Fing La, Pathian Ṭih Rawh!

“LALPA ṭih hi finna bul a ni.”​—⁠THUFINGTE 9:⁠10.

1. Engvângin nge mi tam takin Pathian ṭih tih chu hriatthiam harsa an tih?

TUN hma chuan tuemaw Pathian ṭih mi tia sawi chu infakna anga ngaih a ni ṭhîn a. Tûn laiah erawh chuan mi tam takin Pathian ṭih tih chu ngaih dân hmân lai leh hriatthiam har tak niin an ngai a. ‘Pathian chu hmangaihna a nih si chuan, engvângin nge ka hlauh ang?’ tiin an zâwt mai thei a. An tân chuan hlau tih chu thil duhawm lo a niin, ngaihtuahna tizeng thei khawp hial a ni. Mahse, Pathian hlauhna, a nih loh leh ṭihna dik tak erawh chuan awmze zau tak a nei a, kan la hmuh tûr angin, chu chu rilru ngaihtuahna mai a ni lo.

2, 3. Pathian ṭihna dik takah eng nge tel?

² Bible-a Pathian ṭih tih chu mize ṭha a ni a. (Isaia 11:⁠3) Hei hi Pathian zahna dik tak leh thûk tak, tih lungngaih duh lohna nasa tak a ni. (Sâm 115:11) Hei hian Pathian nungchang tehnate pawmna leh vawn tlatna te, leh thil dik leh dik lo a sawite mila nun duhnate a huam tel a. Chutiang ṭihna chuan “khawsa zia fing tak neihtîrtu leh thil ṭha lo apiangte pumpelhtîrtu Pathian lama rilru put hmang pawimawh tak,” a târ lang tih thuziak pakhat chuan a sawi. Pathian Thu chuan inâwm takin: “LALPA ṭih hi finna bul a ni,” tiin min hrilh a ni.​—⁠Thufingte 9:⁠10.

³ Dik takin, Pathian ṭihna chu mihringte  thiltih chi hrang hrang nên a inkûngkaih a. Hei hi finna nên chauh ni lovin, hlimna te, remna te, hausakna te, dam reina te, beiseina te, rinchhanna te, leh rin tlatna te nên pawh a inkûngkaih bawk. (Sâm 2:11; Thufingte 1:7; 10:27; 14:26; 22:4; 23:​17, 18; Tirhkohte 9:31) Tin, rinna leh hmangaihna nên pawh a inkûngkaih hnai hle. Dik takin, Pathian leh kan mihringpuite nêna kan inlaichînna pumhlûm a huam a ni. (Deuteronomy 10:12; Joba 6:14; Hebrai 11:⁠7) Pathian ṭihnaah chuan kan Pa vâna miin a mi mala min ngaihsakzia leh kan bawhchhiatnate ngaihdam a inpeihzia rinnghehna a tel a. (Sâm 130:⁠4) Sim duh lo mi suaksualte chauhvin Pathian râp nachhan tûr an nei a ni. *​—⁠Hebrai 10:​26-31.

Jehova Ṭih Dân Zir Rawh

4. ‘Jehova ṭih dân’ zir tûrin engin nge min ṭanpui thei?

⁴ Pathian ṭih chu thu tlûkna fing siam nân leh Pathian malsâwmnate dawn nâna thil pawimawh ber a nih avângin, engtin nge ‘Jehova ṭih dân’ dik tak chu kan zir theih ang? (Deuteronomy 17:19) Bible-ah hian Pathian ṭih mipa leh hmeichhia tam takte entîrna chu “keimahni min zirtîrna tûrin” chhinchhiah a ni a. (Rom 15:⁠4) Pathian ṭih tih awmze dik tak hre thiam tûra min ṭanpui tûr chuan, chu mi chungchânga entawn tûr zînga hmân lai Lal Davida nuna thilthleng chu ilo en ang u.

5. Davida chu berâm vênnain engtin nge Jehova ṭihna chungchâng a zirtîr?

⁵ Jehova chuan Israel lal hmasa ber Saula’n mipui a hlauh vâng leh Pathian ṭihna a tlâkchham avângin a hnâwl a. (1 Samuela 15:​24-26) Kawng leh lamah chuan, Davida nun kawng leh Jehova nêna inlaichînna hnai tak a neihna chuan ani chu Pathian ṭih mi a nih tak zetzia a târ lang thung. Davida chuan a naupan lai aṭangin a pa berâmte a vêng fo ṭhîn a. (1 Samuela 16:11) Zân arsi êng hnuaia berâm vênna chuan Jehova ṭihna hre thiam tûrin a ṭanpui a ni ngei ang. Lei leh vân zau tak chungchâng hre tlêm hle mah se, Pathianin kan zah leh nasa taka kan ngaihhlut a phu a ni tih thutâwp dik a siam thei a ni. “I vân, i kut chhuakte, thla leh arsi i ruathote khi, ka ngaihtuah châng chuan, ‘Mihring hi eng nge maw a niha, i hriat reng ṭhin ni? Mihring fapa pawh hi eng nge maw a niha, i kan ṭhin ni?’ ka ti ṭhîn,” tiin a hnuah chuan a ziak a ni.​—⁠Sâm 8:​3, 4.

6. Engtin nge Jehova ropuizia hriatthiamna chuan Davida chu a awmtîr?

⁶ Inâwm takin, Davida’n arsi awmna vân zauzia chu ama têtzia nên a han khaikhin hian, chu chuan a rilru a hneh hle a. Chu hriatna chuan tihhlauh ahnêkin, Jehova faka: “Vânte khian Pathian ropuizia chu a hriattîr a; boruak zau tak khian a kut chhuak chu a lantîr ṭhîn a,” tia sawi tûrin a chêttîr zâwk a ni. (Sâm 19:⁠1) He Pathian zahna hian Davida chu Jehova lam a hnaih zualtîrin, A kawng ṭha famkim zir leh zawh chu a duhtîr a ni. Davida’n Jehova hnêna: “Nang chu i ropui si a, thilmakte i ti bawk ṭhîn a: nangmah chauh hi Pathian i ni. Aw LALPA, i kawng chu mi entîr ang che; i thutakah ka awm ang: i hming ṭih tûrin thinlung sakhat mi puttîr ang che,” tia a zai laia a rilru awm dân tûr chu han ngaihtuah teh.​—⁠Sâm 86:​10, 11.

7. Engtin nge Pathian ṭihna chuan Davida chu Goliatha bei tûra a ṭanpui?

⁷ Philistia mite’n Israel ram an rûn khân, an mi chak feet kua leh a chanve laia sâng Goliatha chuan, a nihna takah chuan Israelte chu: ‘A mala min beitu tûr mi inthlang ta che u! A chak zâwk a nih chuan, inrawng kan bâwl ang,’ tia âuvin a cho va. (1 Samuela 17:​4-10) Saula leh a sipai zawng zawngte chu an thlabâr ta hle mai a​—⁠Davida erawh chu a thlabâr ve lo. Eng anga thiltithei pawh ni se, mihring ni lovin Jehova chauh hi ṭih tûr a ni tih a hria a ni. Davida chuan Goliatha chu: “Kei zawng sipaite LALPA . . . hmingin ka lo thawk zâwk a ni. . . . Tin, heta pungho zawng zawng hian LALPA chuan khandaih leh feiin a chhandam lo tih an hre thei ang a; indona chu LALPA indona a ni si a,” tiin a hrilh a. A virhvawm leh lung pakhat hmangin​—⁠leh Jehova ṭanpuina nên​—⁠Davida chuan mi hrawl chu a that ta a ni.​—⁠1 Samuela 17:​45-47.

8. Pathian ṭihna nei Bible entîrnate chuan eng nge min zirtîr?

⁸ Keini pawhin Davida hmachhawn aia hlauhawm nêp chuang lo harsatna emaw, hmêlma emaw kan tawng mai thei a. Eng nge kan tih  theih? Davida leh hmân laia mi rinawmte tih dân ang bawkin, Pathian ṭihna nei chungin kan hmachhawn ve thei a ni. Pathian ṭihna chuan mihring hlauhna chu a hneh thei a. Pathian chhiahhlawh rinawm Nehemia chuan hmêlmate nawrna hnuaia awm, a chipui Israelte chu heti hian a fuih a ni: ‘Anmahniho chu hlau hauh suh ula, Lalpa ropui tak leh hlauhawm tak mai chu hre reng . . . rawh u,’ tiin. (Nehemia 4:14) Davida te, Nehemia te, leh Pathian chhiahhlawh rinawm dang te chuan Jehova ṭanpuinain a pêk hnate chu an thawk zo thei a. Pathian ṭihna nên keini pawhin chutiang chuan kan thawk zo ve thei a ni.

Pathian Ṭihna Nên Harsatnate Hmachhawn Rawh

9. Eng dinhmun hnuaiah nge Davida chuan Pathian ṭihna a lantîr?

⁹ Davida’n Goliatha a thah hnuah Jehova chuan hnehna tam lehzual a pe a. Amaherawhchu, îtsîknaa khat Saula chuan Davida chu​—⁠atîr chuan alang apauvin, tichuan fing vervêk takin, leh a tâwpah sipaiho nên​—⁠thah a tum a ni. Jehova’n Davida chu lal a la nih tûr thu a hrilh chiang tawh nachungin, kum engemaw zât chu a tlânchhiat, ral a beih, leh Jehova’n lala a siam hun chu a nghah a ngai a. He mi hun chhûng zawng hian, Davida chuan Pathian a ṭih tih a lantîr a ni.​—⁠1 Samuela 18:​9, 11, 17; 24:⁠2.

10. Engtin nge Davida chuan hlauhawm a hmachhawn laiin Pathian ṭihna a lantîr?

¹⁰ Ṭum khat chu, Davida chuan Philistia khawpui Gath lal Akisa hnênah inhumhimna a zawng a. (1 Samuela 21:​10-15) Lal chhiahhlawhte chuan Davida chu an ram hmêlmaah an puh a. Chu dinhmun hlauhawm tak chu Davida’n engtin nge a chhân lêt? Jehova hnênah ṭawngṭaiin a thinlung a leihbua a ni. (Sâm 56:​1-4, 11-13) Chu hmun kalsan tûr chuan a intih ât der ngai mah se, Davida chuan Jehova chu a beihnate malsâwma chhan chhuaktu a ni tak zet tih a hria a. A rilru zawng zawnga Jehova chunga rinna a nghah tlatna leh a rin tlatna chuan Pathian ṭihtu dik tak a nihzia a târ lang a ni.​—⁠Sâm 34:​4-6, 9-11.

11. Engtin nge Davida angin Pathian ṭihna chu fiahna hnuaiah kan lantîr theih ang?

¹¹ Davida angin, kan harsatnate hmachhawn thei tûra Pathianin ṭanpui min tiam rin tlatna hmangin amah ṭihna kan lantîr thei a ni. Davida chuan: “I awm dân tûr chu LALPA chungah nghat la, amah chu ring la, aman a ti vek ang,” tiin a sawi. (Sâm 37:⁠5) Hei hi kan harsatnate chingfel tûra thil tihtheihte ti hauh si lo va, Jehova kuta dah nghâl ringawtin, leh amah chu kan tâna hma la tûrin kan beisei tihna a ni lo. Davida chuan Pathian ṭanpuina a dîl hnuah engmah tih nei lovin a awm mai lo. Jehova pêk a thahrui  leh finnate chu hmangin, a harsatnate chu a hmachhawn a ni. Mahse, Davida chuan mihringte beihna mai chuan hlawhtlinna a thlen thei lo tih a hria a. Chu chu kan hre ve tûr a ni. Kan theih ang apiang kan tih hnuah, a bâk zawng chu Jehova tihah kan dah thei a. Dik takin, Jehova hnêna innghah chauh mai lo chu tih theih kan nei mang meuh ṭhîn lo. Hei hi a mi mala Pathian ṭihna kan lantîr hun a ni. “LALPA thurûk chu amah ṭihtute hnênah a awm,” tia tih tak zeta Davida thusawi aṭang hian thlamuanna kan hmu thei a ni.​—⁠Sâm 25:⁠14.

12. Engvângin nge kan ṭawngṭainate chu kan ngaih pawimawh hle a ngaih a, eng ang rilru put hmang nge kan neih ngai hauh loh tûr chu?

¹² Chuvângin, kan ṭawngṭaina leh Pathian nêna kan inlaichînna chu kan ngai pawimawh hle tûr a ni. Jehova kan pan hian, “ani chu a awm tih leh zawngtute hnêna lâwmman pêk hmang a ni tih” kan ring tlat tûr a ni. (Hebrai 11:6; Jakoba 1:​5-8) Tin, tirhkoh Paula min zilh angin, Jehova’n min ṭanpui hian ‘lâwm nachâng kan hre’ tûr a ni. (Kolossa 3:​15, 17) Thiltawn ngah hriak thih Kristian pakhatin: “Pathian chu vâna awm tirhkah ang mai niin an ngai a. Thil engemaw an mamawh hunah, han kohva ngaihsak nghâl vat nih an duh a ni. An thil duh an han neih lah hian, Pathian chu kal bo tûrin an duh leh si,” tia a sawite ang hi kan ni ve ngai tûr a ni lo. Chutiang rilru put hmang chuan Pathian ṭihna tlâkchhamzia a lantîr a ni.

Pathian Ṭihna Tlâk Chham Hunah

13. Eng hunah nge Davida chuan Pathian Dân zah lohna a lantîr?

¹³ Davida’n mangan laia Jehova ṭanpuina a dawnna chuan Pathian a ṭihna chu a tithûk zual sauhvin leh Pathiana a rinna chu a tichak sauh va. (Sâm 31:​22-24) Amaherawhchu, langsâr takin ṭum thum lai Davida chuan Pathian ṭihna a tla chham a, chu chuan rahchhuah râpthlâk tak a  thlen a ni. A hmasa ber chu Jehova thuthlung bâwm chu Dânin a kawhhmuh anga Levia chite phurhtîr lo va, tawlailîra Jerusalema phur tûra ruahmanna a siam hi a ni. Tawlailîr khalhtu Uza chuan Thuthlung Bâwm chu vawn ngheh tuma a han chelh chuan “chu a thiltih dik loh” avâng chuan a thi ta nghâl a. Uza chuan nasa takin thil sual ti ngei mah se, a nihna takah chuan chu thil lungchhiatthlâk tak chu Davida’n Pathian Dân zahna dik tak a chhawmnun loh avânga lo thleng a ni. Pathian ṭih tih awmzia chu a ruahmanna anga thil tih hi a ni.​—⁠2 Samuela 6:​2-9; Number 4:​15; 7:⁠9.

14. Davida’n Israel mite a chhiarna chuan eng nge a rah chhuah?

¹⁴ A hnuah, Setana tirhin Davida’n Israel indo mite chu a chhiar a. (1 Chronicles 21:⁠1) Chutianga tihna hmangin, Davida chuan Pathian ṭihna tlâkchhamzia a lantîr a, chu chuan Israel mi 70,000 thihna a thlen hial a. Jehova hmaah a inlamlêt nachungin, amah leh a mite chuan nasa takin an tuar tho a ni.​—⁠2 Samuela 24:​1-16.

15. Engin nge Davida chu mipat hmeichhiatna hmanna sualah tlûk luhtîr?

¹⁵ Hun rei lo te chhûng atâna Pathian ṭihna a tlâkchhamna dang chuan Uria nupui Bat-sebi, mutpuina a thlen a. Davida chuan uirêna emaw, mi dangte kawppui îtna ringawt emaw pawh chu thil dik lo a ni tih a hria a. (Exodus 20:​14, 17) Chu buaina chu Davida’n Bat-sebi inbual lai a hmuhnain a inṭan a. Pathian ṭihna dik tak chuan Davida chu a mit la sawn vat tûr leh a ngaihtuahna la pêng vat tûrin a chêttîr tûr hi a ni naa le. Chu aiin, Davida chuan a duhnain Pathian ṭihna a hneh hma loh chuan a ‘melh tlat reng’ niin a lang. (Matthaia 5:28; 2 Samuela 11:​1-4) A nun kawng tin rênga Jehova telna chu a hre chang tawh meuh lo a ni.​—⁠Sâm 139:​1-7.

16. Davida’n a thil sual tih avângin eng rahchhuah nge a tawrh?

¹⁶ Davida leh Bat-sebi mipat hmeichhiatna hmanna chuan fapa a piantîr a. A hnu rei lo têah, Jehova chuan Davida sual hai lang tûrin a zâwlnei Nathana a tîr a. Davida chuan rilru pângngai nei kîr lehin, Pathian ṭihna a nei leh a, a inlamlêt bawk a ni. Jehova chu a lak ata A thlarau thianghlim la bo lo tûrin a ngên a. (Sâm 51:​7, 11) Jehova chuan Davida chu a ngaidam a, a hremna chu a tihnêpsak ta bawk a; mahse, a thil sual tihna rahchhuah lungchhiatthlâk zawng zawngte lakah Pathian chuan a hum chuang lo. Davida fapa chu a thi a, chu mi ni aṭang chuan lungngaihna leh chhiatna nasa takin a chhûngkua chu a tuam vêl ta reng a ni. Pathian ṭihna tlâkchhamna man chu a va han to tak êm!​—⁠2 Samuela 12:​10-14; 13:​10-14; 15:⁠14.

17. Thil sual tihnain lungngaihna a rah chhuah chu sawifiah rawh.

¹⁷ Tûn laiah pawh chutiang bawkin nungchang lama Pathian ṭihna tlâk chhamna chuan rah chhuah râpthlâk tak leh daih rei tak chu a thlen thei a. Nupui la ṭha lai tak chuan a Kristian pasal, ram danga hna thawkin a rinawm lohsan thu a han hriata a tawrhna chu han ngaihtuah teh. A thin ṭhâwnna leh a tawrhna avâng chuan kûn chunga a hmai hupin, a mittui a tla zawih zawih a. A pasalin a nupui rinngamna leh a zahna nei lêt leh tûr chuan engtianga rei nge ngai ang le? Chûng rah chhuah lungngaihthlâk takte chu Pathian ṭih tak zetna hmangin a pumpelh theih a ni.​—⁠1 Korinth 6:⁠18.

Pathian Ṭihna Chuan Sual Min Pumpelhtîr

18. Eng nge Setana thiltum leh a tih dân phung chu?

¹⁸ Setana chuan khawvêl nungchang ṭha hlutna a tihniam chak hle a, a bîk takin Kristian dikte tihkhaw loh chu a duh hle a ni. Chu mi ti tûr chuan, kan thil hriat theihna, a bîk takin kan mit leh kan beng kal tlangin kawng hnai ber kan thinlung leh rilru chu a hmang a ni. (Ephesi 4:​17-19) Engtin nge zahmawh lem te, thu zahmawh te beisei lo taka i hmuh hunah emaw, chutiang mite i tawn thut hunah emaw chuan i chhan lêt ang?

19. Engtin nge Pathian ṭihna chuan Kristian pakhat chu thlêmna hneh tûra a ṭanpui?

 ¹⁹ Europe rama Kristian upa, fa nei leh doctor ni bawk André-a * chungchâng hi ngaihtuah teh. André-a chu zan khuaa damdawi ina a thawh chângin, a thawhpui hmeichhiate chuan mutpui tûra sâwmna lehkha chu a lukhamah an lo târ ṭhîn a. André-a chuan nghet takin an nungchang bawlhhlawhnate chu a hnial ṭhak a ni. Chu bâkah, chutiang boruak bawlhhlawh tak ata inla hrang tûr chuan hmun dangah hna a zawng hmu a. Pathian ṭihna chu thil finthlâk leh malsâwmna a nihzia a lang chiang hle, tûnah hian André-a chuan a awmna rama Jehova Thuhretute branch office-ah hunbi neiin hna a thawk mêk a ni.

20, 21. (a) Engtin nge Pathian ṭihna chuan sual min pumpelhtîr theih? (b) Eng nge a dawta thuziakah ngaihtuah ho ni dâwn?

²⁰ Thil dik lo ngaihtuah rengna chuan, miin ti tûra phalna a neih rêng rêng loh thil engemaw tih nâna Jehova nêna an inlaichînna hlu tak paih bo duhna rilru a neihtîr thei a ni. (Jakoba 1:​14, 15) Kawng leh lamah, Jehova kan ṭih chuan kan nungchang vên ṭhatsa min tihhniamtîr thei mihring te, hmun te, thiltih te, leh intihhlimna te lakah chuan kan inthiar fihlîmin, kan kal bosan hial ang. (Thufingte 22:⁠3) Thil zahthlâk tak emaw, inpêk ngai emaw pawh ni se, Pathian lawm hlawh lohna nêna khaikhin chuan chu chu thil tê tham tak a ni. (Matthaia 5:​29, 30) Pathian ṭihna chuan “thil engmah lo mai mai en” lohna leh hurna lam thil leh zahmawh lam thil engang chi pawh laka duhrêng vânga inpho chhuah loh chu a huam tel chiang hle a ni. Chutianga kan tih chuan, Jehova’n ‘min tihharh,’ a nih loh leh kan nunna a zuah a, kan mamawh apiang min pêk chu kan ring tlat thei a ni.​—⁠Sâm 84:⁠11; 119:⁠37.

²¹ Pathian ṭihna dik tak nêna thiltih chu finna kawng a ni fo ṭhîn. Hlimna dik neihna hnâr pawh a ni bawk. (Sâm 34:⁠9) Hei hi a dawta thuziakah chiang taka târ lan a ni ang. (w06 8/1)

[Footnote-te]

I Hrilhfiah Thei Em?

• Eng Kristian miziate nge Pathian ṭihnaah chuan tel?

• Engtin nge Pathian ṭihna chuan mihring hlauhna chu a do?

• Ṭawngṭaina thlîr dân dik kan nei tih engtin nge kan lantîr theih?

• Engtin nge Pathian ṭihna chuan thil sual tih min pumpelhtîr theih?

[Zirlai Atâna Zawhnate]

[Phêk 23-naa milem]

Jehova kutchhuak a thlîrna aṭangin Davida chuan Pathian ṭih a zir

[Phêk 24-naa milemte]

Beisei loh taka thlêmna i tawn thutin engtin nge hma i lâk ang?