Rinawmna Kawng Zawhna Aṭanga Lo Awm Hlimna
Rinawmna Kawng Zawhna Aṭanga Lo Awm Hlimna
“LALPA malsâwmna chuan a tihausa ṭhîn a, lungngaihna a belhchhah ṭhîn lo.”—THUFINGTE 10:22.
1, 2. Engvângin nge nakin hun tûr ngaihtuah tlut tlut chu kan pumpelh ang?
“NAKIN hun tûr ngaihtuah tlut tlutna chuan . . . tûn hun hi a nihna tûr ang takin min hmuhtîr lo,” tiin America mi fing pakhat chuan a sawi a. Chu chu puitlin huna an thiltihtheih tûrte ngaihtuah tlut tlut avânga an puitlin thlenga naupang nih hlâwkna hmuh hmaihtu naupangte tân pawh a dik a ni.
2 Jehova betute pawh hetiang ngaihtuahna lakah hian an fihlîm bîk lo. Thil ni thei târ lan hi han ngaihtuah teh. Pathian thutiam lei paradis thlen famkimna chu kan nghâkhlel êm êm a. Dam lohna te, tarna te, natna te, leh hrehawm tawrhna te laka fihlîm hlân chu kan nghâkhlel a ni. Chûng thilte beisei chu ṭha hle mah se, nakin huna tisa lam malsâwmnate kan ngaihtuah tlut tlut avângin tûn laia thlarau lam malsâwmna kan dawnte hmuh hmaih ta ila engtin nge ni ang? Chu chu a va zahthlâk dâwn êm! Awlsam têa lunghnualin, duh aia rei ‘kan beiseina tihkhawtlaina chuan thinlung a tina’ dâwn a ni. (Thufingte 13:12) Nuna buainate leh harsatnate chuan beidawnna, a nih loh leh mahni inkhawngaihna thangah min awhtîr thei a. Dinhmun ṭha lote chu hmachhawn aiin, phunnawi duhna rilru kan lo nei thei a ni. Tûna kan dawn malsâwmnate lâwm taka ngaihtuahna hmangin hêng zawng zawng hi pumpelh theih a ni.
3. He thuziakah hian eng nge kan ngaihtuah ber ang?
3 “LALPA malsâwmna chuan a tihausa ṭhîn a, lungngaihna a belhchhah ṭhîn lo,” tiin Thufingte 10:22 chuan a sawi a. Tûn laia Jehova chhiahhlawhte thlarau lama hmuingîlna chu kan lâwmna tûr malsâwmna a ni lâwm ni? Kan thlarau lam hmuingîlna hmêlhmang ṭhenkhat chu ngaihtuahin, chu chuan mahni tân ṭheuhva awmzia a neih dân chu ilo ngaihtuah ang u. “Mi fel, ama remruat thiamna,” a nih loh leh rinawmna kawng zawhtute chunga Jehova vûr malsâwmnate ngaihtuahna chuan hlim taka kan Pa vâna mi rawng bâwl zawm zêl kan tumna chu a tinghet a ni.—Thufingte 20:7.
Tûna ‘Min Tihausatu Malsâwmnate’
4, 5. Bible zirtîrna a eng ber hi nge i hlut a, engvângin nge?
4 Bible zirtîrna dik hriatna. Kristianna ram sakhuate chu Bible ring niin an inchhâl tlângpui a. Amaherawhchu, Bible zirtîrnate chu an pawm tlâng ṭhîn lo. Pâwl khata awmte ngei pawh Bible zirtîrna chungchângah an thlîr dân a inang lo fo a ni. An dinhmun chu Jehova chhiahhlawhte dinhmun lakah chuan a va danglam tak êm! Kan ram, hnam, a nih loh leh kan chi chu engpawh lo ni se, a hming kan hriat Pathian chu kan bia a. Ani chu pathum infinkhâwm pathian maksak tak a ni lo. (Deuteronomy 6:4; Sâm 83:18; Marka 12:29) Lei leh vâna pawimawh ber Pathian lalchungnunna thu buai chu chinfel a hun tawh a, a chunga rinawm tlatna hmangin, chu thu buaiah chuan kan tel ṭheuh tih chu kan hre bawk. Mitthite dinhmun chungchâng thu dik kan hria a, hremhmun meidîla mihringte hremtu leh sual kan faina hremhmuna thawntu Pathian râpna lak aṭangin kan fihlîm bawk a ni.—Thuhriltu 9:5, 10.
5 Chu bâkah, tihpalh thil thua chanchhâwnna avânga lo awm kan ni lo tih hriat chu a va hlimawm tak êm! Pathian thil siam kan ni a, ama anpui ngeia siam kan ni zâwk mah a ni. (Genesis 1:26; Malakia 2:10) Fakna hla phuahtu chu a Pathian hnênah: “I hnênah lâwm thu ka hrilh ang che; hlauhawm tak leh mak taka siam ka ni si a: i thiltihte hi mak tak a ni a; chu chu ka nunna hian a hre chiang hle a ni,” tiin zai a ni.—Sâm 139:14.
6, 7. I nun emaw, i hriat mi dangte nun emawa eng inthlâkthlengnate nge malsâwmna lo ni ta?
6 Mi tichhe thei thil chîn dawklak leh thiltihte kan pumpelh. Chanchin puan chhuahnate chuan zialzûk te, zu in nasat lutuk te, leh mipat hmeichhiatna lama inphalraina te laka vaukhânna thu a târ lang zîng hle a. A tlângpui thuin, hêng vaukhânnate hi ngaihthah a ni fo ṭhîn. Mahse, Pathian dikin chutiang thilte chu a hnâwl tih leh chûng thil titute’n amah an tilungngai tih mi rilru ṭha puin a hriatin eng nge a tih? Chu mi chu chutiang thiltihte bânsan tûra chêttîrin a awm a ni. (Isaia 63:10; 1 Korinth 6:9, 10; 2 Korinth 7:1; Ephesi 4:30) A bul berah chuan Pathian tihlâwm nâna a tih mah ni se, hlâwkna dang—hrisêlna ṭha zâwk leh rilrua thlamuanna—chu a dawng a ni.
7 Thil ṭha lo chîn dawklakte bânsan chu mi tam tak tân a harsa hle a. Chutichung chuan, kum tinin mi a sîng têlte chuan an bânsan a ni. Jehova hnêna inpumpêkin tuiah baptisma an chang a, chutiang chuan an nuna Pathian tilâwm lo thiltihte an paih bo tawh tih vântlâng an hriattîr a ni. Kan vai atâna intihchakna a va ni êm! Sual leh mi tichhe thei nungchang bâwih nihna ata zalen reng kan tumna chu a tinghet zual sauh a ni.
8. Eng Bible ṭanchhan zilhna hian nge chhûngkuaah hlimna awmtîr?
8 Chhûngkaw nun hlim kan nei thei. Ram tam takah chuan chhûngkaw nun chu a chau va. Inneihna tam tak chu inṭhennain a tâwp a, chu chuan naupangte rilru chu hrehawm takin a dah fo a ni. Europe ram ṭhenkhatah chuan, chhûngkua zawng zawnga zaa sawmhnih zet chu nupa kawp chawi loh an ni a. Engtin nge Jehova chuan chhûngkaw chungchângah rinawmna kawng zawh tûra min ṭanpui? Khawngaihin, Ephesi 5:22–6:4 hi chhiar la, pasalte, nupuite, leh fate tâna Pathian Lehkha Thu zilhna ṭha tak hi chhinchhiah rawh. Chu Bible châng leh châng danga a sawite nunpuina chuan inneihna a tinghet a, naupangte ṭha taka enkawl tûrin nu leh pate a ṭanpui a, chhûngkaw nun hlim a siam a ni. Chu chu lâwm chhan tûr a tling a ni lâwm ni?
9, 10. Engtin nge nakin hun kan thlîr dân chu khawvêl mite thlîr dân nên a inan loh?
9 Khawvêl buainate chinfel thuai a ni dâwn tih rin tlatna. Science lam leh khâwl lama thiamna a sângin, hruaitu ṭhenkhatte’n tih tak zeta an bei chung pawhin, tûn lai nuna buaina khirh tak takte chu chinfel a la ni chuang lo. World Economic Forum dintu Klaus Schwab-a chuan tûn hnai mai khân, “khawvêl tawh harsatna chu a pung zêl a; mahse, a chinfelna hun erawh a tlêm tawlh tawlh thung a ni,” a ti. Tin, “ram tinin a tawrh thil hlauhawm fîrfiaka chêtna te, chhehvêl boruak chhiatna te, leh sum leh pai lama ngêlngheh lohna te” pawh a sawi bawk. Schwab-a chuan: “Tûn hma zawng aiin, khawvêl hian thawhhona leh hma lâk vat ngai harsatna a hmachhawn a ni,” tiin a titâwp a ni. Kum zabi 21-na kan luh tawh hnuah pawh, mihringte nakin hun tûr chu a la pik hle.
10 Jehova’n mihringte buaina zawng zawng chingfel thei tûr ruahmanna—Pathian Messia Lalram—a siam tih hriat chu a va lâwmawm tak êm! Chu mi hmang chuan Pathian dik chuan ‘indonate a tirehin, thlamuanna nasa tak chu a tiduah hluah hluah’ ang. (Sâm 46:9; 72:7) Hriak thih Lal Isua Krista chuan ‘pachhia te leh mi rethei te chu hnehchhiahna leh nunrâwnna ata a chhanhim ang.’ (Sâm 72:12-14) Lalram rorêlna hnuaiah chuan ṭâmna a awm lo vang. (Sâm 72:16) Jehova chuan kan “mit ata mittui zawng zawng a hrufai ang a; lungngaih te, ṭah te, nat te pawh a awm leh tawh hek lo vang; thil hmasate chu a ral ta.” (Thu Puan 21:4) Lalram chu vânah din a ni daih tawh a, leia buaina tinrêng chingfel tûrin hma a la vat ang.—Daniela 2:44; Thu Puan 11:15.
11, 12. (a) Nuam tihzâwng thilte tihna chuan hlimna tluantling min pe em? Hrilhfiah rawh. (b) Engin nge hlimna tak tak min pe?
11 Hlimna tak tak min petu kan hria. Engin nge hlimna tak tak min pe? Rilru lam zir mi pakhat chuan hlimnaah hian thil pawimawh pathum—nuam tihzâwng thiltihna, inhnamhnawihna (hna leh chhûngkua thiltih ang chia telna), lungawina (thiltum lian zâwk emaw, mi dangte tâna ṭangkai tûr emaw thawh) a tel tih a sawi. Hêng pathumte zîngah hian nuam tihzâwng thiltihna chu pawimawh lo berah a dah a, tichuan: “Mi tam takin an nuna nuam tihzâwng thiltih chu an ûm a, an dah pawimawh ber avângin, hei hi thil chhinchhiah tlâk tak a ni,” a ti. He mi chungchânga Bible thlîr dân hi eng nge ni?
12 Hmân lai Israel Lal Solomona chuan: “Ka rilruin, ‘Khawi nge! nuamsipbâwl ka’n chîng teh ang, a nuam teh rêng emaw’ ka ti a, mahse hei pawh eng a lo ni lo. Nuih hi a âtthlâkzia ka chhar chhuak a, hlimhlawp lah eng ruai a ni lo,” a ti. (Thuhriltu 2:1, 2) Pathian Lehkha Thu sawi dân chuan, nuam tihzâwng thiltihnain a pêk hlimna chu rei lo tê atân chauh a ni. Hnaa inhnamhnawihna chungchâng hi eng nge ni ve? Hna awmzia nei ber—Lalram thu hrilh leh zirtîr siam hnaah hian kan tel a ni. (Matthaia 24:14; 28:19, 20) Bible hrilhfiah chhandamna thuchah mi dangte hrilhna hmangin, keimahni ngei leh ngaithlatute chhandamna pe thei hna chu kan thawk a. (1 Timothea 4:16) “Pathian hnathawhpuite” kan nih angin, “englo lâk aiin pêkin lukhâwng a nei zâwk,” tih chu kan tawng a ni. (1 Korinth 3:9; Tirhkohte 20:35) He hna hian kan nun hi awmzia a neihtîr lehzual a, Siamtu hnênah amah sawichhetu Diabol-Setana chhân lêtna tûr chu a pe bawk. (Thufingte 27:11) Dik takin, Jehova chuan Pathian ngaihsaknain hlimna tak tak leh tluantling min pe tih min kawhhmuh a ni.—1 Timothea 4:8.
13. (a) Eng kawngin nge Theocratic Rawngbâwlna School hi ka lâwmna tûr malsâwmna a nih? (b) Theocratic Rawngbâwlna School chu engtin nge i ṭangkaipui?
13 Zirtîrna pawimawh leh ṭangkai kan dawng. Gerhard-a chuan Jehova Thuhretute kohhranah upa niin rawng a bâwl a. A tleirâwl lai chu ngaihtuah lêt lehin, ani chuan: “Tleirâwl ka nih lai chuan, ṭawng ka harsat êm êm a. Ka rilru a buai hian, ka ṭawng hlei thei lo va, ka dang a âwk ṭan mai ṭhîn. Inngaih hniamna neiin, ka lunghnual a. Ka nu leh pate chuan ṭawng dik dân zirnaa kal tûrin ruahmanna min siamsak a, mahse, an ṭan lâkna chuan min ṭanpui chuang lo. Ka harsatna chu taksa lam ni lovin, rilru lam a ni a. Mahse, Jehova hnên aṭanga thilpêk ropui tak chu a awm—chu chu Theocratic Rawngbâwlna School a ni. He school-a luhna hian huaisenna min pe thar a. Ka thil zirte hmang ṭangkai tûrin theihtâwp ka chhuah a. Chu chuan min ṭanpui ta! Ka ṭawng nâl sawtin, ka lunghnual tawh lo va, rawngbâwlnaah pawh ka huai telh telh a ni. Tûnah chuan vântlâng thusawite hial pawh ka sawi tawh a. He school hmanga nun thar min petu Jehova chungah ka lâwm tak zet a ni,” tiin a sawi. Jehova’n a hna thawk tûra min zirtîrna hi kan lâwm chhan tûr a ni lâwm ni?
14, 15. Mangan laiin, eng ṭanpuina nge dawn mai theih a nih? Entîrna pe rawh.
14 Jehova nêna inlaichînna leh khawvêl pum huap unaute ṭanpuina. Katrin-i chu Asia chhim-chhak lama lîrnghîng nasa tak leh chu mi avânga awm tsunami chanchin chuan a barakhaih hle a. Chu chhiatna a thlen lai chuan a fanu chu Thailand-ah a thang mêk a. Katrin-i chuan dârkâr 32 lai chu a fanu dam leh dam loh a hre lo va, a dârkâr têla pung tawlh tawlh hliampui tuarte zîngah a tel leh tel loh lah a hre hek lo. A tâwpa a fanu a him tih hriattîrna phone a dawn meuh chuan Katrin-i chu a engthâwl huai a ni.
15 Hêng lungkham hun chhûng hian Katrin-i chu engin nge ṭanpui? Ani chuan: “Chûng hun chhûng zawng deuhthaw chu Jehova hnêna ṭawngṭai nân ka hmang a. He hian chakna leh rilrua thlamuanna min pêkzia chu ka hre nawn fo a ni. Chu bâkah, thlarau lama unaute chuan min rawn tlawhin, min fuih hlawm a ni,” tiin a ziak. (Philippi 4:6, 7) Jehova hnêna ṭawngṭaina leh thlarau lama unaute thlamuanna duhawm tak dawng lo se chuan, hêng hun hrehawm tak chhûnga a dinhmun chu a va chhe zual dâwn êm! Jehova leh a Fapa nêna kan inlaichînna hnai tak leh Kristian unaute belh tlat chu malsâwmna dang lam bîk tak a ni a, ho lam taka lâk chi a ni lo.
16. Thawhleh beiseina hlutna târ langtu thiltawn pakhat sawi rawh.
16 Hmangaih thi tawhte hmuh leh theih beiseina. (Johana 5:28, 29) Tlangvâl Matthias-a chu Jehova Thuhretu anga enkawl chhoh a ni a. Mahse, a malsâwmna dawn chu hre lovin, tleirâwl a nih laiin Kristian kohhran aṭang chuan a tawlh bo va. Tûnah chuan heti hian a ziak a ni: “Ka pa nên chuan tîtîna tak tak kan nei ngai meuh lo va. Hun liam tawhahte khân, inmil lohna tam tak kan nei a. Chuti chung chuan, ka pa chuan nun ṭha ber min duhsak ṭhîn. Min hmangaih êm êm a, mahse chutih lai chuan ka hre thiam si lo. Kum 1996-ah chuan, a khum bula ṭhuin, a kut vuana ṭap zawih zawih chungin ka thiltih zawng zawngte avânga pawi ka tihzia leh amah ka hmangaihzia chu ka hrilh a. Mahse, ani chuan a hre thei si lo. A hnu lawkah chuan, min kalsan ta a. Thawhlehnaa ka pa hmu tûra ka dam khawchhuak a nih chuan, hun kal tawha tîtîna rîl tak kan neih lohte aiah kan tîtî nghek ang a. Tûnah upa niin rawng ka bâwl tih leh ka nupui nên pioneer kan thawk dûn tih a hriat chuan, a lâwm ngawt ang,” tiin. Thawhleh beiseina chu kan tân malsâwmna a va ni tak êm!
“Lungngaihna A Belhchhah Ṭhîn Lo”
17. Jehova malsâwmnate ngaihtuahna chuan engtin nge min ṭanpui?
17 Isua Krista chuan a Pa vâna mi chungchângah: “Ani chuan mi sualte leh mi ṭhate chungah chuan a nî a chhuahtîr ṭhîn a, mi felte leh mi fel lote chungah pawh ruah a sûrtîr ṭhîn,” tih a sawi a. (Matthaia 5:45) Pathianin mi fel lote leh mi suaksualte pawh mal a sâwm a nih si chuan, rinawmna kawng zawhtute chu mal a va sâwm nasa lehzual dâwn êm! Jehova chuan “dik taka awmte lakah chuan thil ṭha rêng rêng a ui lo vang” tih Sâm 84:11 chuan a târ lang. Amah hmangaihtute chunga a bîk taka ngaihsakna leh ngaihtuahna a lantîrte kan chhût hian, kan thinlung chu lâwmna leh hlimnain a va khat tak êm!
18. (a) Eng kawngin nge Jehova malsâwmnate chuan lungngaihna a belhchhah loh? (b) Engvângin nge Pathian laka mi rinawm tam takte’n hrehawm an tawrh?
18 “LALPA malsâwmna” chu a mite hnêna thlarau lam hmuingîlna petu a ni a. “Lungngaihna a belhchhah ṭhîn lo” tih chu kan ring tlat a ni. (Thufingte 10:22) Chutiang a nih si chuan, engvângin nge Pathian laka mi rinawm tam takte’n natna leh hrehawm tawrhna nasa tak awmtîrtu fiahna leh harsatna an tawh? Harsatna leh lungngaihnate chu a chhan bul pui pathum avângin kan chungah a lo thleng a ni. (1) Sual lam kan ngaihtuahna. (Genesis 6:5; 8:21; Jakoba 1:14, 15) (2) Setana leh a ramhuaite. (Ephesi 6:11, 12) (3) Khawvêl suaksual te chu. (Johana 15:19) Jehova’n kan chungah thil ṭha lo thlen chu a phal laiin, chûng chu ama awmtîr a ni lo. Dik takin, “thilpêk ṭha leh thilpêk famkim zawng zawng chu chung lam aṭangin êngte Pa hnên ata, a lo chhuk ṭhîn a ni.” (Jakoba 1:17) Jehova malsâwmnate chuan lungngaihna a awmtîr lo.
19. Rinawmna kawng zawh rengtute chu engin nge nghâk?
19 Thlarau lama hmuingîlnaah chuan Pathian nêna inlaichînna hnai tak neih a tel fo va. Amah nêna inlaichînna hnai kan neih hian, ‘nunna, nunna taktak’—chatuan nunna—chu ‘kan vawn theih nân, hun lo thleng tûr atân chuan lungphûm ṭha tak kan tân kan khâwl khâwm’ a ni. (1 Timothea 6:12, 17-19) Nakina Pathian siam khawvêl tharah chuan, thlarau lama hausakna leh tisa lama malsâwmna kan nei ve ve ang. Chutih hunah chuan ‘Jehova thu pawmtu’ zawng zawngte’n nunna tak tak chu an nei tawh ang. (Deuteronomy 28:2) Kan tumna nghet tak nên hian, hlim takin rinawmna kawng chu i zawh zêl ang u. (w06 5/15)
Eng Nge I Zir?
• Engvângin nge nakin hun ngaihtuah buai lutuk chu a finthlâk loh?
• Eng malsâwmna nge tûna kan chen mêk?
• Engvângin nge Pathian chhiahhlawh mi rinawmte’n hrehawm an tawrh?
[Zirlai Atâna Zawhnate]