Setana Dodâl Rawh, Tichuan A Tlân Bosan Ang Che!

“Pathian thu thuin awm rawh u; amaherawhchu Diabola dodâl rawh u, tichuan a tlân bosan ang che u.”​—⁠JAKOBA 4:⁠7.

1, 2. (a) Diabola mizia eng nge Isaia bung 14-a thu puanchhuahnaah târ lan a nih? (b) Eng zawhnate nge kan sawiho vang?

DIABOLA chu chapona chhinchhiahna a ni a. A chapona chu Pathian zâwlnei Isaia thu chhinchhiahah hian a lang a ni. Babulon chu khawvêl awptu ber a nih hma kum zabi khat aia tamah khân Jehova mite’n “Babulon lal” chu he thu hmang hian an lo au khum tawh a ni: “I rilruah chuan, ‘Vânah ka chho vang a, Pathian arsite [Davida thlah kal zêla lalte] chung lamah khian ka lalṭhutphah ka chawi sâng ang . . . Chungnungbera ang maiin ka awm ang,’ i tih ṭhin vei nên khân,” tiin. (Isaia 14:​3, 4, 12-15; Number 24:17) “Babulon lal” chapona chu “he khawvêl pathian,” Setana rilru nên hian a inang hle a. (2 Korinth 4:⁠4) Mahse, Babulon lalna chu zahthlâk taka a tâwp ang bawk hian Setana chapona chu chhiatnain a tâwp dâwn a ni.

² Amaherawhchu, Diabola a la awm chhûng erawh chuan hêng zawhna: Setana chu kan hlau tûr em ni? Engvângin nge Kristiante tiduhdah tûra mite a chêttîr? Engtin nge Diabola chu kan indinchan khalhtîr loh vang?, tihte hi kan lungkham mai thei a ni.

Diabola Chu Kan Hlau Tûr Em Ni?

3, 4. Engvângin nge hriak thih Kristiante leh an ṭhiante chuan Diabola an hlauh loh?

³ Hriak thih Kristiante chu: “I tuar tûrte hi hlau suh: ngai teh, fiaha in awm theih nân diabola chuan in zînga mi ṭhenkhat tân inah a khung dâwn che u a ni; tin, ni sâwm hrehawm in tuar ang. Thih thlengin rinawmin lo awm rawh, tichuan nunna lallukhum ka pe ang che,” tih Isua Krista thusawi hian a tichak hle a. (Thu Puan 2:10) Hriak thihte leh an ṭhian lei lam beiseina neite chuan Diabola chu an hlau lo. Chu an hlauh lohna chu an pianpui huaisenna vâng a ni lo. Pathian ṭihna an neih vâng leh ‘a thla hnuai an chuh ṭhin’ vâng a ni.​—⁠Sâm 34:9; 36:⁠7.

⁴ Isua Krista zirtîr huaisente chuan hrehawm eng pawh tuar se, thih thlengin an rinawm a ni. Jehova chuan A laka rinawmte chu a thlahthlam ngai dâwn lo tih an hriat avângin, Diabol-Setana thil tih theih chu an hlau lo. Chutiang bawkin, hriak thih Kristiante leh an ṭhian inpumpêkte chuan tûn laia tihduhdahna nasa tak tâwk reng chung pawhin Pathian laka an rinawmna tihchhiat loh chu an tum ruh tlat a ni. Mahse, Diabola’n thihna a thlen thei tih tirhkoh Paula chuan a târ lang. Chu chuan min ti hlau tûr a ni em?

5. Hebrai 2:​14, 15 aṭangin eng nge kan zir?

⁵ Paula chuan Isua chu a thihna hmanga “thihnain thihna thuneitu (chu chu Diabola a ni) a tihboral theihna tûr leh, thih hlauh vânga dam chhûnga bâwiha awm zawng zawngte chu  a chhan chhuah theihna tûrin” ‘tisa leh thisenin a lo awm’ tih a sawi. (Hebrai 2:​14, 15) “Thihna thuneitu” a nih angin, Setana chuan Juda Iskariota chu thununin Juda hruaitute leh Rom mite chu Isua a khaihlumtîr a ni. (Luka 22:3; Johana 13:​26, 27) Amaherawhchu, inthawina atâna a thihna hmangin Isua chuan sual nei mihringte chu Setana thununna aṭangin a tizalên a, kan tân chatuana nun chu neih theihah a siam a ni.​—⁠Johana 3:⁠16.

6, 7. Eng chen chiah nge Diabola chuan thihna thlentîr theihna a neih?

⁶ Eng chen chiah nge Diabola chuan thihna thlentîr theihna a neih? Aw le, Setana’n sual kawng a zawh phat aṭangin, a dâwt sawi leh a kaihhruaina chuan mihringte zîngah thihna a thlen a. Hei hi Adama’n thil a tihsual a, mihring zawng zawng chunga thihna a hlan chhâwn zêl vâng a ni. (Rom 5:12) Chu bâkah, khawvêla Setana chhiahhlawhte chuan Jehova betute chu an tiduhdah a, Isua Krista chunga an tih ang bawkin a châng phei chuan thi khawp hialin an tiduhdah a ni.

⁷ Nimahsela, Diabola chuan a thah duh apiang a that theiah erawh kan ngai tûr a ni lo. Pathian chuan A mite chu a humhim tlat a, khawvêla betu dik zawng zawngte a tihmang vek chu a phal ngai lo vang. (Rom 14:⁠8) Jehova chuan a mi zawng zawngte chunga tihduhdahna a thlen chu phalin, Diabola beihna avânga kan zînga ṭhenkhatin an nun an chân hial chu a phal ngei mai a. Mahse, Bible chuan Pathian ‘hriat rengna lehkhabua’ hming chuangte tân chuan thawhleh beiseina duhawm tak chu a pe a, Diabola chuan chutiang thawhlehna chu a dang thei hauh lo!​—⁠Malakia 3:16; Johana 5:​28, 29; Tirhkohte 24:⁠15.

Engvângin Nge Setana’n Min Tihduhdah?

8. Engvângin nge Diabola chuan Pathian chhiahhlawhte chungah tihduhdahna a thlentîr?

⁸ Pathian chhiahhlawh rinawm kan nih chuan, Diabola’n min tihduhdah chhan tûr ṭha tak a nei a ni. A thiltum chu kan rinna min pênsantîr hi a ni a. Kan Pa vâna mi nên chuan inlaichînna hlu tak kan nei a, chu tak chu Setana chuan tihchhiat a duh a ni. Hei hi mak kan ti tûr a ni lo. Eden huanah, Jehova chuan entîr nei a “hmeichhia” leh “rûl” in kârah leh an ‘thlahte’ inkârah inhmêlmâkna a awm dâwn tih a lo sawi lâwk tawh a. (Genesis 3:​14, 15) Bible chuan Diabola chu “rûlpui tar” tia sawiin, hun a neih tlêm thu leh a thinrim nasat thu a târ lang a ni. (Thu Puan 12:​9, 12) ‘Thlah’ pahnihte inkâra inhmêlmâkna a awm chhoh zêl avângin, rinawm taka Jehova rawngbâwltute chuan tihduhdahna tawrh chu an beisei thei a. (2 Timothea 3:12) Chutianga Setana’n min tihduhdah chhan dik tak chu i hria em?

9, 10. Diabola chuan eng thu buai nge a chawh chhuah a, mihringte nungchang nên engtin nge a inkaihhnawih?

 ⁹ Diabola chuan lal chungnunna thu buai chu a chawk chhuak a. Chu thu buai nêna inkûngkaihin, an Siamtu laka mihringte rinawmna pawh a cho a ni. Setana chuan mi fel Joba lakah tihduhdahna a thlentîr tawh a. Eng nge a chhan? Jehova laka Joba rinawmna tichhe tûrin a ni. Joba nupui leh a ‘thlamuantu tuar hrehawm takte’ chuan chutih lai chuan Diabola duhzâwng an ti a. Joba bua târ lan angin, Diabola chuan a fiah phal a nih phawt chuan tumah hi Pathian lakah an rinawm reng dâwn lo nia chhâlin Pathian a cho va. Mahse, Joba chuan a rinawmna chu a vawng tlat a, Setana chu dawthei a nihzia a fiah a ni. (Joba 1:​8–2:9; 16:2; 27:5; 31:⁠6) Diabola chuan tûn laia Jehova Thuhretute chu an rinawmna tichhiat nân leh a chona chu a dik a ni tih fiah nân a tiduhdah a ni.

¹⁰ Diabola chuan kan rinawmna tihchhiat a duh êm avângin kan chungah tihduhdahna a thlentîr tih hriatna chuan huaisen tûr leh chhel tûrin min ṭanpui thei a. (Deuteronomy 31:⁠6) Kan Pathian hi Lei leh Vâna Lalchungnungber a ni a, kan rinawmna vawng tûrin min ṭanpui ang. Rinawmna vawngtu nia Jehova chotu lian ber, Diabol-Setana chhân lêttîrna hmangin Jehova thinlung tihlâwm dân kawng i dap zêl ang u.​—⁠Thufingte 27:⁠11.

“Mi Sual Lakah Chuan Min Chhandam . . . Ang Che”

11. Eng nge “Sual tûra thlêmnaah chuan min hruai lût suh la” tih ngenna awmzia chu?

¹¹ Rinawmna vawngtu nih hi thil ho lam a ni lo; ṭawngṭai fan fan a ngai a ni. Lal ṭawngṭaina chu he mi kawngah hian a ṭangkai lehzual a. A ṭhenah chuan Isua chuan: “Sual tûra thlêmnaah chuan min hruai lût suh la, mi sual lakah chuan min chhandam zâwk ang che,” tiin a sawi a ni. (Matthaia 6:13) Jehova chuan thil sual ti tûrin min thlêm lo. (Jakoba 1:13) Amaherawhchu, Bible chuan Pathianin thil awm a phalte pawh chu a tih ang leh a thlentîr anga sawi châng a nei a. (Ruthi 1:​20, 21) Chuti chu, Isua sawi anga kan ṭawngṭai hian, thlêmna laka kan tlâwm phal lo tûrin Jehova kan ngên tihna a ni. Chutiang ṭawngṭaina chu a ngaithla ngei ang: “Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tih Bible-in min tiam si a.​—⁠1 Korinth 10:⁠13.

12. Engvângin nge, “Mi sual lakah chuan min chhandam zâwk ang che,” tia kan ṭawngṭai?

¹² Lal ṭawngṭainaa sual tûra thlêmna chungchâng a sawi hnuah, Isua chuan inâwm takin: “Mi sual lakah chuan min chhandam zâwk ang che,” tiin a sawi a ni. Bible lehlin ṭhenkhat chuan: “Thil sual lakah chuan min chhan chhuak ang che,” (King James Version; Revised Standard Version) tiin emaw, “Thil sual lakah chuan min vênghim ang che,” (Contemporary English Version) tiin emaw an dah a. Amaherawhchu, Bible-ah chuan ‘laka chhan chhuak’ tih hi mi chungchânga hman a ni deuh ber a, Chanchin Ṭha Matthaia Ziak chuan Diabola chu mi mal, mite “thlêmtu” angin a sawi a ni. (Matthaia 4:​3, 11) Chuvângin, “mi sual,” Diabol-Setana laka min chhan chhuak tûra ṭawngṭai chu a pawimawh a ni. Pathian laka thil sual ti tûra thiam taka min thlêmthlûk chu a tum a. (1 Thessalonika 3:⁠5) “Mi sual lakah chuan min chhandam zâwk ang che,” tia kan ṭawngṭai hian, Diabola’n min dinchan khalh loh nân kan Pa vâna mi chu min kaihruai tûr leh ṭanpui tûrin kan ngên tihna a ni.

 Diabola’n Dinchan Khalh Che Suh Se

13, 14. Engvângin nge Korinth mite chuan kohhrana inngaih hmang pa an dâwr dân an thlâkthleng a ngaih?

¹³ Paula chuan Korinth khuaa Kristiante chu inngaidam tawn tûra a fuih khân, heti hian a ziak a ni: “Eng kawngah pawh mi in ngaihdam apiang, kei pawhin ka ngaidam ve a; kei pawhin ka ngaihdam tawh sa chu, engpawh ka lo ngaih dam tawh chuan nangmahni avângin Krista hmaah chuan ka ngaidam a ni; chutilochuan Setanan min dinchan khalh dah ang e; a ngamthlêmna chu kan hai si lo va,” tiin. (2 Korinth 2:​10, 11) Diabola chuan kawng tam takah min dinchan khalh thei a; mahse, engvângin nge a chunga thu hi Paula’n a sawi le?

¹⁴ Paula chuan Korinth khuaa mite chu inngaih hmangpa kohhran ata an hnawhchhuah loh avângin a zilh a. Chutianga an hnawhchhuah lohna chuan Setana a tilâwm ngei ang, ‘Jentailte zîngah pawh awm ngai hlei lo chutiang inngaihna’ an pawm zamna chuan kohhran a tihhmingchhiat avângin. A tâwpah chuan thilsual titu chu hnawhchhuah a ni. (1 Korinth 5:​1-5, 11-13) Chu pa chu a hnuah a inlamlêt a. Korinth kohhran chuan chu pa chu ngaidama a lâkluh leh duh loh chuan, Diabola chuan kawng dangin anmahni chu a dinchan khalh dâwn a ni. Eng kawngin nge? Setana ang maia nunrâwngin, ngil an nei lo a ni dâwn a ni. Inlamlêta chu ‘a lungngaih lutuknain a lem zawh’ avânga Pathian a biak loh phah ṭhak chuan, zahngaihna Pathian, Jehova hmaah a bîkin upate chuan he mi avâng hian mawh an phur dâwn a ni. (2 Korinth 2:7; Jakoba 2:13; 3:⁠1) Kristian tumahin nunrâwnna, tawrh hlelhawmna, leh zahngaihna neih lohna hmanga Setana entawn chu an duh lo ngei ang.

Pathian Pêk Râlthuamin Min Vênghim

15. Eng indonaah nge kan tel a, hnehna chu engah nge a innghah?

¹⁵ Diabola lak ata chhan chhuah ni tûr chuan, thlarau sualho awmte beihna thlarau lam indonaah kan tel ngei tûr a ni. Chutiang thlarau sualte kan beihnaah hnehna kan chan leh chan loh chu “Pathian râlthuam famkim” kan hâk leh hâk lohvah a innghat a. (Ephesi 6:​11-18) He râlthuamah hian “felna âwmphaw” a tel a ni. (Ephesi 6:14) Hmân lai Israel Lal Saula’n Pathian thu a awih lo va, thlarau thianghlim a chân a. (1 Samuela 15:​22, 23) Mahse, fel taka kan awm a, thlarau lam râlthuam famkima kan inthuam chuan, Pathian thlarau thianghlim kan nei ang a, Setana leh a vântirhkoh sualte leh ramhuaihote lakah vênhim kan ni ang.​—⁠Thufingte 18:⁠10.

16. Engtin nge thlarau sualho awmte laka venhimna kan neih chhunzawm zêl theih ang?

¹⁶ Thlarau sualho awmte lak ata vênhim ni zêl tûr chuan, thil dangte zîngah hian Pathian Thu kan chhiara kan zir ziah a ngai a, “sum enkawltu rinawm” hmanga chhuah thu leh hlate kan hmang ṭangkai tûr a ni. (Luka 12:42) Tichuan, Paula fuihna: “Unaute u, a dik apiang te, a zahawm apiang te, a fel apiang te, a thianghlim apiang te, a duhawm apiang te, a thangmawi apiang te​—⁠ṭhatna rêng a awm a, fakna rêng a awm phawt chuan​—⁠chûng chu ngaihtuah rawh u,” tih nêna inrem hian kan rilru chu thlarau lam thil ṭhate chuan kan ti khat dâwn a ni.​—⁠Philippi 4:⁠8.

17. Engin nge chanchin ṭha puangchhuaktu thiam tak ni tûrin min ṭanpui ang?

 ¹⁷ Jehova chuan ‘remna chanchin ṭha inbuatsaihna chu kan keah bun’ thei tûrin min ṭanpui a. (Ephesi 6:15) Kristian inkhâwmnaa tel ziahna chuan Pathian Lalram chanchin ṭha puang chhuak tûrin min thuam a ni. Pathian thutak zir tûr leh thlarau lam zalênna nei tûra mi dangte ṭanpuina aṭangin hlimna kan va han dawng nasa tak êm! (Johana 8:32) “Thlarau ngûnhnâm (Pathian Thu chu)” zirtîrna dik lote aṭanga invên nân leh ‘kulhpui nghet takte ṭhiah’ nân a pawimawh êm êm a ni. (Ephesi 6:17; 2 Korinth 10:​4, 5) Thiam taka Pathian Thu, Bible hmanna chuan thutak zirtîr tûrin min ṭanpui a, Diabola ngamthlemna laka tlâwm lo tûrin min vênghim a ni.

18. Engtin nge ‘Diabola ngamthlêmnate kan do zawh’ theih?

¹⁸ Paula chuan thlarau lam kan râlthuam chungchâng heti hian a sawi ṭan a ni: “Lalpaah leh a chakna thahruiah chuan thiltihtheihna neiin lo awm rawh u. Diabola ngamthlêmnate chu in do zawh nân Pathian râlthuam famkimin inthuam rawh u,” tiin. (Ephesi 6:​10, 11) Grik thu mal ‘do zo’ tia lehlin hi sipaiin indonaa ṭanhmun a khuar sawina nên a inkûngkaih a. Setana’n kan inpumkhatna tihbuai nân te, kan zirtîrna tihchhiat nân te, a nih loh leh Pathian laka kan rinawmna tih chhiat nân te hian thiltih verther tak takte hmang mah se, thlarau lama indonaah ṭanhmun kan khuar tlat a ni. Diabola beihnate chu tûn thleng hian a hlawhtling lo va, a hlawhtling ngai bawk hek lo vang! *

Diabola Dodâl Rawh, Tichuan A Tlân Bo Vang

19. Diabola do tlat zêl theihna kawng khat chu eng nge ni?

¹⁹ Diabola leh a kaihhruaina hnuaia awm thlarau sualho awmte kan donaah hian kan hlawhtling thei a ni. Setana hlauva khurh chhan tûr a awm lo, zirtîr Jakoba chuan: “Pathian thu thuin awm rawh u; amaherawhchu Diabola dodâl rawh u, tichuan a tlân bosan ang che u,” tia a ziah avângin. (Jakoba 4:⁠7) Setana leh a lam ṭang thil siam thlarau sualte do tûra chak taka hma kan lâk theih dân kawng khat chu, dawi leh ramhuai kaihhnawih thil tinrêngte hawisan leh chutiang thila inhnamhnawihte laka inthiar fihlîm hi a ni. Jehova chhiahhlawhte chuan ai en te, arsi hmanga ai en te, leh thlarau zâwlna te an hnâwl tûr a ni tih Bible chuan chiang takin a sawi a. Thlarau lama kan harhvâna kan chak bawk chuan, tuemawin kan chunga dawi thiamna hmanga thil sual a thlentîr chu kan hlauh a ngai lo vang.​—⁠Number 23:23; Deuteronomy 18:​10-12; Isaia 47:​12-15; Tirhkohte 19:​18-20.

20. Engtin nge Diabola kan do theih ang?

²⁰ Bible tehnate leh thutak zawm tlatna leh amah do tlatna hmangin ‘Diabola chu kan dodâl’ a ni. Setana chu khawvêl pathian a nih avângin khawvêl hian a lungrualpui tlat a. (2 Korinth 4:⁠4) Chuvângin khawvêl zia, hêng chapona, mahni hma sialna, nungchang bawlhhlawhna, tharum thawhna, leh hausak âtchilhna ang chi-te hi kan hnâwl a ni. Isua’n thlalêra thlêm a nih lai khân Pathian Lehkhabu hmangin a beihnate a dodâl a, chu mi hnuah Diabola chuan a tlân bosan tih kan hria a ni. (Matthaia 4:​4, 7, 10, 11) Chutiang bawkin, Jehova laka kan intukluh ṭhak leh tih tak zeta Amah kan rin tlat chuan, Setana chu kan ngam ang a, ani’n ‘min tlân bosan’ ang. (Ephesi 6:18) Pathian Jehova leh a Fapa duh tak ṭanpuinain tumahin, Diabola ngei pawhin min tina kumkhua thei lo a ni!​—⁠Sâm 91:​9-11. (w06 1/15)

[Footnote]

Eng Nge I Chhânna Chu?

• Diabol-Setana chu kan hlau tûr a ni em?

• Engvângin nge Setana’n Kristiante a tihduhdah?

• Engvângin nge “mi sual” lak ata min chhandam tûra kan ṭawngṭai?

• Engtin nge thlarau lam indonaah hnehna kan chan theih ang?

[Zirlai Atâna Zawhnate]

[Phêk 17-naa milem]

Krista zuitu hmasa mi huaisente chu thih thlengin an rinawm

[Phêk 18-naa milem]

Diabola chuan Jehova hriat rengnaa awmte kaihthawhna tûr chu a dang thei lo

[Phêk 19-naa milem]

“Mi sual” lak ata chhandam ni tûrin i ṭawngṭai em?

[Phêk 20-naa milem]

“Pathian râlthuam famkim” chuan i inthuam em?