Jehova Dawhtheihna Entawn Rawh
Jehova Dawhtheihna Entawn Rawh
“Lalpa chu a thutiam kawngah chuan a muang lo ve; . . . a dawhthei a ni zâwk e.”—2 PETERA 3:9.
1. Eng thilpêk hlu tak nge Jehova’n mihringte a pêk?
JEHOVA chuan mi dang tuma pêk theih loh thil engemaw min pe a. Chu chu thil duhawm tak leh hlu tak a ni a; mahse, kan lei theih emaw, kan hlawh chhuah theih emaw a ni lo. A thilpêk chu chatuan nunna—kan zînga a tam zâwkte tân chuan, lei paradis-a tâwp nei lova nun hi a ni. (Johana 3:16) A va nuam dâwn êm! Lungngaihna nasa tak thlentu—inhauna te, tharum thawhna te, retheihna te, dân bawhchhiatna te, natna te, leh thihna hial te pawh—a boral ṭhak ang. Mite chu Pathian Ram rorêlna hnuaiah remna leh inpumkhatna famkim chênin an nung ang. Chu Paradis chu kan va nghâkhlel tak êm!—Isaia 9:6, 7; Thu Puan 21:4, 5.
2. Engvângin nge Jehova’n Setana kal hmang a la tihboral loh?
2 Jehova ngei pawhin leia Paradis a din leh hun tûr chu a nghâkhlel hle a ni. Tihah chuan, felna leh rorêlna fel a ngaina si a. (Sâm 33:5) Ani chuan a tehna fel ngaihsak lo emaw, do emaw, a thuneihna hmusit taka hnâwl leh a mite tiduhdahtu khawvêl chu a hmu duh lo va. Mahse, Setana kal hmang suaksual a la nuai bo loh chhan a awm a ni. Chûng a chhante chu a lalchungnunna thu buai nêna inkûngkaih thil dik leh dik lo chungchângah a ni a. Hêng thu buaite a remnaah hian, Jehova chuan a bîk takin mize duhawm tak, tûn lai mi tam takte tlâk chham—dawhtheihna—chu a lantîr a ni.
3. (a) Bible-a “dawhtheihna” tia lehlin Grik leh Hebrai thu mal awmzia chu eng nge ni? (b) Eng zawhnate nge kan ngaihtuah dâwn?
3 Grik thu mal pakhat, Mizo Bible-a ‘dawhtheihna’ tia vawi sâwm pahnih lai lehlin a awm a. Chu mi awmzia tak chu “rilru sei” tihna a ni a, ‘nghah peihna’ tih leh ‘chhelna’ ti pawha lehlin a ni. “Dawhtheihna” tia lehlin Grik leh Hebrai thu mal hian zaidamna, leh thinnelna te a kâwk a. Engtin nge Jehova dawhtheihna chu kan hlâwkpui? Jehova leh a chhiahhlawh rinawmte dawhtheihna leh chhelna aṭang hian eng nge zir tûr awm? Jehova chuan dawhtheihna a lantîr reng dâwn lo tih engtin nge kan hriat theih? Chu chu ilo en ang u.
Jehova Dawhtheihna Ngaihtuahin
4. Jehova dawhtheihna chungchângah tirhkoh Petera’n eng nge a ziah?
4 Jehova dawhtheihna chungchângah, tirhkoh Petera chuan heti hian a ziak a ni: “Duh takte u, he thu kamkhat hi theihnghilh suh u, Lalpa ngaih chuan ni khat hi kum sângkhat ang a ni a, kum sângkhat pawh ni khat ang a ni, tih hi. Mi ṭhenkhatin muanga an ruat angin Lalpa chu a thutiam kawngah chuan a muang lo ve; tuma boral duh lova, mi zawng zawng lo sim duhin nangmahni lamah a dawhthei a ni zâwk e,” tiin. (2 Petera 3:8, 9) Hetah hian Jehova dawhtheihna hre thiam tûra min ṭanpui thei thu pahnih hi chhinchhiah ang che.
5. Engtin nge Jehova hun thlîr dân chuan a thiltih a nghawng?
5 A pakhatna chu Jehova hun thlîr dân leh kan thlîr dân a in ang lo hi a ni. Chatuana nungtu tân chuan, kum sângkhat chu ni khat ang lek a ni a. Ani chu hunin a thunun emaw, a nawr emaw ve lo va; mahse, a thiltih tûrah a muangchâng chuang hek lo. Tâwp chin nei lo finna a neih avângin, Jehova chuan a kaihhnawih zawng zawngte tâna ṭha ber tûr chêt lâk hun chiah chu a hria a, chu mi hun chu dawhthei takin a nghâk a ni. Mahse, chutih chhûnga a chhiahhlawhte’n an tawn theih hrehawm tawrhna eng pawh chu a ngaihsak lo niin thutâwp kan siam tûr a ni lo. Ani chu “thinlunga khawngaihna” Pathian, hmangaihna chhinchhiahna a ni. (Luka 1:77; 1 Johana 4:8) Ani chuan he rei lote chhûnga hrehawm tawrhnain a thlen thil ṭha lo eng pawh chu chatuan atân a tibo ṭhak thei a ni.—Sâm 37:10.
6. Pathian chungchâng eng thutâwp nge kan siam loh vang a, engvângin nge?
6 Thil duhzâwng tak han nghah chu a awlsam lo ngei mai a. (Thufingte 13:12) Chuvângin, mite’n an thutiam an hlen nghâl loh hunah, mi dangte chuan hlen an tum lo niin thutâwp an siam thei a ni. Pathian chu chutiang mi anga han ngaih chu a va finthlâk lo tak êm! Pathian dawhtheihna chu a muan vâng nia kan ngaih chuan, hun liam zêlte chuan rinhlelhna leh lunghnualna awlsam takin min neihtîr thei a, thlarau lama kan mutthlûk mai a hlauhawm a ni. Chu aia nasa zâwk, atîra Petera’n a vaukhân mite—rinna nei lo nuihsantute—hruai sualin kan awm thei a. Chûng mite chuan nuihsawh chungin: “A lo kal lehna thutiam chu khawiah nge? Siam tirh aṭangin engkim a awm pângngai angin chi thlahtute muthilh nî ata tawh kha a la awm zêl alâwm,” an ti a ni.—2 Petera 3:4.
7. Engtin nge Jehova dawhtheihna leh mite’n an lo sim a duhna chu a inkûngkaih?
7 Patera thusawi aṭanga kan hmuh thu pahnihna chu Jehova chuan mi zawng zawng lo sim a duh avângin a dawhthei tih hi a ni. Luhlul taka an kawng sual aṭanga kîr duh lote chuan Jehova rorêlna chu an tâwk a. Amaherawhchu, Pathian chuan mi suaksual thihnaah lâwmna a nei lo. Mite’n an sim a, an kawng sualte kalsan a, an nung reng hmuh chu a lâwm zâwk a. (Ezekiela 33:11) Chuvângin, mite’n nun theihna hun remchâng tam tâwk an neih theih nân a dawhtheiin, chanchin ṭha chu hmun tinah a puan chhuahtîr a ni.
8. Israel hnam a dâwr dânah Pathian dawhtheihna eng nge kan zir theih?
8 Pathian dawhtheihna chu hmân lai Israel hnam a dâwr dânah pawh a hmuh theih bawk a. Kum zabi têl chhûng chu, an thuâwih lohna a dawh a ni. A zâwlneite kal tlangin anni chu: “Dân zawm tûr, in pi leh pute ka pêk leh ka chhiahhlawh zâwlneite hmanga ka hriattîr che u ang zêl chuan, in awm dân sual hi hawisan ula, ka thupêkte leh ka thuruatte chu pawm rawh u,” tiin a fuih nawn fo va. Eng nge a rah chhuah? Lungchhiatthlâk takin, mite chuan “an pawm duh lo.”.—2 Lalte 17:13, 14.
9. Engtin nge Isua’n a Pa dawhtheihna ang chu a lantîr?
9 A tâwpah chuan, Jehova chuan Judate Pathian nêna inrem leh tûra taima taka ngêntu a Fapa chu a rawn tîr a. Isua’n a Pa dawhtheihna chu sawisêl bovin a lantîr a ni. Tihhlum a ni thuai dâwn tih hre chiangin, Isua chu: “Aw Jerusalem, Jerusalem! zâwlneiho thattu, i hnêna an rawn tirhte lunga lo dênghlumtu, arpuiin a notê a thla hnuaia a awp khâwm angin i fate vawi engzât nge awp khâwm ka tum kha! Nimahsela in duh si lo,” tiin a rûm a ni. (Matthaia 23:37) Hêng rilru khawih tak thute hi mi hrem châk ngawih ngawih rorêltu ṭawngkam chhuak a ni lo va, mite dawhthei tak ṭhian ṭha ṭawngkam chhuak a ni zâwk a ni. Vâna a Pa angin, Isua chuan mite’n inlamlêt a, rorêlna râpthlâk tak an pumpelh chu a duh a. Ṭhenkhat chuan Isua vaukhânna chu ngaithlain, C.E. 70-a Jerusalem chunga rorêlna râpthlâk tak lo thleng chu an pumpelh a ni.—Luka 21:20-22.
10. Pathian dawhtheihna chu eng kawngin nge kan hlâwkpui?
10 Pathian dawhtheihna chu a ropui hle a ni lâwm ni? Mihring thuâwih lohna chu nasa hle mah se, Jehova chuan mi maktaduai têl dangte rualin, amah hriat theihna leh chhandam inbeisei theihna hun remchâng min pe ṭheuh a ni. “Kan Lalpa dawhtheihzia chu chhandamnaah ruat rawh u,” tiin Petera’n a Kristianpuite hnênah a ziak a. (2 Petera 3:15) Jehova dawhtheihnain kan tân chhandamna kawng a hawn avângin kan lâwm hle a ni lâwm ni? Nî tina Jehova rawng kan bâwlnaah min dawhthei zêl tûrin kan ngên a ni lâwm ni?—Matthaia 6:12.
11. Jehova dawhtheihna hriatthiamna chuan eng ti tûrin nge min chêttîr ang?
11 Jehova’n dawhtheihna a lantîr chhan kan hriat thiamna hian, a rawn thlen tûr chhandamna chu dawhthei taka nghâk tûr leh a thutiamte hlen tûrin a muang tia thutâwp siam lo tûrin min ṭanpui a ni. (Jeremia Ṭah Hla 3:26) Pathian Ram lo thleng tûrin kan ṭawngṭai chhunzawm zêl a, chutih rual chuan Pathianin chu ṭawngṭaina chhân nâna hun ṭha ber a hria tih kan ring tlat a ni. Chu bâkah, kan unaute leh thu kan hrilhnate kan dâwrnaah Pathian dawhtheihna ang lantîrna hmanga Jehova entawn tûra chêttîrin kan awm a ni. Keini pawhin tuma boral chu kan duh lo va, an inlam lêt a, chatuan nun kan beiseina min ṭâwmpui ve chu kan duh a ni.—1 Timothea 2:3, 4.
Zâwlneite Dawhtheihzia Ngaihtuah Rawh
12, 13. Jakoba 5:10 nêna inmilin, engtin nge zâwlnei Isaia’n hlawhtling taka dawhtheihna a lantîr?
12 Jehova dawhtheihzia ngaihtuahna hmangin, chu mizia hlut tûr leh nei ve tûra ṭanpui kan ni a. Mihring ṭha famkim lote tân chuan dawhtheihna neih chu a harsa a; mahse, neih theih loh a ni lo. Hmân laia Pathian chiahhlawhte hnên aṭangin kan zir a ni. Zirtîr Jakoba chuan: “Unaute u, Lalpa hminga thusawitu zâwlneite chu, tuar dân leh chhel dân [“dawhtheihna,” NW] kawngah chuan entawn atân hmang rawh u,” tiin a ziak a. (Jakoba 5:10) Kan thil hmachhawn tûr mi dangte’n hlawhtling takin an lo hmachhawn tawh tih hriat chu a thlamuanthlâk hle a ni.
13 Entîr nân, zâwlnei Isaia chuan a hna chu dawhthei taka a thawh a ngai a. Jehova chuan hetiang hian a hriattîr a ni: “Kal la, he chite hi hrilh rawh, ‘Bengin a hriat zawng hria ula, a ngaihna erawh chu hre suh u; a hmuh chu hmu ula, hriat erawh chu hre suh u,’ tiin. He chite thinlung hi tithau la, an bengte tingawng la, an mitte maimitchhîntîr rawh; chutilochuan an mitin an hmu ang a, an bengin an hria ang a, an thinlungin an hre bawk ang a, an hawikîr leh ang a, tihdamin an awm dah ang e,” tiin. (Isaia 6:9, 10) Mite’n an ngaihsak lo chung pawhin, Isaia chuan Jehova vaukhânna thuchah chu kum 46 aia tlêm lo dawhthei takin a puang a ni! Chutiang bawkin, dawhtheihna chuan mi tam takin pawm lo mah se, kan chanchin ṭha hrilhnaa chhel tûrin min ṭanpui ang.
14, 15. Harsatna leh lunghnualna hmachhawn tûrin engin nge Jeremia chu ṭanpui?
14 Zâwlneite’n an rawngbâwlna an hlenin, ngaihsak lohna mai piah lam thil an tawrh a ngai a ni; tihduhdahna thlengin. Jeremia chu kawla tântîr a ni a, ‘tân ina’ khung, leh ripa paih luh a ni. (Jeremia 20:2; 37:15; 38:6) He tihduhdahna hi a ṭanpui duh mite kut aṭangin a tuar a. Mahse, Jeremia chu a thinur lo va, a thungrûl hek lo. Kum sâwmbi tel dawhthei takin a tuar zâwk a ni.
15 Tihduhdahna leh nuihsawhna chuan Jeremia chu a ngawihtîr lo va, tûn laiah pawh min ngawihtîr hek lo. Lunghnual châng zawng kan nei mai thei. Jeremia ngei pawh a lunghnual si a. Heti hian a ziak a ni: “LALPA thu chu ka tân chuan, nilênga dem leh hmusit hlawhna chauh a ni. ‘Ani chu ka lam lo vang a, a hmingin thu ka sawi tawh hek lo ang,’” tiin. Tichuan engtin nge? Jeremia chuan a thu hrilh chu a bânsan em? “Ka ruh chhûnga mei kâng inkhung ta ang mai hian ka thinlung chhûngah chuan [Pathian thu] a awm si ṭhîn, ka pai hle hle zo lo va, ka chelh ngang lo a ni,” tiin a chhunzawm a ni. (Jeremia 20:8, 9) Nuihzattute lama rilru a pêk hian, a hlimna a hloh tih hi chhinchhiah ang che. A thuchah ken mawina leh pawimawhna a ngaihtuahin, a hlimna chu a nei lêt leh a ni. Chu bâkah, Jehova chu Jeremia hnênah “mi huaisen hlauhawm tak angin” a awm a, Pathian thu chu ṭhahnemngai tak leh huaisen taka hril zêl tûrin a tichak a ni.—Jeremia 20:11.
16. Chanchin ṭha hrilhnaa kan hlimna chu engtin nge kan vawn theih ang?
16 Zâwlnei Jeremia chuan a hnaah hlimna a hmu em? Tehreng mai! Jehova hnênah chuan heti hian a sawi a ni: “I thute chu tihlan a ni a, ka ei a, i thute chu ka tân lâwmna leh ka thinlung hlimna a ni; Aw LALPA, . . . i hming kan pu ta si a,” tiin. (Jeremia 15:16) Jeremia chu Pathian dik ai a awhna leh a thu hrilhna chanvoah chuan a lâwm a. Keini pawh kan lâwm thei a ni. Chu bâkah, khawvêl puma mi tam takte’n Lalram thuchah an pawm a, an inlamlêt a, chatuana nunna kawng an zawh hian vâna vântirhkohte angin kan lâwm a ni.—Luka 15:10.
“Joba Chhelzia”
17, 18. Eng kawngin nge Joba a chhel a, eng nge a rah chhuah?
17 Hmân lai zâwlneite chungchâng a sawi hnuah, zirtîr Jakoba chuan: “Joba chhelzia chu in hria a, Lalpan a tâwpa a tihzia pawh kha in hmu bawk a, Lalpa chu khawngaihnain a khahzia leh zah a ngaih theihzia pawh kha,” tiin a ziak a ni. (Jakoba 5:11) Heta Grik thu mal “chhelzia” tia lehlin hian Jakoba’n châng hmasaa, atîra ziakin “dawhtheihna” a tih nên chuan a awmzia a thuhmun a. He thu mal pahnihte inan lohna hi sawiin, mi thiam pakhat chuan: “A hmasa zâwk chu miin min tihnawmnah huna dawhtheih hi a ni a, a hnuhnûng zâwk chu min tilungngaitu thilte tuar reng chunga huaisen taka beih fan fan hi a ni,” a ti.
18 Joba chuan lungngaihna nasa tak a tâwk a. Sum leh pai chânna te, fate chânna te, natna hrehawm tak te chu a tuar a. Jehova hrem nia puhna dik lo tak pawh a hmachhawn bawk. Joba chuan ngawi rengin a tuar lo; a dinhmun chu sawi chhuakin, Pathian aia fel zâwkah a inruat deuh hial a ni. (Joba 35:2) Amaherawhchu, a rinna chu a hloh ngai lo va, a rinawmna lah a tichhe hek lo. Setana sawi angin Pathian a sawichhe lo a ni. (Joba 1:11, 21) Eng nge a rah chhuah? Jehova chuan “Joba hun hnuhnûng chu a tîr aia nasa takin mal a sâwm” a. (Joba 42:12) Joba hrisêlna chu pe lêt lehin, a hausakna chu a thuahin a vûr a, a hmangaihte nêna nun hlim tak hmang tûrin mal a sâwm a ni. Joba rinawm taka a chhelna chuan Jehova a hriat chian zualtîr a ni.
19. Joba dawhtheihna aṭangin eng nge kan zir?
19 Dawhthei taka Joba chhelna aṭangin eng nge kan zir? Joba angin, natna emaw, thil dang harsatna emaw kan tuar mai thei a ni. Jehova chuan harsatna engemaw tak kan tawrh a phal chhan chu kan hre thiam chiah lo thei. Mahse, Kan rinawm tlat chuan mal sâwm kan ni ang, tih chu kan chiang thei a ni. Jehova chuan amah tih tak zeta zawngtute chu mal a sâwm lo ngai lo. (Hebrai 11:6) Isua chuan: “A tâwp thlenga tuar peih apiang chu, chu mi ngei chu chhandamin a awm ang,” a ti a ni.—Matthaia 10:22; 24:13.
‘Jehova Nî Chu A Lo Thleng Ngei Ang’
20. Engvângin nge Jehova nî chu a lo thleng ngei ang tih kan chian theih?
20 Jehova chuan dawhthei hle mah se, ani chu a fel a, suahsualna chu a tuar kumkhua lo vang. A dawhtheihna chuan chin tâwk a nei a ni. Petera chuan: “[Pathianin] tui tilêtin hmân lai khawvêl chu a zuah lo va,” tiin a ziak a. Nova leh a chhûngte nunna chu chhandam a nih laiin, chu Pathian ngaihsak lo khawvêl chu tuiin a chîm a ni. Jehova chuan Sodom leh Gomorra chungah rorêlin, vutah a chantîr bawk. Hêng rorêlnate hi “amah ngaihsak lo, la awm tûrte entîrnaah a hmang” a ni. He mi avâng hian, “Lalpa nî chu . . . a lo thleng ngei ang,” tih kan chiang thei a ni.—2 Petera 2:5, 6; 3:10.
21. Kan dawhtheihna leh chhelna chu engtin nge kan târ lan theih a, a dawta thuziakah eng thu nge kan ngaihtuah ang?
21 Chutichuan, mi dangte chhandam an nih theih nâna inlamlêt tûra ṭanpuina hmangin Jehova dawhtheihna chu i entawn ang u. Kan thu hrilhnate’n an ngaihsak lo chung pawhin dawhthei taka chanchin ṭha hrilhna hmangin zâwlneite chu i entawn bawk ang u. Chu bâkah, Joba anga fiahna laka kan chhel a, rinawmna kan vawn phawt chuan, Jehova chuan nasa takin mal min sâwm dâwn tih kan chiang thei a. Jehova’n leilung tluan chhuaka chanchin ṭha hril tûra a mite thawhrimna nasa taka mal a sâwm dân kan hriat hian kan rawngbâwlnaah lâwm nachhan tûr a awm a ni. Chu chu a dawta thuziakah kan hmu ang. (w06 2/1)
I La Hria Em?
• Engvângin nge Jehova’n dawhtheihna a lantîr?
• Zâwlneite dawhtheihna aṭangin eng nge kan zir?
• Engtin nge Joba’n chhelna a lantîr a, eng nge a rah chhuah?
• Engtin nge Jehova dawhtheihna chuan chin tâwk a nei tih kan hriat?
[Zirlai Atâna Zawhnate]
[Phêk 22-naa milem]
Isua’n a Pa dawhtheihna sawisêl bovin a lantîr
[Phêk 24-naa milemte]
Engtin nge Jehova’n Jeremia dawhtheihna chu mal a sâwm?
[Phêk 25-naa milemte]
Engtin nge Jehova’n Joba chhelna chu mal a sâwm?