Joba Bu Aṭanga Thu Pawimawh Hrilhfiahna
Jehova Thu Chu A Nung
Joba Bu Aṭanga Thu Pawimawh Hrilhfiahna
THLAHTU Joba chu Uz ram, tûna Arab ramah hian a chêng a. Chutih lai chuan Israel mi tam takte chu Aigupta ramah an khawsa a ni. Joba chu Israel mi ni lo mah se, Pathian Jehova betu a ni a. A chungchângah Bible chuan: “Lei chungah hian amah anga famkim, mi ngîl, Pathian ṭih mi, thil ṭha lo laka insûm thei mi tumah an awm lo,” tiin a sawi. (Joba 1:8) Ani hi Jehova chhiahhlawh langsâr bîk tak pahnih—Jakoba fapa Josefa leh zâwlnei Mosia te dam hun chhûng inkâr vêla nung a ni ngei ang.
Joba bu ziaktu nia ngaih Mosia chuan Uz ram kiang lawka awm Media rama kum 40 a awm lai khân Joba chanchin chu a hria a nih ngei a rinawm. Mosia chuan Israel mite’n thlalêra kum 40 an châm tâwp dâwn hnaih lama Uz ram an hnaih lai khân Joba hun tâwp lam chanchin chu a hria a ni thei ang. * Joba thil tawn chu mawi taka ziaka chhinchhiah a ni a, chu thuziak chu thu leh hla lama ṭha chungchuanga ngaih a ni. Mahse, chu aimah chuan hêng zawhna ang chite hi a chhâng a ni: Engvângin nge mi ṭhate’n hrehawm an tawrh? Engvângin nge Jehova’n sualna awm a phal? Mihring ṭha famkim lote hian Pathian laka an rinawmna an vawng thei em? tih te hi. Pathian Thu thâwkkhum zînga mi a nih angin, Joba lehkhabua thu awmte hi a nung a, tûn laiah pawh hian thil a tithei a ni.—Hebrai 4:12.
“KA PIANNA NI CHU BORAL RAWH SE”
(Joba 1:1–3:26)
Ni khat chu Setana’n Pathian hmaah Joba rinawmna chu a cho va. Jehova chuan chu chona chu pawmin, Setana chu Joba chunga chhiatna inzawm zat mai a thlentîr chu a phalsak a. Mahse, Joba chuan ‘Pathian sawichhiat’ chu a duh lo.—Joba 2:9.
Joba ṭhian pathumte chu ‘amah tuarpui tûrin’ an lo thleng a. (Joba 2:11) Engmah sawi lovin an ṭhut ngawihpui reng a, a tâwpah Joba chu: “Ka pianna nî chu boral rawh se,” tiin a ṭawng chhuak a. (Joba 3:3) “Nausên êng hmu ngai lote ang mai,” a nih loh leh thi saa piang ang mai nih a duh hial a ni.—Joba 3:11, 16.
Bible Chungchânga Zawhnate Chhânna:
1:4—Joba fate chuan pian cham an lâwm em? Lâwm lo ve. He mi chânga “hun” tia lehlin atîra ziaka “nî” tih chu “pian champhaphâk nî” tiin ṭhenkhat chuan an hre sual a. Mahse Hebrai ṭawnga “nî” tihna leh “pian champhaphâk nî” tihna hi a inang lo va, awmze hrang ve ve a nei a ni. (Genesis 40:20) Joba 1:4-a “hun” tih hi ni chhuah aṭanga ni tlâk hun chhûng inkâr sawi nâna hman a ni a. Joba fapa pasarihte chuan ni sarih chhûng chhûngkaw inhmuh khâwmna chu kum tinin an nei niin a lang. Chutia ruai an han inṭheh chhâwk chuan, “an hun zêlah,” a nih loh leh ‘an nî zêlah’ anmahni in ṭheuhvah a fapate chu ruai buatsaihtu an ni ṭhîn.
1:6; 2:1—Tute nge Jehova hmaa inlan phalsakte chu? Jehova hmaa dingte zîngah chuan Pathian Fapa mal neih chhun, Thua; vântirhkoh rinawmte; leh Diabol-Setana pawh tiamin ‘Pathian fa’ vântirhkoh thuâwihlote chu an tel a ni. (Johana 1:1, 18) Satana leh a ramhuaihote chu kum 1914-a Pathian Lalram din a nih hnu lawka vân aṭanga paihthlâk an nih hma loh chuan vânah an awm reng a. (Thu Puan 2:1-12) Jehova chuan a hmaa an inlan phalsakna hmangin, thlarau thil siam zawng zawngte hmaah Setana chona leh buaina chawh chhuah chu a pho lang a ni.
1:7; 2:2—Jehova’n Setana chu hmaichhan ngeiah a bia em? Bible chuan Jehova’n thlarau thil siamte a biak pawh dân chu kimchang takin min hrilh lo va. Amaherawhchu, zâwlnei Mikaia chuan inlârnaah vântirhkoh leh Jehova hmaichhana an inbe lai a hmu a ni. (1 Lalte 22:14, 19-23) Chuti a nih chuan, Jehova chuan Setana chu mi dang kaltlang lovin hmaichhana a biak ngei a rinawm.
1:21—Eng kawngin nge Joba chu a “nu pum” chhûnga a kîr leh theih? Pathian Jehova’n ‘leia vaivuta mihring a siam’ avângin, heta “nu” tih hi lei sawi nâna hman a ni.—Genesis 2:7.
2:9—Joba nupuiin Pathian sawichhia a, thi mai tûra a pasal a hrilh khân, eng rilru nge a put ang le? Joba nupui chuan a pasal chân ang bawk chu a chân a ni. A pasal hrisêl ṭha tak ni ṭhîn kha tûna natna tenawm takin a tlâkbuak ta mai han hmuh chu a tuar hle ngei ang. Tin, a fa duh takte a chân tawh a. Hêng zawng zawngte avânga a lungngaihna chuan thil pawimawh tak—Pathian nêna an inlaichînna chu a ngaihtuah teltîr lo a ni thei ang.
Kan Zir Tûrte:
1:8-11; 2:3-5. Joba chungchânga târ lan a nih angin, rinawmna vawng tûr chuan ṭawngkam ṭha leh thiltih dik bâkah, Jehova rawngbâwlna atâna rilru put hmang dik a ngai a ni.
1:21, 22. Dinhmun ṭha leh khirh hnuaia Jehova laka rinawm rengna hmangin, Setana chu dawthei a nihzia kan fiah thei a ni.—Thufingte 27:11.
2:9, 10. Joba angin, chhûng leh khatte’n thlarau lam thil kan ûmna an hlut lo emaw, kan rinna phatsan tûr, a nih loh leh kalsan tûra min nawr emaw hunah kan nghet tlat tûr a ni.
2:13. Joba ṭhiante chu thlarau lama an chak loh avângin Pathian leh a thutiamte chungchângah hnêmna thu sawi tûr engmah an nei lo.
“KA DIKNA KA DAH BO LO VANG”
(Joba 4:1–31:40)
Joba ṭhian pathumte sawi ber chu Joba’n thil sual nasa tak a tih avânga Pathian hremna nasa tak tâwk a nihzia hi a ni. Elifaza chuan hma a hruai a. Bildada chuan elsênna ṭawngkam na lehzual hmangin a zui a. Zophara chuan a diriam lehzual sauh bawk a ni.
Joba chuan amah tlawhtute ngaihtuah dân dik lo chu a pawm lo va. Pathianin hrehawm a tawrh a phal chhan a hriat thiam loh avângin, nasa taka mahni inthiam chawp a tum a. Amaherawhchu, Joba chuan Pathian a hmangaih a: “Ka thih thlengin ka dikna ka dah bo lo vang,” tiin a au chhuak a ni.—Joba 27:5.
Bible Chungchânga Zawhnate Chhânna:
7:1; 14:14—‘Leia tawn tûr’ leh “hun ruat” tih hi eng tihna nge ni? Joba manganna chu a nasat êm avângin, a thil tawn chu hna hahthlâk taka thawktu inhlawhfa thil tawn ang mai a ni. Hebrai thu mal “tawn tûr” tia lehlin hi “tihluihnaa thawhtîr” tihna pawh a ni thei a. (Joba 10:17) Miin Seol-a “hun ruat” a hman chhûng—a thih aṭanga a thawh leh thleng—chu hun hman ngei ngei ngai a nih avângin, ani chuan chu hun chu tihluihnaa hun serh hman nên a khaikhin a ni.
7:9, 10; 10:21; 16:22—Hênga chhinchhiah Joba thusawi hian thawhlehna a ring lo tih a lantîr em? Hêngte hi Joba hmâlawka thil awm dân tûr chungchâng sawina a ni. Chuti a nih chuan, eng a tihna nge ni ang? A awmzia ni thei pakhat chu, a thih chuan a dam rualpui tuma’n an hmu dâwn tawh lo a tihna a ni thei a. Pathian hun ruat a thlen hma loh chuan, Joba chu an thlîr dân aṭangin a lo kîr leh lo vang a, hriat reng pawh a hlawh lo vang. Tin, Joba chuan Seol aṭangin tumah mahni thuin an kîr leh thei lo a tihna pawh a ni thei bawk. Joba’n thawhlehna lo awm tûr a rinzia chu Joba 14:13-15-ah hian a lang chiang hle a ni.
10:10—Engtin nge Jehova’n Joba chu ‘hnute tui anga a leih chhuah a, hnute khal anga a hlâwm’? Hei hi a nu chhûla Joba insiam dân hla thua hrilhfiahna a ni.
19:20—Joba’n “ka ha vun chu ka la chang” a tih hian eng a tihna nge ni thei ang? Vun nei lo nia hriat thil vun chauh chang pha anga insawiin, Joba chuan engmah chang lovin a dam khawchhuak tih a sawina a ni thei ang.
Kan Zir Tûrte:
4:7, 8; 8:5, 6; 11:13-15. Hrehawm tuartu chu a thil tuh rah a seng emaw, Pathianin a pawm lo emaw angin kan ngai nghâl mai tûr a ni lo.
4:18, 19; 22:2, 3. Mi kan zilhna thu chu kan mi mal ngaih dânah ni lovin, Pathian Thuah a innghat zâwk tûr a ni.—2 Timothea 3:16.
10:1. Nasa taka rilru natna chuan Joba mit a tihdelsak avângin, a hrehawm tawrh chhan ni thei tûr âwmang thil chu a ngaihtuah lo. A bik takin, a kaihhnawih thil kan hriat chian avângin, hrehawm kan tawrh hunah kan lungngai lutuk tûr a ni lo.
14:7, 13-15; 19:25; 33:24. Setana’n kan chunga a thlentîr theih fiahna eng pawh kan tawh lai hian thawhleh beiseina chuan min tichak thei a ni.
16:5; 19:2. Kan ṭawngkam chhuakte chuan mite a tithinur lovin, a fuihin a tichak zâwk tûr a ni.—Thufingte 18:21.
22:5-7. Finfiahna rin tlâk awm si lo inpuhna ṭanchhana zilhna pêk chuan hlutna a nei lova, mi a tichhe thei a ni.
27:2; 30:20, 21. Rinawmna vawng tûr chuan ṭhat famkim a ngai kher lo. Joba chuan dik lo takin Pathian a sawisêl a ni.
27:5. Joba chauhvin a dikna, a nih loh leh rinawmna chu a la bo thei, chu chu miin Pathian a hmangaihnaa a innghah avângin. Chuvângin, Jehova hmangaihna nghet tak chu kan nei tûr a ni.
28:1-28. Mihring chuan leia ro awmna a hria a. Chu ro a han zawn chuan, hmun hla tak hmu thei mupui mit pawhin a hmuh theih lohna lei hnuai kawngahte a thiamna chuan a hruai a ni. Pathian finna erawh chu Jehova ṭihna aṭanga lo awm a ni.
29:12-15. Mamawhte hnênah phûr takin hmangaih-ngilneihna kan lantîr tûr a ni.
31:1, 9-28. Joba chuan inchhai derna, uirêna, dik hlelna, leh mi dangte nunrâwng taka cheibâwlna, hausak âtchilhna, leh milem biakna te pumpelh kawngah kan tân entawn tûr a siam a ni.
“VUT LEH VAIVUTA ṬHUIN KA SIM TA E”
(Joba 32:1–42:17)
An kianga awm Elihua chuan an thusawi chu dawhthei takin a lo ngaithla reng a. Tûnah chuan a ṭawng chhuak ve ta. Joba leh amah nghaisatu pathumte chu a zilh a ni.
Elihua’n thu a sawi zawh veleh, Jehova chuan ṭhâwngaleivir aṭangin a chhâng a. Ani chuan Joba hrehawm tawrhna chhan chu a hrilhfiah lo. Amaherawhchu, Engkimtitheia chuan zawhna inzawm tam tak zâwtin, Joba chu A thiltihtheihna mak tak leh finna nasa tak a hriattîr a. Joba chuan hriatthiamna tel lovin thu a sawi a ni tih pawmin: “Ka inten a, vut leh vaivuta ṭhuin ka sim ta e,” tiin a sawi a ni. (Joba 42:6) Joba hrehawm tawrhna a han tâwp chuan, a rinawmna chu malsâwmsak a lo ni ta a ni.
Bible Chungchânga Zawhnate Chhânna:
32:1-3—Engtik khân nge Elihua a lo thlen? Elihua chuan an ṭawng zawng zawng a lo hriat vek avângin, a ṭhian pathumte’n ni sarih chhûng ngawi renga an ṭhutpuina chu ṭawngchhuahna hmanga Joba’n a tihtâwp hma deuh aṭangin, an thusawi hriat theihna tûr chinah a lo ṭhu a ni ngei ang.—Joba 3:1, 2.
34:7—Engtin nge Joba chu “tui anga deuna in” mi ang a nih? Joba chuan a hrehawm tawrh laiin, amah kantu mi pathumte nuihsawhna chu Pathian kalh zâwng mah ni se, pawm a duh a. (Joba 42:7) Chutiang chuan, tui ti taka tui intu ang maiin, deuna chu a pawm a ni.
Kan Zir Tûrte:
32:8, 9. Finna hi kum upat ruala neih theih a ni lo. Pathian Thu hriatthiamna leh a thlarau kaihhruaina a ngai a ni.
34:36. Rinawmna chu kawng engemaw taka ‘fiah fai vek’ nihna hmanga târ lan a ni.
35:2. Elihua chuan ngun takin a ngaithla a, a thusawi ṭantirhah thu buai bulpui ber chu a sawi chat a ni. (Joba 10:7; 16:7; 34:5) Kristian upate chuan zilhna an pêk hmain ngun takin an ngaithla ang a, thil nih dân dik tak chu hriain, thu pawimawh lai tak chiang takin an hre thiam tûr a ni.—Thufingte 18:13.
37:14; 38:1–39:30. Jehova thiltih mak ropui takte—a thiltihtheihna leh finna lantîrnate—ngun taka chhûtna chuan min inngaihtlâwmtîrin, a lalchungnunna thiamchantîrna chu kan mi mal duhzâwng engang ai pawhin a pawimawh zâwk fê tih hre thiam tûrin min ṭanpui a ni.—Matthaia 6:9, 10.
40:1-4. Engkimtitheia sawisêl kan duh châng hian ‘kan kâ kan hup mai’ tûr a ni.
40:15–41:34. Behemoth (tuivawk) leh liviathan (awle) chu an va chak tak êm! Pathian rawngbâwlnaa nghet reng tûr chuan keini pawhin chakna min petu, hêng ramsa chak takte Siamtu hnên aṭanga chakna chu kan mamawh a ni.—Philippi 4:13.
42:1-6. Jehova thu benga hriatna leh a thiltihtheihna lan chhuah dân hriattîrna chuan Joba chu ‘Pathian hmu’ tûr, a nih loh leh Pathian chungchânga thutak hre tûrin a ṭanpui a. (Joba 19:26) Hei hian a ngaih dân a siam ṭhattîr a ni. Pathian Lehkha Thu hmanga zilhna kan dawn hunah, kan thiltih sualte pawm leh insiam ṭhat chu kan châk tûr a ni.
‘Joba Chhelna’ Ang Chu Nei Rawh
Joba lehkhabu chuan mihringte hrehawm tawrhnaah Pathianin mawh a phur lo tih chiang takin a târ lang a. Setana chu mawhphurtu a ni. Pathianin leia suahsualna awm a phalna hian Jehova lalchungnunna thu buai leh kan rinawmna thu buaia kan ṭan lam mi mala lantîr theihna hun remchâng min pe a ni.
Joba angin, Jehova hmangaihtu zawng zawngte chu fiah an ni dâwn a. Joba chanchin chuan chu fiahna chu kan tuar chhuak thei tih rinnghehna min pe a ni. Kan buaina tawhte chu chatuanin a awm reng dâwn lo tih min hriattîr bawk. “Joba chhelzia chu in hria a, Lalpan a tâwpa a tihzia pawh kha in hmu bawk a,” tiin Jakoba 5:11 chuan a sawi. Jehova’n Joba chu rinawmna a vawn avângin lâwmman a pe a ni. (Joba 42:10-17) Kan hmaa beiseina awm—lei Paradis-a chatuana nun—chu a va ropui tak êm! Joba angin, kan rinawmna vawn chu i tum ruh tlat ang u.—Hebrai 11:6. (w06 3/15)
[Footnote]
^ par. 2 Joba lehkhabu chuan B.C.E. 1657 aṭanga 1473 chhûng, kum 140 aia tam a huam tel a ni.
[Phêk 6-naa milemte]
‘Joba chhelna’ aṭangin eng nge kan zir theih?