Chhiartute Zawhna

Engtin nge Thufingte 8:​22-31-a finna chungchâng sawi hi leia mihring anga a lo kal hmaa Isua Krista chanchin sawina a ni tih kan hriat theih?

Thufingte bua hmuh finna thâwk khum thu chu hetiang hi a ni: “LALPA chuan a thil siam bul berah min din a, hmasânga a thil siam bul berah. . . . Tlâng liante an din hma leh Tlâng tête awm hmain ka piang tawh a, . . . Vânte a tihngheh laiin ka awm tawh a, . . . chutih lai chuan mi themthiam angin a kiangah ka awm a; ni tin, a lâwmna ka ni a. A bulah ka hlim êm êm bawk thîn. . . . Ka lâwmna chu mihring fate chungah a ni,” tih hi.

He Bible châng hi Pathian finna ringawt emaw, finna mita hmuh theih loh ringawt emaw sawina a ni lo. Engvângin nge a nih loh? A chhan chu heta finna sawi hi Jehova thil siam bul bera “din” a nih loh leh siam a nih vâng a ni. Jehova chu eng tiklai pawhin a awm a, a fing reng a ni. (Sâm 90:​1, 2) A finna chuan inṭanna a nei lo va; siam emaw, “din” emaw lah a ni hek lo. Tin, fa anga “piang” a nih loh leh hrin lah a ni bawk hek lo. Chu bâkah, chu finna chu mihring anga ṭawng chhuak leh thil ti anga târ lan a ni bawk.​—⁠Thufingte 8:⁠1.

Thufingte bu hian he finna hi Siamtu Jehova bula “mi themthiam” anga hmasâng ata a awm thu a sawi a. Chu chu Isua sawina a ni chiang hle. Leia a lo kal hma daih aṭang tawhin Jehova nên hna an lo thawk dûn tawh a, Bible chuan: “Ani hi chu engkim awm hmain a awm rêng a ni, amahah chuan engkim a ding ho bawk a ni,” tiin a sawi.​—⁠Kolossa 1:17; Thu Puan 3:⁠14.

Pathian Fapa chu Jehova thiltum fing takte leh thupêkte târ langtu a nih avângin, finna anga han sawi chu a inâwm hle a ni. Mihring anga a lo kal hmain, Isua chu Pathian Thu, a nih loh leh Pathian aia thusawitu a ni. (Johana 1:⁠1) Ani chu “Pathian thiltihtheihna leh Pathian finna” anga sawi a ni a. (1 Korinth 1:​24, 30) Pathian Fapa, mihring fate a lawm êm avânga tlanna inthawi nâna a nun petu sawifiahna duhawm tak a va ni êm!​—⁠Johana 3:16. (w06 8/1)