Jehova Inawpna Pâwl Ṭhatna Chu Ngaihtuah Rawh
Jehova Inawpna Pâwl Ṭhatna Chu Ngaihtuah Rawh
“I in ṭhatna chuan kan tlai ang.”—SAM 65:4.
1, 2. (a) Biak in nêna inkûngkaih ruahmannate chuan Pathian mite chungah eng nghawng nge a neih dâwn? (b) Davida’n biak in sak nân eng ṭanpuinate nge a pêk?
HMAN lai Israel mi Davida chu Hebrai Pathian Lehkha Thu-a sawi mi challang berte zînga mi a ni a. Chu berâm vêngtu, rimawi tum thiam tak, zâwlnei, leh lal ni bawk si chuan Pathian Jehova chu a rinchhan pumhlûm ṭhak a ni. Jehova nêna inlaichînna hnai tak a neihna chuan Davida chu Pathian tâna in sak duhna a neihtîr a. Chutiang in, a nih loh leh biak in chu Israelte tâna biakna dik hmunpuiah a chang dâwn a ni. Biak in nêna inkûngkaih ruahmannate chuan Pathian mite chungah hlimna leh hlâwkna a thlen dâwn tih Davida chuan a hria a. Chuvângin: “Mi, i biak in hung chhûng kawtlaiahte awm thei tûra i [Jehova] thlana, i kiang i pantîra chu a eng a thâwl e: i in ṭhatna chuan kan tlai ang, i biak in hmun thianghlim ṭhatna chuan,” tiin a zai a ni.—Sâm 65:4.
2 Davida’n Jehova in a sak chu phal a ni lo va. Chu chanvo ṭha bîk tak chu a fapa Solomona tâna zuahsak a ni zâwk a ni. Davida chu a neih châk êm êm chanvo mi dang hnêna pêk a nih pawhin a phunnawi lo. A tâna thil pawimawh ber chu biak in sak a ni tûr hi a ni. Jehova hnên aṭanga a dawn biak in sak dân tûr riruang chu Solomona hnêna hrilhna hmangin, chu in sakna chu thinlung zawng zawngin a thlâwp a. Chu bâkah, Davida chuan Levia mi sâng têlte chu rawngbâwl tûra ṭhen hrangin, biak in sak nân rangkachak leh tangkaraw tam tham tak a pe bawk a ni.—1 Chronicles 17:1, 4, 11, 12; 23:3-6; 28:11, 12; 29:1-5.
3. Pathian chhiahhlawhte’n biakna dik atâna ruahmanna siamte chungah eng rilru put hmang nge an neih?
3 Israel mi rinawmte chuan Pathian ina biakna dik atâna ruahmanna siamte chu an thlâwp a. Tûn laia Jehova chhiahhlawhte kan nih angin, keini pawhin Jehova lei lam inawpna pâwla biakna atâna ruahmanna siamte chu kan thlâwp ve a ni. Chutiang chuan Davida neih ang rilru put hmang kan neihzia kan târ lang a ni. Sawisêl duhna rilru kan pu lo. Pathian inawpna pâwl ṭhatna chu kan ngaihsak zâwk mah a ni. Nasa taka kan lâwmna tûr thil ṭha tam takte chu i ngaihtuah ngai em? Chûng zînga ṭhenkhat chu ilo ngaihtuah ang u.
Hmahruaitute Chungah Lâwm Rawh
4, 5. (a) Engtin nge ‘bâwih rinawm leh fing’ chuan a hna chu a hlen? (b) Thuhretu ṭhenkhatte’n thlarau lam chaw an dawn chu engtin nge an ngaih?
4 Isua’n leia a thil neihte enkawl tûra a ruat ‘bâwih rinawm leh fing’ chungah lâwm nachhan tûr ṭha tak kan nei a. Thlarauva hriak thih Kristian bâwih pâwl chuan chanchin ṭha hrilhnaah te, biakna atâna inkhâwmna buatsaihnaah te, leh ṭawng 400 chuanga Bible ṭanchhan thu leh hla tihchhuahnaah te hma a hruai a ni. Lei pumpuia mi maktaduai têlte chuan he “a hun apianga” thlarau lam chaw hi lâwm takin an kîl a ni. (Matthaia 24:45-47) He mi chungchângah hian phunnawi chhan tûr a awm lo chiang hle.
5 Jehova Thuhretu pitar Elfi-i chuan bâwih pâwl chhuah thu leh hlaa Bible zilhnate a nunpuina avângin kum tam tak chhûng chu thlamuanna leh ṭanpuina a tawng tawh a. Lâwmna nasa tak chuan Elfi-i chu: “Jehova inawpna pâwl tel lovin eng nge ka tih theih tehlul ang?” tia ziak tûrin a chêttîr a ni. Peter-a leh Irmgard-i te nupa pawh kum sâwm têl Pathian chhiahhlawh an ni tawh a. Irmgard-i chuan “Jehova inawpna pâwl mi hmangaih leh ngaihsak tak” chhuah thu leh hla zawng zawng avânga a lâwm thu chu a sawi chhuak a ni. Hêng thu leh hlaahte hian mitdel leh bengchhêtte ang chi, mamawh zual bîk neite tâna buatsaih pawh a tel a ni.
6, 7. (a) Engtin nge lei pum puia kohhrante thiltih chu enkawl a nih? (b) Jehova inawpna pâwl lei lam pêng chungchângah eng nge sawi a nih?
6 Jehova Thuhretute Governing Body chuan ‘bâwih rinawm’ ai chu a awh a, chu hriak thih pâwl tê tak tê chuan khawvêl puma Jehova Thuhretute hmunpui Brooklyn, New York-ah rawng a bâwl a ni. Governing Body chuan lei pum pui-a kohhran 98,000 chuangte thiltih enkawl tûrin Jehova chhiahhlawh thiltawn ngahte chu branch office-tea rawngbâwl tûrin a ruat a. Hêng kohhranahte hian Bible-a thil phût tlintute chu upa leh kohhranho rawngbâwltu angin ruat an ni. (1 Timothea 3:1-9, 12, 13) Upate chuan hma an hruaiin, Pathian berâmte chu hmangaih takin an enkawl a. Chu berâm rual zînga mi nih leh “unauhote” zînga awm lungrualna leh hmangaihna dawngtu nih chu malsâwmna a va ni tak êm!—1 Petera 2:17; 5:2, 3.
7 Mite chuan sawisêl a hnêkin, upate hnên aṭanga an dawn thlarau lam kaihhruaina duhawm tak avânga an lâwmzia chu an sawi fo zâwk a ni. Entîr nân, kum 30 chho bâwr vêl mi Kristian nupui Birgit-i chungchâng hi han ngaihtuah teh. Tleirâwl a nih laiin, ṭhian sual kâwmin thil sual tihnaah a tlu lût ṭhelh a. Mahse, upate hnên aṭanga Bible zilhna chiang tak leh rinpuite ṭanpuina chuan dinhmun hlauhawm thei tûr lak ata a chhan chhuak a ni. Tûnah Birgit-i chuan engtin nge a ngaih? Ani chuan: “Jehova inawpna pâwl ropui taka ka la awm reng hi ka lâwm tak zet a ni,” a ti. Kum 17 mi Andreas-a chuan: “Hei hi Jehova inawpna pâwl, khawvêla inawpna pâwl azawnga ṭha ber chu a ni tak zet a ni,” a ti bawk. Jehova inawpna pâwl lei lam pêng ṭhatnate avâng hian kan lâwm tûr a ni lâwm ni?
Hmahruaitute Pawh Mi Ṭha Famkim An Ni Lo
8, 9. Davida dam rualpui ṭhenkhat chuan engtin nge thil an tih a, chûngte chu engtin nge Davida’n a chhân lêt?
8 Biakna dika hmahruai tûra ruatte chu mi ṭha famkim lo an ni ngei mai a. An vaiin thil an tisualin, ṭhenkhat phei chuan an tlin lohnate hneh tûra an beih reng a ngai a ni. Chuvâng chuan kan lunghnual tûr a ni em? Ni lo ve. Hmân lai Israel rama mawhphurhna lian tak pêkte pawhin thil sual khûnkhân tak an ti palh a ni. Entîr nân, Davida chu tleirâwl a nih laiin, Lal Saula buaina tireh nâna rimawi tumsak tûra koh a ni a. A hnuah, Saula chuan Davida chu thah a tum a, a tâwpah chuan nunna chhanhim nân a tlânchhiat a ngai hial a ni.—1 Samuela 16:14-23; 18:10-12; 19:18; 20:32, 33; 22:1-5.
9 Israel dangte chuan vervêk takin thil an ti a. Entîr nân, Davida sipai hotu Joaba chuan Saula chhûngkhat Abnera chu a that a. Absaloma chuan a pa Davida lalna chuhin, a phiarru a. Tin, Davida mi rin tak thurâwn petu ber Ahithophela chuan amah a phatsan bawk. (2 Samuela 3:22-30; 15:1-17, 31; 16:15, 21) Mahse, Davida chu thinrimin a phunnawi lo va, biakna dik lah a kalsan hek lo. Chu mi kalh chuan a chhâng lêt hlauh zâwk a ni. A dinhmun harsa tak chuan Davida chu Jehova vuan tlat tûr leh Saula avânga a tlânchhiat laia a neih rilru put hmang ṭha chu nei reng tûrin a chêttîr a ni. Chutih lai chuan, Davida chu: “Aw Pathian, mi khawngaih rawh, mi khawngaih rawh; ka nunna hi nangmahah chuan a tlu lût si a: a ni, i thla hnuai chu ka chuh ang, vânduainate hi a kian hma loh chuan,” tiin a zai a ni.—Sâm 57:1.
10, 11. Kristian Gertrud-i chuan a tleirâwl laiin eng nge a tawn a, a rinpuite chungchânga a ngaih dân eng nge a sawi?
10 Tûn laiah Pathian inawpna pâwl chu dik lo taka sawisêl chhan tûr kan nei lo. Jehova emaw, a vântirhkohte emaw, thlarau lam berâm vêngtute emaw chuan Kristian kohhran chhûnga bum hmang mi suaksualte an awm chu an phal lo vang. Amaherawhchu, kan vai hian kei mahni ngei leh Pathian chhiahhlawh dangte ṭhat famkim lohna chu kan hmachhawn a ni.
11 Kum rei tak Jehova betu Gertrud-i chu a tleirâwl laiin tidertu leh hunbi kima Lalram puangchhuaktu ni lo anga dik lo taka puh a ni a. Engtin nge a chhân lêt? Chutianga cheibâwl a nih avâng chuan Gertrud-i chu a phunnawi em? Phunnawi lo. Kum 2003-a kum 91 mi nia a thih dâwn ṭêpah chuan, a nun kawng chu thlîr lêtin, heti hian a sawi a ni: “Hêngte leh a hnua ka thiltawnte hian, mite’n thil an tisual chung pawhin, Jehova’n a hna pawimawh tak chu a kaihruai zêl a, chutah chuan keini mi ṭha famkim lote hi min hmang a ni tih min zirtîr a ni,” tiin. Gertrud-i’n Pathian chhiahhlawh dangte ṭhat famkim lohna a hmachhawn chuan tih tak zeta ṭawngṭaiin Jehova chu a pan a ni.
12. (a) Entîrna duhawm lo tak eng nge kum zabi khatnaa Kristiante’n an siam? (b) Eng nge kan ngaihtuah tlat ang?
12 Kristian rinawm ber leh inpumpêk berte pawh mi ṭha famkim lote an nih avângin, rawngbâwltua ruatin thil a tihsual hunah, ‘phunnawina awm lovin engkim i ti’ zêl ang u. (Philippi 2:14) Kum zabi khatnaa Kristian kohhrana mi ṭhenkhatte entîrna duhawm lo tak kan zui chuan a va pawi dâwn tak êm! Zirtîr Juda sawi angin, chu tih laia zirtîrtu derte chuan “Lalpa thuneihna chu an pawisa lo va, ropuinate an sawichhia” a ni. Chu bâkah, chûng thil sualtitute chu “phunnawitu leh sawisêltute an ni.” (Juda 8, 16) Sawisêltute phunnawina chu i hnâwlin, ‘bâwih rinawm’ kal tlanga thil ṭha kan dawnte chu i ngaihtuah tlat zâwk ang u. Jehova Inawpna pâwl ṭhatna chu i hlutin, ‘phunnawina awm lovin engkim i ti’ ang u.
“Hei Hi Thu Khirh Tak A Ni”
13. Engtin nge mi ṭhenkhatin Isua zirtîrna ṭhenkhat chu an chhân lêt?
13 Kum zabi khatnaa mi ṭhenkhat chu rawngbâwltua ruatte chunga an phunnawi laiin, mi dangte chu Isua zirtîrna chungah an phunnawi thung a ni. Johana 6:48-69-a chhinchhiah a nih angin, Isua’n: “Tupawh ka tisa eia ka thisen in chuan chatuana nunna a nei tawh,” a ti a. Chûng thute an hriat chuan, “a zirtîr a ṭhen tam takin . . . ‘Hei hi thu khirh tak a ni, tunge dawngsawng thei ang?’ an ti a. Isua’n “chu mi thu-ah chuan a zirtîrte an phunnawi tih” a hria a. Chu bâkah, “a zirtîrte a ṭhen tam tak an kal bo va, amah an pâwl leh ta lo va.” Mahse, a zirtîrte zawng zawng an phunnawi lo. Isua’n a zirtîr 12-te hnêna: “Nangni pawhin kal bo in duh ve em?” tia a zawh laia thilthleng hi lo chhinchhiah rawh. Tirhkoh Petera chuan: “Lalpa, tu hnênah nge kan kal ang? Nangin chatuana nunna thu i nei alâwm. Nang Pathian mi thianghlim chu i ni tih kan âwih ta a, hriat pawh kan hria e,” tiin a chhâng a ni.
14, 15. (a) Engvângin nge ṭhenkhatte chu Kristian zirtîrna ṭhenkhata an lungawi loh? (b) Emanuel-a chungchângah eng nge kan zir theih?
14 Tûn laiah, Pathian mite zînga mi tlêm tê chu Kristian zirtîrna ṭhenkhat lakah an lungawi lo va, Jehova inawpna pâwl lei lam pêng chungah an phunnawi a ni. Engvângin nge chutiang thil chu a thlen? Chutiang phunnawina chu Pathian thil tih dân an hriatthiam loh vâng a ni fo va. Siamtu chuan a mite hnênah thutak chu zawi zawiin a târ lang chho zêl a. Chuvângin, Pathian Lehkha Thu kan hriatthiamna chu siamrem chhoh zêl a ni dâwn a ni. Jehova mi a tam zâwkte chuan chutianga siamremna chu lâwmawm an ti a. Ṭhenkhat erawh chu an lo “kherkhiap lutuk” a, thlâk thlengnate chu an ngai hua a ni. (Thuhriltu 7:16) Chu chu chapona avâng pawh a ni thei a, ṭhenkhat chu mahni thu thua lum duhna thangah an âwk thung. A chhan chu engpawh ni se, chutiang phunnawina chuan khawvêl leh a kawngahte min hnuhkîr theih avângin a hlauhawm a ni.
15 Entîr nân, Thuhretu Emanuel-a chuan ‘bâwih rinawm leh fing’ chhuah thu leh hla a chhiarah sawisêl tûr a hmu a. (Matthaia 24:45) Kan Kristian thu leh hla chhuahte chu chhiar tawh lovin, a tâwpah phei chuan tualchhûng kohhran upate hnênah Jehova Thuhretute zînga mi nih a duh tawh loh thu a hrilh a ni. Amaherawhchu, a hnu rei lo têah Emanuel-a chuan Jehova inawpna pâwl zirtîrnate dikzia chu a hre chhuak a. Thuhretute be pawp lehin, a thil tihsual chu a pawm a, Jehova Thuhretute zînga mi niin a lo kîr leh a. Chuvângin, hlimna a lo nei leh ta a ni.
16. Kristian zirtîrna ṭhenkhat chungchânga rinhlelhnate hneh tûrin engin nge min ṭanpui thei?
16 A nih leh, Jehova mite zirtîrna chungchânga rinhlelhna kan neih avângin phunnawi duh ta ila engtin nge ni ang? Dawhtheihna i nei ang u. A tâwpah ‘bâwih rinawm’ chuan kan zawhna chhânnate leh kan rinhlelhnate tifiahtu thu leh hlate chu a chhuah thei a. Kristian upate ṭanpuina zawn chu a finthlâk a ni. (Juda 22, 23) Ṭawngṭaina te, mahnia zirna te, thlarau lam thil ngaihventu rinpuite nêna inkawmna te chuan rinhlelhnate paih bo tûr leh Jehova min biak pawhna hmanrua kal tlanga kan zir, rinna tichaktu Bible thutak chunga kan lâwmna tithûk tûrin min ṭanpui thei bawk a ni.
Rilru Put Hmang Ṭha Chu Vawng Rawh
17, 18. Phunnawi aiin eng rilru put hmang nge kan lantîr ang a, engvângin nge?
17 Mihring ṭha famkim lote chuan sual lam âwn duhna an rochun ngei a, ṭhenkhat chuan chhan leh vâng ṭha awm lovin sawisêl an châk et et thei bawk. (Genesis 8:21; Rom 5:12) Mahse, phunnawi chîng mi kan lo nih chuan, Pathian Jehova nêna kan inlaichînna chu kan tiderthâwng ang. Chuvângin, phunnawi duhna awm thei apiang lakah kan inthunun a ngai a ni.
18 Kohhran thila phunnawi aiin, rilru put hmang ṭha chu kan vawngin, hlimna te, Pathian zahna te, inbûk tâwkna te, leh rinna kawnga hrisêl ṭhatna te min neihtîrtu hun duan zui chu a ṭha zâwk hle a ni. (1 Korinth 15:58; Tita 2:1-5) Jehova chuan a inawpna pâwl chhûnga thil engkim chu a thunun a; tin, Isua chuan kum zabi khatna kohhrana thil awm dân a hriat ang chiahin, tûn laia kohhran tina thil awm dân apiang chu a hria a ni. (Thu Puan 1:10, 11) Pathian leh kohhran Lu Krista chu dawh thei takin nghâk rawh. Siam ṭhat ngai thilte siam ṭha tûrin mawhphurhna chelh berâm vêngtute chu hman an ni thei a ni.—Sâm 43:5; Kolossa 1:18; Tita 1:5.
19. Lalram chuan mihringte chungchângah thu a rawn neih pumhlûm hma chuan, eng nge kan ngaihsak tlat ang?
19 He kal hmang suaksual hi a tâwp thuai dâwn a, Messia Lalram chuan mihringte chungchângah thu a rawn nei pumhlûm tawh ang. Chu mi a lo thlen hma zawng chuan, rilru put hmang ṭha vawn chu a va pawimawh tak êm! Hei hian kan rinpuite chhiatna ni lovin, an ṭhatna hmu tûrin min ṭanpui dâwn a ni. An mize ṭhate ngaihtuahna chuan min tihlim ang. Phunnawina hmanga rilru tihhah aiin, thlarau lamah kan intichak zâwk dâwn a ni.
20. Rilru put hmang ṭha neihna chuan eng malsâwmnate nge min dawntîr thei ang?
20 Rilru put hmang ṭha neihna chuan Jehova inawpna pâwl lei lam pêng zawmna avânga kan neih malsâwmna tam takte chu min hriattîr reng thei a. He pâwl hi lei leh vâna Lal Chungnungber chunga rinawm khawvêla pâwl awmchhun chu a ni. Chu thu dik chungchâng leh Pathian dik awmchhun, Jehova biaknaa tel theihna chanvo chu engtin nge i ngaih? I rilru put hmang chu: “Aw ṭawngṭaina ngaithlatu, i hnênah tîsa zawng zawng chu an lo kal ang. Mi, i biak in hung chhûng kawtlaiahte awm thei tûra i thlana, i kiang i pantîra chu, a eng a thâwl e: i in ṭhatna chuan kan tlai ang,” tia zaitu Davida rilru put hmang ang ni rawh se.—Sâm 65:2, 4. (w06 7/15)
I Hre Chhuak Em?
• Engvângin nge kohhrana hmahruaitute chunga kan lâwm ang?
• Mawhphurhna chelh unaupate’n thil an tihsual hunah eng nge kan chhân lêt dân tûr?
• Pathian Lehkha Thu hriatthiamna siam ṭhat a nihin engtin nge kan thlîr ang?
• Kristianin rinhlelhna a neih chu hneh tûrin engin nge ṭanpui thei?
[Zirlai Atâna Zawhnate]
[Phêk 13-naa milem]
Davida chuan Solomona hnênah biak in sak dân tûr ruahmanna chu pein, biakna dik chu thinlung zawng zawngin a thlâwp
[Phêk 16-naa milem]
Kristian upate chuan lâwm takin thlarau lam ṭanpuina an pe