Felna Zawnna Chuan Min Vênghim Ang
Felna Zawnna Chuan Min Vênghim Ang
“[Pathian] felna chu zawng hmasa zâwk rawh u.”—MATTHAIA 6:33.
1, 2. Eng thu tlûkna nge Kristian ṭhalai pakhatin a siam a, engvângin nge chu thu tlûkna chu a siam?
ASIA khawmuala Kristian nula pakhat chuan sawrkâr office-ah secretary hna a thawk a. A taimain, hna thawk tûrin a kal hma a, a hnaah chuan a zelthel lo bawk. Amaherawhchu, a hna chu hna nghet a nih loh avângin, a thawh dân en ṭhat a ngai a. A thawhna hotu ber chuan a mutpui phawt chuan hna nghet a pe ang a, dinhmun sâng zâwk pawh a pe ang tih chu a hrilh a. Ani chuan a hna a chânna tûr pawh ni se, chu chu a hnâwl fithla ṭhak a ni.
2 Chu Kristian nula thiltih chu a âwm lo viau em? Awm lo lo ve, ani chuan Isua thu: “[Pathian] felna chu zawng hmasa zâwk rawh u,” tih chu fîmkhur takin a zui zâwk a ni. (Matthaia 6:33) A tân chuan, thu bul dikte zui chu mipat hmeichhiatna hman khawlohna hmanga hlâwkna neih ai chuan a pawimawh hle zâwk a ni.—1 Korinth 6:18.
Felna A Pawimawhna
3. Eng nge felna chu?
3 “Felna” tih chuan nungchang lama nghehna leh rinawmna a kâwk a. Bible-ah chuan felna atâna Grik leh Hebrai thu mal chu ngîl, a nih loh leh dik tihna a ni. Hei hi mi mal intihfelna, mahni tehna hmanga mahni bawk inendikna a ni lo. (Luka 16:15) Hei hi Jehova tehna aṭanga dikna a ni a. Pathian felna hi a ni.—Rom 1:17; 3:21.
4. Engvângin nge Kristian tân felna a pawimawh?
4 Engvângin nge felna chu a pawimawh? A chhan chu, “felna Pathian,” Jehova chuan a mite’n felna an nunpui hian a duhsakna a pêk vâng a ni. (Sâm 4:1; Thufingte 2:20-22; Habakuka 1:13) Tupawh fel lo taka thilti chuan Pathian nêna inlaichînna hnai tak a nei thei lo. (Thufingte 15:8) Chuvâng chuan a ni, tirhkoh Paula’n Timothea chu: “Tleirâwl châknate chu tlânsan la, thinlung thianghlima Lalpa lam apiangte zîngah chuan felna . . . chu [mize pawimawh dangte rualin] ûm ve rawh,” tia a fuih ni. (2 Timothea 2:22) Hei hi Paula’n thlarau lam râlthuam chi hrang hrangte a sawi ṭuma “felna âwmphaw” a telh chhan pawh a ni bawk.—Ephesi 6:14.
5. Engtin nge thil siam ṭha famkim lote hian felna an zawn theih?
5 Mihring tumah hi an fel famkim vek lo ngei mai a. Mi zawng zawngin Adama aṭangin ṭhat famkim lohna an rochun avângin, mi zawng zawngte chu an pian tirh ata mi sual, fel lo tak an ni. Mahse, Isua chuan felna kan zawng tûr a ni tih a sawi a. Chu chu engtia zawn theih nge a nih? Isua’n min tlan nâna a nun ṭha famkim a pêk avângin felna chu zawn theih a ni a; tin, chu inthawinaa rinna nung kan lantîr chuan, Jehova chuan kan sualte chu a ngaidam duh a ni. (Matthaia 20:28; Johana 3:16; Rom 5:8, 9, 12, 18) Chu mi ṭanchhana kan chak lohnate hneh tûra ṭanpuina kan dîl a, Jehova tehna dikte kan zir paha theih tâwp chhuaha zawm kan tum hian Jehova chuan amah kan biakna chu a pawm a ni. (Sâm 1:6; Rom 7:19-25; Thu Puan 7:9, 14) A va thlamuanthlâk tak êm!
Fel Lohna Khawvêla Fel
6. Engvângin nge Kristian hmasate tân khawvêl chu hmun hlauhawm tak a nih?
6 Isua zirtîrte’n “kâwlkil thleng pawha” a thuhretute ni tûra thupêk an dawn khân, dinhmun harsa tak chu an hmachhawn a ni. (Tirhkohte 1:8) An thlawhhma bial zawng zawng chu Setana, “misual thu thuin” a awm a. (1 Johana 5:19) Khawvêl chu a awmtîr thlarau sual chuan a chiahpiah vekin, Kristiante chuan a thununna ṭha lo chu an tâwk dâwn a ni. (Ephesi 2:2) An tân chuan, khawvêl chu hmun hlauhawm tak a ni. Pathian felna an zawn hmasak chauhvin an rinawmna vawng chungin an tuar chhuak thei dâwn a. Tam takte chuan an tuar chhuak a, ṭhenkhat erawh chu ‘felna kawng’ ata an kal pêng thung a ni.—Thufingte 12:28; 2 Timothea 4:10.
7. Eng mawhphurhnain nge Kristian chu thununna ṭha lo a do ngaihtîr?
7 Tûn laia Kristiante tân khawvêl hi a him zâwk em? Him lul lo ve! Kum zabi khatna hun aiin a chhe zâwk daih a ni. Chu bâkah, Setana chu leia paihthlâk a ni tawh a, hriak thih Kristian, “[hmeichhe] thlah la awm Pathian thupêkte zâwma Isua hriattîrna thu pawmte” chu râwng takin a do a ni. (Thu Puan 12:12, 17) Tin, chu “thlah” ṭanpuitu apiangte chu Setana chuan a bei bawk. Chutichung chuan, Kristiante chu khawvêl aṭangin an inthupbo thei lo. Khawvêla mi an ni lo nachungin, chutah chuan an chên a ngai a. (Johana 17:15, 16) Rilru dik tak pute zawng chhuak tûrin thu an hrilh a ngai a, Krista zirtîr ni tûrin an zirtîr a ngai bawk a ni. (Matthaia 24:14; 28:19, 20) Kristiante’n he khawvêl thununna ṭha lo an pumpelh pumhlum theih loh avângin chûngte chu an do a ngai a ni. Chûng thununnate zînga pali chu ilo ngaihtuah ang u.
Nungchang Bawlhhlawhna
8. Engvângin nge Israelte chuan Moab-ho pathiante an biak tâk mai?
8 Kum 40 thlalêra an kalna tâwp lamah chuan, Israel tam takte chu felna kawng ata an pêng a. Jehova chhan chhuahna thiltih tam tak an mit ngeiin an hmu a, Ram Tiam chu an lût ṭêp tawh a ni. Mahse, chu hun pawimawh takah chuan, Moab-ho pathiante chu an bia a ni. Engvângin nge? “Tisa châkna” lama an tlâwm vâng a ni. (1 Johana 2:16) An chanchin ziak chuan: “Moab-ho fanute chu an pâwl ta hlawm a,” a ti.—Number 25:1.
9, 10. Tûn laia eng dinhmunin nge tisa châkna ṭha lo thununna dik lo chu hriat reng ti pawimawh?
9 Chu thilthleng chuan tisa châkna dik lovin mi fîmkhur lote a tihchhiat theih dân a târ lang a ni. Nungchang bawlhhlawhna hi nun phung pângngai anga thlîr a nih chhoh zêl tâkah chuan, chu thilthleng aṭang chuan kan inzir tûr a ni. (1 Korinth 10:6, 8) United States aṭanga thu dawn chuan: “Kum 1970 vêl hma kha chuan, America rama state zawng zawngah khawsak tlân [nupa ni lo khawsak dun] chu dân kalh a ni a. Tûnah chuan tih dân phung pângngai a ni ta. A vawikhatna atâna innei zawng zawng zînga a chanve aia tamte hi an inneih hmain nupa angin an khawsa dûn tawh a ni,” tiin a sawi. Chutiang leh a anpui inphalraina chu ram pakhata awm mai a ni lo. Khawvêl hmun hrang hrangah hmuh a ni a, lungchhiatthlâk takin, Kristian ṭhenkhat chuan chutiang tih dân chu zuiin—Kristian kohhrana an dinhmunte pawh an hloh hial a ni.—1 Korinth 5:11.
10 Chu bâkah, nungchang bawlhhlawhna chu hmun tinah theh darh niin a lang. Cinema leh TV program-te chuan inneih hmaa mipat hmeichhiatna hman chu ṭhalaite tân pawm a pawina awm rêng rêng lo angin a sawi hmuh a. Mawngkawhurna chu thil pângngai angin a târ lang a ni. Film tam takte chuan inpâwl lai lemte chu chiang lehzualin an lantîr tial tial bawk a. Internet-ah lah chutiang inpâwl lai milem chu awlsam taka hmuh theih a ni. Entîr nân, chanchinbua thuziaktu pakhat chuan a fapa kum sarih mi chu school aṭangin a lo haw a, school-a a ṭhian pakhatin Internet-a hmeichhe saruaka awmin mi a pâwl lai lem a hmuh thu a pa hnênah phûr takin a rawn hrilh tih a târ lang. A pa chuan râpthlâk a ti hle a; mahse, naupang engzât fakauvin nge an nu leh pate hrilh lovin chutiang chu hmu ang maw? Chu bâkah, nu leh pa engzâtin nge an fate khelh vedio-game chhûnga thil awmte chu hriatpui? Chutiang vedio-game tam tak chuan nungchang bawlhhlawh tak te, ramhuai zâwlna leh tharum thawhna te pawh a târ lang a ni.
11. Engtin nge chhûngkua chu khawvêl nungchang bawlhhlawhna aṭanga vênhim a nih theih ang?
11 Engtin nge chhûngkuain chutiang “intihhlimna” bawlhhlawh chu an do theih ang? Pathian felna zawng hmasain, leh bawlhhlawhna engpawh pumpelhna hmangin an do thei a ni. (2 Korinth 6:14; Ephesi 5:3) Nu leh pa, an fate thiltih ṭha taka endiktute leh an fate laka Jehova leh a dân felte hmangaihna tuhtute chuan zahmawh lam thil te, zahmawh lam thil telna video game-te, cinema bawlhhlawhte leh thlêmna fel lo dangte lakah an fate chu an vênghim a ni.—Deuteronomy 6:4-9. *
Tualchhûng Aṭanga Nêksâwrna Hlauhawm
12. Eng buaina nge kum zabi khatnaah chhuak?
12 Paula chuan Asia minor-a Lustra khuaa a awm laiin, mak tak maiin mi pakhat a tidam a. Thuziak chuan heti hian a sawi: “Mipuiten Paula thiltih chu an hmuh veleh Lukaoni ṭawngin, ring takin, ‘Pathiante chu mihring angin kan hnênah an lo chhuk ta a nih hi!’ an ti a. Tin, Barnaba chu ‘Jupita’ an ti a, Paula chu thusawitu zâwk a nih avângin, ‘Merkuria’ an ti a,” tiin. (Tirhkohte 14:11, 12) A hnuah chûng mipuite bawk chuan Paula leh Barnaba te chu thah an duh a ni. (Tirhkohte 14:19) Chiang takin, chûng mipuite chu tualchhûng nêksâwrna chuan a thunun hneh hle a ni. Chu lai hmuna awm ṭhenkhat Kristian an lo nih chuan, an puithuna âtthlâk chîn duhna thinlung chu an la nei chhunzawm zêl niin a lang. Paula chuan Kolossa khuaa Kristiante hnêna a lehkha thawnah chuan ‘vântirhkoh biakna’ lakah a vaukhân a ni.—Kolossa 2:18.
13. Kristianin a pumpelh tûr hnam dân ṭhenkhat chu engte nge ni a, engtin nge pumpelh tûra chakna a hmuh theih ang?
13 Tûn laiah, Kristian dikte pawhin hetiang tho hian Kristian thu bulte palzûttu sakhaw dik lote ngaih dân aṭanga lo chhuak hnam dânte chu lâr hle mah se an pumpelh a ngai a ni. Entîr nân, ram ṭhenkhatah chuan chhiatni ṭhatni nêna inkaihhnawih thil chîn tam takte chu, thih huna thlarau nung zawm zêl awm anga sawi dâwt thu aṭanga lo chhuak a ni. (Thuhriltu 9:5, 10) Ram ṭhenkhatah chuan, hmeichhe naupangte serh hlehsak chu tih ṭhan a ni a. * Hei hi thil ṭûl lo leh nunrawnthlâk tak, Kristian nu leh pate’n an fate laka an bat hmangaihnaa enkawl nên chuan a inmil lo hle a ni. (Deuteronomy 6:6, 7; Ephesi 6:4) Engtin nge Kristiante chuan tualchhûng nêksâwrna chu do va, chûng chîn dânte chu an kalsan theih ang? Jehova rin punhlumna hmangin. (Sâm 31:6) Felna Pathian chuan an thinlung aṭanga: “Ka inhumhimna leh ka kulhpui; ka Pathian, ka rina chu [i] ni,” tia a hnêna sawitute chu a tichakin, a enkawl dâwn a ni.—Sâm 91:2; Thufingte 29:25.
Jehova Theihnghilh Suh
14. Israelte Ram Tiam an luh hma lawkah Jehova’n eng vaukhânna nge a pêk?
14 Israelte’n Ram Tiam an luh hma lawk khân, Jehova chuan amah theihnghilh lo tûrin a vaukhân a. “A thupêk te, a rorêlna te, a dân te, vawiina ka pêk che u hi zâwm lovin LALPA in Pathian chu in theihnghilh dah rual ang e, fîmkhur rawh u; chutilochuan in ei a, in tlai a, in ṭha takte in sak a, in luah hun leh, in ran rual te, in berâm rual te a lo pun a, in tangka te, in rangkachak te a lo pun hun chuan, in rilrute a lo chapo vang a, . . . LALPA in Pathian chu in theihnghilh mai ang,” tiin a sawi a ni.—Deuteronomy 8:11-14.
15. Engtin nge Jehova kan theihnghilh lo a ni tih kan chian theih ang?
15 Chutiang thil chu tûn laiah a thleng thei em? Thleng thei e, thil dik lo kan dah pawimawh zâwk chuan. Amaherawhchu, Pathian felna kan zawn hmasak chuan, biakna thianghlim chu kan nuna thil pawimawh ber a lo ni ang. Paula min fuih angin, ‘hun remchâng kan lei’ ang a, kan rawngbâwlnaah hmanhmawhna rilru kan nei ngei ang. (Kolossa 4:5; 2 Timothea 4:2) Chawlh hahdamna emaw, hun hlimawm tak hman emaw chu inkhâwm leh thlawhhma rawngbâwlna aia a pawimawh zâwk erawh chuan, Jehova chu kan nuna pawimawh lo zâwka ngaiin kan theihnghilh a tih theih dâwn a ni. Paula chuan ni hnuhnûngah chuan mite chu “Pathian hmangaih aia mahni lâwmna mai hmangaih zâwktu te” an ni dâwn tih a sawi a. (2 Timothea 3:4) Kristian rinawmte chu chutiang ngaih dânin a thunun lo a ni tih tichiang tûrin ngun takin anmahni an inenfiah ṭhîn a ni.—2 Korinth 13:5.
Inlâk Hran Duhna Lakah Invêng Rawh
16. Eng ngaih dân dik lo nge Evi leh Paula hun laia mi ṭhenkhatte’n an târ lan?
16 Eden huanah, Setana chuan Evi chungah hmasial taka inlâk hran duhna chu hlawhtling takin a lo hmang tawh a. Evi chuan thil dik leh dik lo chungchângah amah ngeia thu tlûkna siam a duh a ni. (Genesis 3:1-6) Kum zabi khatnaa Korinth khua kohhran zînga ṭhenkhat chuan chutiang bawk mahni inlâk hran duhna chu an nei a. Paula aia hre zâwk niin an inngai a, chûng mite chu ṭawng el takin, tirhkoh lian berte tiin Paula chuan a ko a ni.—2 Korinth 11:3-5; 1 Timothea 6:3-5.
17. Engtin nge inlâk hran duhna rilru kan pum pelh theih ang?
17 Tûn lai khawvêlah pawh, tam takte chu “thuhnu dâwn lo te, inngaihlu te” an niin, chu ngaih dân chuan Kristian ṭhenkhat pawh a thunun a. A ṭhen phei chu thutak dotute an lo ni ta hial a ni. (2 Timothea 3:4; Philippi 3:18) Biakna thianghlim chungchângah chuan Jehova chu kaihhruaina min petu anga kan en leh “bawi rinawm, fing tak” leh kohhran upate thlâwp hi a pawimawh hle. Chu chu felna zawn dân kawng a ni a, inlâk hran duhna rilru nei lo tûrin min vênghim a ni. (Matthaia 24:45-47; Sâm 25:9, 10; Isaia 30:21) Hriak thihho awmna kohhran hi “thutak ban leh innghahna” chu a ni. Jehova chuan he kohhran hi min vênghim tûr leh min kaihruai tûrin a din a. (1 Timothea 3:15) A chanvo pawimawh tak hriatna chuan Jehova duhzâwng fel takte laka inngaitlâwm taka kan intukluh paha ‘inngaihhlut avânga engmah ti lo’ tûrin min ṭanpui ang.—Philippi 2:2-4; Thufingte 3:4-6.
Isua Entawn Rawh
18. Eng kawnga Isua entawn tûrin nge fuih kan nih?
18 Bible chuan: “Felna chu i ngaina a, suahsualna chu i huat kha,” tiin Isua chungchâng a lo sawi lâwk a. (Sâm 45:7; Hebrai 1:9) Entawn tûr rilru put hmang ṭha a va ni êm! (1 Korinth 11:1) Isua chuan Jehova tehna dikte chu a hre mai a ni lo; a hmangaih a ni. Tichuan, Setana’n thlalêra a thlêm khân, Isua chuan a hnâwl hreh lo va, “felna kawng” pênsan duh lovin nghet takin a hnial a ni.—Thufingte 8:20; Matthaia 4:3-11.
19, 20. Eng nge felna zawnna rah chhuah ṭhate chu?
19 Tisa châkna dik lo chu a nasa hle thei a. (Rom 7:19, 20) Amaherawhchu, felna chu kan tân a hlut chuan, chu chuan suahsualna do tûrin min tichak ang. (Sâm 119:165) Thil dik lo kan hmachhawn hunah chuan felna hmangaihna nasa tak chuan min humhim ang. (Thufingte 4:4-6) Thlêmna laka kan tlâwm apiangin, Setana chu hnehna kan pe tih hre reng rawh. Setana chu dodâl a, Jehova hnêna hnehna pêk chu a va ṭha zâwk dâwn êm!—Thufingte 27:11; Jakoba 4:7, 8.
20 Felna an zawn avângin Kristian dikte chu ‘Pathian ropuina leh fakna tûra Isua Krista zâra felna rah awm chuan an lo khat’ a. (Philippi 1:10, 11) ‘Mihring thar, thutak felna leh thianghlimnaa Pathian anga siam chuan an inthuam’ bawk a ni. (Ephesi 4:24) Jehova ta an ni a, mahni lâwmna zawng lovin, a rawngbâwl tûrin an nung zâwk a ni. (Rom 14:8; 1 Petera 4:2) Hei hi an ngaihtuahna leh thiltihte thununtu chu a ni a. An Pa vâna mi thinlung chu an va tilâwm tak êm!—Thufingte 23:24. (w06 1/1)
[Footnote-te]
^ par. 11 Nungchang bawlhhlawhna lak ata chhûngkua venghim tûra thurâwn hlu tak tak chu The Secret of Family Happiness tih Jehova Thuhretute tih chhuahah a chuang a ni.
^ par. 13 Hmeichhe serh hlehsak chu tûn hma chuan hmeichhe serhtan tia koh a ni ṭhîn.
I Hrilhfiah Thei Em?
• Engvângin nge felna zawn chu a pawimawh?
• Engtin nge Kristian ṭha famkim lote hian felna an zawn theih?
• Eng nge khawvêla thil ṭhenkhat Kristiante pumpelh tûr chu?
• Engtin nge felna zawnna chuan min vênhim?
[Zirlai Atâna Zawhnate]
[Phêk 28-naa milem]
Isua zuitute tân, khawvêl chu hmun hlauhawm a ni
[Phêk 29-naa milem]
Jehova hmangaih tûra zirtîrna dawng naupangte chu nungchang bawlhhlawhna do tûra thuam an ni ang
[Phêk 30-naa milem]
Israel mi ṭhenkhat chuan Ram Tiama neinung taka an han awm hnuah chuan Jehova an theihnghilh
[Phêk 31-naa milem]
Isua angin, Kristiante chuan fel lohna an hua