Biakna Dik Lo Lakah Inthiar Fihlîm Rawh!
Biakna Dik Lo Lakah Inthiar Fihlîm Rawh!
“‘An zîng ata lo chhuak ula, ahrangin awm rawh u, thil bawlhhlawh rêng rêng pawh dek suh u,’ Lalpan a ti.”—2 KORINTH 6:17.
1. Eng ang thlarau lam dinhmunah nge mi rilru ṭha pute an awm?
RILRU ṭha pu mi tam takte chuan Pathian chungchâng leh mihringte nakin hun tûr chungchâng chu an hre lo va. Thlarau lama an mamawh êm êm chutiang zawhnate chhânna an hmuh loh avâng chuan, an buai nuai nuaiin, a ngaihna an hre lo a ni. Mi maktaduai tam takte chu puithuna âtthlâkte, serh leh sângte, leh min Siamtu tilâwm lo kût nî vângthlate bawiah an awm a. Hremhmun mei dîl, Pathian pathum infinkhâwm, leh thlarau thi thei lo, a nih loh leh zirtîrna dik lo dangte ringtu ṭhenawm leh chhûngkhat i neih ngei a rinawm a ni.
2. Sakhaw hruaitute chuan eng nge an tih a, eng nge a rah chhuah?
2 He thlarau lama thimna darhzau tak hi engin nge awmtîr? Inkalh tak maiin, a awmtîrtu chu sakhuana hi a ni—a bîk takin, Pathian rilru kalhzâwng ngaih dân zirtîr sakhaw pâwlte leh hruaitute awmtîr a ni. (Marka 7:7, 8) Chuvângin, mi tam tak chuan Pathian an tihlungnih loh laiin, Pathian dik biaah an inngai a. Sakhaw dik lo hi he dinhmun lungchhiatthlâk tak awmtîrtu a ni.
3. Sakhaw dik lo awmtîrtu bul ber chu tunge ni a, a chungchâng Bible-ah engtia târ lan nge a nih?
3 Sakhaw dik lo phênah hian hmuh theih loh tuemaw a awm a. Chu mi chungchâng chu sawiin, tirhkoh Paula chuan: “Krista, Pathian anpui, a ropuizia chanchin ṭha êng chuan anmahni a chhun ên theih lohna tûrin chûngahte chuan he khawvêl pathian hian ring lote rilru a tidel ta a,” a ti a. (2 Korinth 4:4) “He khawvêl pathian” chu tu dang ni lovin, Diabol-Setana hi a ni. Ani chu sakhaw dik lo awmtîrtu bul ber a ni a. Paula chuan: “Setana meuh pawh êng tirhkohvah a insiam chawp si ṭhîn a. Chuvângin a rawngbâwltute pawh chu felna rawngbâwltuah insiam chawp mah sela thil mak a ni lo ve,” tiin a ziak a ni. (2 Korinth 11:14, 15) Setana chuan thil ṭha lote chu ṭha angin a lantîr a, mite chu dâwt thu ring tûrin a bum a ni.
4. Hmân lai Israelte hnêna Pathian Dân pêkin zâwlnei derte chungchâng eng nge a sawi?
4 Bible-in sakhaw dik lo nasa taka a dem pawh hi a mak lo ve! Entîr nân, Mosia Dân chuan Pathian hnam thlante chu zâwlnei derte lakah chiang takin a vaukhân a. Zirtîrna dik lo leh pathian dik lote biakna awmtîrtu chu ‘Jehova chunga helna thu a sawi avângin tihhlum tûr a ni.’ Israelte chu ‘an zînga thil ṭha lo chu tibo tûra’ thupêk an ni. (Deuteronomy 13:1-5) Ni e, Jehova chuan sakhaw dik lo chu thil sual angin a thlîr a ni.—Ezekiela 13:3.
5. Tûn laiah eng vaukhânnate nge kan ngaihsak ang?
5 Isua Krista leh a tirhkohte chuan sakhaw dik lo chungchânga Jehova rilru put hmang chiah chu an lantîr a. Isua chuan a zirtîrte hnênah: “Zâwlnei derte lakah fimkhur rawh u; chûng chu berâm vun sinin in hnênah an lo kal ṭhîn a, an chhûng lamah erawh chuan chinghne koham takte an ni si a,” tiin a vaukhân a ni. (Matthaia 7:15; Marka 13:22, 23) Paula chuan “thu tak . . . dâltute Pathian ngaihsak lohna leh fel lohna zawng zawng chungah chuan vân aṭangin Pathian thinur a lo lang” tih a ziak a. (Rom 1:18) Kristian dikte tân hêng vaukhânnate ngaihsak leh Pathian Thu, thutak dâltu emaw, zirtîrna dik lo thehdarhtu emaw laka inthiar fihlîm chu a va pawimawh tak êm!—1 Johana 4:1.
“Babulon Khaw Ropui” Tlânchhiatsan Rawh
6. Engtin nge Bible-ah “Babulon Khaw Ropui” chu târ lan a nih?
6 Bible-a Thu Puan buin sakhaw dik lo a târ lan dân hi han ngaihtuah teh. Ram tam tak leh a mite chunga thuneitu nawhchizuar zu rui anga sawi a ni a. He entîr nei hmeichhia hian lal tam takte nên inngaih a hmang a, Pathian betu dikte thisen chu a rui a ni. (Thu Puan 17:1, 2, 6, 18) A chala hming inziak chuan a nungchang bawlhhlawhna leh a tenawmna chu a chawih hle. A hming chu “Babulon Khaw Ropui, leia nawhchizuarte leh thil tenawmte nu,” tih a ni.—Thu Puan 17:5.
7, 8. Engtin nge sakhaw dik lo chu a inzawrh a, eng nge a rah chhuah?
7 Bible-a Babulon Khaw Ropui chungchâng sawi chuan khawvêla sakhaw dik lo pâwl chu a chawih hle a. Sakhaw pâwl sâng tam takte chu khawvêl pâwl pakhat angin inlungrual lo mah se, a thiltumah leh thiltihah chuan ṭhenhran theih loh khawpin an inzawm tlat a ni. Thu Puan-a nawhchizuarin a entîr angin, sakhaw dik lo chuan sawrkârte chungah nasa takin thu a nei a. Inneihna thuthlung laka rinawm lo hmeichhia angin, sakhaw dik lo chuan sawrkâr politics dang dang nêna inzawmna siamin a inzuar a ni. Zirtîr Jakoba chuan: “Nangni uirenute u, khawvêl ṭhian nihna hi Pathian hmêlma nihna a ni tih in hre lo vem ni? Chutichuan tupawh khawvêl ṭhian nih duh apiang chuan Pathian hmêlmaah a insiam ṭhîn a ni,” tiin a ziak a ni.—Jakoba 4:4.
8 He sakhaw dik lo leh sawrkârte infinna hian mihringte chungah hrehawm tawrhna nasa tak a thlen a. Africa politic chungchâng zir mi Dr. Xolela Mangcu-a chuan “khawvêl chanchin chu sakhua leh politics infinnain a awmtîr mipui insâmna hlîra a khah” thu a sawi a. Tûn hnai maia chhuak chanchinbu pakhat chuan: “Thisen chhuahna leh tûn laia inngeih lohna hlauhawm berte chu . . . sakhuaah a innghat a ni,” a ti. Mi maktaduai telte nun chu sakhuain a thlâwp indonaah chân a ni a. Babulon Khaw Ropui chuan Pathian chhiahhlawh dikte ngei pawh a tiduhdahin, a that hial a, an thisenin a rui a tih theih a ni.—Thu Puan 18:24.
9. Engtin nge Jehova’n biakna dik lo a huatzia chu Thu Puan bu-ah târ lan a nih?
9 Jehova’n biakna dik lo a huatzia chu Babulon Khaw Ropui chunga thilthleng aṭang hian chiang takin a hmuh theih a. Thu Puan 17:16 chuan: “Ki sâwm i hmuh leh sakawlh ngei chuan nawhchizuar chu an hua ang a, engmah nei lo leh saruakin an siam ang a, a sa pawh an ei ang a, meiin an hâlral ang,” a ti. A hmasain, sakawlh lianpui chuan a thih thlengin a bei a, a sate chu a ei a. Tichuan, a taksa bâng zawng chu a hâlral ṭhak a ni. Chutiang bawk chuan, rei lo têah khawvêl sawrkârte chuan sakhaw dik lo chu a do ang a. Pathianin chu chu a thlentîr ang. (Thu Puan 17:17) Khawvêl sakhaw dik lo lalram, Babulon Khaw Ropui chu tihboral ṭhak tûr a ni a. “Tuman an hmu leh tawh tawp lo vang.”—Thu Puan 18:21.
10. Sakhaw dik lo chungchângah eng nge kan dinhmun tûr chu?
10 Babulon Khaw Ropui chungchângah betu dikte chu eng dinhmunah nge an din ang? Chiang takin Bible chuan: “Ka mite u, a sualnaahte in tel lohna tûr leh, a hremnate in hmuh ve lohna tûrin, a chhûng ata chhuak rawh u,” tiin thu a pe a ni. (Thu Puan 18:4) Chhandama awm duhte chuan a tlai luat hmain sakhua dik lo chu an chhuahsan tûr a ni. Isua Krista chuan leia a awm lai khân, ni hnuhnûngahte chuan mi tam tak chuan a mah zuituah an inchhâl satliah dâwn tih a sawi lâwk a. (Matthaia 24:3-5) Chûng mite hnênah chuan: “Nangni thil sual tite u, ka hre ngai lo va che u, ka hnên ata kal bo rawh u,” a la ti ang. (Matthaia 7:23) Tûna Lala ṭhu tawh, Isua Krista chuan sakhaw dik lo chu a hnâwl ṭhak a ni.
Inthiar Fihlîm Rawh—Engtin Nge?
11. Biakna dik lo laka inthiar fihlîm tûrin eng nge kan tih ngai?
11 Kristian dikte chuan sakhaw dik lo zirtîrnate hnâwlin, biakna dik lo lakah an inthiar fihlîm a. Chu chu Pathian leh a Thu chungchânga dâwt thehdarhna radio leh television program-te leh sakhuana thil lehkha bute chu kan pumpelh tawp tûr tihna a ni a. (Sâm 119:37) Khawtlâng puipunna leh sakhaw dik lo pâwlte huaihawt intihhlimna thiltiha tel loh chu a finthlâk bawk a ni. Chu bâkah, biakna dik lo chu engti kawng mahin kan thlâwp lo bawk. (1 Korinth 10:21) Hêng thilte pumpelhna hian tuemawin ‘Krista thu ang ni lo va, mihring thu rochhiah leh khawvêl A Aw B anga an thu fing leh bumna mai mai hmanga râl lâka min lâk’ loh nân min vênghim a ni.—Kolossa 2:8.
12. Engtin nge miin sakhaw dik lo pâwlte nêna a inzawmna engpawh lakah a fihlîm theih?
12 Sakhaw dik lo mi leh sa anga hming ziak lûttu chuan Jehova Thuhretute zînga mi nih a duh chuan engtin nge ni ang? A tlângpui thuin, bânna lehkha chuan miin sakhaw dik lo mi leh sa anga thlîr nih a duh lohzia a târ lang a ni. Chutiang miin sakhaw dik lo lak aṭanga thlarau lam bawlhhlawhna engkim pumpelh tûra chêt a lâk vat chu a pawimawh zual bîk a. Thuhretu ni tûra a thiltih chuan a awmna sakhaw pâwl leh thlîrtute hmuhah chu sakhua nêna a inzawmna eng pawh a tâwp tih a lan chiantîr tûr a ni.
13. Biakna dik lo laka inthiar fihlîm a ṭûlna chungchângah Bible-in eng fuihna nge a pêk?
13 Tirhkoh Paula chuan: “Ring lo mite nên rual lo taka nghâwngkawl bât dûnin awm suh u; suahsualna leh felnain engnge inṭâwmna an neih? A nih loh leh thim leh êngin engnge inpâwlna an neih? Beliara leh Krista pawhin engnge inngeihna an neih? A nih loh leh ring lo leh ringtu chuan engnge chan dun an neih? Milemte leh Pathian biak in pawhin engnge inremna an neih? . . . Chuvângin, ‘An zîng ata lo chhuak ula, ahrangin awm rawh u, thil bawlhhlawh rêng rêng pawh dek suh u.’ Lalpan a ti,” tih a ziak a. (2 Korinth 6:14-17) Hêng thute hi biakna dik lo laka inthiar fihlîmna hmangin kan zâwm a ni. Paula fuihna hian keini pawh betu dik lote laka inthiar fihlîm a phût em?
“Fing Takin Awm Rawh”
14. Sakhaw dik lova telte lakah kan inla hrang nalh tûr a ni em? Hrilhfiah rawh.
14 Betu dikte chuan biakna dik lova tel mite nêna inpawhna engpawh an hawisan tûr a ni em? Kan rinna min ṭâwmpui lote lakah kan inla hrang nalh tûr a ni em? Ni lo ve. Thupêk ropui ber pahnihna chu: “Nangmah i inhmangaih angin i vêngte pawh i hmangaih tûr a ni,” tih a ni a. (Matthaia 22:39) Kan vêngte hnêna Ram chanchin ṭha kan hrilh hian hmangaihna kan lantîr tak zet a ni. Anmahni kan hmangaihna chu Bible kan zirpui hunah leh sakhaw dik lo laka inthiar fihlîm a ngaihzia kan hriattîr hunah kan lantîr bawk a ni.
15. ‘Khawvêla mi ni lo’ tih hian eng awmzia nge a neih?
15 Kan vêngte hnênah chanchin ṭha chu hril mah ila, Isua hnung zuitute ang bawkin, ‘khawvêla mi kan ni lo.’ (Johana 15:19) Heta ‘khawvêl’ tih thu mal hian Pathian laka inla hrang mihringte a kâwk a. (Ephesi 4:17-19; 1 Johana 5:19) Khawvêl laka inla hrang tih chu Jehova tilâwm lo rilru put hmangte, ṭawngkamte, leh nungchangte kan pumpelh tihna a ni. (1 Johana 2:15-17) Chu bâkah, “ṭhian sualte chuan nungchang ṭha an tikhawlo ṭhîn” tih thu bul nêna inmilin, Kristian tehnate mila nung lote chu ṭhian ṭhaah kan siam lo. (1 Korinth 15:33) Khawvêla mi ni lo tih chu “khawvêl bawlhhlawh kai lova” awm hi a ni. (Jakoba 1:27) Chuvângin, khawvêla mi ni lo tih chu mi dangte nêna inzawmna rêng rêng kan nei lo tihna a ni lo.—Johana 17:15, 16; 1 Korinth 5:9, 10.
16, 17. Engtin nge Kristiante’n Bible thutak hre lote chu an cheibâwl ang?
16 A nih chuan, Bible thutak hre lote chu engtin nge kan cheibâwl ang? Kolossa khuaa kohhranho hnênah, Paula chuan: “Remchânna lei zêlin, pâwn lama mite lakah chuan fing takin awm rawh u. Mi tin engtia chhân ṭheuh tûr nge ni tih in hriat theih nân in ṭawngka chhuak chu, chia al, khawngaihna tel ni fo rawh se,” tiin a ziak a. (Kolossa 4:5, 6) Tirhkoh Petera chuan: “In thinlungah Krista chu Lalah ruat rawh u; nangmahnia awm in beisei chhan zâwt apiang che u chhâng tûrin inpeih sa fo ang che u, nimahsela thuhnuairawlh tak leh ṭih dêk chungin,” tiin a ziak a ni. (1 Petera 3:15) Paula chuan Kristiante chu “tumah sawichhe lo tûr te, kawhmawh bâwl lo tûr te, mi zawng zawng laka thuhnuairawlhna tinrêng tilanga nunnêm tûrtein” a fuih a ni.—Tita 3:1, 2.
17 Jehova Thuhretute kan nih angin, mi dangte chunga chaltlaina emaw, chapona emaw chu kan pumpelh a. Sakhaw danga mite sawi nân ngaihnêpna ṭawngkam chu kan hmang lo bawk. Chutih ahnêkin, in neitu te, vêng te, a nih loh leh hnathawhpuite’n ngilnei lo emaw, ṭawngkam ṭha lo emaw an hmang chung pawhin, remhre takin kan dâwr zâwk a ni.—Kolossa 4:6; 2 Timothea 2:24.
‘Thu Dik Dân Chu Nei Tlat Rawh’
18. Sakhaw dik lova kîr lehte chuan eng thlarau lam dinhmun chhe tak nge an tawn?
18 Bible thutak zir hnua, biakna dik lova mi a kîr leh chuan a va râpthlâk dâwn êm! Bible chuan chutiang titute dawn tûr a rah chhuah lungchhiatthlâk tak chu hetianga sawiin a târ lang a ni: “Lalpa leh Chhandamtu Isua Krista an hriat avângin khawvêl bawlhhlawhnate an tlân chhuahsan hnuin chu mi vêkah chuan an tân leh a, ngamin an awm leh si chuan an awmze hnuhnûng chu atîr ai chuan a lo chhe ta zâwk a ni ang. . . . ‘Ui ama luak lamah a kîr leh a, vawkpui inbualfai tawh pawh chirhdiakah inbual tûrin a kîr leh a,’ tih thufing tawi dik tak ang thu chu an chungah a lo awm ta a ni,” tiin.—1 Petera 2:20-22.
19. Engvângin nge kan thlarau lam dinhmun hlauhawma awmtîr thei thil engpawh lakah kan invên reng chu a pawimawh?
19 Kan thlarau lam tâna hlauhawm thei thil engpawh lakah kan invêng reng tûr a ni. Hlauhawm chu englai pawhin a awm reng si a! Tirhkoh Paula chuan: “Nakin hunah chuan mi ṭhenkhatte chu, mi dawtheite vervêkna avângin hruaibona thlaraute leh ramhuaite zirtîrna thu ngaihsakin rinna chu an la bânsan ang tih thlarau chuan chiang takin a sawi,” tiin a vaukhân a ni. (1 Timothea 4:1, 2) Heta ‘nakin hun’ a sawiah chuan kan awm a. Biakna dik lo laka inthiar fihlîm lote chu “dik lohna ngamthlêmna angin, fing vervêka mihring bum chawpin, zirtîrna thli tinrênga lehlam lehlama vawrh leh len len” an ni thei a ni.—Ephesi 4:11-14.
20. Engtin nge mi tichhe thei sakhaw dik lo thununna laka kan invênghim theih?
20 Engtin nge mi tichhe thei sakhaw dik lo thununna lakah kan invênghim theih ang? Jehova’n invênhim nâna min pêk thil zawng zawng hi han ngaihtuah teh. Pathian Thu, Bible kan nei a. (2 Timothea 3:16, 17) Jehova chuan “bawi rinawm, fing tak” kal tlangin thlarau lam chaw chu hnianghnâr takin min pe bawk. (Matthaia 24:45) Thutaka hma kan sâwn zêl hian, ‘puitlingte tâna chaw rum’ châkna insiamin, thlarau lam thutak zirna hmunah kal châkna kan insiam tûr a ni lâwm ni? (Hebrai 5:13, 14; Sâm 26:8) Kan hriat tawh ‘thu dik dân chu kan neih tlatna’ tûrin, Jehova thil min pêkte chu hman ṭangkai vek i tum tlat ang u. (2 Timothea 1:13) Chutiang chuan biakna dik lo lakah kan inthiar fihlîm thei ang. (w06 3/15)
Eng Nge I Zir?
• Eng nge “Babulon Khaw Ropui” chu?
• Sakhaw dik lo laka inthiar fihlîm tûrin eng nge kan tih ngai?
• Thlarau lam tâna hlauhawm eng nge kan pumpelh ang?
[Zirlai Atâna Zawhnate]
[Phêk 14-naa milem]
“Babulon Khaw Ropui” chu nawhchizuar anga sawi a nih chhan i hria em?
[Phêk 15-naa milem]
“Babulon Khaw Ropui” chu tihchhiat a ni dâwn
[Phêk 17-naa milem]
Kan rinna min ṭâwmpui lote lakah ‘thuhnuairawlhna leh ṭih dêkna’ kan lantîr