Vâna Thil Awmte leh Leia Thil Awmte Fâwk Khâwm
Vâna Thil Awmte leh Leia Thil Awmte Fâwk Khâwm
“A duhzâwng . . . engkim—vâna thil awmte, lei chunga thilawmte pawh—Kristaa fâwk khâwm tûr chu.”—EPHESI 1:9, 10.
1. Lei leh vân tâna Jehova “duhzâwng” chu eng nge ni?
LEI LEH VANA REMNA! Chu chu “remna Pathian” Jehova thiltum ropui tak chu a ni. (Hebrai 13:20) Ani chuan A “duhzâwng” chu “engkim—vâna thil awmte, lei chunga thil awmte pawh—Kristaa fâwk khâwm” a ni tih ziak tûrin tirhkoh Paula chu A thâwk khum a. (Ephesi 1:9, 10) He Bible chânga “fâwk khâwm” tia lehlin thiltih sawina thu mal hi eng tihna chiah nge a nih? Bible scholar J. B. Lightfoot-a chuan: “Chu thu mal chuan thil inmil lo leh inṭhen hranna awmtîrtu engmah awm tawh lohna lei leh vân, leh a chhûnga thil awm zawng zawngte Kristaa inremna chu a kâwk a ni. Chutah chuan sualna leh thihna, lungngaihna leh hlawhchhamna leh hrehawm tawrhnate chu a bo tawh ang,” a ti.
“Vâna Thil Awmte”
2. Tute nge fâwk khâwm ngai “vâna thil awmte” chu?
2 Tirhkoh Petera chuan Kristian dikte beiseina ropui tak chu: “A thutiam ang chuan vân tharte leh lei thar, a chhûnga felna awmte chu kan beisei a ni,” tia ziakin a khai khâwm a ni. (2 Petera 3:13) Heta “vân tharte” tiamna hian rorêlna sawrkâr thar, Messia Lalram a kâwk a. Paula’n Ephesi khuaa mite hnêna a lehkha thawna a târ lan, “vâna thil awmte” chu “Kristaa” fâwk khâwm tûr a ni. Anni chu vâna Krista nêna rorêl tûra thlan bithliah chin neite an ni. (1 Petera 1:3, 4) Hêng hriak thih Kristian mi 1,44,000 te hi “lei ata tlan tawh,” Krista vân lam Lalrama a roluahpui tûr “mihring zîng ata tlan” an ni.—Thu Puan 5:9, 10; 14:3, 4; 2 Korinth 1:21; Ephesi 1:11; 3:6.
3. Engtin nge hriak thihte chu leia an awm lai pawhin ‘vân hmuna ṭhuttîr’ an ni a tih theih?
3 Hriak thih Kristiante chu Jehova thlarau lam fate ni tûra thlarau thianghlim hmanga hrin, a nih loh leh piang tharte an ni. (Johana 1:12, 13; 3:5-7) Jehova “fa” an lo nih angin, Isua unaute an lo ni a. (Rom 8:15; Ephesi 1:5, 6) Chutiang an nih avângin, leia an awm lai pawhin ‘Krista Isuaah chuan kaih thawh leh vânhmunahte a hnêna ṭhuttîr’ nia sawi an ni. (Ephesi 1:3; 2:6) Anni chu vâna an tâna ruatah chuan “thlarau thianghlim tiam chuan chhinchhiahin” an awm a, ‘chu chu an roluahna tûra zakhamna a ni.’ (Ephesi 1:13, 14; Kolossa 1:3-5) A nih chuan, hêng mite hi Jehova’n a zât chiah a ruat lâwk, fâwk khâwm ngai “vâna thil awmte” an ni.
Fâwk Khâwmna A Inṭan
4. Engtikah leh engtin nge “vâna thil awmte” fâwk khâwmna chu a inṭan?
4 Jehova ‘khawsak hun,’ a nih loh leh thil a kîlkawi dân nêna inremin, “vâna thil awmte” a fâwk khâwmna chu ‘hun bi a kim’ hunah ṭan a ni a. (Ephesi 1:9, 10) Chu hun chu C.E. 33, Pentikost-ah khân a lo thleng a ni. Chu mi nî chuan, tirhkohte leh zirtîrte chungah thlarau thianghlim chu leih a ni a. (Tirhkohte 1:13-15; 2:1-4) Hei hian thuthlung thar chu a inṭan tih leh Kristian kohhran leh thlarau lam Israel hnam thar, “Pathian Israelte,” a inṭan tih a finfiah a ni.—Galatia 6:16; Hebrai 9:15; 12:23, 24.
5. Engvângin nge Jehova’n tisa lam Israelte aiawh tûr “hnam” thar a siam?
5 Tisa lam Israel nêna siam Dân thuthlung chuan vâna chatuana thawktu tûr “puithiam chi, hnam thianghlim” chu a rah chhuak lo va. (Exodus 19:5, 6) Isua chuan Juda sakhaw hruaitute hnênah: “Pathian ram chu in hnên ata lâksak a ni ang a, a rah chhuah tûr hnam hnênah pêk a ni ang,” tiin a hrilh a ni. (Matthaia 21:43) Chu hnam, thlarau lam Israel chu thuthlung thara lâk luh hriak thih Kristiante hmanga din a ni a. Chûng mite hnênah chuan tirhkoh Petera chuan: “Thim ata chhuaka, a êng mak taka lût tûra kotu che u ṭhatna chu in entîr theih nân nangni zawng chi thlan, lal puithiamho, hnam thianghlim, Pathian mite ngei in ni si a; hmân lai khân mi rêng in ni lo va, tûnah erawh chuan Pathian mi in ni ta a,” tiin a ziak a ni. (1 Petera 2:9, 10) Tisa lam Israelte chu Jehova thuthlunpui mite an ni tawh lo. (Hebrai 8:7-13) Isua’n a sawi lâwk tawh angin, Messia Lalrama mi nihna chanvo chu an hnên aṭanga lâksak a ni a, thlarau lam Israel 1,44,000 te hnêna pêk a ni.—Thu Puan 7:4-8.
Lalram Thuthlunga Hruai Luh
6, 7. Eng thuthlung danglam bîk tak nge Isua a thlarau lam unaute nêna a siam a, chu chuan an tân eng awmzia nge a neih?
6 Isua’n a thih Hriatrengna hman dân tûr a hmêlhriattîr zân khân, a tirhkoh rinawmte hnênah: “Thlêmna ka tawh chhûng zawng nangni mi awmpuitu in ni a; tichuan ka rama ka dawhkâna in eia in bâr theihna tûrin, ka Pain ram mi ruatsak angin ram ka ruatsak che u a ni; tichuan Israel hnam sâwm leh hnam hnih rorêlsakin lalṭhutphahah in la ṭhu ang,” tiin a hrilh a ni. (Luka 22:28-30) Hetah hian Isua chuan ‘thih thlenga rinawmna’ hmanga “hnehtu” an nihzia fiahtu, thlarau lama a unau mi 1,44,000-te nêna a siam thuthlung danglam bîk tak chu a sawi a ni.—Thu Puan 2:10; 3:21.
7 He bithliah chin nei pâwla mite hian mihring taksa leh thisena leia chatuan nun beiseina zawng zawng chu an chân a ni. Anni chuan Krista nên vânah rorêlin, mihringte rorêlsakin lalṭhutthlêngah an ṭhu ang. (Thu Puan 20:4, 6) Tûnah chuan hêng hriak thihte tân chauhva hman theih Bible châng dangte leh “berâm dang” te’n Hriatrengna entîrnate an eia, an in loh chhan târ langtu Bible châng dangte chu i lo bihchiang ang u.—Johana 10:16.
8. Hriak thihte hian chhang an ei hian eng nge an târ lan? (Phêk 13-naa bâwm en rawh)
8 Hriak thihte chuan Krista tawrh ang hrehawm chu an tuar ang a, a thih anga thih pawh an inhuam a ni. Chu pâwl zînga mi a nih angin, Paula chuan ‘Krista a hmuh theihna tûr leh . . . amah nên, a thawhlehna thiltihtheihna nên, a tuarnate ṭâwmpuina nêna a hriat theih nân’ inpêkna engpawh siam tûra a inpeih thu a sawi a. Ni e, Paula chuan ‘a thihna anpuia thih’ chu a inhuam a ni. (Philippi 3:8, 10) Hriak thih Kristian tam tak chuan an taksaah hian ‘Isua thihna chu an pu’ a ni.—2 Korinth 4:10.
9. Hriatrengnaa chhang chuan eng taksa nge a entîr?
9 Lalpa Zanriah hman dân tûr a hmêlhriattîr khân Isua chuan: “Hei hi ka taksa a ni,” a ti a. (Marka 14:22) Rei lo têa vuak leh thisen chhuah ni mai tûr, a taksa tak tak a sawina a ni a. Dawidim telh lo chhang chu, chu mi taksa entîrna inhmeh tak chu a ni. Engvângin nge? A chhan chu Bible-ah dawidim chuan sualna emaw, suahsualna emaw a entîr vâng a ni. (Matthaia 16:4, 11, 12; 1 Korinth 5:6-8) Isua chu mi ṭha famkim a ni a, a mihring taksaah sual rêng a awm lo. Chu a taksa ṭha famkim chu thupha chawi nân a hlân dâwn a. (Hebrai 7:26; 1 Johana 2:2) Chutianga a hlanna chu Kristian rinawm zawng zawng, vân lama nunna beiseina neite emaw, lei paradis-a chatuan nun beiseina neite emaw chuan an hlâwkpui vek dâwn a ni.—Johana 6:51.
10. Eng kawngin nge Hriatrengna uain intute chuan ‘Krista thisen an ṭâwmpui’?
10 Hriatrengnaa hriak thih Kristiante’n an in ṭhin uain chungchângah, Paula chuan: “Malsâwmna no mal kan sâwmsak ṭhin hi Krista thisen ṭâwmpuina a ni lo vem ni?,” tiin a ziak a ni. (1 Korinth 10:16) Eng kawngin nge uain intute chuan ‘Krista thisen an ṭâwmpui’? Anmahni ngei pawh tlan ngai an nih avângin, tlanna inthawina pêknaah chuan an tel lo va. Krista thisenin tlanna a pêk theihna an rinna hmangin, an sualte chu ngaihdam a ni a, vâna nung tûrin mi fela ruat an ni. (Rom 5:8, 9; Tita 3:4-7) Krista thisen chhuak chuan a roluahpuitu tûr mi 1,44,000 te chu a ‘tithianghlim,’ a nih loh leh a tihrang a, “mi thianghlimte” ni tûrin sual lak aṭangin a thianfai a ni. (Hebrai 10:29; Daniela 7:18, 27; Ephesi 2:19) Ni e, Krista chuan a thisen chhuak nên “chi tina mite, ṭawng tina mite, mi tina mi te, hnam tina mi te, Pathian tân [a] lei a, . . . kan Pathian tân khua leh tuiah leh puithiamahte [a] siam” a ni. Anni chuan “leiah chuan ro an rêl” ang.—Thu Puan 5:9, 10.
11. Hriatrengna uain inna hmangin hriak thihte chuan eng nge an lantîr?
11 Isua’n a thih Hriatrengna a hman khân, a tirhkoh rinawmte hnênah uain no chu pein: “In zain in rawh u; hei hi ka thisen, sualte ngaihdam nâna mi tam tak tâna chhuak tûr, thuthlunna chu a ni,” a ti a. (Matthaia 26:27, 28) Bâwngpate leh kêlpate thisen chuan Pathian leh Israel hnamte inkâra Dân thuthlung chu a tihngheh ang chiahin, Isua thisen chuan C.E. 33 Pentikost nîa lo piang tûr thlarau lam Israelte nêna Jehova thuthlung thar chu a tinghet a ni. (Exodus 24:5-8; Luka 22:20; Hebrai 9:14, 15) ‘Thuthlunna thisen’ entîrtu uaiin inna hmangin, hriak thihte chu thuthlung thara lâk luh an ni a, chu mi hlâwknate an dawnzia an lantîr a ni.
12. Engtin nge hriak thihte chuan Krista thihnaa baptisma an chan?
12 Hriak thihte chu thil dang engemaw tak pawh hriattîr an ni a. Isua’n a zirtîr rinawmte hnênah: “Ka no in tûr chu in in ang a, ka baptisma chan tûr pawh chu in chang ve ang,” tih a hrilh a. (Marka 10:38, 39) A hnuah tirhkoh Paula chuan Kristiante chu ‘Krista thihnaa baptis’ an ni tih a sawi a ni. (Rom 6:3) Hriak thihte chuan mahni inphat nunkawng an zawh a. Leia chatuana nun beiseina engpawh an hnâwl avângin an thihna chu inthawina a ni. Hêng hriak thihte hi rinawm taka an thiha vâna Krista ‘rorêlpui’ tûra thlarau thil siam anga an thawhleh hnuah, Krista thihnaa an baptisma channa chu a kim ang.—2 Timothea 2:10-12; Rom 6:5; 1 Korinth 15:42-44, 50.
Entîrnate Eia Inna
13. Engvângin nge lei lam beiseina neite’n Hriatrengna entîrnate chu an eia an in ve loh va; mahse, engvângin nge Hriatrengna hun serhah an tel?
13 Hriatrengna hman laia sem kual chhang leh uain ei leh innaah hian hêng thil zawng zawngte hi a tel avângin, lei lam beiseina neite tân lo eia lo in ve chi a ni lo tih a chiang hle. Lei lam beiseina neite chuan Krista taksa pêng hriak thihte an ni lo tih leh Jehova’n Isua Krista nêna rorêl tûrte nêna a siam thuthlung tharah an tel lo tih an hria a ni. “No” chuan thuthlung thar a entîr avângin, thuthlung thara mite chauhvin entîrna chu an eiin an in a ni. Lalram awpna hnuaia leia chatuana nun ṭha famkim beiseitute chu Krista thihnaah baptis an ni lo va, vâna rorêl tûra koh lah an ni hek lo. Chutiang mite’n entîrnate an lo eia an lo in chuan, chu chuan an chungchângah thil dik lo engemaw a awm tih a târ lang ang. Chuvângin, Hriatrengnaah zah taka thlîrtu angin tel mah se, an eiin an in ve lo va. Jehova’n a Fapa, Krista thisen chhuak ṭan chhana ngaihdamna a pêk pawh tiamin, anni chu Jehova thil tihsak zawng zawng chungah chuan an lâwm a ni.
14. Engtin nge hriak thihte chu chhang an eia uain an innain thlarau lama a tihchak?
14 Vâna Krista nêna rorêl tûra koh Kristian tlêm tête chhinchhiahna hnuhnûng ber chu a tâwp ṭêp tawh a. An lei nun an pêk hma loh zawng, hriak thihte chu Hriatrengna entîrnate an eia an inna hmangin thlarau lama tihchak an ni a. Chutianga an eia an in hian Krista taksa zînga mi an nih angin, an hriak thih unaute nên inpumkhatna nei niin an inhria a ni. Entîrna chang an eia uain an inna chuan thih thlenga rinawm tûra mawhphurhna an neih chu a hriattîr ṭhîn a ni.—2 Petera 1:10, 11.
“Lei Chunga Thil Awmte” Fâwk Khâwmna
15. Tute nge hriak thih Kristiante lama lâk khâwm chu?
15 Kum 1935 vêl aṭangin, “pâwl tlêmte” zînga tel lo “berâm dang” pung chak tak leia chatuana nun beiseina neite chuan hriak thihte chu an rawn thlâwp a. (Luka 12:32; Johana 10:16; Zakaria 8:23) Anni chu Krista unaute ṭhian rinawm an lo ni a, “he ram chanchin ṭha” hi hnam zawng zawng hnêna hriattîrna kawngah ṭanpuina hlu tak an pe a ni. (Matthaia 24:14; 25:40) Chutianga tiin, Krista’n hnamte chunga ro a rêl huna a ‘ding lama a dah,’ duhsakna hlawh “berâmte” dinhmunah an indah a ni. (Matthaia 25:33-36, 46) Krista thisen rinna hmangin, “hrehawmna nasa tak ata” dam khawchhuak tûr “mi pui tam tak” te an lo ni ang.—Thu Puan 7:9-14.
16. “Lei chunga thil awmte” zîngah tute nge tel ang a, engtin nge hêng mite zawng zawng hian “Pathian fate” nih theihna chanvo an neih ang?
16 Mi 1,44,000 zînga a la bângte chhinchhiahna zawh vek a nih chuan, leia Setana kal hmang suaksual tihboralna ‘thlite’ chu tlehtîr a ni ang. (Thu Puan 7:1-4) Krista leh a ṭhian lal puithiamte Kum Sâng Rorêl chhûngin, mipui tam tak chu chhiarsên loh khawpa tam kaih thawh lehte chuan an fin ang. (Thu Puan 20:12, 13) Hêng mite hian Messia Lal, Isua Krista rorêlna hnuaia khua leh tui nih hlen theihna hun remchâng an nei ang. Kum Sâng Rorêlna tâwpah chuan, hêng “lei chunga thil awmte” zawng zawng hian fiahna hnuhnûng ber chu an tâwk ang. Chu fiahnaa rinawmte chu lei lama “Pathian fate” anga pawm an ni tawh ang.—Ephesi 1:9, 10; Rom 8:21; Thu Puan 20:7, 8.
17. Engtin nge Jehova thiltum chu a thlen famkim dâwn?
17 Chuvângin, a ‘khawsak hun,’ a nih loh leh thil a kîlkawi dân fing tak hmangin, Jehova chuan “engkim—vâna thil awmte, lei chunga thilawmte pawh—Kristaa fâwk khâwm” tûra a thiltum chu a hlen chhuak ang. Lei leh vâna awm thil siam finna nei zawng zawngte chu inremnaa fâwk khâwm an ni ang a, a thiltumte tihlawhtlingtu Pathian Ropui, Jehova lalchungnunna fel tak hnuaiah hlim takin an intulût ang.
18. Engtin nge hriak thihte leh an ṭhiante chuan Hriatrengnaa telna chu an hlâwkpui ang?
18 Hriak thih tlêm tête leh an ṭhian berâm dang mi maktaduai têlte tân chuan April 12, 2006-a inhmuhkhâwmna chuan an rinna a va tichak dâwn êm! Anni chuan: “Mi hriat reng nân hei hi ti ṭhîn rawh u,” tia Isua thupêk angin, a thih Hriatrengna chu an hmang ang. (Luka 22:19) Chuta tel zawng zawngte chuan Jehova’n a Fapa duh tak Isua Krista hmanga a thiltih tawhte chu an hre chhuak tûr a ni. (w06 2/15)
Ennawn Nân
• Vâna thil awmte leh lei chunga thil awmte tâna Jehova thiltum chu eng nge ni?
• Tute nge “vâna thil awmte” chu ni a, engtin nge fâwk khâwm an nih?
• Tute nge “lei chunga thil awmte” chu ni a, eng beiseina nge an neih?
[Zirlai Atâna Zawhnate]
[Phêk 13-naa bâwm]
“Krista Taksa”
[Phêk 13-naa thu lâk chhuah]
Paula chuan hriak thih Krista unaute tâna chhangin awmzia a neih dân sawiin, 1 Korinth 10:16, 17-ah chuan “taksa” tih ṭawngkam chu awmze danglam bîk tak neiin a hmang a ni. Ani chuan: “Chhang kan phel ṭhin hi, Krista taksa ṭâwmpuina a ni lo vem ni? Keini mi tam tak hi chhang tlang khat, taksa pumkhat kan nih hi; kan zain chhang tlang khata mi kan chang ṭheuh si,” tiin a sawi a. Hriak thih Kristiante’n Hriatrengna chhang an ei hian, hriak thih kohhranho nêna an inpumkhatna chu an puang chhuak a, chu hriak thih kohhran chu taksa ang a ni a, a Lû chu Krista a ni.—Matthaia 23:10; 1 Korinth 12:12, 13, 18.
[Phêk 13-naa milemte]
Engvângin nge hriak thihte chauhvin chhang an eia uain an in?
[Phêk 15-naa milem]
Jehova khawsak hun hmangin, lei leh vâna thil siam nunna nei zawng zawng chu an inpumkhat ang