Ṭhian Ṭha Neih I Duh Em?

ṬHIAN ṭha nei duh lo kan awm mang lo vang a. Ṭhian ṭhate hnêna i thiltawnte han hrilh theihna chuan i nun a tihlim zual sauh ngei ang. Mahse, engtin nge ṭhian dik tak i hmuh theih ang? Kum 2,000 dâwn lai liam ta khân, Isua chuan mihring zawng zawngte inlaichînnaa hlawhtlinna bul ber chu mahni hmasial lo hmangaihna a nih thu a lo lantîr a. “Miin i chunga an tiha in duh tûr ang zêlin mi chungah pawh ti ve rawh u,” tiin a zirtîr a ni. (Luka 6:31) He thu hi Dân Rangkachak tia koh a ni fo ṭhîn a, ṭhian nei tûr chuan mahni hmasial lo leh thilphal i nih a ngaihzia a târ lang a. A bul berah chuan, ṭhian nei tûr chuan, ṭhian i nih a ngai a ni. Engtin nge?

Inṭhianna ṭha leh duhawm tak chu zan khat thil thua neih theih a ni lo. Tihah chuan, ṭhian chu hmêlhriat satliah mai a ni si lo va. Anni chu rilrua inzawmna i neihpuite an ni. Ṭhian ṭha tak nei tûr leh neih chhoh zêl nân chuan ṭan lâk a ngai a. Inṭhiannaah chuan i ṭhianin a mamawh chu nangma remchânna aia ngaih pawimawh zâwk a ngai fo ṭhîn. Ṭhiante chu an hlimna chauh ni lovin, an lungngaihnate pawh an inhrilh tawn ṭhîn a ni.

Inṭhianna dik tak chu miin a mamawh huna rilru lam leh thiltiha ṭanpuina ṭangkai tak pêkna hmangin i lantîr a. Thufingte 17:17 chuan: “Ṭhian chuan englai pawhin a hmangaih reng a, mangan nî atâna unauva piang a ni,” tiin a sawi. Dik takin, inṭhianna chu chhûngkaw inphuarna aiin a nghet zâwk thei a ni. Thufingte 18:24 chuan: “Ṭhian tam tak siam chuan mahni intihchhiatna a siam a ni a, amaherawhchu unau aia nghet zâwk ṭhian an awm ṭhîn,” a ti. Chutiang ṭhian awmze nei tak neih dân hriat belh chu i duh em? An zînga inhmangaih tawnna awm nia hriat hlawh mite zînga tel chu i duh em? (Johana 13:35) I duh a nih chuan, in vêngchhûnga Jehova Thuhretute chuan ṭhian dik zawn hmuh dân chu lâwm takin an kawhhmuh ang che. (w06 3/1)