Jehova Chuan Hrehawm Tuarte A Chhan Chhuak

“Mi fel hrehawmnate chu a tam a, nimahsela LALPAN chûng zawng zawngah chuan a chhan chhuak ṭhîn.”​—⁠SAM 34:⁠19.

1, 2. Eng harsatna nge Kristian mi rinawm pakhat chuan a hmachhawn a, engvângin nge chutiang bawk chu kan hmachhawn ve mai theih?

NULA Keiko-i * chu kum 20 chuang Jehova Thuhretute zînga mi a ni tawh a. Engemaw chhûng chu regular pioneer, a nih loh leh hunbi kima Lalram puangchhuaktu niin rawng a bâwl bawk. Chu chanvo chu a hlut tak zet a ni. Amaherawhchu, tûn hnai mai khân beisei bona leh khawharna chuan a tlâk buak a. “Ka tih theih awmchhun chu ṭah a ni ringawt mai,” tiin a sawi. A lungngaihna tireh tûrin, Keiko-i chuan mahnia Pathian thu zir nân hun tam lehzual a hmang a. “Mahse, ka ngaihtuahna chu ka thlâkthleng thei chuang lo. Ka lungngaih êm avângin thih ka duh hial a ni,” a ti.

² Chutiang chi beidawnna chu i hmachhawn ve tawh ngai em? Jehova Thuhretute zînga pakhat i nih angin, Pathian ngaihsakna chuan “nunna tûna awm sa leh la awm leh tûr pêk tiamna a neih avângin,” lâwm nachhan tûr tam tak i nei a ni. (1 Timothea 4:⁠8) Tûnah hian thlarau lam paradis-ah i chêng mêk a! Amaherawhchu, chu chu hrehawmna engkim ata vênhim i ni tihna a ni em? A ni hauh lo! Bible chuan: “Mi fel hrehawmnate chu a tam a,” a ti. (Sâm 34:19) ‘Khawvêl pumhlûm hi mi sual [Diabol-Setana] thu thua a awm’ avângin hei hi thil mak a ni lo. (1 Johana 5:⁠19) Chu chu kan vaiin kawng engemaw takin kan tuar ṭheuh a ni.​—⁠Ephesi 6:⁠12.

Hrehawmna Rah Chhuah

3. Pathian chhiahhlawh lungngaihna nasa tak tuar Bible entîrnate pe rawh.

³ Hun rei tak chhûng lungngaihna chuan kan thil thlîr dân zawng zawng chu a tithim ṭhak thei a. (Thufingte 15:15) Mi dik Joba chungchâng hi ngaihtuah teh. Hrehawm râpthlâk tak a tawrh laiin Joba chuan: “Hmeichhe hrin tawh mihring phawt chu rei lo tê dam, buainaa khat a ni,” tiin a sawi a. (Joba 14:⁠1) Joba hlimna chu a thâmral ta. Hun engemawti chhûng chu, Jehova’n a kalsan niah a inngai hial a. (Joba 29:​1-5) Joba hi manganna nasa tak tuar Pathian chhiahhlawh awmchhun a ni lo. Bible chuan Hani chu fa a neih theih loh avângin “a rilru a mangang êm êm” tih min hrilh a. (1 Samuela 1:​9-11) An chhûngkaw dinhmunin a tihhrehawm êm avângin, Rebeki chuan: “Nun hi ka ning êm mai,” a ti hial a ni. (Genesis 27:⁠46) Davida chuan a thiltih sualte a ngaihtuahin: “Nilêngin lungngaiin ka vân ruai ṭhîn,” tiin a sawi a. (Sâm 38:⁠6) Hêng entîrna ṭhenkhat hian, Kristian hun hma lama Pathian ṭih mipa leh hmeichhiate’n lungngaihna nasa tak an tuar tih chiang takin a târ lang a ni.

4. Engvângin nge tûn lai Kristiante zînga “lungngaite” an awm chu thil mak a nih loh?

 ⁴ Kristiante chungchâng hi eng nge ni ve le? Tirhkoh Paula chuan Thessalonika khuaa mite chu lungngaite, a nih loh leh “rilru tête chu fuih” tûrin hrilh an ngai tih a hria a. (1 Thessalonika 5:14) Lehkhabu pakhat chuan Grik thu mal “rilru tête” tiha lehlin hian “nuna lungngaihna avânga rei lo te chhûng mangangte” a kâwk thei tih a sawi. Paula thute chuan Thessalonika kohhrana thlarauva hriak thih ṭhenkhat chu an lunghnual tih a târ lang a ni. Tûn lai Kristiante zîngah pawh lungngai an awm a. Mahse, engvângin nge an lungngaih? A awmtîrtu tlângpui thil pathum chu ilo ngaihtuah ang u.

Kan Ṭhat Famkim Lohna Chuan Min Tilungngai Thei

5, 6. Rom 7:​22-25 aṭangin eng thlamuanna nge kan hmuh theih?

⁵ ‘Inhriat chhuah theihna rêng rêng nei tawh lo’ mi ṭha lote ang lo takin, Kristian dikte chu an ṭhat famkim lohna chuan a tihrehawm hle a. (Ephesi 4:⁠19) “Ka rilru tak takin Pathian dân chungah ka lâwm si ṭhîn a; nimahsela ka taksa pêngahte hian dân danglam a awm tih ka hria, chu chuan ka rilru dân a do va, ka taksa pêngtea sualna dân awm hnênah chuan salah mi hruai ṭhîn a,” tia ziaktu Paula angin kan inhre ve mai thei a. Tin, Paula chu: “Mi rethei ka va ni tehlul êm!” tiin a rûm hial a ni.​—⁠Rom 7:​22-24.

⁶ Paula anga inhriat châng i nei ve ngai em? Mahni ṭhat famkim lohna hriat chian chu thil dik lo a ni lo, chu chuan sualna a pawithuizia a hriattîr chein, thil ṭha lo pumpelh i tumna chu a tihchak theih avângin. Mahse, i tlin lohna avânga i lungngaih reng chu a ṭûl kher lo. Paula’n a lungngaihna a sawi chhuah kan târ lan zawh chiah chu: “Isua Krista kan Lalpa avângin Pathian hnênah lâwmthu ka sawi a ni,” tiin a sawi belh a ni. (Rom 7:25) Ni e, Paula chuan a rochun sual lak ata Isua thisen chhuakin a tlan thei tih a ringnghet tlat a ni.​—⁠Rom 5:⁠18.

7. Engin nge mi chu sual lam a ngaihtuahna avânga lungngai lo tûrin ṭanpui thei?

⁷ I pianpui sual avânga i lungngai a nih chuan, tirhkoh Johana thuziak: “Tupawhin thil a tihsual chuan Pa hnêna mi sawipuitu, Isua Krista mi fel chu kan nei e; ani chu kan sualte thupha chawina a ni; keimahni sual chauh ni lovin, khawvêl zawng zawng sual thupha chawina pawh a ni,” tih chu i thlamuanpui thei a ni. (1 Johana 2:​1, 2) Sual lam ngaihtuahna avânga i lungngai a nih chuan, Isua chu mi ṭha famkimte tân ni lovin, mi sualte tân a thi tih chu hre reng rawh. A nihna takah chuan, “mi zawng zawngin thil an tisual tawh vek a, Pathian ropuina an chang zo ta lo a ni.”​​—⁠Rom 3:⁠23.

8, 9. Engvângin nge mahni thiam loh inchantîrna chu kan hnâwl ang?

⁸ Amaherawhchu, tûn hmain sual khûnkhân tak lo ti ni ta la. Rinhlelh rual lohvin, ṭawngṭaiin Jehova hnênah chu mi chungchâng chu i thlen fo tawh pawh a ni thei. Kristian upate hnên aṭanga thlarau lam ṭanpuina chu i dawng tawh bawk a. (Jakoba 5:​14, 15) I inchhîr tak zet avângin kohhran chhûngah i la awm a. A nih loh leh hun engemaw chen Pathian inawpna pâwl i chhuahsan a; mahse, a hnuah i inchhîrin, dinhmun thianghlim chu i nei leh a ni. Dinhmun chu a engemaw ber pawh lo ni ta se, tûn hmaa i sualna hriat chhuah leh ṭhinna chuan a tilungngai mai thei che a. Chutiang a nih chuan, Jehova chuan inchhîr tak zette chu “a ngaidam nasa” tih hre reng rawh. (Isaia 55:⁠7) Chu bâkah, beisei bo tak anga i inngaih chu a duh lo. Chu chu Setana duhzâwng tak a ni. (2 Korinth 2:​7, 10, 11) Diabola chu a phu ang ngeia tihboral a ni dâwn a; mahse, ani chuan nang pawhin chutiang bawk tihboralna phu anga i inngaih chu a duh a ni. (Thu Puan 20:10) I rinna tichhe tûra Setana thiltum hi hlawhtlintîr phal ngai suh ang che. (Ephesi 6:⁠11) Kawng danga i tih ang thovin, he mi chungchângah pawh hian “amah chu do” tlat zâwk rawh.​—⁠1 Petera 5:⁠9.

⁹ Thu Puan 12:​10-ah chuan Setana chu Kristian hriak thih “kan unaute hêktu” tia koh a ni a. Anni chu Pathian hmaah ‘achhûn azânin a hêk’ a ni. He Bible châng ngaihtuahna hian, Jehova’n thiam loh a chantîr lo che chung pawha mahni thiam loh i inchantîr chuan, dik lo taka hêktu Setana chu a lâwm hle dâwn tih hmu thiam tûrin a ṭanpui ang che. (1 Johana 3:​19-22) Engvângin nge tlâwm duh hial khawpa i tlin lohna chu i tawrh reng ang? Pathian nêna in inlaichînna chu  Setana tihchhiattîr suh. Jehova chu ‘lainatnaa khat, mi khawngaih thei tak, thin nel tak, ngilneihna ngah’ a ni tih chu Setana’n hmuhhmaihtîr che suh se.​—⁠Exodus 34:⁠6.

Kan Tlin Lohnain Min Tilunghnual Thei

10. Eng kawngin nge tlin lohna kan neihte chuan min tihlunghnual theih?

¹⁰ Kristian ṭhenkhat chu an tlin lohnain Pathian rawng an bâwlna a nghawng avângin an lunghnual a. Chu chu nangmahah a dik em? Natna khirh tak te, tarna te, a nih loh leh dinhmun dang te chuan tûn hmaa ilo tih angin rawngbâwlnaa hun tam tak a pêktîr thei lo che pawh a ni thei a. Kristiante chu Pathian rawngbâwl nâna hun lei tûra fuih kan ni ngei mai. (Ephesi 5:​15, 16) Mahse, i tlin lohna chuan rawngbâwlnaa i thawh tam lehzual theihna chu a dâl tak zet che a, chu chuan a tilunghnual che a nih chuan engtin nge ni ang?

11. Galatia 6:​4-a chhinchhiah Paula fuihna thu chu engtin nge kan hlâwkpui theih?

¹¹ Bible chuan thatchhe lo tûr leh “rinna leh nghah peihna vânga thutiamte rochung tawhte zirho” zâwk tûrin min fuih a ni. (Hebrai 6:⁠12) An entîrna ṭhate kan bihchian a, an rinnate entawn kan tum chauhvin hei hi kan ti thei a ni. Amaherawhchu, mi dangte nêna ṭha lo zâwnga kan inkhaikhin a, kan thiltih chu ṭha tâwk lo anga kan ngaih chuan kan ṭangkaipui lo vang. Chuvâng chuan Paula fuihna thu: “Mi tinin mahni thiltih fiah ṭheuh zâwk rawh se, chu mi hunah chuan mi dang chung ni lovin, mahni chung chauhvah chhuan tûr a nei ang,” tih hi kan nunpui tûr a ni.​—⁠Galatia 6:⁠4.

12. Jehova rawng kan bâwlnaah engvângin nge kan hlim theih?

¹² Kristiante chuan natna khirh tak avânga tlin lohna an nei a nih pawhin, hlimna tûr chhan ṭha tak an nei a ni. Bible chuan: “In hnathawh leh a hming chunga hmangaihna in lantîr . . . chu theihnghilh tûrin Pathian chu mi fel lo a ni si lo va,” tiin min tiam si a. (Hebrai 6:⁠10) I thunun theih piah lam dinhmunte chuan tûn hmaa Jehova rawngbâwlnaa ilo thawh tawhte anga thawh chu a tiharsa pawh a ni thei a. Amaherawhchu, Jehova ṭanpuina nên telephone-a thu hrilhna leh lehkha thawna thu hrilhna ang chi Kristian rawngbâwlna kawng ṭhenkhatah chuan i tel tam lehzual thei a. Pathian Jehova chuan thinlung zawng zawnga i rawngbâwlna leh amah leh i mihringpuite chunga hmangaihna i lantîrna chu mal a sâwm dâwn tih i chiang thei a ni.​—⁠Matthaia 22:​35-40.

“Hun Khirh Takte” Chuan Min Tilungngai Thei

13, 14. (a) Eng kawngtein nge hêng “hun khirh takte” hian hrehawmna min siam mai theih? (b) Engtin nge tûn laiah hmangaihna pianpui neih lohna chu a lan chhuah?

¹³ Pathian felna khawvêl thara nun chu nghâkhlel hle mah ila, tûnah hian “hun khirh takte” kârah kan awm mêk a. (2 Timothea 3:⁠1) Manganna lo thlengte chuan kan tân chhan chhuahna a hnaihzia a târ lang tih kan hriat avângin thlamuanna kan nei a ni. Mahse, min hual vêltu dinhmunte avângin hrehawm kan tuar a. Entîr nân, hna thawh tûr nei lo ni ta la engtin nge ni ang? Hna hmuh tûr a vâng thei a, thlate a liam zêl hian i dinhmun khirh tak chu Jehova’n a hmuh leh hmuh loh emaw, i ṭawngṭaina a hriat leh hriat loh emaw chu i ringhlel pawh a ni thei. A nih loh leh inthliar hranna tuartu emaw, kawng danga rorêl dik lohna ṭhenkhat tuartu emaw i ni thei a. Mi fel Lota, amah hual vêltute nungchang chhiatna avânga “lungngai êm êma” angin, chanchinbu thupuite i chhiarna chuan a tilungngai ve mai thei bawk che a ni.​—⁠2 Petera 2:⁠7.

¹⁴ Ni hnuhnûng hmêlhmang pakhat kan ngaihthah theih hauh loh tûr a awm a. Bible chuan mi tam takin “hmangaihna pianpui [an] nei lo” vang tih a sawi lâwk a ni. (2 Timothea 3:⁠3) Chhûngkaw tam tak chuan hmangaihna nasa takin a tlachham a. In chhûngkhura tharum thawhna chungchâng ziakna Family Violence tih lehkhabu chuan “mite chuan mi dangte kut tawrh aiin, mahni chhûngkuaa mi ngeite thah, kut thlâk, a nih loh leh rilru lam emaw, mipat hmeichhiatna lam emawa tihchingpen an tuar zâwk dâwn tih thilthleng chuan a hril a. Mite’n hmangaih leh him nia an inhriatna tûr hmun chu, puitling leh naupang ṭhenkhat tân chuan hmun azawnga hlauhawm ber a ni,” tih a sawi lang. In chhûng boruak ṭha lova chêngte chuan  a hnuah lungngaihna leh beidawnna an tawng duh deuh bîk a. Chutiang thil chu i chunga thleng ni ta se engtin nge ni ang?

15. Engtin nge Jehova hmangaihna chu mihring tute hmangaihna ai pawha a chungnun?

¹⁵ Fakna hla phuahtu Davida chu: “Ka nu leh ka pa chuan mi kalsan ta si a, nimahsela LALPA chuan mi la pawm ang,” tiin a zai a. (Sâm 27:10) Jehova hmangaihna chu mihring nu leh pa tupawh hmangaihna aiin a nasa zâwk tih hriat chu a va thlamuanthlâk tak êm! Nu leh pate hnâwl, tihretheih, a nih loh leh ngaihthah nih chu hrehawm hle mah se, chu chuan Jehova ngaihsakna che chu a thunun thei lo. (Rom 8:​38, 39) Pathianin a hmangaihte chu a lamah a hîp tih hre reng rawh. (Johana 3:16; 6:44) Mihringte chuan eng ang pawhin cheibâwl che mah se, vâna i Pain a hmangaih che asin!

Lunghnualna Tiveng Tûra Hma Lâkna Ṭangkaite

16, 17. Lunghnualna a hmachhawn hunah, miin thlarau lam chakna nei tûrin eng nge a tih theih?

¹⁶ Lunghnualna hmachhawn tûrin hma lâkna ṭangkai takte chu i nei thei a. Entîr nân, Kristian thiltih ṭhaah inhmang la. A bîk takin i lungngaihna chu nasa lutuka a lan hunah, Pathian Thu chu ngun takin chhût rawh. Fakna hla phuahtu chu: “‘Ka ke a tleu ve,’ ka tih khân, Aw LALPA, i ngilneihna chuan mi kai a. Ka rilrua ngaihtuah tam tak ka neih lai chuan i thlamuannate chuan ka nunna hi a tihlim thîn,” tiin a zai a ni. (Sâm 94:​18, 19) Bible chhiar ziahna chuan i rilru chu hnemna thute leh mi tichak thei ngaihtuahnatea tikhat tûrin a ṭanpui ang che.

¹⁷ Ṭawngṭai a pawimawh bawk. I rilru chhûngrila awm i sawi chhuah theih loh hunah pawh Jehova chuan i sawi tum chu a hria a. (Rom 8:​26, 27) Fakna hla phuahtu chuan: “I rit phurh chu LALPA chungah nghat la, tichuan anin a tichak ang che; mi fel chu engtikah mah tihnghîn a phal lo vang,” tiin he tiamkamna hi a pe a ni.​—⁠Sâm 55:⁠22.

18. Lungngaihna nei chuan eng hma lâkna ṭangkai takte nge a neih theih?

¹⁸ Ṭhenkhat chuan enkawl ngai khawp lungngaihna nasa tak (clinical depression) avângin beidawnna an tawng a. * He natna hi i tuar a nih chuan, Pathian khawvêl thar leh ‘chu mi khuaa awmte chuan “ka dam lo ve,” an tih tawh loh’ hun ngaihsakna chuan i ngaihtuahna lâk pên tum rawh. (Isaia 33:⁠24) I lungngaihna chu a châng chânga i neih ṭhin aia nasa anga a lan chuan, mi thiam râwn chu a finthlâk ang. (Matthaia 9:12) Taksa lama i inenkawl ṭhat pawh a pawimawh bawk a. Ei leh in ṭha, leh insâwizawina ṭhenkhat chu a ṭangkai mai thei a ni. I mamawh tâwkin châwl hahdam rawh. TV enin zan  rei tak thleng meng lo la, i taksa leh rilru lam tichau thei intihhlimna chu pumpelh rawh. A pawimawh berah chuan, Pathian tilâwm thei rawngbâwlnaah inhmang zêl rawh! Jehova’n ‘mittui zawng zawng a hrûkfai’ hun chu lo la thleng rih lo mah se, tuar chhuak thei tûrin a ṭanpui ang che.​—⁠Thu Puan 21:4; 1 Korinth 10:⁠13.

“Pathian Kut Chak Tak Hnuaiah Chuan” Awmin

19. Jehova’n hrehawm tuarte hnênah eng nge a tiam?

¹⁹ Mi fel hrehawmnate chu tam mah se, Bible chuan “LALPAN chûng zawng zawngah chuan a chhan chhuak ṭhîn” tih min tiam a ni. (Sâm 34:19) Engtin nge chu chu Pathianin a tih? Tirhkoh Paula’n a ‘tisaa hlîng’ laka chhâwk zângkhai tûra a ṭawngṭai leh ṭhin khân, Jehova chuan: “Ka thiltihtheihna hi chak lohnaah asin tihfamkimin a awm ni,” tiin a hrilh a ni. (2 Korinth 12:​7-9) Jehova’n Paula hnênah eng nge a tiam a, i hnênah eng nge a tiam? Tûn la laa tihdam nghâlna ni lovin, tuar chhuak thei tûra chakna a tiam zâwk a ni.

20. Harsatna tâwk mah ila, 1 Petera 5:​6, 7 hian eng nge min tiam?

²⁰ Tirhkoh Petera chuan: “A hun têah chuan a chawimawi theihna tûr che uin Pathian kut chak tak hnuaiah chuan intihnuai ula, anin a ngaihsak thin che u avângin in manganna zawng zawng ama chungah nghat vek rawh u,” tiin a ziak a ni. (1 Petera 5:​6, 7) Jehova’n a ngaihsak che avângin, a thlahthlam lo vang che. Harsatna i tâwk chung pawhin a ṭanpui ang che. Kristian rinawmte chu “Pathian kut chak tak hnuaiah” an awm tih i rilruah vawng tlat rawh. A rawng kan bâwl hian, Jehova chuan tuar thei tûrin chakna min pe a ni. Amaha kan rinawm phawt chuan, engmahin thlarau lam chhiat hlenna min thlen thei lo. Chuvângin, a thutiam khawvêl thara chatuana nunna nei tûr leh hrehawm tuarte a chhan chhuah hlen hun hmu tûrin, Jehova laka kan rinawmna chu i vawng tlat ang u! (w06 7/15)

[Footnote-te]

I Hre Chhuak Em?

• Engvângin nge hrehawmna chuan Jehova chhiahhlawhte pawh a nghawng?

• Pathian mi ṭhenkhatte tilunghnualtu thil ṭhenkhat chu eng nge ni?

• Engtin nge kan lungkhamna hmachhawn tûra Jehova’n min ṭanpui?

• Eng kawngin nge “Pathian kut chak tak hnuaiah chuan” kan awm?

[Zirlai Atâna Zawhnate]

[Phêk 17-naa milemte]

Jehova mite chuan harsatna tâwk mah se, hlim chhan tûr an nei

[Phêk 20-naa milem]

Telephone-a thu hrilhna chu thinlung zawng zawnga Jehova rawng i bâwl theihna kawng khat a ni