Jehova Chuan “A Tâwp Tûr Chu Atîr Aṭang Rêngin” A Sawi
Jehova Chuan “A Tâwp Tûr Chu Atîr Aṭang Rêngin” A Sawi
“Keiin a tâwp tûr chu atîr aṭang rêngin ka sawi ṭhîn a, thil la tih lohte chu hmasâng aṭang rêngin ka sawi ṭhîn.”—ISAIA 46:10.
1, 2. Babulon hneh a nihna nêna inkûngkaih thilthlengte zîngah eng nge chhinchhiah tlâk a, hei hian Jehova chungchâng eng nge a târ lan?
HMELMA sipaite chuan zan thim hnuaiah Euphratis Lui chhuat chu zawhin an tum ram Babulon khaw ropui lam chu a rûk têin an pan a. Khawpui kulh kawngkhâr an han pan hnaih chuan, thil maksak tak mai an hmu ta. Babulon kulh kawngkhâr hrawl takte chu a inkhâr hauh lo mai! Lui chhuat aṭang chuan an lâwnkai a, khawpuiah chuan an lût a. Khawpui chu an la ta thuai a ni. An hotu ber Kura chuan, a ram hnehah hian thuneihna chu la vatin, a hnuah Israel sal tângte chhuahtîrna thu chu a puang a. Sal tâng mi a sâng têlte chu Jerusalema Jehova biakna din thar leh tûrin an kîr leh ta a ni.—2 Chronicles 36:22, 23; Ezra 1:1-4.
2 Chûng B.C.E. 539-537 inkâra thilthlengte chu tûnah hian thilthleng chanchin ziaktute’n ṭha takin an finfiah tawh a. Kum 200 vêl aṭanga chu thilthleng tûrte hriat lâwk a ni chu thil chhinchhiah tlâk tak a ni. Jehova chuan a zâwlnei Isaia chu chutiang khawpa hma daih aṭanga Babulon tlâwm tûr thu hrilh lâwk tûrin a thâwk khum a. (Isaia 44:24–45:7) Pathian chuan Babulon hneh a nihna nêna inkûngkaih dinhmunte chauh ni lovin, a hnehtu tûr hruaitu ber hming thlengin a sawi lang a ni. * Chutih laia a thuhretu Israelte hnênah, Jehova chuan: “Tûn hmâa hmasâng thilte chu hre reng rawh u: kei hi Pathian ka ni a, a dang rêng rêng an awm si lo; kei hi Pathian ka ni, keimah ang rêng rêng an awm lo; keiin a tâwp tûr chu atîr aṭang rêngin ka sawi ṭhîn a, thil la tih lohte chu hmasâng aṭang rêngin ka sawi ṭhîn,” a ti a. (Isaia 46:9, 10a) Jehova chuan thil lo la thleng tûrte chu a hre lâwk thei tak zet a ni.
3. Eng zawhnate chhânna nge kan ngaihtuah ang?
3 Pathianin nakin hun tûr eng chen chiah nge a hriat? Jehova chuan mi mal tinin kan la tih tûrte chu a hre lâwk em? Kan nakin hun tûr hi ruat lâwk a ni em? Hêngte leh a kaihhnawih zawhnate atâna Bible chhânna chu he thuziakah leh a dawta thuziakah kan ngaihtuah ang.
Jehova —Hrilh Lâwkna Pathian Chu
4. Tunge Bible-a chhinchhiah hrilh lâwknate Hnâr chu?
4 Nakin hun tûr a hriat lâwk theih avângin, Jehova chuan Bible hun laia a chhiahhlawhte chu hrilh lâwkna tam tak ziak tûrin a thâwk khum a, chu chuan a tih tûr a thiltumte chu min hriat lâwktîr a ni. Jehova chuan: “Ngai teh u, tûn hma thilte chu a lo thleng ta, thil tharte ka sawi a nih hi,” tiin a puang chhuak a ni. (Isaia 42:9) Pathian mite chu an va nihlawh êm!
5. Jehova thiltih tûr hriat lâwkna hian mawhphurhna eng nge a ken tel?
5 Zâwlnei Amosa chuan: “Lalpa PATHIAN chuan a rawngbâwltu, a zâwlneite hnênah a thurûk hrilh lovin engmah a ti lo vang,” tiin min thlamuan a. He hriat lâwkna hian mawhphurhna a keng tel a ni. Amosa’n a dawta tehkhin thu thiltithei tak a hman hi chhinchhiah teh: “Sakeibaknei a rûm a, tuin nge hlau lo vang?” tih hi. Sakeibaknei rûm chuan a bul hnaia awm mihring leh ramsate chu a ṭûl anga a chêttîr vat angin, Amosa ang zâwlneite chuan Jehova thu puan chhuah chu an hriattîr nghâl vat a ni. “Lalpa PATHIAN chuan thu a sawi a, tuin nge hril lo thei ang?”—Amosa 3:7, 8.
Jehova “Thu” Chu “A Hlawhtling”
6. Eng kawngin nge Babulon tlûkchhiatna nêna inkûngkaihah Jehova “remruat” chu a hlawhtlin?
6 Zâwlnei Isaia hmangin, Jehova chuan: “Ka remruat chu a ding chhuak ang a, ka duhzâwng zawng zawng chu ka ti vek ang,” a ti a. (Isaia 46:10b) Babulon chungchânga Pathian “remruat,” a duhzâwng emaw, a thiltum emawah chuan Babulon hneh tûr leh tlûkchhiattîr tûra Persia aṭanga Kura koh hi a tel a ni. Jehova chuan chu a thiltum chu a hma daih aṭangin a puang lâwk diam a. Kan hriat tawh angin, B.C.E. 539-ah chuan a lo thleng famkim ngei a ni.
7. Engvângin nge Jehova “thu chhuak” chu englai pawhin a hlawhtling tih kan rinngheh theih?
7 Kura’n Babulon a hneh hma kum zabi li dâwn laiah khân, Juda Lal Jehosaphata chuan Ammon leh Moab sipai ṭangrual chu a hmachhawn a. Ringngam takin heti hian a ṭawngṭai a ni: “Aw LALPA, kan pi leh pute Pathian, vâna Pathian i ni lâwm ni? Hnam tin chunga rorêltu i ni lâwm ni? I kutah chuan thiltihtheihna leh chakna a awm a, tuma chelh rual i ni lo va,” tiin. (2 Chronicles 20:6) Isaia chuan chutiang bawk rinngamna chu a sawi chhuak a ni: “Sipaihote LALPA chuan a ruat tawh si a, tuin nge suhsak ang? A kut chu pharin a awm tawh a, tuin nge lâk kîrtîr ang?” tiin. (Isaia 14:27) A hnuah, Babulon Lal Nebukadnezzara chuan a âtna ata a rawn harh chhuah leh hun chuan, inngaitlâwm takin: “Tumahin [Pathian] kut chu an chawlhtîr thei lo va, a hnênah, ‘Nangin eng nge i tih?’ pawh an ti thei hek lo,” tiin a pawm a ni. (Daniela 4:35) Ni e, Jehova chuan a mite chu: “Ka thu chhuak chu . . . engmah tih nei lovin ka hnênah a kîr leh lo vang a, ka duh ang chu a tizo zâwk ang a, thil ti tûra ka tirhnaah chuan a hlawhtling bawk ang,” tiin a thlamuan a ni. (Isaia 55:11) Jehova “thu chhuak” chu eng lai pawhin a thleng dik ngei tih chu kan ringnghet thei a. Pathian thiltumte chu hlawhchham thei a ni lo.
Pathian Chatuan Thiltum Chu
8. Eng nge Pathian chatuan thiltum chu?
8 Tirhkoh Paula chuan Ephesi Kristiante hnêna a lehkha thawnah, Pathian chu “chatuana remruat,” a nih loh leh chatuan thiltum nei niin a sawi a. (Ephesi 3:10, 11) Hei hi Pathianin a thiltih dân tûr engkim a duan lâwk ngai ang hrimin, thiltih tûr duan lâwkna mai a ni lo. Chu aimah chuan, mihring leh lei atâna atîra Jehova thiltum hlen a tum tlatna nên a inkûngkaih zâwk a ni. (Genesis 1:28) A thiltum chu hlawhchham thei a nih lohzia hriat thiam nân, Bible-a chhinchhiah hrilh lâwkna hmasa ber hi ilo ngaihtuah ang u.
9. Engtin nge Genesis 3:15 chu Pathian thiltum nên a inkûngkaih?
9 Genesis 3:15-a thutiam chuan Adama leh Evi’n thilsual an tih hnu chiah aṭangin, Jehova chuan a entîr nei hmeichhiain thlah emaw, fapa emaw a hrin chu a thiltum a ni tih a târ lang a. Ani chuan a hmeichhia leh Setana, leh an thlah inepte inkâra indona awm rah chhuah tûr chu a hmu lâwk bawk a ni. Jehova chuan Pathian hmeichhe Thlah ke artui tihthitlin chu phal mah se, a hun ruatah chuan a Thlah chuan rûl, a nih loh leh Diabol-Setana lû chu a tithitling dâwn a. Chutih chûng chuan, thutiam Messia anga Isua lo lanna tûra thlan chhuan kaltlangin Jehova thiltum chuan ma thei lovin hma a sâwn zêl a ni.—Luka 3:15, 23-38; Galatia 4:4.
Jehova Thil Ruat Lâwkte
10. Adama leh Evi’n thilsual ti tûrin Jehova’n atîr aṭangin a ruat lâwk em? Hrilhfiah rawh.
10 Pathian thiltuma Isua chanvo chu sawiin, tirhkoh Petera chuan: “Ani [Isua] chu leilung pian hmain ruat lâwkin a awm ngei mai, nimahsela hun hnuhnûngahte hian nangmahni avângin inlârin a awm a,” tiin a ziak a ni. (1 Petera 1:20) Jehova’n a tîr aṭang rêngin Adama leh Evi te chuan thilsual an ti ang a, Isua Krista tlanna inthâwina chu mamawh a ni ang tih a ruat lâwk sa em? Ruat lâwk sa lo. ‘Piang’ tia lehlin hi, a ngial a ngan chuan Grik thu mal “chi thlâk” tihna a ni a. Adama leh Evi te’n thilsual an tih hma khân fa an pai hman, a nih loh leh ‘chi an thlâk’ hman em? Hman lo. Thu an âwih loh hnuah chauh Adama leh Evi te chuan fa an nei a ni. (Genesis 4:1) Chuvângin, Adama leh Evi an hel hnu chiah, fa an pai hma siin, Jehova chuan ‘thlah’ lo lang tûr chu a ruat lâwk a ni. Isua thihna leh thawhlehna chuan tlanna ruahmanna duhawm tak a pe a, chu mi hmang chuan sual rochun leh Setana thiltih chu engmah lova chantîr a ni ang.—Matthaia 20:28; Hebrai 2:14; 1 Johana 3:8.
11. Pathian chuan a thiltum hlen chhuahnaah thil inher chhoh dân eng nge a ruat lâwk?
11 Pathian chuan a thiltum hlen chhuah nân ruat lâwk dang a la nei a. Chu chu “engkim—vâna thil awmte, lei chunga thil awmte pawh—Kristaa fâwk khâwm tûr chu” Pathian duhzâwng a ni tih Ephesi khua mite hnêna Paula lehkha thawn chuan a târ lang. Tichuan, Krista roluahpui tûra thlan “vâna thil awmte” chungchâng chu sawiin, Paula chuan: “Ama duhzâwng remruat ang zêla thil engkim titu tum anga ruat lâwk . . . kan ni,” tiin a hrilhfiah a ni. (Ephesi 1:9-11) Ni e, Jehova chuan mihring bithliah chin neite chu Pathian hmeichhe thlah zawmpuitu ni tûr leh tlanna inthawina hlâwkna sem chhuahnaa Krista thawhpui tûrin a ruat lâwk a ni. (Rom 8:28-30) Tirhkoh Petera chuan hêng mite hi “hnam thianghlim” tiin a sawi a. (1 Petera 2:9) Tirhkoh Johana chuan inlârnaah Krista roluahpui zât tûr chu mi 1,44,000 an ni tih hriat theihna chanvo hlu tak a nei a ni. (Thu Puan 7:4-8; 14:1, 3) Anni chuan Lal Krista chu thlâwpin, “Pathian ropui fakna” atân an thawk a ni.—Ephesi 1:12-14.
12. Engtin nge mi 1,44,000 chu a mi mala ruat lâwk an ni lo tih kan hriat theih?
12 Mi 1,44,000 ruat lâwkna chu hetiang kawnga rinawm taka Pathian rawngbâwl tûrin mi ṭhenkhat chu a mi mala ruat lâwk an ni tihna a ni lo. Dik takin, Kristian Grik Pathian Lehkha Thua fuihnate chu hriak thihte an rinawm nghehna tûr leh vân lam kohna dawng tlâka an indah theihna tûra kaihhruai nân leh tihchak nân bîka ziak a ni. (Philippi 2:12; 2 Thessalonika 1:5, 11; 2 Petera 1:10, 11) Jehova chuan a thiltum ti hlawhtling tûrin mi 1,44,000 chu an tling dâwn tih a hre sa a. An tlin leh tlin loh chu an nun kawng an thlannaah a innghat a, chu chu a mi mal ṭheuhva an siam tûr thu tlûkna a ni.—Matthaia 24:13.
Jehova Thil Hriat Lâwkte
13, 14. Jehova’n thil a hriat lâwk theihna a hman dân chu eng nên nge a inmil a, engvângin nge?
13 Jehova chu hrilh lâwkna leh thiltum nei Pathian a nih avângin, engtin nge thil a hriat lâwk theihna chu a hman? A hmasa berin, Pathian kawng zawng zawng chu a dikin, a fel a, hmangaihna a nei bawk tih kan hria a. Vântlâng kum chhiar kum zabi khatnaa Hebrai Kristiante hnêna a lehkha thawnah tirhkoh Paula chuan Pathian chhechham leh thutiam chu “Pathian daw rual a nih lohna thil danglam thei lo pahnih” a ni tih a nemnghet a ni. (Hebrai 6:17, 18) Zirtîr Tita hnêna a lehkha thawnah pawh, Paula chuan Pathian “dâwt sawi thei lova” tih a ziah khân, chu thu chu a târ lang bawk.—Tita 1:1, 2.
14 Chu bâkah, Jehova chuan tâwp chin nei lo thiltihtheihna nei mah se, dik lo takin thil a ti ngai lo. Mosia chuan Jehova chu “Pathian rinawm, khawlohna nei lo, fel leh ṭha a ni,” tiin a târ lang. (Deuteronomy 32:4) Jehova thiltih apiang chu a mizia ropui tak nên a inmil a. A thiltihte chuan a mize bul berte—hmangaihna, finna, rorêl dikna, leh thiltihtheihna te chu a mil famkim tih a târ lang a ni.
15, 16. Eden huanah khân Jehova’n duh thlan tûr eng nge Adama hmaah a dah?
15 Eden huana thilthlengah hêng mizia zawng zawngte a lan dân hi ngaihtuah rawh. Hmangaihna ngah Pa ber a nih angin, Jehova chuan thil siam mihringte mamawh apiang chu a pe a. Adama chu thil ngaihtuah theihna, chhût theihna, leh thu tlûkna siam theihna chu a pe bawk. Pianpui finnaa kaihhruai nungchate ang lo takin, Adama chuan duhthlan theihna a nei a ni. Adama siam a nih hnuah, Pathian chuan a vân lalṭhutphah aṭangin “a thil siam tinrêng chu a en a, ngai teh, ṭha a ti êm êm a.”—Genesis 1:26-31; 2 Petera 2:12.
16 Jehova’n Adama chu “a chhia leh a ṭha hriatna thing rah” ei lo tûra thu a pêk khân, Adama’n thu tlûkna a siam theih nân kaihhruaina chiang tâwk tak a pe a. Adama chu thing rah pakhat tiam lovin “huana thing tinrêng rahte” a ei a phalsak a, ei phal loh thing rah einain a rah chhuah tûr duhawm lo tak chu a hrilh bawk a ni. (Genesis 2:16, 17) Adama hnênah chuan a thiltihte’n nghawng a neih dân tûr chu a hrilhfiah bawk. Adama’n eng nge a tih ang?
17. Engvângin nge Jehova’n a hriat lâwk theihna a hman dân chungchângah a duhtui kan tih theih?
17 Thil engkim hriat lâwk theihna nei mah se, Jehova chuan Adama—leh Evi—thiltih tûra a thil hriat lâwk theihna hman loh chu a thlang niin a lang. Chuvângin zawhna lo awm chu, Jehova’n nakin hun a hmuh lâwk theih leh theih loh lam ni lovin, a thil hmuh lâwk theihna hman a thlan leh thlan loh lam chu a ni. Chu bâkah, Jehova chu hmangaihna Pathian a nih avângin, hre rêng chung leh nunrâwng takin chu helna—leh a rah chhuah râpthlâk zawng zawngte—awm tûrin a ruat lâwk lo vang tih kan ngaihtuah thei a ni. (Matthaia 7:11; 1 Johana 4:8) Chuvângin, Jehova’n a thil hriat lâwk theihna a hman dân chungchângah hi chuan, a duhtui a ni.
18. Engvângin nge Jehova’n a thil hriat lâwk theihna hmanna kawnga a duhtuina chuan a ṭhat famkim loh vâng a ni tih a kawh loh?
18 Jehova’n a hriat lâwk theihna a hman dân chungchânga a duhtuina chuan thil engemaw a tlachhamin, a famkim lo tihna a kâwk em? Kâwk lo ve. Mosia chuan Jehova chu “Lungpuia” a ni tih a sawi hnuah: “A thiltih a fel famkim” tiin a sawi belh a ni. Mihringte thil sualtih sawhkhâwk avângin amah mawhpuh tûr a ni lo. Tûna kan vaia kan tawn sawhkhâwk râpthlâk tak chu thuâwih lohna thiltih fel lo tak vânga lo awm ṭan a ni a. Tirhkoh Paula chuan “mi pakhat avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a” tiin chiang takin a chhût a ni.—Deuteronomy 32:4, 5; Rom 5:12; Jeremia 10:23.
19. Eng zawhnate nge a dawta thuziaka sawiho a nih ang?
19 Kan sawiho tawhte aṭangin, Jehova chuan rorêl dik lohna a nei lo tih kan hria. (Sâm 33:5) Chu ai mah chuan, Jehova theihnate, a mizia ṭhatnate, leh a tehnate chu a thiltum nêna inmilin a hmang a ni. (Rom 8:28) Hrilh lâwkna Pathian a nih angin, Jehova chuan ‘a tâwp tûr chu atîr aṭang rêngin a sawi ṭhîn a, thil la tih lohte chu hmasâng aṭang rêngin a sawi ṭhîn.’ (Isaia 46:9, 10) A hriat lâwk theihna hmanna kawngah a duhtui a ni tih kan hmu bawk a. A nih chuan, hei hian engtin nge min nghawng? Engtin nge kan thu tlûkna siamte chuan Pathian thiltum duhawm tak a mil tih kan tihchian theih ang? Chutianga tihna chuan eng malsâwmnate nge a thlen dâwn? Hêng zawhnate hi a dawta thuziakah sawiho a ni ang. (w06 6/1)
[Footnote]
^ par. 2 Jehova Thuhretute chhuah A Book for All People, (English) tih brochure phêk 28-na chu en rawh.
I Hrilhfiah Thei Em?
• Eng hmân lai entîrnatein nge Pathian “thu chhuak” chu englai pawhin “a hlawhtling” tih finfiah?
• Jehova’n a ‘chatuan thiltum’ nêna inkûngkaihin eng nge a ruat lâwk?
• Eng kawngin nge Jehova’n a thil hriat lâwk theihna chu a hman?
[Zirlai Atâna Zawhnate]
[Phêk 22-naa milem]
Jehosaphata’n Jehova a ring
[Phêk 23-naa milem]
Pathian chuan Isua thihna leh thawhlehna a sawi lâwk
[Phêk 24-naa milem]
Jehova’n Adama leh Evi thiltih tûr chu a ruat lâwk em?