“Mihring Thu Aiin Pathian Thu Kan Zâwm Zâwk Tûr A Ni”

“Thisen Hlu” Hmanga Tlan

JEHOVA hmangaihna thiltih ropui ber chu a Fapa mal neih chhun nun ṭha famkim tlanna atâna hlân tûra a rawn tîr hi a ni. Mihring ṭha famkim lote kan nih angin chutiang tlanna chu kan mamawh a ni, mihring ṭha famkim lo tumahin ‘a dam reng na tûrin an unau pawh an tlan theih loh va, Pathian hnênah tlanna an pêksak theih bawk hek loh avângin.’ (Sâm 49:​6-9) Pathianin ‘tupawh a ring apiang an boral loh va, chatuana nunna an neih zâwk nâna a Fapa mal neih chhun a pêk’ avângin kan va han lâwm tak êm!​—⁠Johana 3:⁠16.

Engtin nge tlanna chuan min chhanchhuah? He Pathian thiltih hriat reng tlâk hmangaihna lantîrna avânga zalenna kan neih dân kawng chi li-te chu ilo ngaihtuah ang u.

Tlannaa Chhuah Zalen

A hmasain, Isua inhlanna chuan kan rochun sual lak ata min chhanchhuak thei a. Kan vai hian sual neiin kan piang a ni. Jehova dân kan bawhchhiat theih hma hauh pawhin mi sual kan ni. Chu chu engtin nge a nih theih? Rom 5:12 chuan: “Mi pakhat [Adama] avângin sual khawvêlah a lût a, sual avângin thihna a lût bawk a,” a ti. Mi sual Adama thlah kan nih angin, a ṭhat famkim lohna chu kan rochung a ni. Amaherawhchu, tlanna avângin sualna rochunin min phuarna ata kan zalên thei ta a. (Rom 5:16) Isua chuan Adama thlahte tâna sualin a rah chhuah chu tuarin, ‘thihna chu mi tin tân a temsak’ a ni.​—⁠Hebrai 2:9; 2 Korinth 5:21; 1 Petera 2:⁠24.

Pahnihnaah, tlanna chuan thihna thlen thei sual sawhkhâwk ata min chhuah zalên thei a. “Sual man chu thihna a ni.” (Rom 6:23) Sual hremna chu thihna a ni. Pathian fapa chuan inthawi nâna a thihna hmangin, thuawih mihringte tân chatuana nun chu neih theihin a siam a. Rinhlelh ruallohvin, “tupawh Fa ring apiangin chatuana nunna an nei tawh; nimahsela tupawh Fa thu âwih lo apiangin nunna an nei lo vang.”​—⁠Johana 3:⁠36.

Pathian Fapa laka rinna kan lantîr chauhvin sual sawhkhâwk ata chhanchhuah kan ni thei tih chhinchhiah ang che. Hetah hian kan nuna inthlâkthlengna siam a, Pathian duhzâwng mila nun a tel a ni. Kawng dik lo kan ûm mêk engpawh kalsanin, Pathian duhzâwng ti tûrin hma kan la tûr a ni a. Tirhkoh Petera chuan ‘kan sualte thai bo a nih theih nân sim a, hawi kîr leh’ a ngaih thu a sawi a ni.​—⁠Tirhkohte 3:⁠19.

Pathumnaah chuan, Isua inthawina pêk chuan chhia leh ṭha hriatnain thiam loh min chantîrna lak ata min tizalên a. Jehova hnêna inpumpêk tawh a, baptisma chang tawh a Fapa zuitu zawng zawngte chuan thlamuanna an nei a ni. (Matthaia 11:​28-30) Kan ṭha famkim lo nachungin, chhia leh ṭha hriatna thiang tak nêna Pathian rawngbâwlnaah chuan hlimna nasa tak kan hmu a. (1 Timothea 3:9; 1 Petera 3:21) Kan sualte inpuanna leh kalsanna hmangin, zahngaihna kan dawng a, chhia leh ṭha hriatna khawih buaina lak ata chu chhuah zalen kan ni.​—⁠Thufingte 28:⁠13.

Ṭanpuina leh Beiseina A Pe

A tâwp berah chuan, tlannaa rinna lantîrna hmangin, Pathian hmaa kan dinhmun chungchânga hlauhna lak ata chu chhan chhuah kan ni. Tirhkoh Johana chuan: “Tupawhin thil a tihsual chuan Pa hnêna mi sawipuitu [a nih loh leh, min ṭanpuitu], Isua Krista . . . chu kan nei e,” tiin a sawi a ni. (1 Johana 2:⁠1) Isua ṭanpuitu nihna chelh chungchângah tirhkoh Paula chuan  heti hian a ziak a ni: “Amaha Pathian hnêna lo kalte chu a tâwpkhâwk thlengin a chhandam thei bawk a ni, anmahni ṭawngṭaisak tûrin chatuana a nun reng avângin,” tiin. (Hebrai 7:25) Sual bawlhhlawhna engpawh kan neih chhûng chuan, Pathian hmaa dinhmun dik nei tûrin Puithiam Lal Isua Krista ṭanpuina chu kan mamawh reng dâwn a ni. Engtin nge Isua chuan kan tân puithiam lal anga rawng a bâwl?

Isua chu a thawhleh aṭanga ni sawm li, C.E. 33-ah chuan, Pathian hnêna a “thisen hlu” a hlanna tûr hmun, vânah chuan a lâwn a. Chu mi avâng chuan, Isua chuan thuawih mihringte chu sualna leh thihna lak ata a chhuah zalên thuai dâwn a ni. * (1 Petera 1:​18, 19) Chuvângin, Isua Krista chuan kan hmangaih leh kan thuawihna a phu tih i pawm lâwm ni?

Chu bâkah, Pathian Jehova chuan kan hmangaihna leh kan thuawihna a phu a. Ani chuan hmangaih takin “tlanna” chu kan tân a siam a ni. (1 Korinth 1:30) Tûna kan nun mai bâkah, chatuana nun beiseina kan neih pawh hi a laka kan thil bat a ni a. Chuvângin, “Mihring thu aiin Pathian thu kan zawm zâwk” chhan tûr tam tak a awm a ni.​—⁠Tirhkohte 5:29. (w06 3/15)

[Footnote]

[Phêk 19-naa bâwm/milem]

I HRIA EM?

• Isua chu Olive Tlâng aṭangin vânah a lâwn.​—⁠Tirhkohte 1:​9, 12.

• Isua tirhkoh rinawmte chauhvin vâna a lâwn lai chu an hmu.​—⁠Tirhkohte 1:​2, 11-13.