“Mihring Thu Aiin Pathian Thu Kan Zâwm Zâwk Tûr A Ni”

‘Indona Chu Jehova Indona A Ni’

SIPAI inep pâwl hnihte chu kawrruam lehlam lehlamah an indin chilh rân mai a. Israel mite chu ni 40 chhûng zet mai Philistia mi chak Goliatha chona avângin hlau leh thlabârin an awm a ni.​—⁠1 Samuela 17:​1-4, 16.

Goliatha chuan Israel mite chu he thu hmang hian râwl ring takin a cho va: “Mi inthlang ula ka hnênah lo chhuk rawh se. Min beih theiha min tihhlum chuan in chhiahhlawhah kan awm ang a, amaherawhchu keiin ka ngama ka tihhlum chuan kan chhiahhlawhah in awm ang a, kan rawng in bâwl ang. . . . Vawiinah hian Israel-ho sipaite chu ka cho a ni, mi pakhat han thawh ula kan lo inbei ang e,” tiin.​—⁠1 Samuela 17:​8-10.

Hmân lai chuan mi chakte an sipaite aiawha inmal beih chu thil pângngai tak a ni a. Inmal beihnaa a chak zâwk lam chuan hnehna chu an chang mai ṭhîn. Mahse, he Israelte chotu hi sipai pângngai mai a ni lo. Ani chu mi hrawl sâng tak​—⁠hmêlma kawlh leh hlauhawm tak a ni a. Amaherawhchu, Goliatha chuan Jehova sipaihote chu nuihsawhin, chhiatna chu tawng lo thei lo dinhmunah a indah a ni.

Hei hi sipai inmal beihna mai a ni lo. Jehova leh Philistia pathiante inkâra inbeihna a ni. Israel Lal Saula chuan Pathian hmêlmate do tûra a sipaite huaisen taka hruai aiin, hlauh avângin engmah ti thei lovin a awm zâwk a ni.​—⁠1 Samuela 17:⁠11.

Jehova Rinchhantu Râwlthar

Chutih lai chuan, Israel lal ni tûra hriak thih tawh râwlthar pakhat chuan Saula sipaia ṭang a unaute chu a kan a. A hming chu Davida a ni. Goliatha thusawite a han hriat chuan: “He serhtan loh Philistia mi hi tunge maw a nih a, Pathian nung sipaite a han cho vei le?,” tiin a zâwt a ni. (1 Samuela 17:26) Davida mithmuhah chuan, Goliatha chuan Philistia mi leh an pathiante ai a awh tlat a. Thinurna dik lantîrin, Davida chuan Jehova leh Israelte tâna din chhuaha, milem betu mi hrawlpui bei tûra inpêk chu a duh a. Mahse, Lal Saula chuan: “Nang zawng chu Philistia mi bei tûr chuan i kal thei êm lo vang e, tleirâwl chauh i la ni si a,” tiin a hrilh a ni.​—⁠1 Samuela 17:⁠33.

Saula leh Davida thil thlîr dân chu a va han inthlau tak êm! Saula mithmuhah chuan berâm vêngtu mipa naupangin mi hrawl rorum tak a cho a ni. Amaherawhchu, Davida chuan mihring ve maiin Lal Chungnungber Jehova chu a dodâl niin a hmu thung a. Davida huaisenna chu Pathianin A hming leh A mite nuihsawhna chu hrem lohvin a chhuah dâwn lo tih a rin tlatnaah a innghat a ni. Goliatha chuan a chakna a chapopui laiin, Davida chuan Jehova rinchhanin Pathian thlîr dân aṭangin a chhût a ni.

‘Jehova Hmingin Ka Lo Thawk Chhuak’

Davida rinna chuan nghahchhan ṭha tak a nei a ni. Ani chuan a berâmte chu savawm leh sakeibaknei lak ata chhan chhuak tûrin Pathianin a ṭanpui tih a hre reng a. Berâm vêngtu râwlthar chuan Jehova’n tûnah pawh he Philistia hmêlma hlauhawm tak bei tûr hian a ṭanpui dâwn tih a hre chiang hle. (1 Samuela 17:​34-37) Davida chu virvawm leh lung tê mâm tak pa-nga kengin, Goliatha bei tûr chuan a chhuak ta a ni.

Râwlthar Davida chuan Jehova pêk chakna ringin chu hmêlma hneh theih rual loh anga lang chu hmachhawn a tum a. Philistia mi  hnênah chuan huaisen takin: “Nang zawng khandaih te, fei te, feitê te kengin i lo thawk a; kei zawng sipaite LALPA Israel sipaite Pathian i chova hmingin ka lo thawk zâwk a ni. Vawiinah hian LALPAN nang hi ka kutah min pe dâwn a . . . Lei chunga mi zawng zawng hian Israel-ho zîngah hian Pathian a awm tih chu an hre thei ang a: tin, heta pungho zawng zawng hian LALPA chuan khandaih leh feiin a chhandam lo tih an hre thei ang . . . indona chu LALPA indona a ni si a,” a ti a ni.​—⁠1 Samuela 17:​45-47.

Engtin nge thil a inher chhuah? Thâwk khum thu chuan heti hian a sawi: “Davida chuan Philistia mi chu a virvawm leh lungin a ngam a, Philistia mi chu a vawm a, a that ta a; Davida chuan khandaih a keng hauh lo va,” tiin. (1 Samuela 17:50) Khandaih keng hauh lo mah se, Jehova ṭanpuina thiltithei tak chu a nei a ni. *

Chu inmal beihnaah chuan Davida’n Jehova a rinna chu thiam chantîr a va ni tak êm! Mihring hlauhna leh Jehova chhanhim theihna rinna inkâra a engemaw zâwk zâwk thlan a ngaih hunah chuan, kan thlan tûr chu a chiang ta hle: “Mihring thu aiin Pathian thu kan zâwm zâwk tûr a ni.” (Tirhkohte 5:29) Chu bâkah, dinhmun huphurhawm takte pawh Jehova thlîrna aṭanga kan thlîr hian, harsatna lian tham takte pawh inbûk tâwkin kan thlîr thiam thei a ni. (w06 5/1)

[Footnote]

[Phêk 20-naa bâwm/milem]

GOLIATHA CHU ENG ANGA LIAN NGE NI?

Goliatha chu 1 Samuela 17:​4-7 chuan tawng ruk​—⁠feet kua aia sâng a nih thu min hrilh a. Goliatha len zâwng leh chak zâwng chu dâra siam a âwmphaw hian a târ lang a ni. A âwmphaw chu kg. 57 laia rit a ni a. A fei ngul chu thing khanchhuk ang mai a niin, fei hmâwr hriam thîra siam chu kg. 7 laia rit a ni. Goliatha râlthuam chu Davida ai pawha a rih zâwk ngei a rinawm!