Jehovah Ṭih La, Hlim Rawh!

“LALPA ṭih mi chu a eng a thâwl e.”​—⁠SAM 112:⁠1.

1, 2. Jehova ṭihnain eng nge a thlen theih?

HLIMNA hi awlsam taka neih mai theih a ni lo. Hlimna dik tak chu duh thlanna dik siamnaah te, thil dik tihnaah te, leh thil dik lo hawisannaah te a innghat a ni. Min Siamtu Jehova chuan nun kawng ṭha thei ang ber kan neih theih dân min zirtîr tûrin a Thu, Bible chu min pe a. Jehova kawhhmuhna zawnna leh zawmna hmanga Pathian ṭihna lantîrin lungawi tak leh hlim tak kan ni thei a ni.​—⁠Sâm 23:1; Thufingte 14:⁠26.

² He thuziakah hian Pathian ṭihna dik takin mi chu thil dik lo ti tûra thlêmna do thei tûr leh thil dik ti tûra chakna a pêk dân târ langtu Bible-a entîrnate leh tûn lai huna entîrnate kan ngaihtuah dâwn a. Lal Davida’n a tih a ngaih ang bawka kan kawng dik lote siam ṭha tûra min chêttîrna hmangin Pathian ṭihnain hlimna min thlen theih dân kan hmu dâwn a ni. Tin, Jehova ṭihna hi nu leh pate’n an fate hnêna an hlan chhâwn theih ro hlu tak a ni tih kan hmu bawk ang. Dik takin, Pathian Thu chuan: “LALPA ṭih mi chu a eng a thâwl e,” tih min tiam si a.​—⁠Sâm 112:⁠1.

Hlimna Hloh Chu Nei Lêt Lehin

3. Engin nge Davida chu a thil sual tihna lak ata ṭhatchhuahtîr leh thei?

³ Thuziak hmasaa ngaihtuah a nih tawh angin,  Davida chuan ṭum thum lai langsâr takin Pathian ṭihna dik a lantîr lo va, thil sual a ti a. Amaherawhchu, Jehova thununna a chhân lêt dân chuan thil tisual mah se, Pathian ṭih mi a ni tih a târ lang a ni. Pathian a ngaihsânna leh a zahna chuan a thil sual tihte pawm a, insiam ṭha tûr leh Jehova nêna inlaichînna ṭha nei leh tûrin a chêttîr a. A thil tihsualte chuan amah leh mi dangte chungah hrehawm tawrhna a thlen nachungin, tih tak zeta a inlamlêtna chuan Jehova ṭanpuina leh malsâwmna a dawn chhunzawmtîr leh a ni. Davida entîrna chuan tûn laia Kristian sual nasa taka tlu lûtte hnênah huaisenna a pe thei ngei a ni.

4. Engtin nge Pathian ṭihnain mi chu hlimna nei lêt leh tûra a ṭanpui theih?

⁴ Sonja-i thiltawn hi lo en teh. * Hunbi kima chanchin ṭha hriltu ni mah se, ṭhian sual a kâwm a, Kristian tih loh tûr thil tiin, Kristian kohhran ata hnawhchhuah a ngai ta hial a. A thiltih dik lohzia chu hre chhuakin, Jehova nêna an inlaichînna siam ṭha leh tûra thil tih ngai apiang chu a ti a. A tâwpah chuan, kohhran chhûngah lâk luh a ni leh ta a ni. Chutih chhûng zawng pawh chuan Jehova rawngbâwl duhna chu a nei reng a. A tâwp atâwpah chuan, hunbi kima pioneer rawngbâwl hna chu a thawk leh ta a ni. A hnuah Kristian upa pasalah a nei a, tûnah hian a pasal nên chuan kohhranah hlim takin rawng an bâwl a ni. Sonja-i chuan hun rei lo tê atâna Kristian kawng a pênsan avâng chuan pawi ti hle mah se, Jehova a ṭihnain kawng dika lêt leh tûra a ṭanpuina avâng chuan a hlim hle a ni.

Thil Sual Tih Aiin Tawrh A Ṭha Zâwk

5, 6. Davida’n vawi hnih lai Saula nunna a zuahsak dân leh a zuahsak chhan sawifiah rawh.

⁵ Pathian ṭihnain a tîr aṭanga thil sual min tihtîr loh chu a ṭha zâwk ngei mai. Hei hi Davida chungah pawh a thleng dik a ni. Ṭumkhat chu Saula chuan sipai sâng thum nêna Davida ûmin, Davida leh a mite an bihrûkna pûk ngei maiah chuan a lût a. Davida mite chuan Saula that tûrin an tur a. Jehova’n Davida hmêlma hlauhawm tak chu a kutah a pe a ni lâwm ni? Davida chuan zawitea kalin Saula puan fêm chu a hlep a. Pathian a ṭih avângin, chu a thiltih pawi lo tak pawh chuan a chhia leh ṭha hriatna a tibuai hle a. A mi, lungni lote chu kalsanin: “LALPA hriak thih ka lalpa chunga he thil ka tih hi a âwm lo tawp mai a ni,” tiin a mi lungni lote chu a ṭîntîr a ni. *​—⁠1 Samuela 24:​1-7.

⁶ A hnuah Saula chu zân riakin a chhuak leh a; tichuan, amah leh a mi zawng zawngte chu “LALPAN tui taka a muthilhtîr avângin” an muhîl vek a. Davida leh a vahpa huaisen tak Abisaia chu Saula leh a hote riahbûkah chuan an han chhova, Saula muhîl lai tak hmaah chuan an ding a. Abisaia chuan Saula chu thah mai a duh a. Davida chuan ani chu dangin, a hnênah: “LALPA hriak thih chunga kut thlâka thiam chang thei tunge awm thei ngai?” tiin a zâwt a ni.​—⁠1 Samuela 26:​9, 12.

7. Engin nge Davida chu thil sual tihna lak ata hum?

⁷ Engvângin nge Davida’n vawi hnih lai Saula thah theihna hun remchâng a neih khân a thah mai loh? A chhan chu, Saula a hlauhna aia Jehova a ṭihna chu a nasat zâwk vâng a ni. Davida chuan Pathian ṭihna dik tak a neih vângin thil sual tih ai chuan, a ṭûl a nih chuan, tawrh mai pawh a inhuam a. (Hebrai 11:25) Jehova’n A mite a enkawlnaah leh a mi mal taka amah a enkawlnaah chuan rinna pumhlûm a nei a ni. Pathian rinchhanna leh a thu zawmnain hlimna leh malsâwmna tam tak a thlen rualin,  ngaihthahna erawh chu A lawm loh nihna a ni tih a hria a. (Sâm 65:⁠4) Pathianin amah lala siam A tiam chu a tihlawhtling ngeiin, Saula chu hun a tihah chuan a la bo mai dâwn a ni tih a hre bawk a ni.​—⁠1 Samuela 26:⁠10.

Pathian Ṭihna Chuan Hlimna A Thlen

8. Engtin nge nêksâwrna hnuaia Davida nungchang chu entawn tlâk a nih?

⁸ Kristian kan nih angin, nuihsanna te, tihduhdahna te, leh fiahna dangte kan beisei thei a. (Matthaia 24:9; 2 Petera 3:⁠3) A châng phei chuan rinpuite telna harsatna chu kan tâwk hial mai thei a ni. Amaherawhchu, Jehova’n thil engkim a hmu a, kan ṭawngṭainate a hria a, a hun takah a duhzâwng angin thil chu a chingfel mai ang tih kan hria. (Rom 12:​17-21; Hebrai 4:16) Chuvângin, min dotute hlauh ai chuan Pathian kan ṭih zâwk a, min chhanhim tûrin amah chu kan beisei zâwk a ni. Davida angin, keimahniin phuba kan la mai lo va, tawrhna pumpelh tûrin thu bul dikte chu kan bawhchhe hek lo. Hei hian a tâwpah hlimna a thlen a ni. Mahse, chu chu engtin nge a thlen?

9. Pathian ṭihnain tihduhdahna tuar chung pawha hlimna a thlen theih dân entîrna pe rawh.

⁹ Africa rama hun rei tak chhûng missionary-a rawngbâwl chuan heti hian a sawi a: “Kristian tualdawihna avânga political party card lei duh lo nu pakhat leh a fanu tleirâwl chu ka ngaihtuah a. Mipa pungkhâwmte’n nasa taka kut an thlâk hnuah an in lama haw tûrin an hrilh a. An hâwn kawngah chuan a nu chuan chûng thil a lo thlen chhan hriat thiam harsa ti tak a fanu ṭap chu hnem a tum a. Chutih lai chuan hlim lo mah se, chhia leh ṭha hriatna thiang an nei thung a ni. A hnuah chuan Pathian thu an âwih avângin an hlim hle a. Party card kha lo lei ta sela chuan, mipuite chu an hlim hle tûr a ni nâ a. Mipate chuan theitui in tûr an pein, an haw kawng tluan chuan an lam hual vêl tûr zawng a nia le. Mahse, chu hmeichhia leh a nu chuan an rinna kalh zâwngin thil an ti tih an inhriatna chuan khawvêla mi hlim lo berah a siam âwm si a,” tiin. Pathian an ṭihna chuan chutiang thil hlauhawm zawng zawng ata chu a chhanhim a ni.

10, 11. Hmeichhe pakhatin Pathian a ṭih avângin eng rah ṭha nge lo awm?

¹⁰ Pathian ṭihna lantîrna chuan nunna thianghlimna zahna kawnga fiahna tawn hunah pawh hlimna a thlen a. Mary chuan a fa pathumna a pai lai chuan, doctor chuan nau titla tûrin a tur a. “I dinhmun a hlauhawm hle mai. Engtik hunah pawh harsatna tâwkin, dârkâr 24 chhûnga thi thei reng i ni a. Chutiang a nih chuan naute pawh a thi bawk ang a. Thi lo ta pawh ni se, naute chu mi pângngaiin a chhuak ang tih sawi theih a ni lo,” tiin a sawi a. Mary chuan Jehova Thuhretute nên Bible a zir mêk a; mahse, baptisma pawh a la chang hrih lo va. Ani chuan: “Chutichung chuan Jehova rawngbâwl ka thlang tawh a, engpawh tuar dâwn mah ila a thu âwih chu ka tum nghet tlat a ni,” tiin a sawi.​—⁠Exodus 21:​22, 23.

¹¹ A nau pai chhûng chuan Bible zir leh a chhûngkua enkawlin a buai hle a. A tâwpah chuan naute chu a lo piang ta. Mary chuan heti hian a sawi: “A hmasa pahnihte aiin naute chu ka har deuh va; mahse, thil khirh lutuk a thleng lo,” tiin. Pathian ṭihna chuan ani chu chhia leh ṭha hriatna ṭha tak nei tûrin a ṭanpui a, baptisma a chang ta thuai rêng a ni. Naute a lo ṭhan len chuan ani pawh chuan Jehova ṭihna a rawn nei ve a, tûnah hian Jehova Thuhretute branch office pakhatah rawngbâwlin a awm a ni.

‘Jehovaah Chuan Intichak Rawh’

12. Engtin nge Pathian ṭihna chuan Davida chu a tihchak?

¹² Davida’n Jehova a ṭihna chuan thil sual tihna lak ata a vêng him chauh a ni lo. Chu chuan dinhmun harsa tak hnuaiah pawh rang tak leh fing taka thil ti tûrin a tichak bawk a ni. Davida leh a mite chu Saula lak ata kum khat leh thla li chhûng chu Philistia mite ram Ziklag-ah an tlânchhia a. (1 Samuela 27:​5-7) Ṭumkhat chu an kalbo hlânin Amalek sipai hote chuan khua chu an lo hâlsak a, an nupui te, an fate, leh an ran rual zawng zawngte chu an lâksak a. An lo kîra thil awm dân an han hmuh chuan Davida leh a mite chu an ṭap a. An ṭahna chu thinrimnain a inthlâk thuai a, Davida mite chuan lunga den hlum an rawt a. Davida chu a mangang hle nachungin,  a beidawng lo. (Thufingte 24:10) Pathian a ṭihna chuan Jehova lam hawi tûrin a chêttîr a, “LALPAAH chuan a intichak” a ni. Pathian ṭanpuinain Davida leh a mite chuan Amalek ho chu an hneh a, thil zawng zawng chu an nei lêt leh thei a ni.​—⁠1 Samuela 30:​1-20.

13, 14. Engtin nge Pathian ṭihnain Kristian pakhat chu duhthlanna ṭha siam tûrin a ṭanpui?

¹³ Tûn laia Pathian chhiahhlawhte pawhin Jehova rinchhan a ngaihna leh huaisen taka thil tih vat ngai dinhmunte an hmachhawn bawk a. Kristina-i hi entîr nân lo hmang ila. A naupan lai chuan Jehova Thuhretute nên Bible an zir a. Mahse, vântlâng hmuna rimawi (piano) tum thiam nih a duh a, chu mi ni thei tûr tâwk chuan hma a sâwn bawk a ni. Chu bâkah, thu hrilhnaa kal a zah êm avângin, baptisma channain a thlen tûr mawhphurhna chu a pawm ngam lo va. Mahse, Pathian Thu a han zir chhoh zêl chuan Pathian Thu thiltihtheihna chu a hre ṭan a. Jehova ṭih a zir a, Jehova chuan a chhiahhlawhte hnênah an thinlung zawng zawngin, an rilru zawng zawngin, an thlarau zawng zawngin leh chakna zawng zawngin an hmangaih a phût a ni tih a hre thiam ta a. (Marka 12:30) Hei hian Jehova hnêna inpumpêk a, baptisma chang tûrin a chêttîr a ni.

¹⁴ Kristina-i chuan thlarau lama hmasâwn tûra ṭanpui tûrin Jehova a ngên a. Ani chuan: “Vântlâng punkhâwmna hmuna piano tumtute nun chu zin kual reng leh kum khata vawi 400 lai tum tûra intiamkamna te a tel a. Chuvângin, sum leh paia ka inchâwmna tûra zirtîrtu nih leh hunbi kima chanchin ṭha hriltu nih chu ka thlang ta zâwk a ni,” tiin a sawifiah a ni. Chutih hun lai chuan, Kristina-i chuan a awmna rama vântlâng punkhâwmna hmun lâr berah a vawikhatna atâna inpho chhuak tûrin ruahmanna a siam diam tawh a. A hnuah chuan: “Ka concert hmasa ber chu a hnuhnûng berah a chang ta a ni,” tiin a sawi leh a ni. Kristina-i chuan Kristian  upa pasalah a nei a. Tûnah hian an pahnihin Jehova Thuhretute branch office pakhatah rawng an bâwl mêk a ni. Jehova’n duhthlanna dik siam tûra chakna a pêk avâng leh tûna a hun leh a chaknate a rawngbâwl nâna a hman theih avâng chuan a hlim hle a ni.

Ro Hlu Tak Chu

15. Eng nge Davida’n a fate rochun a duh a, engtin nge chu chu a tih?

¹⁵ Davida chuan: “Hawh u, naupangte u, ka thu ngaithla rawh u: LALPA tih dân ka lo zirtîr ang che u,” tiin a ziak a. (Sâm 34:11) Ani chuan pa a nih angin, a fate hnêna ro hlu tak​—⁠Jehova ṭihna ṭha, dik tak, leh inbûk tâwk tak hnutchhiah chu a tum tlat a. Ṭawngkam leh thiltihin, Davida chuan Jehova chu, thil phût chîng leh hlauhawm ang leh A dânte bawhchhiat hleka kutthlâk hmang anga lantîr lovin, Pa ber, leia A fate hmangaih, hre thiam, leh ngaihdam peih tak angin a lantîr zawk a ni. Davida chuan: “Tuin nge mahni tihsualte hre thei ang?,” tiin a zâwt a. Tichuan, Jehova’n kan thiltih sualte a en reng lo a ni tih a rinnghehzia târ langin: “Sual inthupte lakah hian mi tifihlîm ang che,” tiin a sawi belh a. Davida chuan a theihtâwpa ṭan a lâk chuan, a thusawite leh a ngaihtuahnate chu Jehova tân pawm tlâk a ni tih a hre chiang hle zâwk a ni.​—⁠Sâm 19:​12, 14.

16, 17. Engtin nge nu leh pate’n an fate hnênah Jehova ṭih dân an zirtîr theih?

¹⁶ Davida chu tûn laia nu leh pate tâna entawn tûr a ni. Ralph-a, a unaupa nêna Jehova Thuhretute branch office pakhata rawngbâwltu chuan: “Ka nu leh pate chuan thutaka awm nuam ti tûrin min enkawl seilian a. Kan naupan lai chuan, kohhran thiltih chungchângtea an tîtînaah chuan min telh ṭhîn a, anmahni ang bawkin thutaka awm chu nuam kan ti hle. Jehova rawngbâwlnaah thil ṭha kan ti thei tih ring tûrin min enkawl seilian a ni. Kan chhûngkua chu kum tam tak chhûng Lalram thuchhuahtu mamawh zualna hmunah kan awm a, kohhran tharte dinna kawngah kan ṭanpui a ni.

¹⁷ “Kawng dik min zawhtîrtu chu thlâkthleng theih loh dân khauh tam takte a ni lo va, ka nu leh pate tâna Jehova a takzia, a ngilneihzia leh a ṭhatzia chu a ni zâwk. Jehova hriat chian lehzual leh tih lâwm dân an zawng a, Pathian an ṭihna leh an hmangaihna dik tak aṭang chuan kan inzir a ni. Thil ṭhenkhat kan tihsual châng pawhin ka nu leh pate chuan Jehova’n min hmangaih tawh lo angin min ngaihtîr emaw, thinrim takin khuahkhirhna ṭul lo takte min siamsak emaw lo. A tam zâwkah chuan min ṭhutpuiin, dam takin min tîtîpui zawk ṭhîn a, ka Nu chuan a châng chuan a mittui tling piauvin kan thinlung thlen a tum ṭhîn.Chu chu a hlawhtling a ni. Jehova ṭih chu phurrit ni lovin, thil duhawm tak leh a Thuhretute chuan an hlimpui leh nuam an tih tûr a ni tih ka nu leh pate thusawi leh thiltihte aṭangin kan zir a ni,” tiin a sawi.​—⁠1 Johana 5:⁠3.

18. Pathian dik kan ṭihna avângin eng nge kan hmuh ang?

¹⁸ “Davida thusawi hnuhnûng ber” zînga mi chu: “Mi chunga fel taka rorêl thîna, Pathian ṭih chunga rorêl thîna chu, nî a lo chhuah a, chhûm awm hauh lo zîng êng ang hi a ni” tiin kan chhiar a. (2 Samuela 23:​1, 3, 4) Davida fapa leh a lalna rochungtu Solomona chuan Jehova hnêna “hriatna thinlung” leh ‘a chhia leh a ṭha thliar hran theihna’ pe tûra a dîl avângin, hêng thute finzia hi a hriat ngei a rinawm. (1 Lalte 3:⁠9) Solomona chuan Jehova ṭih hi finna leh hlimna kawng a ni tih a pawm a. A hnuah, Thuhriltu bu chu: “Hêng thu zawng zawng khaikhâwmna hi i ngaithla teh ang: Pathian ṭih la, a  thupêkte vawng rawh; hei hi mihring zawng zawng tih tûr chu a ni mai. Pathian chuan thiltih zawng zawng chungah ro a la rêl dâwn si a, thil inthup engkim, a chhia emaw, a ṭha emawte pawh,” tih thuin a khaikhâwm a ni. (Thuhriltu 12:​13, 14) Chu zilhna chu kan zawm chuan “inngaihtlâwmna leh LALPA ṭih man chu” finna leh hlimna chauh ni lovin, “sum te, chawimawina te, nunna te a ni” tel bawk tih kan hmu ngei ang.​—⁠Thufingte 22:⁠4.

19. Engin nge ‘Jehova ṭih nachâng,’ min hriatthiamtîr thei?

¹⁹ Bible entîrna aṭang leh tûn lai huna thiltawnte aṭangin, Pathian ṭihna dik takin Jehova chhiahhlawh dik takte nunah hmun ṭha tak a luah tih kan hmu a. Chûng ṭihnate chuan kan Pa vâna mi tilâwm lotu thiltihna lak ata min vêng chauh ni lovin, min dotute hmachhawn thei tûra huaisenna min pein, leh kan hmaa lo awm fiahnate leh harsatnate tuar chhuak thei tûrin chakna min pe a ni. Chuvângin, apui apangin, Pathian Thu taima taka zir a, kan thil zirte ngun taka chhûtin, leh rilru tak zeta ṭawngṭai ziahna hmanga Jehova hnaihin i awm ang u. Chutianga kan tih chuan, “Pathian hriatna” chauh ni lovin, ‘Jehova ṭih nachâng’ pawh kan lo hre dâwn a ni.​—⁠Thufingte 2:​1-5. (w06 8/1)

[Footnote-te]

I Hrilhfiah Thei Em?

Engtin nge Pathian ṭihna

• chuan mi chu thil sual nasa tak tihna ata a ṭhat chhuahtîr leh theih?

• chuan fiahna leh tihduhdahna hnuaiah pawh hlimna a thlen theih?

• chuan Pathian duhzâwng ti tûra min tihchak theih?

• chu kan fate tâna ro hlu tak a nih theih?

[Zirlai Atâna Zawhnate]

[Phêk 29-naa milemte]

Pathian ṭihna hi nu leh pate’n an fate hnêna an hlan chhâwn theih ro hlu ber a ni