“Sawi Zêl Rawh!”

RUSSIA ram Nezlobnaya khawpui high school-a thu leh hla lam zirna class chuan Russia mi lehkha ziaktu, Mikhail Bulgakov-a thu ziah chanchin chu an zir a. A thuziahte zîngah chuan Setana chu changtupa anga a târ lan laia Isua Krista hnualsuatna thuziak pakhat a tel a ni. Class-a sawihona an neih hnuah, zirtîrtu chuan chu thuziak ṭanchhana thu inziah siakna nei tûrin a hrilh a. Amaherawhchu, naupang zînga pakhat, kum 16 mi Jehova Thuhretu, a hming Andrey-a chuan, a chhia leh ṭha hriatnain hetiang chi thu leh hla zir a phal loh avânga chu intihsiaknaa tel lo tûra ngaihhnathiam tûrin hawihhâwm takin a dîl a. Chu ai chuan, Isua Krista a thlîr dân ziak tûrin a dîl ta zâwk a. Chu chu zirtîrtu chuan a phalsak a ni.

Andrey-a chuan a thu ziakah chuan, mi dangte ngaih dân a zahsak nachungin, Isua chungchâng hriat theih dân ṭha ber chu Chanchin Ṭha ziak palite zînga a engemaw ber pakhat chhiar a ni tih a hmuh chhuah thu a sawi a. Chutianga i chhiar chuan, “mit ngeia hmutute thuziak aṭangin Isua nun dân leh a zirtîrna chanchinte chu i hre thei ang.” Andrey-a chuan: “Ka thil enghlelh dang leh chu Setana chungchâng sawi a nih dân hi a ni. Ṭhenkhat chuan Setana a changtupa anga sawina lehkhabu chhiar chu hlimawm an ti hle mai thei; mahse, ka tân chuan a hlimawm ve lo,” tiin a ziak zawm a. Ani chuan Setana hi a nihna takah chuan Pathian aṭanga inla hrang thlarau thil siam thiltithei tak a ni a, suahsualna te, lungngaihna te, leh mihringte chunga hrehawm tawrhna te thlentîrtu a ni tih a hrilhfiah a ni. Andrey-a chuan a thuziak chu: “He lehkhabu chhiar hi ka hlâwkpui ka ring lo. Bulgakov-a chu ka haw hran lo. Mahse, kei chuan Isua Krista chanchin thu dik hre tûra Bible chhiar chu ka thlang zâwk fê ang,” tiin a titâwp a ni.

Andrey-a zirtîrtu chu a thuziah chuan a tilâwm hle a, Isua Krista chungchâng report ṭawngkama sawi tûra inbuatsaih tûrin a sâwm a. Andrey-a chuan a rem ti nghâl a ni. Thu leh hla lama class an neih leh hunah, Andrey-a chuan class pum pui hmaah a report buatsaih chu a chhiar a. Isua chu nung dam tawh azawnga mi ropui ber nia a ngaih chhan a sawifiah a ni. Tichuan, Bible-a Matthaia ziak aṭangin Isua thih chungchâng ziakna bung khat a chhiar a. Report pêkna atâna hun ruat a tâwp ṭêp tawh avângin tihtâwp mai chu a duh a; mahse, a class puite chuan: “Sawi zêl rawh! Engtin nge a awm tak zêl?” tiin an nawr a. Chuvângin Isua thawhlehna chungchâng chu Matthaia bu aṭangin a chhiar zawm ta a ni.

Andrey-a’n a chhiar zawh meuh chuan, a class puite chuan Isua leh Jehova chungchânga zawhna tam tak an zâwt a. Andrey-a chuan: “Jehova hnênah finna dîlin ka ṭawngṭai a, ani’n ka ṭawngṭaina a chhâng a. An zawhna zawng zawng ka chhâng thei a ni!” tiin a sawi. Class zawhah chuan, Andrey-a chuan zirtîrtu chu The Greatest Man Who Ever Lived * bu chu a pe a, ani chuan lâwm takin a dawng a ni. Andrey-a chuan: “Ka report pêkah chuan mark sâng tak min pe a, keimaha rinna nghet tak awm leh chu mi ka zahpui loh avângin min fak bawk. Tin, ka rin dân ṭhenkhat chu min pawmpui thu min hrilh bawk a ni,” tiin a sawi.

Andrey-a chuan Jehova leh a Fapa, Isua Krista sawichhiatna lehkhabu chhiar lohna hmanga a Bible zirtîr chhia leh ṭha hriatna zawm a titlu chu a hlimpui hle a. Chu rilru put hmang chuan Bible nêna inkalh ngaih dân lakah a vênhim mai bâkah, Bible thutak pawimawh tak mi dangte hriattîr theihna hun remchâng ropui tak pawh a hawnsak bawk a ni. (w06 3/1)

[Footnote]