherawhchu, zirtîr Luka chuan: “An zînga a ṭhen chu Kupra thliarkâr leh Kurini khuaa mite an ni a, chu mite chuan Antiokei khua chu an thlenin Grikte hnênah pawh thu an sawi a, Lalpa Isua chanchin ṭha chu an hril ve ta a,” tiin a sawi a ni.​—⁠Tirhkohte 11:​19-21.

Thleibîk Nei Lo Pathian Chuan Mi Zawng Zawng Tân Thuchah A Nei

5. Engtin nge ram chanchin ṭha chungchângah Jehova thleibîk neih lohzia chu a lan?

⁵ Chutiang thilthlengte chu Pathian kawng nên a inmil; duhsak bîk a neih loh avângin. Jehova’n hnam dangte a thlîr dân a siam ṭhatsak hnuah chuan, tirhkoh Petera chuan: “Pathianin mi duhsak bîk a nei lo tih dik takin ka hria e;  nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” tiin lâwm takin a sawi a ni. (Tirhkohte 10:​34, 35; Sâm 145:⁠9) Tûn hmaa Kristiante tiduhdah ṭhîntu tirhkoh Paula chuan Pathianin “mi zawng zawng chhandama awmah leh thutak hriaah a duh a ni” tih a puanchhuah khân, Pathianin thleibîk a nei lo tih a rawn nemnghet leh a ni. (1 Timothea 2:⁠4) Siamtu thleibîk neih lohzia chu a hmei a pa, eng hnam pawh, eng ram mi pawh, a nih loh leh eng ṭawng hmangte tân pawh Lalram beiseina a siamsakah hian a lang a ni.

6, 7. Eng Bible hrilh lâwkna hian nge khawvêl pum puia ṭawng hrang hrang hmangte hnêna chanchin ṭha darhna thu sawi lâwk?

⁶ Hetianga khawvêl pum puia darh zauna hi a hma kum zabi tam tak khân sawi lâwk a lo ni tawh a. Daniela hrilh lâwkna sawi dân chuan, “rorêlna te, ropuina te, ram te, [chu Isua] hnêna pêk a ni a, mi tin te, hnam tin te leh ṭawng tinte zawng zawng chuan a rawng an bâwl nân.” (Daniela 7:14) Dik takin, he magazine ngei hi ṭawng 151-a tihchhuah a ni a, khawvêl pum puia sem a ni bawk a, Jehova Lalram chanchin i chhiar theih phahna a nihna chuan, chu Bible hrilh lâwkna thlen famkimna chu a târ lang a ni.

⁷ Bible chuan ṭawng hrang hrang hmangte’n nun chhanhimna thu an hriat hun tûr chu a sawi lâwk tawh a. Biakna dikin mi tam takte a hîp khâwm dân tûr sawifiahin, Zakaria chuan: “Chûng nîahte chuan heti hi a la ni ang a, mi sâwm, hnam ze [“ṭawng,” NW] tinrêng aṭanga lo chhuakte chuan Juda mi pakhat fênfualah an vuanin an chelh ang a, I hnênah Pathian a awm tih kan hriat avângin i hnênah kan kal ve dâwn e, an ti ang, a ti a,” tiin a lo hrilh lâwk tawh a ni. (Zakaria 8:23; Galatia 6:16) Inlârnaa a thil hmuh chu sawiin, tirhkoh Johana chuan: “Ngai teh, mipui tam tak tuma chhiar sên  loh, hnam tin zînga mi te, chi tin zînga mi te, mi tin zînga mi te, ṭawng tin zînga mi te . . . lalṭhutphah hmaah leh Berâm No hmaa ding ka hmu a,” tiin a sawi a. (Thu Puan 7:⁠9) Chûng hrilh lâwknate chu a thleng dik mêk tih kan hmu tawh a ni!

Mi Zawng Zawng Hnênah Thlengin

8. Tûn lai huna thil awm eng hian nge kan thu hrilh dân siamrem ngaihtîr?

⁸ Tûn laiah mite chu ram dangah an pêm tam tual tual a. Khawvêl hmun hrang hranga sumdâwnna inzawm khâwmna chuan ram danga pêmna hun thar a ṭan a ni. Indona hmuna awmte leh ei leh bâr harsatna hmuna awm tam takte chu hmun him zâwkah dinhmun nghelnghet neih nân an pêm a. Ram tam takah chuan, pêmte leh râl tlânte avângin ram dang ṭawng hmanna vêng lian tak tak a lo awm phah a ni. Entîr nân, Finland ramah chuan ṭawng 120 aia tam hman a ni a; Australia ramah chuan ṭawng hrang hrang 200 aia tam hman a ni. United States-a khawpui pakhat San Diego-ah ringawt pawh ṭawng 100 aia tam hriat tûr a awm tlat a ni!

9. Kan rawngbâwlna bialchhûnga ṭawng dang hmangte chu eng angin nge kan thlîr ang?

⁹ Keini Kristian rawngbâwltute hian chutianga ṭawng hrang hmangte awmna chu kan rawngbâwlna dâltu angin kan thlîr em? Thlîr lo ve! Kan rawngbâwlna bialchhûng zauhna duhawm tak​—⁠‘lo, buh seng tûra êng’ tawh angin kan thlîr zâwk a ni. (Johana 4:35) An hnam leh ṭawng hman chu engpawh ni se, an thlarau lam mamawh hretute ngaihsak chu kan tum tlat a ni. (Matthaia 5:⁠3) Chu mi avâng chuan, kum tin mipui ‘ṭawng tin rêng hmang’ tam takte chu Krista zirtîrte an lo ni. (Thu Puan 14:⁠6) Entîr nân, August 2004-ah chuan German ramah thuhrilhna hna chu ṭawng 40-a neih a ni a. Chutih rual rual chuan, Australia-ah chuan chanchin ṭha chu ṭawng 30 dâwn lai hmanga hrilh a ni, kum sâwm lek kalta nêna khaikhin chuan ṭawng 18-in a pung a ni. Greece ramah, Jehova Thuhretute chuan ṭawng chi hrang hrang 20 dâwn laiin mite hnênah thu an hril a. Khawvêl pum puiah Jehova Thuhretu za zêla 80 vêlte chuan khawvêl ṭawng hman langsâr ber, Sâpṭawng  hmang lovin ṭawng dang an hmang zâwk a ni.

10. “Hnam tina” mite zirtîra siamnaah hian thuchhuahtu tinte chuan eng mawhphurhna nge an neih?

¹⁰ “Hnam tina mi zirtîrahte siam” tûra Isua thupêk chu tihpuitlin a ni nameuh mai! (Matthaia 28:19) Chu thupêk chu phûr taka pawmin, Jehova Thuhretute chuan ram 235-ah, thu leh hla chhuahte chu ṭawng 400 aia tamin an sem darh a ni. Jehova inawpna pâwl chuan mite hnêna chanchin thlen tûra thil mamawhte a pêk laiin, Lalram thuchhuahtu tinte chuan Bible thuchahte chu ‘mi zawng zawng’ hnênah an ṭawng hriatthiam ber hmanga hrilh tûrin hma an la tûr a ni. (Johana 1:⁠7) He ṭan rualna hian ṭawng hrang hrang hmang mi maktaduai tam takte chu ram chanchin ṭha hlâwkpui tûrin a ṭanpui a. (Rom 10:​14, 15) Ni e, mi tin hian chanvo pawimawh tak kan chang ṭheuh a ni!

Chona Chu Hmachhawnin

11, 12. (a) Eng chona nge hmachhawn ngai a, thlarau thianghlimin engtin nge a ṭanpui? (b) Engvângin nge mite hnêna an pianpui ṭawng hmang ngeia thu hrilh chu a ṭangkai fo?

¹¹ Tûn laiah, Lalram thuchhuahtu tam takte chuan ṭawng dang zir chu an duh a, Pathian thlarauvin mak tak maia ṭawng danga a ṭawng theihtîr erawh an beisei thei lo. (1 Korinth 13:8) Ṭawng thar zir hi thil harsa tak a ni a. Ṭawng dang hmang thiam reng tawhte pawhin hnam dân leh pian leh mûrna hrang daih nei, chu mi ṭawng hmangte tâna Bible thuchah chu duhawm tak nihtîr tûr chuan an thil ngaih dânte leh an va biak pawh dânte an siam rem a ngai mai thei a ni. Chutah, pêm tharte lah chu an lo zakzum ṭhîn bawk nên; an rilru sûkthlêk dân hre thiam tûr chuan ṭan lâk a ngai a ni.

¹² Nimahsela, ṭawng dang hmangte ṭanpui tûra ṭan an lâknaah thlarau thianghlim chuan Jehova chhiahhlawhte zîngah hna a la thawk reng tho a ni. (Luka 11:13) Mak tak maia ṭawng dang thiam theihna min pêk aiin, thlarau thianghlim chuan ṭawng dang hmangte biak pawh duhna nasa tak min pe thei a ni. (Sâm 143:10) An ṭawng hman ṭhan lohva Bible thuchah mite zirtîr emaw, hrilh emaw chuan an thinlung a thleng mai thei a. Amaherawhchu, ngaithlatute thinlung khawih tûr chuan, an pianpui ṭawng ngei hman chu a ṭha ber fo​—⁠an thinlung chhûng ril bera an tum, an rilru, leh an beisei te khawih thei ṭawng ngei hman chu.​—⁠Luka 24:32.

13, 14. (a) Engin nge ṭhenkhat chu ṭawng dang hmanga rawngbâwl tûra chêttîr? (b) Engtin nge mahni inpêkna chu a lan chhuah?

¹³ Lalram thuchhuahtu tam takte chuan Bible thutak an dawng duh tih an hriat hian, ṭawng dang hmanna hmuna rawngbâwl chu an thlang a. Mi dangte erawh chuan an rawngbâwlna chu harsa zâwk leh tuiawm tak a nih hian an phûr sauh a ni. “Europe Khaw Chhak lam aṭanga lo kal tam takte chu thutak châkin an tuihâl a ni,” tiin Europe chhim lama Jehova Thuhretute branch office pakhat chuan a sawi. Chutianga dawngsawng duhte han ṭanpui chu a va lungawithlâk tehlul êm!​—⁠Isaia 55:​1, 2.

¹⁴ He hnaa awmze nei taka thawk ve tûr hian tum ruhna leh mahni inpêkna erawh kan neih a ngai a ni. (Sâm 110:3) Entîr nân, Japan rama Thuhretu tam takte chuan khawpui lian taka an in leh lo nuam takte kal sanin, China mi pêm tharte Bible hre thiam tûra ṭanpui tûrin, thingtlâng lamah an insawn a. United States khaw thlang lam tuipui kianga thuchhuahtute chuan Filipine mite Bible zirpui tûrin dârkâr khat aṭanga dârkâr hnih chhûng chu motor khalhin an kal ziah bawk. Norway ramah chuan nupa tuakkhat chuan Afghanistan aṭanga lo kal chhûngkaw khat chu Bible an zirpui a ni. Thuhretu nupa chuan Eng Nge  Pathianin Min Phût? * tih brochure Sâpṭawng leh Norway ṭawnga tih chhuah chu an hmang kawp a. Chu chhûngkua chuan an pianpui ṭawng Dari nêna in hnaih tak Persian ṭawngin a paragraph chu an chhiar a. Sâpṭawng leh Norway ṭawng hmangin an sawiho thung a ni. Chutianga mahni inpêkna leh insiamremna chu ram dang mite’n chanchin ṭha an han chhân lêt hian nasa taka malsâwm a ni. *

15. Engtin nge kan vaiin ṭawng chi hrang hrang hmanga thu hrilhnaah kan tel theih?

¹⁵ He ṭawng chi hrang hrang hmanga rawngbâwlnaah hian i tel ve thei em? In bialchhûnga ṭawng dang hman tam ber chu engah nge i zawn chhuah nghâl loh vang le? Tichuan, chung ṭawnga chhuah tract emaw, brochure emaw tlêm azâwngte chu i keng tel ang a. Lehkhabu tê Good News for People of All Nations tih 2004-a tlângzarh chu, ṭawng chi hrang hranga a thuchah ken hriat awlsam tak leh ṭha tak avângin Lalram beiseina thehdarhna hmanraw ṭangkai tak a ni der tawh a ni.

‘Ram Dang Mite Chu Hmangaihin’

16. Engtin nge unau mawhphurhna neite’n ṭawng dang hmangte tâna mahni hmasial lo ngaihsakna an lantîr?

¹⁶ Ṭawng dang kan thiam emaw, thiam lo emaw pawh nise, kan vêng chhûnga ram dang mite thlarau lam zirtîrnaah kan ṭanpui thei ṭheuh a ni. Jehova chuan a mite chu “ram dang mite chu hmangaih” tûrin a zirtîr a. (Deuteronomy 10:​18, 19) Entîr nân, North America khawpui lian tak pakhatah chuan kohhran pangate chuan Kingdom Hall pakhat an inṭâwm a. Hall tam taka tih ṭhin angin, inkhâwm hun chu kum tin thlâk kual a ni ṭhîn a, chu chuan China ṭawnga inkhâwmna neih chu Chawlhni tlai lama neih a nihtîr dâwn a ni. Mahse, hmun hran aṭanga rawn pêm lût restaurant leh a kaihhnawih lama thawkte tân inkhâwm theih a ni dâwn lo va. Kohhran danga upate chuan ngilnei takin China hote inkhâwm chu Chawlhni zîng lama neih theih atân an siamrem ta a ni.

17. Ṭhenkhatin ṭawng dang hmangte ṭanpui tûra insawn an tum hian chu chu engtin nge kan ngaih ang?

¹⁷ Enkawltu hmangaihna nei takte chuan ṭawng dang hmangte ṭanpui duh unaupa leh unaunu tling leh thiam takte chu an fak a. Chûng Bible zirtîrtu tling takte chu an awmna kohhran tân chânna ni mah se, enkawltute chuan Lustra leh Ikonion-a upate ngaih dân ang tho chu an nei a ni. Chuta upate chuan anmahni kohhran tân Timothea chu ṭangkai hle mah se, Paula nêna an zin dun tûr chu an dang bet lo. (Tirhkohte 16:​1-4) Chu bâkah, thuhrilh hnaa hma hruaitute chu ram dang mite thil ngaih dân hrang, hnam dân hrang, a nih loh leh tih dân hrangte chuan a tilunghnual lo. Danglamnate chu pawmin, chanchin ṭha atân inlaichînna ṭha neih chhoh theihna kawng an dap zâwk a ni.​—⁠1 Korinth 9:​22, 23.

18. Eng kawngka zau tak leh sâwt tak nge mi tinte tân inhawng?

¹⁸ Hrilh lâwk ang ngeiin, chanchin ṭha hi “ṭawng tinrêng” hmangte hnênah hrilhin a awm mêk a. Ṭawng dang hmanna hmunah nasa taka pun chhoh beiseina a la awm cheu va. Thuchhuahtu hmangchâng hria sâng tam takte chu he ‘kawngka zau tak leh sâwt takah’ hian an lût tawh a ni. (1 Korinth 16:9) Mahse, a dawta thuziakin a târ lan tûr angin, chûng bialte chawm chho tûr chuan thil tam zâwk mamawh a la ni cheu a ni. (w05 12/1)

[Footnote-te]

I Hrilhfiah Thei Em?

• Engtin nge mi zawng zawngte laka thleibîk neih lohna kawngah Jehova kan entawn theih?

• Engtin nge kan bialchhûnga kan ṭawng hman ang hmang lotute chu kan thlîr ang?

• Engvângin nge mite hnêna an pianpui ṭawng ngeia thu hrilh chu a ṭangkai?

• Engtin nge kan zînga ram dang mi awmte chungah ngaihsakna kan lantîr theih?

[Zirlai Atâna Zawhnate]

[Phêk 23-naa map/milem]

(A lan dân tûr dik tak hriat nân, a lehkhabu en rawh)

Rom

KRET

ASIA

PHRUGIA

PAMPHULIA

PONTO

KAPPADOKIA

MESOPOTAMIA

MEDIA

PARTHAI

ELAM

ARABIA

LIBUA

AIGUPTA

JUDAI RAM

Jerusalem

[Tuipuite]

Mediterranean Tuipui

Tuipui Dum (Black Sea)

Tuipui Sen

Persian Gulf

[Milem]

C.E. 33, Pentikost-ah chuan Rom Awp ram 15 aṭanga mite chuan anmahni pianpui ṭawng ṭheuhvin chanchin ṭha an hria

[Phêk 24-naa milemte]

Ram dang mi tam takin Bible thutak an dawngsawng ṭha hle

[Phêk 25-naa milem]

Ṭawng chi ngaa Kingdom Hall chhinchhiahna thuziak