Sâm Bu 2-na Aṭanga Thu Pawimawh Hrilhfiahna
Jehova Thu Chu A Nung
Sâm Bu 2-na Aṭanga Thu Pawimawh Hrilhfiahna
JEHOVA chhiahhlawh kan nih angin, fiahna tawn chu kan inbeisei a. Tirhkoh Paula chuan: “Tupawh Krista Isuaa Pathian ngaihsaka awm tum apiang chuan tihduhdahnate an tuar bawk ang,” tiin a ziak a ni. (2 Timothea 3:12) Engin nge fiahna leh tihduhdahnate tuar chhuahna hmanga Pathian laka kan rinawmna târ lang tûrin min ṭanpui ang?
Fakna hla thlan khâwm pangate zînga a pahnihna hian chu ṭanpuina chu min pe a ni. Sâm 42-na aṭanga 72-na chuan fiahna hlawhtling taka tuar chhuah kan duh chuan, Jehova lakah rinna pumhlûm kan nghatin, a chhan chhuahna nghah dân kan zir tûr a ni tih min kawhhmuh a. Chu chu kan tân zirlai hlu tak a va ni êm! Pathian Thu dangte ang bawkin, Sâm Bu 2-na thu hi “a nung a, thil a ti thei” tak zet a ni.—Hebrai 4:12.
JEHOVA CHU KAN “INHUMHIMNA LEH KAN CHAKNA”
(Sâm 42:1–50:23)
Levia mi pakhat chu sala hruai a ni a. Pathian be tûra Jehova hmun thianghlima a kal theih lohna chuan a tilungngai hle a: “Aw ka nunna, engah nge i kun reng? Engah nge ka chhûngah hian i buai ni? Pathian beisei rawh,” tiin a inhnêm chawp a ni. (Sâm 42:5, 11; 43:5) He châng lang nawn ṭhîn hian Sâm 42 leh 43-naa hla châng pathumte chu hla pakhatah a thlunzawm a. Sâm 44-na hi Lal Hezekia hun laia Assuria hovin rûn an tum laia ram lungngai tak, Judai ram tâna ṭawngṭaina a ni.
Sâm 45-na, lal inneih ni hla hi Messia Lalram chungchâng hrilh lâwkna a ni. A dawttu fakna hla pathumte chuan Jehova chu ‘inhumhimna leh chakna,’ “lei chung zawng zawnga Lal ropui tak,” leh “kulhbîng sâng,” ang tein a sawi a. (Sâm 46:1; 47:2; 48:3) Sâm 49-na chuan ‘tuman an unau pawh an tlan theih loh’ thu chu a va sawi ṭha tak êm! (Sâm 49:7) Hla thlan khâwm bu 2-naa fakna hla hmasa pariatte hi Kora fate fakna hla a ni a. A pakuana, Sâm 50-na hi Asapha phuah a ni.
Bible Chungchânga Zawhnate Chhânna:
44:19—Eng nge ‘sihalte awmna’ tih chu? Fakna hla phuahtu chuan indonaa thite ruang sihalte’n an eina indona hmun a sawina a ni thei ang.
45:13, 14a—Tunge “lal fanu” “lalber hnênah an hruai” tûr chu? Ani chu “Lalber chatuana awm,” Pathian Jehova fanu a ni a. (1 Timothea 1:17) Ani chuan chawimawi tawh Kristian 1,44,000 hmanga din kohhran, Jehova’n thlarauva hriak thiha fa anga a pawmte a entîr a ni. (Rom 8:16) He Jehova “fanu” hi ‘mo a pasal ela a inchei anga peih diam’ a ni a, mopa—Messia Lal—hnênah hruai a ni ang.—Thu Puan 21:2.
45:14b, 15—“Nulahote” chuan tute nge an entîr? Anni chu betu dik “mipui tam tak,” hriak thih a la bângte zâwma ṭanpuitute chu an ni a. Nungdama “hrehawm nasa tak ata chhuakhote” an nih avângin, vâna Messia Lal inneihna a zawh hunah chuan leiah hian an awm ang. (Thu Puan 7:9, 13, 14) Chutih hunah chuan, “lâwm tak leh hlim takin” an awm ang.
45:16—Eng kawngin nge lalber pate aiah fate an awm ang? Isua leia a lo pian khân, leiah pate a nei a. Kum Sângkhat Rorêl Hun chhûnga thihna ata a kaihthawh hunah chuan anni chu a fate an ni ang. An zînga ṭhenkhatte phei chu “lei chung zawng zawngah hian mi lianah” a ruat ang.
50:2—Engvângin nge Jerusalem chu “mawi famkimna” tia koh a nih? Hei hi a khawpui lan dân vâng a ni lo. Jehova’n a hman vâng leh, a biak in sakna hmun atân leh a hriak thih lalber khawpui atâna siamna hmanga ropuina a vûr vâng a ni.
Kan Zir Tûrte:
42:1-3. Ram ro taka awm sakhi hian tui a châk huam huam ṭhin angin, Levia mi chuan Jehova chu a châk, a nih loh leh a ngai ngawih ngawih a. Hmun thianghlim aṭanga Jehova a biak theih loh avânga Levia mi lungngaihna chu a nasa hle a; chaw châkna nei lovin, ‘a mittui chu achhûn azânin a chaw’ a lo ni ta hial a ni. Rinpuite nêna Jehova kan biak theihna chu nasa takin kan hlut tûr a ni lâwm ni?
42:4, 5, 11; 43:3-5. Kan thunun phâk loh thil engemaw avângin rei lo te chhûng kohhran bêl thei lo ta ila, chutiang kohhran inkhâwmna hlimawm tak kan lo neih tawhte rilrua hriatna chuan min chhawm nung thei ang. Hei hian atîrin mal nia kan inhriatna tizual sauh thei mah se, Pathian chu kan inhumhimna a nihzia leh chhan chhuah nân amah kan nghah a ngaihzia min hriattîr bawk dâwn a ni.
46:1-3. Eng ang chhiatna pawh tâwk mah ila, “Pathian chu kan inhumhimna leh kan chakna” a ni tih rin tlatna kan nei tûr a ni.
50:16-19. Dâwt thu sawi a, thil ṭha lo tih chîng apiang chuan Pathian thu hriattîr tûrin dikna rêng an nei lo.
50:20. Mi dangte thil tihsual mipui vântlâng hriata puan chhuah ai chuan, kan en khum mai zâwk tûr a ni.—Kolossa 3:13.
“KA NUNNA, PATHIAN CHAUH NGHAK RAWH”
(Sâm 51:1–71:24)
Heta fakna hla hlâwmte hi Davida’n Bath-sebi a chêtsualpui hnua tih tak zeta a ṭawngṭainain a inṭan a. Sâm 52 aṭanga 57 chuan Jehova’n a chunga an rit phurh nghattute leh chhandam nâna amah nghâktute chu a chhan chhuak dâwn tih a târ lang. Sâm 58-64-a sawi lan a nih angin, Davida chuan manganna a tawn chhûng zawngin, Jehova chu a inhumhimna a nihtîr a ni. Ani chu heti hian a zai a ni: “Ka nunna, Pathian chauh nghâk rawh; ka beiseina hi ama hnên aṭanga chhuak a ni si a,” tiin.—Sâm 62:5.
Min Chhan Chhuaktu nêna inṭhianna hnai tak neihna chuan ‘a hming ropuizia chu hlaa sa chhuak’ tûrin min chêttîr tûr a ni. (Sâm 66:2) Sâm 65-na chuan Jehova chu phal taka thilpetu angin a fak a, Sâm 67 leh 68 chuan chhanhimtu Pathian ang leh Sâm 70 leh 71 chuan chhan chhuahna Siamtu angin a fak thung a ni.
Bible Chungchânga Zawhnate Chhânna:
51:12—Davida’n tu ‘thlarau tihnuam’ ṭanpuina nge a dîl? Hei hi Pathianin Davida ṭanpui a duhna emaw, Jehova thlarau thianghlim emaw sawina a ni lo; Davida thlarau—a rilru put hmang sawina a ni. Davida chuan Pathian hnênah thil ṭha tih duhna pe tûrin a dîl a ni.
53:1—Engtin nge Pathian a awm tih ring lotu chu “mi â” a nih? Heta mi â tih hi rilru fingvâr lo sawina a ni lo. Chutiang mi chu nungchang lama mi â, a nih loh leh bawlhhlawh a nihzia chu Sâm 53:1-4-naa sawi nungchang lama thlâkchhiatna aṭang hian a hriat theih a ni.
58:3-5—Eng kawngin nge mi suaksualte chu rûl ang an nih? Mi dangte chungchâng dâwt thu an sawite chu rûl tûr ang a ni a. Mi hming ṭha an tihchhiatsak a ni. Mi suaksualte chuan “rûlrial . . . a beng hup ṭhîn ang” maiin kaihhruaina emaw, zilhna emaw chu an ngaithla duh lo.
58:7—Engtin nge mi suaksual chu ‘tui chak taka luang anga an tuiral’? Davida chuan Ram Tiama luikawr ṭhenkhat chu a ngaihtuah a ni thei ang. Chutiang luikawrah chuan thawklehkhata tui lian chuan chîm sâng thut mah se, a kang chat nghâlin hmuh tûr a awm ṭhîn lo. Davida chu mi suaksualte tiboral thuai tûrin a ṭawngṭai a ni.
68:13—Engtin nge “ṭhuro thla tangkaruaa tuama, a thla hmâwr pawh rangkachak eng taka tuam” a nih? Rawng pâwl leh vut buak inpawlh ṭhuro chi khat chuan ni chhun zâwnga rawng chi hrang hranga tle thei hmul ṭhenkhat a nei a. A hmul chu rangkachak rawng ni êngin a han chhun chuan a tle sût a ni. Davida chuan Israel sipai indona aṭanga hnehna changa lo hawte chu, chu ṭhuro—thlâwk chak tak leh lang ropui tak nên chuan a tehkhin a ni thei ang. Bible lama mi thiam ṭhenkhatte sawi angin, he thu hian lâwmman tangkapui anga lâk atâna siam ṭhuro lem chher ṭha tak a kâwk thei bawk. A enga pawh chu ni se, Davida chuan Jehova’n a mite hnêna an hmêlmate hnehna a pêk chungchâng a sawina a ni.
68:18—Tute nge ‘mihringte zînga thilpêkte’ chu? Chûng mite chu Ram Tiam an lâk ṭuma sala an hruai zînga mite an ni a. A hnuah, anni chu Levia mite hna ṭanpui tûra ruat an ni.—Ezra 8:20.
68:30—‘Sakawlh phairuang zînga chêng zilh’ tûra ngenna chu eng tihna nge ni? Davida chuan Jehova mite hmêlma chu ram sakawlh anga sawiin, anmahni chu zilh tûr, a nih loh leh mi an tihnat theihna chu thunun tlat tûrin Pathian a ngên a ni.
69:23—Eng nge ‘hmêlma kâwngte tikhûr’ tih awmzia chu? Kâwng bâwra tihrâwlte hi hna hahthlâk, thil rit chawi leh put ang chi atân hian a pawimawh hle a. Kâwng bâwr nghet lo chuan thahrui neih lohna a entîr a ni. Davida chuan a hmêlmate’n an chakna hloh tûrin a ṭawngṭai a ni.
Kan Zir Tûrte:
51:1-4, 17. Thilsual tihna chuan Pathian Jehova lak ata min tihhran kher a ngai lo. Kan inlamlêt chuan a lainatna kan dawng thei tih kan chiang a ni.
51:5, 7-10. Thil sual kan tih chuan, kan sual rochun avângin Jehova ngaihdamna chu kan ngên thei a. Min silfai tûr leh sual châkna kan thinlung ata la bo va, thlarau dik tak, a nih loh leh nghet tak min pe tûrin kan ṭawngṭai bawk tûr a ni.
51:18. Davida thil sual tih chuan a ram pum dinhmun a tiderthâwng a. Chuvângin, Pathianin Zion chunga thil ṭha a tih nân a ṭawngṭai a ni. Sual nasa tak kan tih hian, Jehova hming leh kohhran hming kan tichhia a ni. Thil pawi kan thlentîr mai theihte chu siam ṭha tûrin Pathian hnênah kan ṭawngṭai a ngai a ni.
52:8. Jehova thuawihna leh a thununna thute pawm nghâlna hmangin, Pathian hnaiha a rawngbâwlnaa rah chhuah ṭha tak, “Pathian ina olive thing chawr duah hluah ang” kan ni thei a ni.—Hebrai 12:5, 6.
55:4, 5, 12-14, 16-18. Davida chu a fapa ngei Absaloma phiar rûkna leh a thurâwn petu rinawm Ahithophela phatsanna avângin a rilru a na hle a. Amaherawhchu, chu chuan Jehova a rinna chu a tibo chuang lo. Rilru natna chu Pathiana kan rinna kan tihbotîr tûr a ni lo.
55:22. Engtin nge Jehova chungah kan ritphurh chu kan nghah? Chu chu (1) ṭawngṭaina hmanga kan lungngaihna a hnêna thlenna te, (2) min kaihruaitu leh ṭanpuitu atâna a Thu leh a inawpna pawl rinchhanna te, leh (3) dinhmun ti ṭha tûra kan tihtheih apiang tihna te hmangin kan nghat a ni.—Thufingte 3:5, 6; 11:14; 15:22; Philippi 4:6, 7.
56:8. Jehova chuan kan dinhmun chauh ni lovin, chu miin kan rilru chhûngril a nghawng dân pawh chu a hria a ni.
62:11. Pathian chuan pâwn lam chakna dang engmah a rinchhan a ngai lo. Amah ngei chu chakna lo chhuahna hnâr chu a ni a. “Thiltihtheihna hi Pathian ta a ni.”
63:3. Pathian ‘ngilneihna hi nunna aiin a ṭha zâwk’ a ni; a tel lo chuan nun hian awmzia a neih loh avângin. Jehova ṭhiana insiam chu a finthlâk a ni.
63:6. Zân—hun reh tak leh rilru la pêngtu awm loh hun—chu rilrua inchhût ngunna hun ṭha tak a ni thei.
64:2-4. Mi rêlna ṭha lo chuan mi pawisawi lo hming ṭha chu tichhe thei a. Chûng inrêlnate chu kan ngaithla tûr a ni lo va, kan theh darh tûr lah a ni hek lo.
69:4. Remna siam tûr chuan, dik lo niin inhre lo mah ila, ngaihdam dîlna hmanga ‘rulhlêt’ chu a finthlâk châng a awm thei.
70:1-5. Jehova chuan hmanhmawh taka a ṭanpui kan dîlna chu a hria a. (1 Thessalonika 5:17; Jakoba 1:13; 2 Petera 2:9) Pathian chuan fiahna kan tawh zui zêl chu a phal mai thei a; mahse, dinhmun hmachhawn thei tûrin finna leh tuar chhuak thei tûrin chakna min pe ang. Kan tawrh theih bâk hrehawm chu min tawrhtîr lo vang.—1 Korinth 10:13; Hebrai 10:36; Jakoba 1:5-8.
71:5, 17. Davida chuan Philistia mi hrawl Goliatha a hmachhawn hma, a naupan têt ata tawh Jehova chu a rina nihtîrin huaisenna leh chakna a nei chho a ni. (1 Samuela 17:34-37) Naupangte chuan an thil tih apiangah Jehova an rinchhan tlat tûr a ni.
“Lei Pum Pui . . . Hi A Ropuinaa Tihkhahin Awm Rawh Se”
Hla thlan khâwm bu 2-naa a tâwpna ber Sâm 72-na hi, Messia lal hun chhûnga thil awm dân tûr entîr lâwktu, Solomona rorêlna chungchâng a ni a. Heta sawi thlamuanna nasa tak, hnehchhiahna leh tharum thawhna tâwpna, leia buh tam tak awmna ang chi malsâwmnate chu a va ropui tak êm! Hêngte leh Lalram malsâwmna dangte hlim taka chêntute zînga mi kan ni ve ang em? Fakna hla phuahtu anga lungawi taka Jehova kan nghah a, kan inhumhimna leh kan chakna kan nihtîr phawt chuan, chûng mite zîngah chuan kan tel ve thei a ni.
“Lalpa Pathian, Israel-ho Pathian chu, fakin awm rawh se, amah chauh hian thil mak a ti ṭhîn a: a hming ropui tak hi a ropuinaa tihkhahin awm rawh se. Amen, Amen” tih thute hmang hian “Davida ṭawngṭainate chu a tâwp” a ni. (Sâm 72:18-20) Chutiang bawk chuan thinlung zawng zawnga Jehova fakin, a hming ropui chu i chawimawi ang u. (w06 6/1)