Pathian Thiltum Tipuitling Tûr Khawsak Hun

‘[Pathianin] a duhzâwng remruat ang zêlin thil engkim a ti.’​—⁠EPHESI 1:⁠11.

1. Engvângin nge Jehova Thuhretute kohhran zawng zawng chu April 12, 2006-ah an inhmuhkhâwm ang?

NILAINI tlai, April 12, 2006-ah chuan mi maktaduai 16 vêl chu Lalpa Zanriah hmang tûrin an kalkhâwm dâwn a. Inkhâwmna tinah chuan, dawhkân pakhat chungah Krista taksa entîrtu chhang dawidim telh loh leh a thisen entîrtu uain chu hûn a ni ang a. Isua thih Hriatrengna awmzia hrilhfiahna thusawi tâwp lamah chuan, kalkhâwm zawng zawngte hnênah hêng entîrnate​—⁠a hmasain chhang, a hnuah uain⁠​—⁠​chu pêk kual a ni ang. Jehova Thuhretute kohhran zînga tlêm tê chauhvah hian, kalkhâwmte zînga pakhat emaw, a aia tam emawin entîrnate chu an eiin, an in tak tak ang a. Mahse, inkhâwmna a tam zâwkah chuan tuman an eiin, an in lo vang. Engvângin nge Kristian ṭhenkhat, vân lam beiseina neite chauhvin an eia an in laiin, a tam zâwk leia chatuana nun beiseina neite chuan an eiin, an in ve loh?

2, 3. (a) Engtin nge Jehova’n a thiltum mila thil a siam? (b) Eng atân nge Jehova’n leilung leh mihringte a siam?

² Jehova chu thiltum nei Pathian a ni a. A thiltum tihpuitlinna kawngah ‘a duhzâwng remruat ang zêlin thil engkim a ti’ a ni. (Ephesi 1:11) A fapa mal neih chhun chu a siam hmasa ber a. (Johana 1:​1, 14; Thu Puan 3:​14) Tichuan, chu a Fapa chu hmangin Jehova chuan thlarau fa chhûngkua leh a tâwpah lei leh vân leh a chhûnga mihringte pawh a siam a ni.​—⁠Joba 38:​4, 7; Sâm 103:​19-​21; Johana 1:​2, 3; Kolossa 1:​15, 16.

³ Kristianna ram sakhaw tam takin a zirtîr angin, Jehova chuan lei hi vâna a thlarau fa chhûngkua tihpun nâna fiahna hmun ang lekah a siam lo. Ani chuan thiltum chiang tak neiin a siam a, lei hi “mihring awm nân” a siam a ni. (Isaia 45:⁠18) Pathianin lei hi mihring tân, leh mihring hi lei atân a siam a ni. (Sâm 115:16) Leilung pum pui hi enkawla vêngtu tûr mi felte luahkhah tûr paradis a lo ni ang. Mihring nupa hmasa berte hnênah khân a tâwpa vâna kal tûra beiseina pêk a ni ngai lo.​—⁠Genesis 1:​26-28; 2:​7, 8, 15.

Jehova Thiltum Chu Cho A Ni

4. Engtin nge Jehova lalchungnunna hman dân chu mihring chanchin inṭantirh aṭanga cho a nih nghâl?

⁴ Pathian thlarau fa pakhat chu a hel a, Pathian pêk duhthlan theihna chu hmang sualin, Jehova thiltum chu tihbahlah a tum a. Jehova lalchungnunna hnuaia duhawm taka intulût zawng zawngte neih remna chu a tikhaw lo a ni. Setana chuan mihring nupa hmasa berte chu Pathian laka inlâk hranna kawng a zawh ṭantîr a ni. (Genesis 3:​1-6) Ani chuan Jehova thiltihtheihna erawh a pha lo; mahse, lalchungnunna A hman dân a sawisêl a, tichuan rorêl tûra dikna A neih pawh a sawisêl tel ta a. Chuvângin, Jehova lalchungnunna thu buai pawimawh tak chu mihring chanchin a inṭantirh aṭangin leiah hian a lo lang nghâl pang a ni.

5. Eng thu buai bul ber dawttu nge tihchhuah a nih a, tute nge cho tel an nih?

⁵ Lei leh vâna lalchungnunna thu buai bul ber nêna inkûngkaih hnai tak chu, Joba hun  laia Setana tihchhuah thu buai pahnihna hi a ni. Jehova thil siamte A hnêna an intukluh chhan leh A rawng an bâwl chhan chungchângah Setana chuan rinhlelhna a siam a. Mahni hmasial vâng chauhva intulût leh a rawngbâwl an ni a, fiah an nih chuan Pathian an hawisan ang a ti a ni. (Joba 1:​7-11; 2:​4, 5) Pathian chhiahhlawh mihringte nêna inkûngkaiha a tihchhuah mah ni se, he chona hian Jehova Fapa mal neih chhun ngei pawh tiamin, Pathian thlarau fate pawh a cho tel a ni.

6. Engtin nge Jehova chuan a thiltum leh a hming chunga a rinawmzia a lantîr?

⁶ A thiltum leh a hming awmzia chunga rinawmin, Jehova chuan Zâwlnei leh Chhandamtu a innihtîr a ni. * Setana hnênah: “Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang,” a ti. (Genesis 3:15) A ‘hmeichhe’ Thlah, a nih loh leh a inawpna pâwl vân lama mi Thlah chu hmangin, Jehova chuan Setana chona chu a chhâng ang a, Adama thlahte tân chhanchhuah beiseina leh nunna chu a pe ang.​—⁠Rom 5:21; Galatia 4:​26, 31.

“A Duhzâwng Thurûk”

7. Eng thiltum nge Jehova’n tirhkoh Paula hmanga a târ chhuah?

⁷ Ephesi khuaa Kristiante hnêna a lehkha thawnah, tirhkoh Paula chuan Pathianin a thiltum tipuitling tûra thil a rêlbâwl dân chu thiam takin a hrilhfiah a. Paula chuan: “A duhzâwng thurûk kan hnêna min hriattîrin, hun bi kim khawsak hunah a lâwmzâwng (engkim​—⁠vâna thil awmte, lei chunga thil awmte pawh​—⁠Kristaa fâwk khâwm tûr chu) amahin tih a tum ang khân,” tiin a ziak a. (Ephesi 1:​9, 10) Jehova thiltum ropui tak chu a lalchungnunnaa duh taka intulût thil siamte awmna lei leh vân fâwk khâwm hi a ni. (Thu Puan 4:​10, 11) Chutichuan a hming chu tihthianghlim a ni ang a, Setana chu dawthei a nihzia chian a ni bawk ang a, Pathian duhzâwng chu ‘vâna an tih angin leiah’ pawh tih a ni tawh ang.​—⁠Matthaia 6:⁠10.

8. ‘Khawsak hun’ tia lehlin thu mal awmzia chu eng nge ni?

⁸ Jehova “duhzâwng,” a nih loh leh a thiltum chu ‘khawsak hun’ hmanga tihpuitlin a ni ang a. Paula chuan “inchhûng khawsak rêlna” tih awmze nei ṭawngkam chu a hmang a ni. Chu chuan, thil kîlkawi dân lam chu a kâwk a. Jehova’n a thiltum tipuitling tûra thil a rêl dân ropui takah chuan, hun liam dân azira zawi zawia a hriattîr tûr “thurûk” a tel a ni.​—⁠Ephesi 1:​9, 10; 3:​8, 9.

9. Engtin nge Jehova’n a duhzâwng thurûk chu zawi zawia a târ lan?

⁹ Thuthlung inzawm zêl engemaw zât hmangin, Jehova chuan Eden huana a thutiam Thlah chungchânga a thiltum a famkim dân tûr chu zawi zawiin a târ lang a ni. Abrahama nêna a thuthlung chuan thutiam Thlah chu leiah Abrahama thlah aṭanga a lo pian tûr thu leh chu mi hmanga “khawvêla chi tin” mal an insâwm tûr thu a târ lang a. Chu thuthlung chuan mi dang pawhin thlah bulpui ber chu an zâwm dâwn tih a hriattîr a ni. (Genesis 22:​17, 18) Tisa lam Israelte nêna siam Dân thuthlung chuan “puithiam  chi” nei tûra Pathian thiltum chu a târ lang a. (Exodus 19:​5, 6) Davida nêna thuthlung chuan chu Thlah chu kumkhuaa Lalram Hruaitu ber a ni dâwn tih a târ lang bawk. (2 Samuela 7:​12, 13; Sâm 89:​3, 4) Dân thuthlungin Judate chu Messia hnên a hruai thlen chuan, Jehova chuan a thiltum thlen famkim lehzual dân tûr chu a târ lan belh a ni. (Galatia 3:​19, 24) Thlah bul ber zâwmtu tûr mihringte chu sawi lâwk angin ‘puithiam chia’ siam an ni ang a, thlarau lam “Israel” thar anga ‘thuthlung thara’ hruai luh an ni ang.​—⁠Jeremia 31:​31-34; Hebrai 8:​7-9. *

10, 11. (a) Engtin nge Jehova’n hrilh lâwk Thlah chungchâng chu a târ lan? (b) Engvângin nge Pathian Fapa mal neih chhun chu leia a lo kal?

¹⁰ Pathian thiltum khawsak hun nêna inmilin, leia Thlah lo lang tûra sawi lâwk hun chu a lo thleng ta a. Jehova chuan vântirhkoh Gabriela chu Mari hnêna Isua tih hming pu tûr fapa a hrin tûr thu hrilh tûrin a tîr a ni. Vântirhkoh chuan Mari hnênah: “Ani chu mi lian a la ni ang a, Chungnungbera Fapa an ti ang; Lal Pathianin a hnênah a thlahtu Davida ṭhutphah chu a pe ang a; Jakoba thlahte chungah chatuanin a lal ang a, a ramin kin ni a nei lo vang,” a ti a. (Luka 1:​32, 33) Chutichuan thutiam Thlah nihna chu a lo chiang ta a ni.​—⁠Galatia 3:16; 4:⁠4.

¹¹ Jehova Fapa mal neih chhun chu leiah a lo kal ang a, fiahna nasa ber a rawn tâwk ang. Setana chona chhânna ṭha famkim chu Isua kutah a innghat dâwn a ni. A Pa chungah a rinawm reng ang em? Chu chu thurûk nên a inkûngkaih a ni. Tirhkoh Paula’n a hnuah Isua chanvo chu a hrilhfiah a: “Pathian ngaihsakna thurûk chu hnial rual lohvin a ropui a ni: ‘Tisaa lo langa, thlarauva thiam changa, vântirhkohte hmuha, Jentailte zînga tlângaupuia, khawvêlah hian mite rina, ropuinaa hruai chhoh tâka chu,’” tiin. (1 Timothea 3:16) Ni e, a thih thlenga rinawm nghehna hmangin, Isua chuan Setana chona chhân lêtna chiang tak chu a pe a ni. Mahse, thurûka thil dang neuh neuhte chu hriat chhoh zêl tûr a la ni.

“Pathian Ram Thurûk”

12, 13. (a) “Pathian ram thurûk” pêng pakhat chu eng nge ni? (b) Jehova’n vâna kal tûra mi tlêm tê a thlannaah eng nge inhnamhnawih?

¹² Thu hrila Galili a fan lai ṭum khat chu, Isua’n thurûk chu Messia Lalram sawrkâr nêna a inkûngkaih hnaihzia a târ lang a. A zirtîrte hnênah: “Vân ram [“Pathian ram,” Marka 4:11] thurûk chu nangni hriat zawng phal a ni,” a ti. (Matthaia 13:11) Chu thurûk pêng pakhatah chuan Jehova’n thlah zînga mi anga a Fapa zâwm a, vâna a rorêlpui tûr mihring mi 1,44,000, “pâwl tlêmte” a thlanna chu a tel a ni.​—⁠Luka 12:32; Thu Puan 14:​1, 4.

¹³ Mihringte chu leia awm tûra siam an nih avângin, mi ṭhenkhat vâna kal tûr  chuan Jehova tân “thil siam thar” chu a ṭûl a ni. (2 Korinth 5:17) He vân lam beiseina namên lo chang tûra thlante zînga pakhat a nih angin, tirhkoh Petera chuan heti hian a ziak a ni: “Kan Lalpa Isua Krista Pathian leh Pa chu fakin awm rawh se. Ani chuan a khawngaihna nasa tak ang zêlin, mitthi zîng ata Isua Krista thawhlehna avângin beiseina nung hmu tûrin min hring leh a, rochan chhe thei lo, bawlhhlawh kai lo, chuai thei lo, vâna in tâna khêk chu hmuhna tûrin,” tiin.​—⁠1 Petera 1:​3, 4.

14. (a) Engtin nge Juda mi ni lote chu ‘Pathian ram thurûka’ an tel? (b) Engvângin nge hêng ‘Pathian thu rilte’ hi kan hriat thiam?

¹⁴ Nakina lo thleng tûr Lalram sawrkâr nêna inkûngkaih thurûka tel thil dang leh chu vâna Krista nêna rorêl tûra koh mi tlêm tête zînga Juda mi ni lote pawh teltîr tûra Pathian duhzâwng hi a ni. Paula chuan he Jehova ‘khawsak hun,’ a nih loh leh a thiltum tipuitling tûra thil a kîlkawi dân chu a hrilhfiah a ni: “Chu chu tûn laia a tirhkoh thianghlimte leh a zâwlnei thianghlimte hnênah thlarau hriattîrin a awm ta ang hian, tûn hma lam khân mihring fate hnênah hriattîrin a awm ngai lo; chu chu hei hi a ni, chanchin ṭha avâng hian Krista Isuaah chuan Jentailte hi roluahpui te, taksa pêngpui te, thutiam dawnpui te an nih hi,” tiin. (Ephesi 3:​5, 6) Thurûka he mi chungchâng hriatthiamna hi “tirhkoh thianghlimte” hnêna pêk a ni a. Chutiang bawkin tûn laiah pawh, thlarau thianghlim ṭanpuina tel lo se chuan “Pathian thu ril” te chu kan hre thiam hauh lo vang.​—⁠1 Korinth 2:10; 4:1; Kolossa 1:​26, 27.

15, 16. Engvângin nge Jehova’n Krista rorêlpuitu tûrte chu mihringte zînga mi a thlan?

 ¹⁵ Vân lam Zion Tlânga “Berâm No” nêna ding mi “1,44,0000” te chu “lei ata tlan tawh” an ni a, “Pathian tân leh Berâm No [Isua Krista] tân rah hmasa ber ni tûrin mihring zîng ata tlan an ni.” (Thu Puan 14:​1-4) Jehova chuan Eden huana a thutiam thlah bul ber lo ni tûrin a vân lam fate zînga a hmasa ber chu a thlang a; mahse, engvângin nge Krista nêna rorêl tûrin mihring zînga mi a thlan? Tirhkoh Paula chuan he bi thliah chin neite hi “[Jehova] lungduha lâwmzâwng angin” a “ruat anga a kohvate” an ni tih a hrilhfiah a ni.​—⁠Ephesi 1:​5, 6, 11; Rom 8:​17, 28-30; 2 Timothea 1:⁠9.

¹⁶ Jehova thiltum chu a hming thianghlim leh ropui tihthianghlim leh lei leh vâna a lalchungnunna thiam chantîr hi a ni a. Tehkhin rual lohva fing a ‘khawsak hun,’ a nih loh leh thil a kîlkawi dân chu hmangin, Jehova chuan a thih thlenga fiahna tâwk tûrin a Fapa chu leiah a rawn tîr a ni. Chu bâkah, Jehova chuan a Fapa kuta a dah Messia Lalramah chuan thih thlenga a lalchungnunna chelh tlat mihringte teltîr chu a tum bawk a ni.​—⁠Ephesi 1:​8-12; Thu Puan 2:​10, 11.

17. Engvângin nge Krista leh a rorêlpui tûrte hi leia mihring anga nung tawh an nih avângin kan lâwm ang?

¹⁷ Jehova chuan Adama thlahte a hmangaih tak zetzia chu leia a Fapa rawn tirhna hmangin leh Lalram sawrkâra Fapa roluahpui tûra mihringte zînga mi thlanna hmangin a lantîr a ni. Engtin nge chu chu Abela aṭanga Jehova chunga rinawmna lantîrtute chuan an hlâwkpui theih? Sualna leh thihna bawih ni saa piang mihring ṭha famkim lote chuan, a tîra mihringte tâna Jehova thiltum nêna inmilin, thlarau lam leh tisa lama tihdam chu an mamawh dâwn a. (Rom 5:12) Leia chatuan nunna beisei zawng zawngte tân chuan, an Lalin leia rawng a bâwl laia a zirtîrte hnêna a lantîr ang hmangaihna leh hriatthiamna a lantîr dâwn tih han hriat chu a va thlamuanthlâk tak êm! (Matthaia 11:​28, 29; Hebrai 2:​17, 18; 4:15; 7:​25, 26) Tin, vâna Krista lal leh puithiam nihpui tûr mi rinawm a hmei a pate hi anmahni ang bawka mi mal chak lohna nei leh nun harsatna tâwk tawhte an ni tih hriat chu a va thlamuanthlâk tak êm!​—⁠Rom 7:​21-25.

Jehova Thiltum Hlawhchham Thei Lo Chu

18, 19. Engvângin nge Ephesi 1:​8-11-a Paula thute hi kan tân a fiah lehzual a, a dawta thuziakah eng nge kan ngaihtuah dâwn?

¹⁸ Tûnah chuan Ephesi 1:​8-​11-a hmuh hriak thih Kristiante hnêna Paula thusawite awmzia chu kan lo hre thiam lehzual tawh a. Ani chuan Jehova’n “a duhzâwng thurûk” chu an hnênah a hriattîr a, Krista nên “ro” an luah tlâng ang a; tin, “ama duhzâwnga remruat ang zêla thil engkim titu tum anga ruat lâwk” an ni tih a sawi. Hei hi a thiltum tipuitling tûra Jehova ‘khawsak hun’ ropui tak nên a inrem tih kan hre thiam a. Hei hian Lalpa Zanriaha kalkhâwm Kristian tlêm tê chuahvin an ei a, an in chhan hre thiam tûrin min ṭanpui bawk a ni.

¹⁹ A dawta thuziakah chuan, Krista thih Hriatrengnain vân lam beiseina neite tâna awmzia a neih chu kan en ang a. Leia chatuana nun beiseina nei mi maktaduai têlte chuan Hriatrengnain a entîrte an ngaihven hle chhan tûr chu kan zir bawk ang. (w06 2/15)

[Footnote-te]

Ennawn Nân

• Engvângin nge Jehova’n lei hi a siam a, chuta mihringte a dah?

• Engvângin nge Jehova Fapa mal neih chhun chu he leia fiah a ngaih?

• Engvângin nge Jehova chuan Krista rorêlpui tûrte chu mihring zîng aṭanga a thlan?

[Zirlai Atâna Zawhnate]