‘Kal Ula, Zirtîr Siamin, Baptis Rawh U’
‘Kal Ula, Zirtîr Siamin, Baptis Rawh U’
“Chutichuan kal ula, hnam tina mi zirtîrahte siam ula, . . . baptis ula, thu ka pêk zawng zawng che u pawm tûrin zirtîr rawh u.”—MATTHAIA 28:19, 20.
1. Sinai Tlâng bulah Israel hnam chuan eng thu tlûkna nge an siam?
KUM 3,500 vêl kal ta khân, hnam pakhat chuan a hnam pumin Pathian hnênah thu an tiam a. Sinai Tlâng bulah pungkhâwmin, Israelte chuan “LALPA sawi zawng zawngte chu kan ti zêl ang e,” tiin an puang chhuak a ni. Chuta ṭang chuan, Israel chu Pathian hnêna inpumpêk, a “ro thlan bîk” an lo ni. (Exodus 19:5, 8; 24:3) Anni chuan a vênhimna leh an chhuan zawng zawng thlenga “hnutetui leh khawizu luanna” rama chên chu an beisei a ni.—Leviticus 20:24.
2. Tûn laiah mite’n Pathian nên eng inlaichînna nge an neih theih?
2 Mahse, fakna hla phuahtu Asapha sawi angin, Israelte chuan “Pathian thuthlung chu an zâwm lo va. A dânah awm an duh lo bawk” a ni. (Sâm 78:10) Jehova hnêna an pi leh pute thu tiam chu an vawng lo. A tâwpah chu hnam chuan Pathian nêna an inlaichînna duhawm tak chu an chân ta a ni. (Thuhriltu 5:4; Matthaia 23:37, 38) Chuvângin, Pathian chuan “ama hming pu atân an zîng ata mite la chhuak tûrin Jentailte a kan” a. (Tirhkohte 15:14) Tichuan, hêng nî hnuhnûngahte hian, ani chuan “mipui tam tak tuma chhiar sên loh, hnam tin zînga mite, ṭawng tin zînga mite” chu a lakhâwm mêk a, anni chuan: “Kan Pathian lalṭhutphaha ṭhua hnênah leh, Berâm No hnênah chhandamna,” tiin lâwm takin an pawm a ni.—Thu Puan 7:9, 10.
3. Pathian nêna mi mal inlaichînna nei tûrin miin eng hma lâkna nge a neih ngai?
3 Pathian nêna inlaichînna hlu tak neitute zînga mi ni tûr chuan, mi chuan Jehova hnênah a inpumpêkin, chu chu tuia baptisma channa hmangin vântlâng hmaah a lantîr tûr a ni. Hei hi a zirtîrte hnêna: “Chutichuan kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula, thu ka pêk zawng zawng che u pawm tûrin zirtîr rawh u,” tia Isua thupêk zawmna a ni. (Matthaia 28:19, 20) Israelte chuan “thuthlunna bu” chhiar chu an ngaithla a. (Exodus 24:3, 7, 8) Chuvâng chuan, Jehova chunga an thiltih tûr chu an hre thiam a ni. Chutiang bawkin tûn laiah pawh, miin baptisma a chan hmain a Thu, Bible-a hmuh Pathian duhzâwng hriatna dik a neih chu a pawimawh a ni.
4. Miin baptisma a chan theihna tûrin eng nge a tih ngai? (A chunga bâwm telh rawh.)
4 Chiang takin, Isua chuan a zirtîrte’n baptisma an chan hmaa rinna lungphûm nghet tak nei tûrin a duh a. A hnungzuitute chu kala zirtîr siam tûr chauh ni lovin, ‘thu a pêk zawng zawng pawm tûra’ zirtîr tûrin a hrilh bawk a ni. (Matthaia 7:24, 25; Ephesi 3:14-19) Chuvângin, baptisma chang thei tûrte chu, hmanhmawh lutuk leh hre chiang lova thu tlûkna an siam loh nân, Bible chu dân naranin a thla têl emaw, kum khat emaw, kum hnih hial emaw pawh an zir phawt ṭhîn a ni. Baptisma channaah ngei pawh hian, a chang tûrte chuan zawhna pawimawh tak pahnih chu an chhâng bawk. Isua chuan ‘A ni, kan tih chu a ni, Ni lo, chu ni lo’ nihtîr a pawimawhzia a sawi uar avângin, baptisma channaa hêng zawhna pahnihte pawimawhna bih chian chu kan ṭangkaipui ang.—Matthaia 5:37.
Simna leh Inpumpêkna
5. Baptisma chang tûrte hnêna zawhna pakhatna chuan eng rahbi pawimawh pahnih nge a sawi uar?
5 Baptisma chang tûr hnêna zawhna pakhatna chu a nun hlui sima Jehova duhzâwng ti tûra a inpumpêk leh pêk loh a ni a. He zawhna hian rahbi pawimawh tak pahnih, baptisma chan hmaa tih ngei ngei tûr simna leh inpumpêkna chu a sawi uar a ni.
6, 7. (a) Engvângin nge Baptisma chang tûr zawng zawngte tân simna a ngaih? (b) Miin a sim hunah eng inthlâkthlengna nge a neih ang?
6 Engvângin nge miin baptisma a chan hmain simna a neih ang? Tirhkoh Paula chuan: “Keini pawh hmânah chuan tisa leh rilru duhzawng tiin, kan tisa châknate angin kan awm vek a,” tiin a hrilhfiah a ni. (Ephesi 2:3) Pathian duhzâwng hriatna dik kan neih hmain, khawvêl thu bulte leh tehnate milin kan nung a. Kan nun chu he khawvêl pathian, Setana thununna hnuaiah a awm a ni. (2 Korinth 4:4) Amaherawhchu, Pathian duhzâwng kan hriat hnu chuan, ‘mihring châkna lamahte awm tawh lovin, Pathian duhzâwng lama’ awm chu kan tum tlat a ni.—1 Petera 4:2.
7 He nun dân thar hian hlâwkna tam tak a nei a. A bul berah chuan, Davida’n Pathian ‘puan in’ leh ‘tlâng thianghlima’ lût tûra sâwmna nêna a tehkhin, Jehova nêna inlaichînna hlu tak neih theihna kawng a hawng a ni—chanvo hlu tak mai chu. (Sâm 15:1) Inâwm takin, Jehova chuan mi tinte ni lovin, “dik taka awma, fel taka tia, [an] rilrua thutak tak sawi mi” chauh chu a sâwm a ni. (Sâm 15:2) Thutak kan zir hmaa kan dinhmun azirin, chûng thil phûtte tlin tih chu nungchang lam leh miziaah inthlâk thlengna engemaw tak kan siam a ngai tihna a ni. (1 Korinth 6:9-11; Kolossa 3:5-10) Chutianga inthlâk thleng tûra chêttîrtu chu simna—kan nun hlui avânga nasa taka inchhîrna leh Jehova tihlâwm tum tlatna—hi a ni. Hei hian inlamlêt ṭhakna—tisa leh khawvêl nun kawng chu kalsan a, Pathian tilâwm nun kawng zawhna—a thlen a ni.—Tirhkohte 3:19.
8. Engtin nge inpumpêkna kan siam a, hei hian baptisma channa nên eng inkûngkaihna nge a neih?
8 Baptisma chang tûrte tâna zawhna hmasa ber a tâwpna lam chuan Jehova duhzawng ti tûra an inpumpêk leh pêk loh a zâwt a. Inpumpêkna chu baptisma chan hmaa tih tûr rahbi pawimawh tak a ni a. Chu chu Krista kal tlanga Jehova hnêna kan nun kan pêk duhzia ṭawngṭaia hriattîrna a ni. (Rom 14:7, 8; 2 Korinth 5:15) Tichuan, Jehova chu kan Pu leh min Neitu a lo ni a, Isua angin a duhzâwng tih chu nuam kan ti a ni. (Sâm 40:8; Ephesi 6:5-8) Jehova hnêna he inpêkna thutiam urhsûn tak hi vawikhat chauh siam a ni. Amaherawhchu, inpumpêkna chu mahni leh Pathian chauh inkâra neih a nih avângin, baptisma chan nia vântlâng hmaa puan chhuahna chuan kan Pa vâna mi hnêna kan inpumpêkna thutiam chu mite a hriattîr a ni.—Rom 10:10.
9, 10. (a) Pathian duhzâwng tihnaah eng nge tel? (b) Nazi thuneitute hial pawhin kan inpumpêkna chungchâng eng nge an hriat?
9 Pathian duhzâwng tihna kawnga Isua entawnnaah chuan eng nge tel? Isua chuan a zirtîrte hnênah: “Tupawhin mi zui a duh chuan mahni inphatin, a nghaisakna ban puin min zui zêl rawh se,” a ti. (Matthaia 16:24, New World Translation) Hetah hian kan tih tûr thil pathum a sawi a. A hmasa ber chu, mahni ‘inphat’ a ni a. Thu danga sawi chuan, ngaihtuahna hmasial leh ṭha famkim lo hnâwl a, Pathian zilhna leh kaihhruaina pawm hi a ni. A pahnihna chu, mahni ‘nghaisakna ban put’ a ni. Isua hun lai chuan nghaisakna ban chu zahthlâk leh hrehawm tawrhna entîrtu a ni a. Kristian kan nih avângin, chanchin ṭha avângin hrehawm tawrh châng kan nei thei tih chu kan pawm a. (2 Timothea 1:8) Khawvêlin min nuihsawh emaw, min dem emaw pawh ni se, Krista angin “mualphona chu ngainêpin,” Pathian kan tilâwm tih hriatnaah chuan kan lâwm a ni. (Hebrai 12:1, 2) A tâwp berah chuan, Isua chu kan zui “zêl” a ni.—Sâm 73:26; 119:44; 145:2.
10 Ngaihvenawm takin, dodâltu ṭhenkhat phei chuan Pathian rawngbâwl tûra Jehova Thuhretute inpumpêkna pawimawhzia chu an hre thiam a ni. Entîr nân, Nazi Germany rama Buchenwald concentration camp-ah chuan, Thuhretu an rinna phatsan duh lote chuan: “Bible Zirlai inpe tak ka la ni a, Jehova nêna chhia ka chham tawh chu engtikah mah ka bawhchhe lo vang,” tih thu inziaka an hming ziak tûra phût an ni a. Hei hian Pathian chhiahhlawh rinawm, inpumpêk zawng zawngte rilru put hmang chu a hril chiang hle.—Tirhkohte 5:32.
Jehova Thuhretute Zînga Mi Anga Chhinchhiah
11. Baptisma changtu chuan eng chanvo nge a neih?
11 Baptisma chang tûr hnêna zawhna pahnihna chuan baptisma channain Jehova Thuhretute zînga pakhat angin a chhinchhiah dâwn tih a hriat leh hriat loh a zâwt a. Baptisma a chan hnu chuan, Jehova hming pu rawngbâwltua nemngheh a lo ni a. Hei hi chanvo hlu tak a nih rualin mawhphurhna lian tak a ni bawk. Chu chuan baptisma changtu chu, Jehova chunga a rinawm phawt chuan chatuana nun beiseina neiin a siam bawk a ni.—Matthaia 24:13.
12. Jehova hming put theihna chanvo chuan eng mawhphurhna nge a ken tel?
12 Dik tak chuan, Jehova, Pathian engkimtitheia hming put chu chawimawina nasa tak zawng a ni ngei mai. Zâwlnei Mika chuan: “Hnam tinin mahni pathian ṭheuh an bia ang a, keini pawh LALPA kan Pathian chu kumkhuain kan bia ang,” a ti. (Mika 4:5) Nimahsela, chawimawina rualin tih tûr pawh a awm a. A hming kan puta chawimawi tûr zâwnga nun chu kan tum tlat tûr a ni. Tirhkoh Paula’n Rom khua Kristiante a hriattîr angin, miin thu a hril ang a nunpui loh chuan Pathian hming chu “tihchhiatin” a awm a ni.—Rom 2:21-24.
13. Engvângin nge Jehova chhiahhlawh inpumpêkte chuan an Pathian chungchâng hril tûra mawhphurhna an neih?
13 Mi chu Jehova Thuhretute zînga mi a lo nih chuan, a Pathian chungchâng hril tûrin mawhphurhna a la nghâl bawk a ni. Jehova chuan a hnêna inpumpêk Israel hnamte chu chatuana a Pathianzia finfiahna hriatpui tûrin a sâwm a ni. (Isaia 43:10-12, 20, 21) Mahse, chu hnam chuan he mawhphurhna hi a hlen lo va, a tâwpah, Jehova duhsakna chu a hloh ṭhak a ni. Tûn laiah, Kristian dikte chuan Jehova hming put theihna chanvo an neih chu an chhuang a. Kan chhuan chhan chu amah kan hmangaih vâng leh a hming tihthianghlim kan châk vâng a ni. Kan Pa vâna mi chungchânga thu dik leh a thiltum kan hriat avângin, engtin nge kan ngawih reng theih tehrêng ang? Tirhkoh Paula’n: “Tih mâkmawh ka chungah a innghat a ni si a; chanchin ṭha hril suh ila, kan chung a pik dâwn si a,” tih a sawi laia a rilru put hmang chu kan pu ve a ni.—1 Korinth 9:16.
14, 15. (a) Jehova inawpna pâwl chuan thlarau lama kan ṭhan chhohnaah eng hmun nge a chan? (b) Thlarau lama min ṭanpui tûrin eng thilte nge hmuh theih a nih?
14 Zawhna pahnihna hian baptisma chang tûra chu Jehova thlarauva kaihhruai a inawpna pâwl thawhpui tûra a mawhphurhna pawh a hriattîr bawk. Pathian rawngbâwlnaah kan mal ṭan thei lo va, “unauhote” ṭanpuina, thlâwpna, leh fuihna chu kan mamawh a ni. (1 Petera 2:17; 1 Korinth 12:12, 13) Pathian inawpna pâwl chuan kan thlarau lam ṭhan chhohnaah hmun pawimawh tak a chang a. Chu chuan hriatna dika ṭhang tûr te, buaina kan tawh huna fing taka thil ti tûr te, leh Pathian nêna inlaichînna hnai tak nei tûr tea min ṭanpuitu Bible thu leh hla chhuah hnianghnâr takin min pe a ni. Nuin a fa chu a hrai puar a, a enkawl angin, “bawi rinawm, fing tak” chuan thlarau lama kan ṭhan chhohna tûrin thlarau lam chaw chu a hun takah hnianghnâr takin min pe a ni.—Matthaia 24:45-47; 1 Thessalonika 2:7, 8.
15 Jehova mite chuan chawlhkâr tina inkhâwmnaah Jehova Thuhretu rinawm ni tûra an mamawh kaihhruaina leh fuihna te chu an dawng a. (Hebrai 10:24, 25) Theocratic Rawngbâwlna School chuan vântlâng hmaa thu sawi thei tûrin min zirtîr a, Rawngbâwlna Inkhâwm chuan kan thuchah ken thiam lehzuala sawi thei tûrin min zirtîr a ni. Kan inkhâwmna leh Bible thu leh hla mi mala kan zirna hmangin, Jehova thlarau chuan hna a thawkin, a inawpna pâwl a kaihruai a ni tih kan hmu thei a. Hêng thilte hmang hian, Pathian chuan hlauhawm chu min hriattîr a, rawngbâwltu hlawhtling tak ni tûra min zirtîrin, thlarau lama harhvâng tûrin min ṭanpui a ni.—Sâm 19:7, 8, 11; 1 Thessalonika 5:6, 11; 1 Timothea 4:13.
Thu Tlûkna Min Siamtîrtu Chu
16. Jehova hnêna inpumpêk tûrin engin nge min chêttîr?
16 Zawhna pahnihte chuan baptisma chang tûrte hnênah tuia baptisma chan a pawimawhna leh chu miin a ken tel mawhphurhnate chu a hriat nawntîr a ni. A nih leh, baptisma chang tûrin engin nge anmahni chêttîr ang? Tu emawin min tur vâng ni lo vin, Jehova’n a lama min “hîp” avângin baptisma chang a zirtîrte zînga mi kan lo ni a. (Johana 6:44) “Pathian chu hmangaihna” a nih avângin, tihluihna ni lovin, hmangaihnain lei leh vânah ro a rêl a ni. (1 Johana 4:8) Jehova mize duhawm takte avâng leh min dâwr dân avângin a lama hîpin kan awm a. Ani chuan kan tân a Fapa mal neih chhun chu min pe a, nakin hun beiseina ṭha ber chu min pe a ni. (Johana 3:16) Chuvângin, a hnêna kan nun pe—a hnêna inpumpêk—tûra chêttîrin kan awm a ni.—Thufingte 3:9; 2 Korinth 5:14, 15.
17. Eng hnênah nge kan inpumpêk loh?
17 Kan inpumpêkna chu thu bul pakhatah emaw, hna pakhatah emaw a ni lo va, Jehova hnênah ngei a ni. Pathianin a mite hnêna a pêk hna chu a inthlâk danglam ang; mahse, a hnêna an inpumpêkna chu a ngai reng a ni. Entîr nân, Abrahama hnêna tih tûr a hrilh chu Jeremia hnêna a hrilh nên chuan a inang lo va. (Genesis 13:17, 18; Jeremia 1:6, 7) Mahse, Jehova an hmangaih avâng leh rinawm taka a duhzâwng tih an duh avângin, an pahnihin Pathian pêk hna chu an hlen a ni. He hun tâwp chhûng hian, Krista hnungzui baptisma chang tawh zawng zawngte chuan Ram chanchin ṭha hril tûr leh zirtîr siam tûra Krista thupêk chu hlen chhuah an tum tlat a. (Matthaia 24:14; 28:19, 20) Chu hna phur taka thawh chu vâna kan Pa kan hmangaihna leh a hnêna kan inpumpêk tak zetzia lantîrna kawng ṭha tak a ni.—1 Johana 5:3.
18, 19. (a) Kan baptisma channa hmangin vântlâng hmaah eng puan chhuahna nge kan siam? (b) A dawta thuziakah eng nge ngaihtuah ni dâwn?
18 Rinhlelh rual lohvin, baptisma chuan malsâwmna tam tak dawn theihna kawng a hawng a; mahse, ho lam taka lâk tûr a ni lo. (Luka 14:26-33) Chu chuan mawhphurhna dang zawng aia ngaih pawimawh tlat tumna chu a târ lan avângin. (Luka 9:62) Baptisma kan chanin: “He Pathian hi kumkhaw tlaitluana kan Pathian a ni dâwn si a: thih thleng pawha min hruaitu a ni ang,” tih chu vântlâng hmaah kan puang chhuak tihna a ni.—Sâm 48:14.
19 A dawta thuziak chuan tuia baptisma chan nêna inkûngkaiha zawhna lo chhuak thei dangte chu a bih chiang ang. Baptisma chang lo tûrin min dang bettu thil engemaw a awm thei em? Kum upat lam chu ngaihtuah tel a ngai em? Engtin nge kan vaiin baptisma channa hun chu zahawm tak kan nihtîr theih ang? (w06 4/1)
I Hrilhfiah Theih Em?
• Engvângin nge Kristian tinte chuan baptisma chan hmaa an sim a ṭûl?
• Pathian hnêna inpumpêknaah eng nge tel?
• Jehova hming put theihna chanvo chuan eng mawhphurhnate nge a ken tel?
• Baptisma chang tûrin engin nge min chêttîr ang?
[Zirlai Atâna Zawhnate]
[Phêk 22-naa bâwm/milem]
Baptisma Chang Tûrte Tâna Zawhna Pahnih
Isua Krista tlanna inthawina zârah i sualnate chu simin, Jehova duhzâwng ti tûrin a hnênah i inpumpêk tawh em?
I inpumpêkna leh baptisma channa hian Pathian thlarauva kaihhruai, a inawpna pâwl nêna inkawp Jehova Thuhretute zînga mi angin a chhinchhiah che tih i hria em?
[Phêk 23-naa milem]
Inpumpêkna chu ṭawngṭaia Jehova hnêna intiamna urhsûn tak a ni
[Phêk 25-naa milem]
Kan rawngbâwlna chuan Pathian hnêna kan inpumpêkna a târ lang