Pathian I Rinna Chu Engtiang Khawpin Nge A Ngheh?
Pathian I Rinna Chu Engtiang Khawpin Nge A Ngheh?
“Ram . . . chu zawng hmasa zâwk rawh u.”—MATTHAIA 6:33.
1, 2. Rawlthar pakhatin a hnathawh chungchângah insiamremna eng nge a neih a, engvângin nge?
RAWLTHAR pakhat chuan a awmna kohhrana ṭangkai lehzual a duh a. Mahse, a hnathawh avânga a inkhâwm ziah thei lo chu a harsatna a ni. Engtin nge chu harsatna chu a chinfel? A nun a tisamkhai zâwk a, a hna aṭangin a bâng a; tin, Kristian kohhrana a thiltihte tibuai lo hna dang a zawng hmu ta a ni. Tûnah chuan, hlawh tlêm zâwk hle mah se, a chhûngkaw mamawh chu a enkawl theiin, kohhranah a ṭangkai lehzual tawh a ni.
2 Chu rawlthar chuan chutiang insiamremna a neih chhan chu i hria em? A dinhmun anga ding i nih chuan, chutiang bawkin insiamremna i nei ve ang em? Fak tlâk takin, Kristian tam takte chuan chutiang insiamrema chu an nei a, an thiltih chu: “A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u a nia,” tia Isua thutiam an rin nghehzia târ langtu a ni a. (Matthaia 6:33) Khawvêl aiin Jehova chu inhumhimna atân an ring zâwk a ni.—Thufingte 3:23, 26.
3. Engvângin nge ṭhenkhat chuan Pathian Lalram dah hmasak chu a tihchi leh chi loh an ngaihtuah mai theih?
3 Kan chênna hun harsatzia ngaihtuahin, ṭhenkhatte chuan chu rawlthar thutlûkna siam chu a finthlâk meuh emaw chu tih an ngaihtuah mai thei a. Tûn laiah, ṭhenkhat chuan a changkâng thei ang bera nuamsa taka an nun an hman laiin, ṭhenkhat erawh chu an rethei tâwp khâwk a ni. Ram retheia awm tam takte chuan awlsam deuh zâwka khawsak theih nân hun remchâng awm apiang chu a chuhin an chuh huam huam a. Kawng lehlamah lah chuan, ram hausa zâwka chêng tam takte chuan sum leh pai lama tlâk chhiatna te, hna hmuh tûr vânna te, an laka phût sâng tawlh tawlh an pute an hmachhawn hian, an nunphung sâng tak chhawm zêl tûra nêksâwrna chu an tâwk a ni. Khawsakna kawnga nêksâwrna awmte han thlîr hian, ṭhenkhat chuan, ‘Lalram zawn hmasak chu a la tihchi reng tho em le?’ an ti rilru mai thei. Chu zawhna chhâng tûr chuan, Isua thusawi ngaithlatute chungchâng hi ngaihtuah ang che.
“Lungkham Suh U”
4, 5. Pathian mite tân nî tin mamawh lungkham lutuk loh chu a âwm a ni tih Isua’n engtin nge a târ lan?
4 Isua chu Galili-ah a awm a, hmun hrang hrang aṭanga lo pungkhâwm mipui tam takte hnênah thu a sawi a ni. (Matthaia 4:25) Chuta awmte zîngah chuan mi hausa an awm a nih pawhin an tlêm hle ngei ang. A tam zâwkte chu rethei tak an nih a rinawm. Mahse, Isua chuan hausak tumna chu dah pawimawh ber lo va, thil pawimawh zâwk, thlarau lam ro chu khâwl zâwk tûrin a fuih a. (Matthaia 6:19-21, 24) “‘Engnge ka ei ang a, engnge ka in ang aw?’ tiin in nunna thu leh, ‘Engnge ka silhin ka fên ang aw?’ tiin in taksa thu lungkham suh u. Ei tûr aiin nunna a thupui zâwk lo vem ni? Silhfên aiin taksa pawh a thupui zâwk lo vem ni?,” tiin a sawi.—Matthaia 6:25.
5 Isua thusawi ngaithlatu tam takte tân chuan chu thu chu a chhawr tlâk êm êm lo niin a lang mai thei. An thawhrim loh chuan an chhûngkuain a tuar dâwn tih an hre si a. Amaherawhchu, Isua chuan savate chungchâng a hrilh a. Savate chu nî tin a tla chawp zêlin an nung a; mahse, Jehova’n anni chu a enkawl a ni. Isua chuan Jehova’n Solomona ropuina zawng zawng aia mawi zâwka thuam ramhnuaia pangpârte a enkawl dân chu a sawi lang bawk. Jehova’n sava leh pangpârte mah a enkawl chuan eng ang fakauva nasain nge min enkawl ang? (Matthaia 6:26-30) Isua sawi angin, kan nunna leh taksa chu kan nunna châwmtu atâna kan lei ṭhin chaw leh kan taksa khuh nâna kan neih ṭhin silhfênte aiin a pawimawh zâwk hle. Kan theihna zawng zawng chu Jehova tâna tih tham awm lo khawpa mahni inchâwm nân leh silhfên atân chauhva kan hman zawh chuan, kan dam chhan dik tak chu kan hloh a ni.—Thuhriltu 12:13.
Thlîr Dân Inbûk Tâwk
6. (a) Kristiante’n eng mawhphurhna nge an neih? (b) Kristiante chuan engah nge an rinna pumhlum an nghah?
6 Isua chuan a thusawi ngaithlatute chu an hnathawh lai chawlhsan a, an chhûngkaw mamawh eng kawng emaw taka pe tûra Pathian nghâk ringawt tûrin a ti hauh lo. Savate pawhin anmahni leh an notê tân chaw an zawn chu a ngai a. Chuvângin, ei an duh chuan Kristiante chuan hna an thawk tûr a ni. An chhûngkaw mawhphurhnate chu an enkawl tûr a ni a. Chhiahhlawh leh sal anga awm Kristiante chuan an pute tân taima takin an thawk tûr a ni bawk. (2 Thessalonika 3:10-12; 1 Timothea 5:8; 1 Petera 2:18) Tirhkoh Paula chuan mahni inchâwm nân puan in siam hna a thawk ṭhîn. (Tirhkohte 18:1-4; 1 Thessalonika 2:9) Amaherawhchu, chûng Kristiante chuan an hnathawh chu an rinchhan bur chuang lo. Jehova an ring tlat zâwk a ni. Chuvângin, mi dangte hriat phâk loh rilru thlamuanna chu an nei a. Fakna hla phuahtu chuan: “LALPA ringtute chu Zion tlâng, tihnghîn rual loh, kumkhuaa awm reng tûr ang chu an ni,” tiin a sawi a ni.—Sâm 125:1.
7. Jehova ring nghet tak tak lotu chuan eng thlîr dân nge a neih theih?
7 Jehova ring nghet tak tak lotu tuemaw chuan thlîr dân dang a nei thei a. Mihring tam zâwkte’n hausak hi himna atâna thil pawimawh ber niin an thlîr a ni. Chuvângin, hlawh tam tak a neihtîr theih beiseiin, nu leh pate chuan an fate chu an ṭhat lai hun zawng zawng deuhthaw lehkha zir nâna hmang zo tûrin an fuih a. Vanduaithlâk takin, Kristian chhûngkaw ṭhenkhat chuan an fate’n thlarau lam thil an ngaihsak lohva, hausak âtchilhna lama an tlân hian, lehkha zir nân an insengso nasa hle tih an hmu chhuak chauh a ni.
8. Eng inbûk tâwkna nge Kristiante’n an vawn ṭhat?
8 Chuvângin, Kristian fing takte chuan Isua zilhna chu kum zabi khatna ang zetin tûn lai hun atân pawh a ni tih hriain, inbûk tâwk chu an tum a ni. Pathian thu anga an mawhphurhna hlen tûrin dârkâr rei tak tak hna an thawh ngai mah se, pawisa thawh chhuah a ngaihnain thil pawimawh zâwk thlarau lam thilte a ngaihthahtîr chu an phal ngai lo.—Thuhriltu 7:12.
Lungkham Lo Tûra Fuih Belhna
9. Jehova ring tlattute chu Isua’n engtin nge a thlamuan?
9 Isua’n tlâng chunga a thusawiah, a thu sawi ngaithlatute chu: “‘Engnge kan ei ang?’ emaw, ‘Engnge kan in ang?’ emaw, ‘Eng sinin nge kan awm ang?’ emaw tih lungkham suh u, Jentailten chûng zawng zawng chu an zawng ṭhîn a ni. Chûng zawng zawng chu in mamawh tih in Pa vâna mi’n a hre reng a ni,” tiin a fuih a. (Matthaia 6:31, 32) Thu thlamuanthlâk a va ni êm! Jehova kan rin tak zet chuan, ani’n min ṭanpui reng ang. Amaherawhchu, Isua thusawi chuan ngaihtuah a titam hle bawk. Hausakna kan “zawng” a nih chuan, kan ngaihtuahna chu ‘Jentailte,’ Kristian dik ni lote ngaihtuahna ang mai a ni tih min hriattîr a ni.
10. Isua chuan tlangvâlin a hnêna thurâwn la tûra a pan khân, engtin nge a thil hmangaih ber chu a lo laih lansak?
10 Ṭumkhat chu tlangvâl hausa tak pakhat hian Isua hnênah chatuana nunna a neih theih nâna thil ṭha a tih tûrte chu a zâwt a. Isua chuan chutih hun laia hman la ni reng, Dân thupêkin a phûtte chu hrilh a. Tlangvâl chuan Isua hnênah: “Chûng thu zawng zawng chu ka zâwm ṭhîn; engnge ka la bâk?” a ti a. Isua chhânna thu chu mi tam tak tân chuan chhawr tlâk niin a lang lo mai thei a ni. Ani chuan: “Ṭha famkima awm i duh chuan, kal la, i neih chu hralh la, pachhiate hnênah pe rawh, chutichuan vânah ro i nei ang; tin, lo kal la, mi zui ang che,” a ti. (Matthaia 19:16-21) Tlangvâl chuan a hausakna a chân ngam lo va, chuvângin lungngai takin a kal bo ta a. Eng anga nasa pawhin Jehova chu hmangaih mah se, a thil neihte chu a hmangaih zâwk a ni.
11, 12. (a) Ngaihtuah titam thei tak eng thu nge Isua’n hausakna chungchângah a sawi? (b) Engtin nge thilneihte chu Jehova rawngbâwlna dâltu a nih theih?
11 Chu thil chuan Isua chu thil beisei loh tak a sawichhuahtîr a ni: “Mi hausa tân vân rama luh chu harsa tak a ni. . . . Mi hausa Pathian rama luh aiin sanghâwngsei hriau benga luh tlang a awl zâwk,” tiin. (Matthaia 19:23, 24) Isua chuan mi hausa tumahin Lalram an luah dâwn lo a tihna a ni em? Ni lo ve: “Pathian nên erawh chuan engkim tih theih a ni,” tia a sawi zawm avângin. (Matthaia 19:25, 26) Dik tak chuan, chutih hun laia mi hausa ṭhenkhat chu Jehova ṭanpuinain hriak thih Kristian an lo ni a. (1 Timothea 6:17) Amaherawhchu, Isua’n chûng thu mak takte chu chhan ṭha tak a awm avângin a sawi a. Vaukhânna atân a sawi a ni.
12 Miin kan sawi tâk tlangvâl hausa tak anga a sum neihte a ngainat viau chuan, chu chu thinlung zawng zawnga Jehova rawng a bâwlna tûr dâltu a ni thei a. Chu chu hausa tawhte leh “hausak tumte” tân a dik thei ve ve a ni. (1 Timothea 6:9, 10) Sum leh pai rin lutukna chuan mi chu ‘a thlarau lam mamawhte a hriat’ lohtîr thei. (Matthaia 5:3) Chu mi avâng chuan, Jehova ṭanpuina a mamawh ṭhin ang kha mamawh ta lo niin a inhre thei a. (Deuteronomy 6:10-12) Kohhranah a bîka dawnsawn nih a lo phût mai thei a ni. (Jakoba 2:1-4) Tin, a hun tam zâwk chu Jehova rawngbâwl nâna hman ai chuan a hausakna chen nân a hmang mai thei bawk.
Thlîr Dân Dik Neiin
13. Laodikei khuaa mite chuan eng thlîr dân dik lo nge an neih?
13 Hausakna thlîr dân dik lo nei chu kum zabi khatnaa Laodikei kohhran hi a ni. Isua chuan an hnênah: “Ka hausa a, sum ka ngah a, engmah ka tlachham lo ve, i tih avâng leh nang mi rethei, khawngaihthlâk, pachhia, mitdel, saruak chu i ni tih i hriat loh avângin,” tiin a sawi a ni. Laodikei mite thlarau lama chutiang dinhmun khawngaihthlâk taka dintîrtu chu an hausakna hi a ni lo. Dik takin, Jehova aia an hausakna an rin zâwk vâng a ni. Chu mi avâng chuan, ‘Isua kâ ata chhâk chhuah’ ṭêp hial khawpin thlarau lamah an lum chang chang a ni.—Thu Puan 3:14-17.
14. Engvângin nge Hebrai Kristiante chuan Paula fakna an phu?
14 Kawng lehlamah, Paula chuan Hebrai Kristiante chu tûn hma lama tihduhdahna an tawrh laia an rilru put hmang avângin a fak thung a. “Kawl bunte chu in lainat a, sum ṭha zâwk, awm hlen bawk tûr chu mahniin in nei tih hriain in sum lâksakte pawh lâwm takin in lo tuar ta bawk si a,” tiin a sawi a ni. (Hebrai 10:34) Chûng Kristiante chu an thil neihte chânna chuan nasa takin a tilungngai lo. An thilneih hlu ber, “an sum ṭha zâwk, awm hlen bawk tûr” chu an chelh tlat avângin hlimna an nei reng a ni. Isua tehkhin thua sumdâwngtu, tuikeplung hlu tak pakhat atâna engkim chântu ang khân, Lalram beiseina chu eng pawh chân huama chelh chu an tum tlat a ni. (Matthaia 13:45, 46) Rilru put hmang ṭha a va ni êm!
15. Engtin nge Liberia rama Kristian hmeichhia pakhat chuan Lalram a dah hmasak?
15 Tûn laiah pawh mi tam tak chuan chutiang rilru put hmang ṭha chu an nei a. Entîr nân, Liberia ramah chuan, Kristian hmeichhe tleirâwl chu university-a lehkha zir theihna hun remchâng pêk a ni a. Chu ramah chuan, chutiang hun remchâng chu hma lam hun ngelnghet neihna kawng anga thlîr a ni. Amaherawhchu, hun bikima thuhriltu pioneer a ni a, special pioneer hun engemawti chhûng thawk tûrin sâwmna a dawng a ni. Lalram zawn hmasak chu thlangin, hunbi kima rawngbâwl chu a thlang ta zâwk a. A rawngbâwlna tûr hmunah a va kal a, thla thum chhûng lekah Bible zirpui 21 lai a nei a ni. He unaunu leh amah ang sâng tam takte chuan, hausakna tûr pawh chân huam khawpin Lalram chu an zawng hmasa a. Engtin nge he hausak âtchilhna khawvêlah hian chutiang rilru put hmang chu an neih reng theih le? Mize ṭha tam tak an neih vâng a ni. Chung zînga ṭhenkhat chu ilo sawiho ang u.
16, 17. (a) Engvângin nge Jehova rinchhan tûr chuan inngaihtlâwmna a pawimawh? (b) Engvângin nge Pathian thutiamte rin nghehna chu kan neih ang?
16 Inngaihtlâwmna: Bible chuan: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che. Mahni ngaihin intifing suh,” tiin a sawi a ni. (Thufingte 3:5-7) A châng chuan, kawng ṭhenkhat chu khawvêl thlîrna aṭang chuan a finthlâk niin a lang mai thei. (Jeremia 17:9) Mahse, Kristian dik takte chuan Jehova kaihhruaina an la zawng reng tho a ni. (Sâm 48:14) ‘A kawng zawng zawngah’—kohhran thilah te, lehkha zirna lamah emaw, hna thawhna lamah emaw te, chawlh hahdamna lamah te, a nih loh leh thil dang engah pawh—inngaitlâwm takin Jehova remruatna a zawng a ni.—Sâm 73:24.
17 Jehova thutiamte rin ngheh tlatna: Paula chuan: “Pathian hnêna lo kal chuanin, ani chu a awm tih leh zawngtute hnêna lâwmman pêk hmang a ni tih rin tûr a ni,” tiin a sawi. (Hebrai 11:6) Jehova’n a thutiamte a tifamkim ang tih kan rinhlelh chuan, ‘khawvêl hman lutuk’ chu thil âwm tak niin a lang thei dâwn a ni. (1 Korinth 7:31) Kawng lehlamah chuan, kan rinna a ngheh chuan Lalram zawn hmasak chu kan tum tlat ang. Engtin nge rinna nghet chu neih theih a nih? Jehova hnaih rengna te, thinlung tak zeta ṭawngṭaina leh mahnia Bible zirna neih ziahna te hmanga neih theih a ni. (Sâm 1:1-3; Philippi 4:6, 7; Jakoba 4:8) Lal Davida angin: “Aw, LALPA, ka ring chia: ‘Ka Pathian i ni,’ ka ti a. Aw, i ṭhatna . . . a va ropui êm!,” tiin kan ṭawngṭai ve thei a ni.—Sâm 31:14, 19.
18, 19. (a) Engtin nge taihmâkna chuan Jehova kan rinna a tihngheh? (b) Engvângin nge Kristian chuan thil chân a inhuam ang?
18 Jehova rawngbâwlnaa taihmâk: Paula chuan: “Tâwp thlenga beiseina famkim hmu tûrin in taihmâk pângngai ang khân taihmâk chhuah ṭheuh fo ula kan ti êm êm mai,” tia ziakin Jehova thutiam rin nghehna chu taihmâkna nên a thlunzawm a. (Hebrai 6:11) Jehova rawngbâwlnaa kan buai chuan ani’n min ṭanpui ang. Chutiang ṭanpuina kan dawn apiang chuan, amah kan rinna chu a nghet tual tual a, ‘nghet tak leh tihchêt rual loh’ kan lo ni. (1 Korinth 15:58) Kan rinna chu tihthar a niin, kan beiseina chu nemngheh a ni.—Ephesi 3:16-19.
19 Chân inhuamna: Paula chuan Isua zui tûrin hna ṭha leh duhawm tak chu a chân a. A nunah hian sum leh pai lama han thlîr chuan harsat châng awm mah se, duhthlanna dik a siam tih a chiang hle. (1 Korinth 4:11-13) Jehova chuan nun nuamsa tak min tiam lo, a châng phei chuan a chhiahhlawhte chuan harsatnate an tuar a. Kan nun tihtluangtlam duhna leh thil chân inhuamna chuan Jehova rawngbâwl kan duh nasatzia a târ lang a ni.—1 Timothea 6:6-8.
20. Engvângin nge dawhtheihna chu Lalram dah hmasatute tân a pawimawh?
20 Dawhtheihna: Zirtîr Jakoba chuan a Kristianpuite chu: “Chutichuan unaute u, Lalpa lo kal hma loh zawng chhel [“dawhthei,” New World Translation] takin awm rawh u,” tiin a fuih a. (Jakoba 5:7) He khawvêl buai tak kârah hian, dawhtheihna neih a harsa hle. Thil a lo thlen zung zung chu kan duh a ni. Mahse, Paula chuan “rinna leh nghah peihna vânga thutiamte rochung tawhte” entawn tûrin min fuih a. (Hebrai 6:12) Jehova chu nghâk peih rawh. Lei paradis-a chatuana nunna chu nghah manhla tak a ni ngei si a!
21. (a) Lalram kan dah hmasak hian eng nge kan lantîr? (b) Eng nge a dawta thuziakah sawiho ni ang?
21 Ni e, Lalram zawng hmasa tûra Isua fuihna hi a chhawr tlâk a ni. Chutianga kan tih chuan, Jehova kan ring tak zet tih leh Kristiante tâna nun kawng him awmchhun chu kan thlang a ni tih kan lantîr a ni. Amaherawhchu, Isua chuan, “[Pathian] felna chu zawng hmasa zâwk” tûr pawhin min fuih a ni. A dawta thuziakah chuan, chu fuihna chu tûn laia mamawh bîk a nih chhan kan en ang. (w06 1/1)
I Hrilhfiah Thei Em?
• Sum leh pai hausakna chungchângah Isua’n eng inbûk tâwkna nge nei tûra min fuih?
• Isua sawi sanghâwngsei leh hriau beng tehkhin thu aṭangin eng nge kan hriat theih?
• Eng Kristian miziain nge Pathian Lalram zawng hmasa tûrin min ṭanpui ang?
[Zirlai Atâna Zawhnate]
[Phêk 23-naa milem]
Isua thusawi ngaithlatu tam takte chu an rethei
[Phêk 25-naa milem]
Isua tehkhin thua sumdâwngtu chuan tuikeplung hlu tak pakhat atân a thil neih zawng zawng a chân
[Phêk 25-naa milem]
Tlangvâl hausa chuan Pathian aiin a hausakna a hmangaih zâwk
[Phêk 26-naa milem]
Jehova rawngbâwlnaa kan buai chuan, aman min ṭanpui ang