Kristian Baptisma Chang Thei Tûra Thil Phûtte Tlinin

“Baptisma channa tûr engin nge mi dâl kher?”​—⁠TIRHKOHTE 8:⁠36.

1, 2. Engtin nge Philipa chuan Ethiopia mi lian nên tîtîna a neih ṭan a, he pain biakna dik a ngaihvenzia engin nge târ lang?

ISUA thih hnu kum khat emaw, kum hnih emawah chuan sawrkâr hotu lian pakhat chu chim lam panin Jerusalem aṭang Gaza panna kawngah a zin a. Tawlailîra chuangin mêl sângkhat lai hah taka a zin a ngai a ni. He sakhaw mi tak hi Jehova be tûrin Ethiopia aṭang Jerusalem thlengin a zin a. A kîr leh lam zin kawng thui tak chu, Pathian Lehkha Thu chhiar nâna a hun fing taka hmang tûr khawpin rinna a nei a. Jehova’n he mi dik tak hi a hmu a, vântirhkoh hmangin a hnêna thu hril tûrin Philipa chu A tîr a ni.​—⁠Tirhkohte 8:​26-28.

² Ethiopia mi lian chuan chûng hun laia an tih ṭhin dân anga lehkha a chhiar rîk avângin, Philipa chuan tîtîna neih ṭan chu awlsam a ti hle a. Chutianga a chhiar rîk avângin, Philipa chuan Isaia bu a chhiar tih chu a hre thei a ni. Philipa zawhna tluangtlam tak pakhat: “I chhiar kha a awmzia i hria em?” tih chuan chu pa ngaihven chu a hlawh nghâl a. Chu chuan Isaia 53:​7, 8 sawihona a neihtîr a ni. A tâwpah, Philipa chuan “Isua thu a hrilh a.”​—⁠Tirhkohte 8:​29-35.

3, 4. (a) Engvângin nge Philipa’n Ethiopia mi chu rei rial lova a baptis? (b) Tûnah eng zawhnate nge kan ngaihtuah ang?

³ Rei lo te chhûngin, Ethiopia mi chuan Pathian thiltuma Isua chanvo rualin, Krista zirtîr baptisma chang nih a ṭûlzia a hre thiam nghâl a. Tui tam tham tak tlingkhâwm a hmuhin Philipa hnênah: “Baptisma channa tûr engin nge mi dâl kher?” tiin a zâwt a ni. Ni e, hei hi thil awm khât tak zawng a ni ngei mai a. Ani hi  rinna nei mi, Pathian chibai bûk tawh Juda saphun a ni a. Ṭum danga baptisma chang tûrin hun rei tak a nghah a ngai dâwn pawh a ni thei. Chu aia pawimawh zâwk chu, he pa hian a hnêna Pathian thil beiseite chu a hre thiam a, tiam chin awm lova chhân lêt chu a duh a ni. Philipa chuan a dîlna chu lâwm takin a pawm a, baptisma a chan hnu chuan Ethiopia mi chu ‘hlim takin a kal ta zêl a ni.’ Tin, ama chênna ramah chuan phur taka chanchin ṭha hriltu a nih ngei a rinawm hle.​—⁠Tirhkohte 8:​36-39.

⁴ Inpumpêkna leh baptisma channa rahbite chu ho lam taka lâk emaw, hmanhmawh taka tih tûr emaw ni lo mah se, Ethiopia mi lian entîrna chuan mi ṭhenkhat, Pathian Thu thutak an hriat hnu lawka baptisma chang nghâl an awm nual tih a târ lang. * Chuvângin, a hnuaia zawhnate hi ngaihtuah chian a ṭha a ni: Baptisma chang tûrin engtia inpuahchah tûr nge? Kum upat lam chu eng chena ngaihtuah tel tûr nge? Mi chuan baptisma a chan hmain thlarau lama hmasâwnna eng chen nge a lantîr ang? A pawimawh ber chu, engvângin nge Jehova’n he hma lâkna nei tûra a chhiahhlawhte a phût?, tihte hi.

Intiamna Urhsûn Tak

5, 6. (a) Hun kal tawha Pathian mite’n Jehova hmangaihna chu engtin nge an chhân lêt? (b) Baptisma kan chan veleh Pathian nêna inlaichînna hnai eng nge kan neih theih?

⁵ Aigupta aṭanga Israelte a chhan chhuah hnu khân, Jehova chuan anni chu a hmangaih atân leh a vênhim atân, leh ‘hnam thianghlima’ din atân “ro thlan bîk” anga pawm chu a duh a. Mahse, chutiang malsâwmna dâwng tûr chuan, mite chuan Pathian hmangaihna chu chiangkuang taka an chhân lêt a ngai a. Anni chuan ‘Jehova sawi zawng zawngte’ ti tûra rem tihna leh amah nêna thuthlung siamna hmangin an chhâng lêt a ni. (Exodus 19:​4-9) Kum zabi khatnaah chuan, Isua’n a zirtîrte chu hnam tina mite zirtîra siam tûrin leh a zirtîrna pawmte chu baptis tûrin thu a pe a. Pathian nêna inlaichînna ṭha chu Isua Krista rinnaah leh a hnua baptisma channaah a innghat a ni.​—⁠Matthaia 28:​19, 20; Tirhkohte 2:​38, 41.

⁶ Hêng Pathian Lehkha Thua chanchin chuangte hian Jehova’n ama rawngbâwl tûra intiamna urhsûn tak siamtute leh vawngtute chu mal a sâwm tih a târ lang. Kristiante tân chuan, inpumpêkna leh baptisma chan chu Jehova malsâwmna dawn theihna rahbi pawimawh tak a ni a. A kawngte zawh leh a kaihhruaina zawn chu kan tum tlat a ni. (Sâm 48:14) Chuvângin, Jehova chuan a kuta min chelhin, kan kalna tûrah chuan min hruai a tih theih a ni.​—⁠Sâm 73:23; Isaia 30:21; 41:​10, 13.

7. Engvângin nge inpumpêkna leh baptisma channa chu mi mal thu tlûkna a nih ang?

⁷ Hêng rahbite rap tûra min chêttîrtu chu Jehova hmangaihna leh a rawngbâwl duhna a ni tûr a ni a. Tuemawin: “I zir rei tawh bawk alâwm,” a tih vâng emaw, “I ṭhiante pawhin baptisma an chan sup sup tawh hi,” a tih vâng emawin tuma’n baptisma an chang tûr a ni lo. A tlângpui thuin, nu leh pate leh Kristian puitling dangte chuan mi chu inpumpêk leh baptisma chan ngaihtuah tûrin an fuih thei a. Tirhkoh Petera chuan Pentikost nîa a thusawi ngaithlatute chu “baptisma chang” tûrin a fuih a ni. (Tirhkohte 2:38) Amaherawhchu, kan inpumpêkna chu mi mal thil a ni a, tumahin kan tân an siam thei lo. Pathian duhzâwng ti tûra thu tlûkna chu mahni siam tûr a ni.​—⁠Sâm 40:⁠8.

Baptisma Chang Tûra Inpuahchah Ṭhat

8, 9. (a) Engvângin nge nausênte baptisma chantîr chu Bible nên a inmil loh? (b) Tleirâwl chuan baptisma a chan hmain eng thlarau lama hmasâwnna nge a neih ang?

⁸ Naupangte chuan inpumpêkna finthlâk an siam thei em? Bible chuan baptisma chang tûrin kum bituk chin a nei lo va. Chutichung chuan, nausênte chu ringtu an ni thei lo va, rinna nei, a nih loh leh Pathian hnêna inpumpêkna siam thei an ni hek lo. (Tirhkohte 8:12)  Kum zabi khatnaa Kristiante chungchângah, thilthleng chanchin ziak mi Augustus Neander-a chuan General History of the Christian Religion and Church tih a lehkhabuah chuan: “Atîrah chuan baptisma chu puitlingte chauhvin an chang thei a ni, miin baptisma leh rinna chu inkûngkaih hnaih tak nia an hriat ṭhin avângin,” a ti.

⁹ Ṭhalaite chungchângah chuan, mi dangte’n hun an duh rei laiin, ṭhenkhat chu an la naupan hle lai pawhin thlarau lamah hma an sâwn a. Amaherawhchu, tleirâwl chuan baptisma a chan hmain puitlingte ang bawkin Jehova nêna inlaichînna ṭha neiin, Bible thu bul hriatthiamna ṭha, leh inpumpêknain a kaihhnawih thilte hriatthiamna chiang tak a nei tûr a ni.

10. Inpumpêka baptisma chan hmain eng hma lâkna nge neih ngai?

¹⁰ Isua chuan a zirtîrte chu mi tharte hnêna thu a pêk zawng zawng zirtîr tûrin a hrilh a. (Matthaia 28:20) Chuvângin, a hmasa berah mi tharte chuan thutak hriatna dik chu an nei tûr a ni a, chu chuan Jehova leh a Thu-ah rinna a neihtîr dâwn a ni. (Rom 10:17; 1 Timothea 2:4; Hebrai 11:⁠6) Tichuan, Pathian Thu thutakin mi thinlung a khawih hunah, chu chuan a nun kawng hlui chu sim a, inlamlêt tûrin a chêttîr ang. (Tirhkohte 3:19) A tâwp berah chuan, Isua thupêk angin mi chuan Jehova hnêna inpumpêk a, baptisma chan duhna a nei ang.

11. Engvângin nge baptisma chan hmaa thu hrilh hnaa tel ziah chu kan tân thil pawimawh tak a nih?

¹¹ Baptisma chang tûra hmasâwnna dang pawimawh tak chu Ram chanchin ṭha hrilhnaa tel hi a ni a. Hei hi Jehova’n hêng ni hnuhnûnga a mite thawh atâna a ruat hna pawimawh ber a ni. (Matthaia 24:14) Chuvângin, baptisma la chang lo thuchhuahtute chuan an rinna mi dang hnêna hrilh theihna chu an hlimpui thei a. He hnaa telna chuan baptisma an chan hnua thlawhhma rawngbâwlnaa ṭhahnemngai taka tel ziah tûrin anni chu a thuam bawk a ni.​—⁠Rom 10:​9, 10, 14, 15.

Baptisma I Channa Tûr Chu Thil Engemawin A Dâl Che Em?

12. Ṭhenkhat chu engin nge baptisma an channa tûr dâl?

¹² Ṭhenkhat chuan baptisma channain a ken tel mawhphurhnate an pawm hreh avângin baptisma an chang duh lo thei a. Jehova tehnate tlin tûr chuan an nunah inthlâkthlengna pawimawh tak an siam a ngai tih an hria a ni. A nih loh leh, baptisma chan hnuah Pathian thil phûtte mila nun chu an tlin loh an hlau pawh a ni thei. Ṭhenkhat phei chuan, “Engtik nîah emaw chuan thil sual engemaw ka ti ang a, kohhran ata hnawhchhuah ka ni mai ang,” tiin an ngaihtuah pawh a ni hial thei bawk.

13. Isua leia a awm laiin, ṭhenkhat chu Isua hnungzui lo tûrin engin nge dâl?

¹³ Isua leia a awm lai khân, ṭhenkhat chuan mahni hmasialna leh chhûngkaw inzawmna chu a zirtîr nih loh phah nân an hmang a. Lehkhaziaktu pakhat chuan Isua kalna apianga a zui duh thu a sawi a. Mahse, Isua chuan vawi tam tak chu riahna hmun tûr takngial pawh a neih loh thu a hrilhfiah a ni. Isua’n a thusawi ngaithlatu mi dang chu a hnungzui tûra a sâwm khân, chu pa chuan a pa a ‘vui’ zet phawt a ngaih thu a hrilh a ni. Isua hnungzui phawta a ṭûl huna a pa vui ai chuan ina awma a pa thih hun nghah chu a duh zâwk niin a lang. A tâwpah, a pathumna chuan Isua a zui hmain, a ina mite ‘ṭawngkam ṭhaa a thlah’ phawt a ngai tih a sawi a. Isua chuan chutianga vuaichana chu ‘hnung lama thilte en’ angin a târ lang a ni. Chuvângin, a duhte tân chuan an Kristian  mawhphurhna la lo tûrin chhuanlam siam tûr a awm reng dâwn niin a lang.​—⁠Luka 9:​57-62.

14. (a) Engtin nge Petera te, Andria te, Jakoba te, leh Johana te chuan mihring mantu lo ni tûra Isua sâwmna chu an chhân lêt? (b) Engvângin nge Isua nghâwngkawl bah chu kan hreh loh vang?

¹⁴ Petera te, Andria te, Jakoba te, leh Johana te entîrna erawh chu mi letling hlauh chu a ni. Isua’n amah zui a, mihring mantu ni tûra a sâwm khân, Bible sawi dân chuan “lênte chu kalsanin an zui ta nghâl” a ni. (Matthaia 4:​19-22) Chu thu tlûkna chu rang taka an siam avângin, a hnua Isua’n an hnêna a sawi: “Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi: tichuan, in thlarau tân chawlhna in hmu ang. Ka nghâwngkawl chu a nuam a, ka phur pawh a zâng a ni,” tih chu anmahni ngeiin an tawng ta a ni. (Matthaia 11:​29, 30) Baptisma chuan mawhphurhna nghâwngkawl min bahtîr laiin, chu chu nasa taka min tihahdamtu tûr phurh nuam tak leh zâng tak a ni tih Isua’n min tiam a ni.

15. Engtin nge Mosia leh Jeremia te entîrna chuan Pathian ṭanpuina kan ring thei tih a târ lan?

¹⁵ Tling lo nia inhriatna neih chu thil pângngai tak a ni ngei mai. Mosia leh Jeremia te chuan atîrah chuan Jehova pêk hna thawk tûrin tling lo niin an inhria a. (Exodus 3:11; Jeremia 1:⁠6) Engtin nge Pathianin anni chu a thlamuan? Mosia hnênah chuan: “I hnênah ka awm dâwn alâwm,” a ti a. Jeremia hnênah pawh: “Chhan chhuak tûr chein i hnênah ka awm e,” tiin a tiam bawk a ni. (Exodus 3:12; Jeremia 1:⁠8) Keini pawhin Pathian ṭanpuina chu kan ring tlat thei a. Pathian kan hmangaihna leh amaha kan rinna chuan kan inpumpêkna mila kan nun theih leh theih loh rinhlelhna kan neih reng chu hneh tûrin min ṭanpui thei a ni. Tirhkoh Johana chuan: “Hmangaihnaah chuan hlauhna rêng a awm lo; hmangaihna famkimin hlauhna a hnawt chhuak zâwk ṭhîn a ni,” tiin a ziak si a. (1 Johana 4:18) Mipa naupang tê chu amaha a kal a ngaih hunah a hlau deuh mai thei a; mahse, a pa nêna kut invuana a kal hunah erawh chuan a inringtâwk hle a ni. Chutiang bawkin, kan thinlung zawng zawnga Jehova kan rin chuan, amah nêna kan kal dûnna kawngte chu a tingîl dâwn tih min tiam a ni.​—⁠Thufingte 3:​5, 6.

Hun Zahawm Tak Chu

16. Engvângin nge baptisma channaah tuia inhnimphûm ṭhak a tel?

¹⁶ Baptisma chu Kristian baptisma chan pawimawhna Bible ṭanchhan thusawi hian a hmakhalh ṭhîn a. Thusawi zawhah chuan, baptisma chang tûrte chu zawhna pahnih chhânna hmangin mipui hmaa an rinna puang chhuak tûra tih an ni. (Rom 10:10; phêk 22-naa bâwm en rawh.) Tichuan Isua tih dân ngei chu zuiin, tuiah an inhnimphûm ta a. Bible chuan Isua chu baptisma a chan zawhah, “tui ata a chhuak” tiin emaw, “tui ata a chhuakin” tiin emaw a sawi. (Matthaia 3:16; Marka 1:10)  Baptistu Johana chuan Isua chu a hnimpil ṭhak tih a chiang hle. * Inhnimpil ṭhakna chuan kan nuna inthlâkthlengna chhinchhiah tlâk tak kan siam chu a entîr a​—⁠kan nun hluiah kan thi a, Pathian rawngbâwl tûrin nun thar kan ṭan ang mai a ni.

17. Engtin nge baptisma chang tûrte leh a lo thlîrtute chuan hun zahawmna an belhchhah theih?

¹⁷ Baptisma chu hun urhsûn tak leh hlimawm tak a ni. Jordan Luia Johana’n a hnimphûm khân, Isua chu a ṭawngṭai tih Bible-in a târ lang. (Luka 3:​21, 22) He entîrna nêna inmilin, tûn laia baptisma chang tûrte chuan nungchang zahawm an lantîr tûr a ni. Tin, Bible chuan kan nî tin nunah mawihnai taka inchei tûra min fuih avângin, kan baptisma chan nîah he fuihna hi kan ngaihsak chu a va han ṭûl lehzual êm! (1 Timothea 2:⁠9) A lo thlîrtute pawhin baptisma chan thusawi ngun taka ngaihthlâkna leh an chan lai ṭha taka lo thlîrna hmangin a phu ang ngei zahna an lantîr thei a ni.​—⁠1 Korinth 14:⁠40.

Baptisma Chang Zirtîrte’n An Dawn Malsâwmnate

18, 19. Baptisma channa chuan eng chanvo leh malsâwmna nge a thlen?

¹⁸ Pathian nêna inpumpêka baptisma kan chan tawh chuan, chhûngkaw ṭha chungchuang tak zînga mi kan lo ni a. A hmasa berah chuan, Jehova chu kan Pa leh kan Ṭhian a lo ni a. Baptisma kan chan hma chuan Pathian laka inmi hran kan ni a; tûnah chuan kan lo inrem ta a ni. (2 Korinth 5:19; Kolossa 1:​19, 20) Krista inthawina hmangin, Pathian chu kan hnaih a, ani pawhin min hnaih bawk a. (Jakoba 4:⁠8) Zâwlnei Malakia chuan Jehova’n a hming putute leh hmangtute a ngaihsak dân leh a ngaihthlâk dân a sawi a; tin, a hriat rengna bua an hming a telh dân pawh a hrilhfiah bawk a ni. Pathian chuan: “Ka ta an ni ang, . . . miin a fapa, a rawngbâwlsaktu chu a zuat angin anni chu ka zuat ang,” a ti.​—⁠Malakia 3:​16-18.

¹⁹ Baptisma channa chuan khawvêl pum huap inunauna zînga mi min nihtîr bawk a ni. Krista zirtîrte’n an inpêkna avânga an dawn tûr malsâwmna chungchâng tirhkoh Petera’n a zawh khân, Isua chuan: “Mi tin inte emaw, unaute emaw, farnute emaw, pa emaw, nu emaw, fate emaw, ramte emaw ka hming avânga kalsan apiang chuan a leh za an hmu ang a, chatuana nunna an la chang bawk ang,” tiin a tiam a ni. (Matthaia 19:29) Chu mi hnu kum rei takah chuan, Petera chuan “khawvêla” awm “unauhote” chungchâng chu a ziak a. Petera chuan unaute ṭanpuina leh malsâwmna chu amah ngeiin a tawng a, keini pawhin kan tawng ve thei a ni.​—⁠1 Petera 2:17; 5:⁠9.

20. Baptisma channa chuan eng malsâwmna ropui tak nge a pêk?

²⁰ Chu bâkah, Isua chuan amah zuitute chu “chatuana nunna an la chang bawk ang” tih a târ lang. Ni e, inpumpêkna leh baptisma channa chuan ‘nunna tak tak vawn theihna’​—⁠Pathian khawvêl thara chatuana nun beiseina chu min pe a ni. (1 Timothea 6:19) Keimahni leh kan chhûngte tân hei aia ṭha zâwk nakin hun atân eng lungphûm nge kan phûm theih tehrêng ang? He beiseina ropui tak hian ‘Jehova kan Pathian hmingin kumkhuain, chatuan thleng pawhin min kaltîr thei a ni.’​—⁠Mika 4:⁠5. (w06 4/1)

[Footnote-te]

I Hrilhfiah Thei Em?

• Engtin nge Jehova hmangaihna chu kan chhân lêt ang a, engvângin nge?

• Baptisma channa chu thlarau lama hmasâwnna engin nge a hmakhalh ang?

• Engvângin nge mawhphurhna lâk hrehna emaw, tlin loh hlauhna emaw chu baptisma channa tûr kan indâltîr loh vang?

• Baptisma chang Isua Krista zirtîrte chuan eng malsâwmna dang lam bîk tak nge an dawn theih?

[Zirlai Atâna Zawhnate]

[Phêk 26-naa milem]

“Baptisma channa tûr engin nge mi dâl kher?”

[Phêk 29-naa milemte]

Baptisma chu hun urhsûn tak leh hlimawm tak a ni