Ṭhatnain Sual A Ngam Dân Tûr

Lal Davida chu mi ṭha a ni. Pathian hmangaihna thûk tak a nei a, dikna a ngainain, pachhiate khawngaihna a nei a. Mahse, he lal ṭha bawk hian, a mi rinawm nupui chu a uirê a. Davida chuan chu pa nupui, Bath-sebi chu a rai tih a hriat chuan, a tâwpah a pasal tihhlum dân tûr ruahmanna a siam a. Tichuan, a bawhchhiatna thup tumin Bath-sebi chu nupuiah a nei ta a ni.​—⁠2 Samuela 11:​1-27.

MIHRINGTE’N thil ṭha an tithei hle tih a lang a. A nih leh engvângin nge thil sual nasa tak an tih? Bible chuan a chhan bulpui chu a târ lang nual a. Pathianin Krista Isua hmanga sualna a tihbo hlen dân tûr a târ lang bawk.

Sual Lam Ngaihtuahna

Lal Davida ngei chuan sual thiltih awmtîrtu pakhat chu a târ lang a. A bawhchhiatna laihlan a nih hnu chuan, a thil sual tih mawh chu a phur a ni. Tichuan, inchhîr takin: “Ngai teh, khawlohnaa dinin ka awm a; ka nun sualin mi pai a,” tiin a ziak a ni. (Sâm 51:⁠5) Nuin thil sual ti tûr fa a pai chu Pathian thiltum a ni ngai lo. Mahse, Evi leh a hnua Adama’n Pathian laka hel an thlan tâkah khân, sual nei lo fa hrin theihna chu an hloh va. (Rom 5:12) Mihring ṭha famkim lote an lo pun tâk deuh deuhvah chuan, “mihring rilru ngaihtuahnate chu an naupan têt ata a sual” tih chu a lo chiang ta a ni.​—⁠Genesis 8:⁠21.

Thunun a nih loh chuan, he sual lam ngaihtuahna hian “inngaihna te, . . . huatna te, inhauna te, thîkna te, thinurna te, inkhinna te, awm hranna te, rin hranna te, îtsîkna te,” leh thil dang Bible-in “tisa thiltihte” tia a sawi mi tichhe thei nungchangte chu a  rah chhuak a ni. (Galatia 5:​19-21) Lal Davida chungchângah chuan, tisa lam chak lohnaah tluin, inngaihna sual a ti a, chu chuan buaina nasa tak a thlen a ni. (2 Samuela 12:​1-12) A ngaihtuahna bawlhhlawh chu do tûr a ni nâ a le. Do ai mahin, Davida chuan Bath-sebi a duhna chu ngaihtuah zêlna hmangin, a hnua zirtîr Jakoba târ lan ang nun phung chu a zui zâwk a ni: “Mi tin mahni châkna hruai bo leh hîpa an awm chuan thlêmna an tâwk a ni zâwk e. Tin, châkna chuan no a pai a, sual a hring ṭhîn a; tin, sual chuan a lo puitlinin thihna a hring ṭhîn,” tih chu.​—⁠Jakoba 1:​14, 15.

Thuziak hmasaa târ lan tâk, tualthahnate, pawngsualnate, leh insuamnate chu mite’n châkna sualin an thiltih an kaihhruaitîr huna thil thlengte entîrna turu takte chu a ni.

Hriat Loh Avânga Thil Sual Tih

Tirhkoh Paula thiltawn chuan mite’n thil sual an tih chhan pahnihna chu a târ lang a ni. Paula a thih meuh chuan, mi nunnêm, ngainatna nei tak tih hming ṭha a nei a. A Kristian unaute rawng chu mahni hmasial lo takin a bâwlsak a ni. (1 Thessalonika 2:​7-9) Mahse, chu mi hma, Saula tia hriat a nih lai chuan, he pâwl hi dovin, “a vau thu leh thah a tum thu a chhâk chhuak” a. (Tirhkohte 9:​1, 2) Engvângin nge Paula chuan Kristian hmasate chunga thil sualtih chu rem tihpuiin, chu thil sualtihnaah chuan a tel? ‘Hre lova ti ka ni,’ a ti. (1 Timothea 1:​12, 13) Ni e, Paula chuan tûn hmain ‘Pathian lamah ṭhahnem a ngai a, hre famkim ang erawh chuan a ngai lo,’ hriatna dik a neih loh avângin.​—⁠Rom 10:⁠2.

Paula angin, mi rilru ṭha tam tak chuan Pathian duhzâwng hriatna dik an thlâkchham avângin thil sual an ti a ni. Entîr nân, Isua’n a hnung zuitute hnênah: “Tupawh a tihlum tûr che u apiangin Pathian chungah thil ṭha tiin an inhria ang, chutiang hun chu a thleng dâwn,” tiin a vaukhân a ni. (Johana 16:⁠2) Isua thute dikzia chu tûn laia Jehova Thuhretute hian an tawng a. Ram tam taka, tihduhdah an ni a, Pathian rawngbâwl intite kut tuarin an thi hial a ni. Chiang takin, chutiang ṭhahnemngaihna sual chuan Pathian dik chu a tilâwm lo.​—⁠1 Thessalonika 1:⁠6.

Sualna Bul Ṭantu

Isua chuan sual a awm chhan bul ber chu a târ lang a. Amah thah tum sakhaw hruaitute hnênah: “Nangni zawng in pa diabola hnêna chhuak in ni a, in pa duhzâwng tih in duh a ni. Ani chu atîr ata tualthat a ni,” a ti. (Johana 8:44) Mahni hmasial taka Adama leh Evi te Pathian laka hel tûra thlêmtu chu amah Setana hi a ni a. Chu helna chuan mihring zawng zawng hnênah sual​—⁠leh chu mi avânga thihna​—⁠chu a hmêlhriattîr a ni.

Setana tualthah duhna rilru chu Joba chunga a thiltihah khân a lang chiang lehzual a. Jehova’n Joba rinawmna chhin a phal khân, Setana chuan Joba hausakna hlih thlâksak chu a duh tâwk mai lo. A fa sâwmte chu a tihlum bawk a ni. (Joba 1:​9-19)  Tûn hnai kum sâwmbi-ahte hian, mihringte chuan sualna pung zêl chu an tawng a, chu chu mihring ṭhat famkim loh avâng leh hriat lohna avâng a ni a, mihringte chungchânga Setana a inrawlh zual sauh vâng pawh a ni bawk. Bible chuan Diabola chu “leiah an paih a, a tirhkohte pawh an paih thla tel” tih a târ lang. Chu hrilh lâwkna bawk chuan Setana leia paih thlâk a nihnain a rawn thlen tûr ‘leia chungpikna’ nasa tak chu a sawi lâwk dik hle a. Setana’n mite chu thil sual ti tûrin tilui thei lo mah se, ‘khawvêl zawng zawng bumna kawngah’ erawh chuan a thiam hle a ni.​—⁠Thu Puan 12:​9, 12.

Sual Lam Ngaihtuahna Paih Bona

Mihringte zîng aṭanga sual nuai bo hlen tûr chuan, pianpui sual lam ngaihtuahna te, hriatna dik tlâkchhamna te, leh Setana thununnate chu paih bo a ngai dâwn a ni. A hmasa berin, engtin nge mihring thinlunga pianpui sual lam ngaihtuahna chu paih bo theih a nih ang?

Mihring dâktawr thiam emaw, mihring siam damdawi ṭha emaw a engamah hian chu chu a ti thei lo. Mahse, Pathian Jehova chuan a pawm duhte tân sual rochung leh ṭhat famkim lohna thawidamna chu a buatsaih a ni. Tirhkoh Johana chuan: “Isua thisenin kan sual zawng zawng min tlenfaisak,” tiin a ziak a. (1 Johana 1:⁠7) Mihring ṭha famkim Isua’n mahni duhthua a nun a hlan khân, ani chuan “sual lamahte thi tawhin felna lamah kan nun theih nân amah ngeiin thingah khân a taksain kan sualte a phur” a ni. (1 Petera 2:​24) Isua inthawina chuan Adama sual tih rahchhuah chu a paih bo a ni. Paula chuan Krista Isua chu ‘mi zawng zawng tlantu’ a lo ni tih a sawi. (1 Timothea 2:⁠6) Ni e, Krista thihna chuan mihring zawng zawng tân Adama hloh tâk ṭhat famkimna neih leh theihna kawng a hawng a ni.

Mahse, tihian i zâwt mai thei a, ‘Kum 2000 vêl kal taa Isua thihnain mihringte ṭhat famkimna a neih lêttîr theih si chuan, engvângin nge sualna leh thihna a la awm cheu?’ tiin. Chu zawhna chhânna hmuh chhuahna chuan sual awmtîrtu pahnihna​—⁠mihringin Pathian thiltumte a hriat lohna​—⁠chu paih bo tûrin a ṭanpui thei a ni.

Ṭhatna Chu Hriatna Dikin A Tiphuisui

Jehova leh Isua’n sualna nuai bo tûra tûna an thiltih mêkte hriatna dik neihna chuan mi rilru ṭha chu hre lo chunga thilsual tihna pawmzamna, a nih loh leh a aia nasa, “Pathian do” nihna lakah a vêng thei a. (Tirhkohte 5:​38, 39) Pathian Jehova chuan hriat lohna avânga tûn hmaa thil sual tihte chu a haider duh a ni. Tirhkoh Paula chuan Atheni mite hnêna a thusawinaah: “Pathianin kan hriat loh laite a haider ṭhîn a; nimahsela tûnah hian ram tina mi zawng zawng sim tûr thu a pe ta a ni, ni a tiam avângin; chu mi niah chuan a mi ruata chu, leia mite fel takin a ngaihtuahtîr ang; chu chu Pathianin amah chu mitthi zîng ata kai thovin, mi zawng zawng hnênah a hriattîr tawh a ni,” a ti.​—⁠Tirhkohte 17:​30, 31.

Tho leh Isua ngeiin Paula chu biaa Kristian hmasate tiduhdah lo tûra a khap avângin, Paula chuan Isua chu thihna ata kaihthawh a ni ngei tih a hria a ni. (Tirhkohte 9:​3-7) Paula chuan Pathian thiltum hriatna dik tak a dawn veleh, mahni inthlâkthlengin, Krista entawntu mi ṭha tak a lo ni a. (1 Korinth 11:1; Kolossa 3:​9, 10) Chu bâkah, Paula chuan “he ram chanchin ṭha” hi ṭhahnemngai takin a hril a ni. (Matthaia 24:14) Isua a thiha a thawhleh hnu kum 2000 dâwn chhûng hian, Krista chuan a lalrama amah nêna rorêl tûrin, mihring zîng ata Paula ang mite chu a thlang a ni.​—⁠Thu Puan 5:​9, 10.

Kum zabi liamta chhûng zawng leh tûn thleng hian, Jehova Thuhretute chuan Isua thupêk: “Kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula, thu ka pêk zawng zawngte che u pawm tûrin zirtîr rawh u,” tih chu ṭhahnemngai takin an hlen a. (Matthaia  28:​19, 20) He thuchah dawngsawngtute chuan Krista vân lam sawrkâr hnuaia awm leia chatuan nun beiseina chu an nei a ni. Isua chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” a ti a. (Johana 17:⁠3) He hriatna nei tûra tuemaw ṭanpui chu miin mi dang tâna a tihsak theih zînga thil ṭha ber a ni.

Sual tinrêngin a hual vêl chung pawhin, he Ram chanchin ṭha pawmtute hian “hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te” ang miziate chu an lantîr a. (Galatia 5:​22, 23) Isua entawnin, ‘tu sual pawh sualin an thungrûl lo’ bawk a ni. (Rom 12:17) Mi mal tin chuan, “ṭhatnain sual chu ngam zâwk” an tum a ni.​—⁠Rom 12:21; Matthaia 5:​44.

Sual Ngam Hlenna

Mihringte chuan anmahniin sualna tichhuaktu bul ber Diabol-Setana chu an ngam thei ngai dâwn lo va. Mahse, Jehova chuan Isua chu Setana lû tithitling tûrin a rawn hmang thuai ang. (Genesis 3:15; Rom 16:20) Jehova chuan mihring chanchin tluan chhuaka sualna nasa tak awmtîrtu politics kal hmang zawng zawng pawh chu ‘tikeh sawm a, tiral’ tûrin Krista Isua chu a kaihruai bawk ang. (Daniela 2:​44; Thuhriltu 8:⁠9) Lo thleng tûr rorêlna nî chhûng hian, “kan lalpa Isua chanchin ṭha âwih lo” zawng zawngte chuan “hrem an tuar ang, . . . chatuana boralna chu.”​—⁠2 Thessalonika 1:​6-10; Zephania 1:​14-​18.

Setana leh amah thlâwptute tihboral an nih tawh chuan, vân aṭangin Isua’n dam khawchhuakte chu atîra dinhmun anga leilung din thar leh tûrin a ṭanpui ang. Krista chuan lei din thar leha nung tlâk zawng zawngte chu a kai tho bawk ang. (Luka 23:​32, 39-​43; Johana 5:​26-​29) Chutianga tiin, Isua chuan mihringte tawrh sualna rahchhuah ṭhenkhat chu a sût ang.

Jehova chuan mite chu Isua chanchin ṭha âwih tûrin a tilui dâwn lo va. Amaherawhchu, nunnaa hruaitu hriatna neih theihna hun remchâng a pe ang. He hun remchâng hi hman ṭangkai vat a va pawimawh tak êm! (Zephania 2:​1-3) Chutianga i hman ṭangkai chuan, tûna i nun tichhe mêktu sualna eng pawh hmachhawn dân i hria ang a. Krista’n sualna a ngam hlen dân chu i hmu bawk ang.​—⁠Thu Puan 19:​11-​16; 20:​1-3, 10; 21:​3, 4. (w06 1/1)

[Phêk 5-naa milem]

Saula’n hriatna dik a tlâkchham avângin thilsual tih rem a tihpui

[Phêk 7-naa milem]

Pathian hriatna dik nei tûra tuemaw ṭanpui chu miin mi dang tâna a tihsak theih zînga thil ṭha ber a ni