Pathian Khawvêl Thara Hausakna Dik

DAVID-A, * Kristian chhûngkaw pa chuan a thiltih chu amah leh a chhûngte tâna thil ṭha ber a nih a ring tlat a. A nupui leh a fate kalsan chu duh lo mah se, sum a thawhchhuah hnem chauhvin an za atân nun ṭha zâwk a pe thei ang tih a ring tlat thung. Chuvâng chuan New York-a awm a chhûngte sâwmna chu pawmin chutah chuan hna a thawk ta thuai a ni.

Amaherawhchu, hunte a han liam zêl chuan, David-a beiseina chu a zuih ral ṭan a. Tûnah chuan thlarau lam thiltih atân hun a hmang ngai mang ta meuh lo va. Engemawti chhûng chu Pathiana rinna pawh a hlauh ṭhelh ta mai a ni. A tâwpa nungchang bawlhhlawhna thlêmnaa a tlûk hnuah chiah chuan a awm dân dik tak chu a hre chhuak ta hlawl mai a. Hausak a tumna chuan a tâna thil pawimawh zawng zawngte chu zawi zawiin a ngaihthahtîr a. A inthlâk danglam a ngai a ni.

David-a ang hian, kum tinin ei leh bar lama an dinhmun a ṭhat zâwk theih beiseiin mi tam tak an pêm a. Mahse, hêng mite hian thlarau lama tlâkchhiatna nasa tak an tâwk fo ṭhîn. Ṭhenkhat phei chuan, ‘Kristian hian Pathian  lama hausa tho siin sum leh pai hausakna a ûm thei em?’ tih an ngaihtuah mai thei a. Lehkha ziaktu leh kohhran hruaitu lâr takte chuan chu chu thil theih niin an sawi. Mahse, David-a leh mi dangte’n an hriat tawh angin, thil pakhat hloh si lova hlawhtlin chu thil harsa tak a ni.​—⁠Luka 18:⁠24.

Sum Hi Sual A Ni Lo

Tangka sum hi mihringte thil siam chhuah chu a ni ngei mai. Thil siam chhuah dangte ang bawkin, amah mai chuan a ṭha lovin a sual hran lo. Thil inthleng tawnna hmanrua mai a ni. Chuvângin, ṭha taka hman a nih chuan kawngro a su hle thei a. Entîr nân, Bible chuan “tangka sum himna a ni,” tih a pawm a, a bîk takin retheihna kaihhnawih harsatna tihven nân a ni zual a ni. (Thuhriltu 7:12) A lo berah ṭhenkhat tân chuan “tangkain engkim a si thlu” niin a lang.​—⁠Thuhriltu 10:⁠19.

Bible chuan thatchhiat chu demin, hna thawk rim tûrin a fuih a. Kan chhûngkaw mamawh kan phuhru tûr a ni a, a chuang bang tlêm azâwng kan neih chuan ‘tlachhamte hnêna pêk tûr’ kan nei tihna a ni. (Ephesi 4:28; 1 Timothea 5:⁠8) Chu bâkah, Bible chuan mahni intihretheih ai chuan kan thil neihte hmang tûrin min fuih a. “[Kan] chanvo pawm theihna” nei tûr leh kan thawhrimna chên tûra hrilh kan ni. (Thuhriltu 5:​18-20) Dik takin, Bible-ah hian a hmei a pa, mi rinawm hausa tam takte entîrna a chuang a ni.

Mi Hausa Rinawmte

Pathian chhiahhlawh rinawm Abrahama chuan berâm leh ran rual tam tak, tangka leh rangkachak tam tak, leh chhiahhlawh a za têlin a nei a. (Genesis 12:5; 13:​2, 6, 7) Mi fel Joba pawh chuan ran rual, chhiahhlawh, rangkachak, leh tangkarua ṭhahnem tâwk tak a nei. (Joba 1:3; 42:​11, 12) Hêng mite hi tûn lai hun atân pawh mi hausa an ni a, mahse Pathian lamah pawh an hausa bawk a ni.

Tirhkoh Paula chuan Abrahama chu “ringtu zawng zawng pa,” tiin a ko va. Abrahama chu a uikawm lo va, a thilneihah lah a rilru a pe lutuk hek lo. (Rom 4:11; Genesis 13:9; 18:​1-18) Chutiang bawkin, Pathian ngei chuan Joba chu mi “famkim, mi ngil,” tiin a sawi a. (Joba 1:⁠8) Mi rethei leh pachhiate ṭanpui a peih reng a ni. (Joba 29:​12-16) Abrahama leh Joba chuan an sum leh pai aiin Pathian an rinchhan zâwk ve ve a ni.​—⁠Genesis 14:​22-24; Joba 1:​21, 22; Rom 4:​9-12.

Lal Solomona hi entîrna dang leh chu a ni. Jerusalema Pathian lalṭhutthleng rochungtu a nih angin, Solomona chu Pathianin finna chauh ni lo, hausakna leh ropuina nasa tak pawh a pe a ni. (1 Lalte 3:​4-14) A dam chhûng hun tam zâwkah chuan a rinawm a. A kum a lo upat hnuah erawh chuan Jehova “lamah a thinlung chu a lo ṭha famkim ta lo.” (1 Lalte 11:​1-8) Dik takin, a thiltawn lungchhiatthlâk tak chuan hausakna thang tlânglâwn tak ṭhenkhat a entîr a ni. Tlêm azâwng lo târ lang ila.

 Hausakna Thangte

Pawisa leh a thil lei theihte hmangaih hi a hlauhawm ber a. Hausakna chuan lungawina awm lo neih belh zêl duhna a siam a ni. A lal ṭan tirh lamah, Solomona chuan mi dangte’n chutiang rilru chu an nei tih a hmu a. “Tangka sum ngainatu chuan tangka sumah duhtâwk a hmu lo vang a, hausak ngainatu chuan duhtâwk a hlêp hek lo vang: hei pawh hi engmah lo mai a lo ni,” tiin a ziak a ni. (Thuhriltu 5:10) Isua leh Paula chuan a hnuah Kristiante chu he bumhmang hmangaihna lakah hian an vaukhân a ni.​—⁠Marka 4:​18, 19; 2 Timothea 3:⁠2.

Sum chu thil engemaw tihpuitlinna hmanrua mai ni lo va, kan thil ngaihsak ber a nih chuan, thlêmna dik lo chi tinrêng, dâwt sawite, rûkrûk te, leh bumna te chuan awlsam takin min hneh thei a ni. Krista tirhkohte zînga mi Juda Iskariota chuan tangka 30 lekin a pu a mantîr a. (Marka 14:11; Johana 12:⁠6) Sum ngainat lutukna avângin ṭhenkhat chuan Pathian aiin tangka sum an be ta zâwk hial a ni. (1 Timothea 6:10) Chuvângin, Kristiante chuan sum tam zâwk neih an tum chhan chungchângah mahni inbum loh an tum tlat tûr a ni.​—⁠Hebrai 13:⁠5.

Hausak ûmnaah hian thil hlauhawm zâwk inphûm ru dang a awm tel bawk. A hmasain, hausakna chuan mahni inrintâwkna a awmtîr duh khawp a. Isua’n “hausakna bumna” a sawi khân hei hi a sawi tel a ni. (Matthaia 13:22) Bible ziaktu Jakoba pawhin Kristiante chu sumdâwnna atâna ruahmanna an siam hunah pawh Pathian theihnghilh lo tûrin chutiang bawk chuan a vaukhân a. (Jakoba 4:​13-16) Sum hian zalênna engemaw chen pe thei anga a lan avângin, a neite tân chuan Pathian aia an sum neih rinchhan palh hlauhawmna chu engtik lai pawhin a awm reng a ni.​—⁠Thufingte 30:​7-9; Tirhkohte 8:​18-24.

A pahnihna chu kan sawi tâk David-a’n a hmuh chhuah angin hausak ûmna chuan hun leh tha leh zung nasa takin a ei ral ṭhîn a, chu chuan mi chu thlarau lam thilte ûmna ata zawi zawiin a la pêng a ni. (Luka 12:​13-21) Mi hausate tân chuan, an thil neihte chu nuam tâwl nân emaw, mahni duhzawng ûm nân emawa hmang tûrin thlêmna a awm reng a ni.

Solomona thlarau lama thlûkchhiat chhan chu engemaw chenah a hausaknate’n a ngaihtuahna a tihzuaitîr a phal vâng niin a sawi theih em? (Luka 21:34) Pathianin hnam dangte nêna inneih pawlh a phal lo bur tih a hria a. Mahse, nupui leh hmei sangkhat vêl chu a khâwm hman a ni. (Deuteronomy 7:⁠3) Hnam dang mi a nupuite tihlâwm tumin, an hlâwkpui atân rinpawlhna lam hawi thiltih chu a tum a. A hmaa kan hmuh tawh angin, Solomona thinlung chu Jehova lak aṭangin zawi zawiin a tawlh bo ta a ni.

Chiang takin, hêng entîrnate hian Isua’n: “Pathian leh sum rawng in bâwl kawp thei lo,” tia a fuihna dikzia hi a târ lang a ni. (Matthaia 6:24) Chuti a nih chuan, engtin nge Kristianin tûn laia mi tam takte’n an tawh ei leh bar lama harsatna chu hlawhtling taka a hmachhawn theih ang? A pawimawh ber zâwkah chuan, eng nun ṭha zâwk beiseina nge kan hmaah awm?

Kan Hmaa Hausakna Dik Tak Chu

Thlahtu Abrahama, Joba, leh Israel mite ang lo takin, Isua zuitute chuan “hnam tina mi zirtîrahte siam” tûra thupêk chu an dawng a. (Matthaia 28:​19, 20) Chu thupêk thawk tûr chuan, thil dang atâna kan hman theih tûr hun leh tha leh zungte kan sên a ngai a ni. Chuvângin, hlawhtlinna chu Isua’n ti tûra min hrilh: “A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia,” tih zawmnaah hian a innghat a ni.​—⁠Matthaia 6:⁠33.

 David-a chuan a chhûngkua leh a thlarau lam nun a hloh ṭêp hnuah, a thil tihsual chu siam ṭhain, kawng dik lam chu a zawh ṭan leh thei ta a. Isua tiam angin, David-a chuan mite Bible zirtîr te, ṭawngṭai te, leh rawngbâwlnate chu a nuna a han dah hmasak leh tâkah chuan, thil dang zawngte chu a rawn ṭha chho ta zêl a. A nupui leh a fate nêna an inlaichînna pawh chuan zawi zawiin ngai a rawh awh leh a ni. Tichuan, hlimna leh lungawinate chu a nei lêt leh ta bawk. Hna chu a thawh rim a la ngai reng tho va. A hausak phah chuang lo. Mahse, a thiltawn hrehawm tak aṭang chuan thil pawimawh tak a zir a ni.

David-a chuan United States-a a insawn chungchâng chu a ngaihtuah nawn leh a, a thu tlûkna siama sum inrawlhtîr tawh ngai loh chu a tum ruh tlat a. Ani chuan nuna thil hlu ber​—⁠chhûngkaw duhawm tak, ṭhian ṭhate, leh Pathian nêna inlaichînna​—⁠chu suma lei theih a ni lo tih a hre ta a ni. (Thufingte 17:17; 24:27; Isaia 55:⁠1, 2) Dik takin, nungchang lama rinawmna hi hausakna ai chuan a hlu zâwk daih a ni. (Thufingte 19:1; 22:⁠1) An chhûngkuain, David-a chuan thil pawimawhte dah hmasak chu a tum tlat a ni.​—⁠Philippi 1:​10, 11.

Mihringte’n hausa chung sia nun ṭha neih an tumna chu a hlawhchham fo va. Amaherawhchu, Pathian chuan nun hlim tak nei tûra kan mamawh taksa lam leh thlarau lama hausakna nasa tak chu a Lalramin a rawn thlen dâwn tih min tiam a ni. (Sâm 72:16; Isaia 65:​21-23) Isua chuan hausakna dik tak chu thlarau lam thil aṭangin a inṭan tih a zirtîr a. (Matthaia 5:⁠3) Chuvângin, tisa lamah kan hausa emaw, kan rethei emaw pawh ni se, thlarau lam thil ngaih pawimawh hmasak hi tute tân pawh kan hma lawka khawvêl thar lo thleng tûr atâna inbuatsaih theihna kawng ṭha ber a ni. (1 Timothea 6:​17-19) Chu khawvêl chu tisa lam leh thlarau lama hausakna hmun dik tak a ni ngei dâwn a ni. (w06 2/1)

[Footnote]

[Phêk 5-naa milem]

Joba chuan a hausakna ni lovin, Pathian a rinchhan

[Phêk 7-naa milemte]

Nuna thil hlu berte chu suma lei theih a ni lo