“Good News for People of All Nations”

ACHUNGA târ lan khi Jehova Thuhretute “Pathian Nên Leng Dûn Rawh” District Inkhâwmpui 2004/2005-a tlâng zarh lehkhabu tê (Hnam Tina Mite Tâna Chanchin Ṭha) a ni. He lehkhabu tê bu chi hrang tihchhuah zînga pakhat chu phêk 32 nei, Arabic aṭanga Urdu thlenga ṭawng 29-a thu tawi fel tak awmna a ni a, hei hi mi a tam thei ang berte hnêna Lalram chanchin ṭha thehdarhna ṭanpuitu tûr atâna buatsaih a ni. (Matthaia 24:14) A hnuaia thiltawnte hian lehkhabu tê hmannain rah chhuah a neih ṭhinte chu a târ lang a ni.

• Inkhâwmpuinaa he lehkhabu tê an dawn hnuah, Thuhretu chhûngkaw khat chuan ram chhûng sawrkâr park (national park) pathum an tlawh a. Chutah chuan India, Netherlands, Pakistan, leh Philippines ram aṭanga lo kalte chu an hmu a. Pa ber chuan: “Hêng mite hian Sâpṭawng tlêm azâwng hmang thei mah se, in aṭanga mêl sâng tam taka hlaa an awm avângin anmahni ṭawng ngeia thuchah kan hmuhtîr chuan an rilru a khawih hle a. Khawvêl pum huapa kan hnathawh leh kan inpumkhat dân chu an hmu chiang ta a ni,” tiin a sawi.

• Thuhretu pakhat chuan India aṭanga lo kal a hna thawhpui hnênah chuan he lehkhabu tê hi a hmuh a. Chu mia ṭawng hrang hrang a hmuh avângin mak a ti a, ama ṭawng ngeia thuchah awm chu a chhiar a ni. Hei hian Bible chungchâng sawi dunna tam zâwk a neihtîr a. Philippines ram aṭanga lo kal a hna thawhpui pakhat chuan lehkhabu têa an ṭawng a hmu chu mak a ti hle a, Jehova Thuhretute chungchâng hriat belh a châk phah sawt a ni.

• Canada ramah chuan, Nepal aṭanga lo kal nu pakhat chuan phone aṭanga Thuhretu nêna Bible zir chu rem a ti a, mahse unaunu a ina sâwm erawh chu a hreh tlat thung a. Amaherawhchu, Thuhretuin chu hmeichhia hnêna lehkhabu tê-ah chuan Nepali ṭawng pawh a tel tih a han hrilh chuan, a ina lêng tûrin unaunu chu phûr takin a sâwm a. A pianpui ṭawng ngeia chu thuchah inziak chu hmuh a tum tlat a nih chu! Chuta ṭang chuan, a inah Bible zirna chu neih chhoh zêl a ni ta a ni. (w05 12/1)