Joba—mi Rinawm Leh Chhel Tak Chu
Joba—mi Rinawm Leh Chhel Tak Chu
“Ka chhiahhlawh Joba hi i ngaihtuah ngai em? Lei chungah hian amah anga famkim, mi ngîl, Pathian ṭih mi, thil ṭha lo laka insûm thei mi tumah an awm lo asin.”—JOBA 1:8.
1, 2. (a) Joba chuan beisei hauh lohvin eng chhiatna râpthlâk tak nge a tawh? (b) Chhiat a tawh hmaa Joba nun dân chu sawi rawh.
THIL engkim—hausakna te, hmingthanna te, hrisêlna te, leh chhûngkaw nun hlim tak te neitu mi pakhat a awm a. Tichuan, chhiatna râpthlâk tak pathumin a indawtin a dêng a ni. Thâwklehkhatah a hausakna zawng zawng chu a hloh va. A dawtah thlipui mak dangdai tak chuan a fa zawng zawngte nun chu a lâksak leh a. A hnu lawkah chuan, natna râp awm tak a vei a, khawihliin a taksa pum chu a tuam chhuak vek a ni. A chanchin kan sawi chu Joba, Bible-a ama hming pu lehkhabua mi pawimawh ber a ni tih i hriat ngei a rinawm.—Joba, bung 1, leh 2.
2 Ani chu: “Aw, tûn hma thla ral taahte khân awm ni ila,” tiin a rûm a ni. (Joba 3:3; 29:2) Chhiatna a lo thlen hian, tunge tûn hma lam hun ngai lo awm? Joba chungchângah hi chuan, mi ngîl a ni a, vânduaina ata humhim niin a lang a ni. Mi liante chuan ani chu an zahin thurâwn an lâkna ṭhin a ni a. (Joba 29:5-11) Ani chu a hausa a, mahse sum leh pai thlîr dân inbûk tâwk a nei a ni. (Joba 31:24, 25, 28) Hmeithai leh fahrahte a ṭanpui ṭhîn bawk. (Joba 29:12-16) Tin, a nupui chungah a rinawm bawk a ni.—Joba 31:1, 9, 11.
3. Jehova’n Joba chu engtin nge a thlîr?
3 Joba chuan Pathian chibai a bûk avângin sawisêlbovin a nung a. Jehova chuan “lei chungah hian amah anga famkim, mi ngîl, Pathian ṭih mi, thil ṭha lo laka insûm thei mi tumah an awm lo,” a ti. (Joba 1:1, 8) Joba chu nungchang lama a rinawm chung pawhin, chhiatna râpthlâk tak chuan a nun dân nuam tak chu a rawn tichhe vek a. A thil neih zawng zawng chu a bo vek a, a rorumna dik tak chu natna, manganna, leh lunghnualna hian a fiah a ni.
4. Joba hrehawmna ngaihtuah chu engvângin nge a ṭangkai ang?
4 Mahse, Joba chu Pathian chhiahhlawh chhiatna râpthlâk tak tâwktu awmchhun a ni hauh lo. Tûn laia Kristian tam tak chuan a tawrh ang chu an tuar ve a ni. Chuvângin, he zawhna pahnihte hian kan ngaihtuah a phu a ni: Chhiatna kan tawh hian engtin nge Joba hrehawmna hriat chhuahna chuan min ṭanpui theih? Chu chuan hrehawm tuarte khawngaih lehzual dân engtin nge min zirtîr theih?
Rinawmna Thu Buai leh A Fiahna
5. Setana puh dân chuan Joba’n Pathian rawng a bâwl chhan chu eng nge ni?
5 Joba chungchâng chu a danglam bîk a. A hriat lohvin, Diabola chuan Pathian a biak chhan ber chungah rinhlelhna a siam a ni. Vâna thlarau fate kal khâwmnaah, Jehova chuan Joba mize ṭha takte chu a sawi chhuak a, Setana chuan: “Amah chu a in nên, a neih zawng zawng nên, kil tinah i hung vêl a ni lâwm ni?” tiin a chhâng a. Chutiang chuan Setana chuan Joba’n Pathian a biak chhan chu mahni hmasial vâng niin a puh a—Pathian chhiahhlawh dang zawng zawngte pawh chu mi avânga Pathian biaah a puh tel a ni. Setana chuan Jehova hnênah: “I kut thawh la, a neih zawng zawng hi han khawihsak teh, i hmaichhan ngeiah a sawichhe mai ang che,” a ti.—Joba 1:8-11.
6. Eng thu buai pawimawh tak nge Setana’n a chawh chhuah?
6 Hei hi thu buai pawimawh tak a ni. Setana chuan Jehova’n a lal chungnunna a hman dân chu a dem a. Pathian tân lei leh vân hi hmangaihnaa awp chu thil theih a ni em? Nge, Setana sawi hmuh angin, atâwpah chuan mahni hmasialna hian hnehna a chang ziah dâwn? Jehova chuan A chhiahhlawh rinawmna chu ring tlatin, nakina thu buai lo awm tûrte entawn tûr fiahna tehkhâwng atâna Diabola’n Joba a hman chu a phal a ni. Chutichuan, Setana ngei chuan Joba chungah chhiatna râpthlâk takte chu a indawtin a thlentîr zut a. Setana’n a beih hmasakna a hlawhchham chuan, natna hlauhawm takin Joba chu a tihrehawm a ni. Diabola chuan: “Vun aiah vun tih a ni a, a ni, miin a neih zawng zawng a nunna atân a pe phal ang chu!,” a ti ve tlat a ni.—Joba 2:4.
7. Eng kawngin nge tûn laia Pathian chhiahhlawhte chuan Joba tawrh ang fiahna chu an tawrh?
7 Tûn laia Kristian a tam zâwkte chuan Joba ang tlukin tuar lo mah se, hrehawmna chi hrang hrangte chuan anni chu a tlâk buak a. Tam tak chuan tihduhdahna emaw, chhûngkaw buaina emaw chu an tâwk a. Ei leh bâr harsatna emaw, hrisêl lohna emaw chu a nasa hle thei bawk. Ṭhenkhat chuan an rinna avângin an nun an chân a ni. Chhiatna kan tawh engkim chungah chuan Setana chu kan mawhpuh thei lo ngei mai. A nihna takah chuan, buaina kan tawh ṭhenkhat chu kan thil tihsual emaw, nu leh pa hnên aṭanga kan rochun thil emaw avânga lo awm a ni thei. (Galatia 6:7) Kan zain kum upat avânga bawrhsâwmna leh leilung chhiatna avânga lo awm harsatnate chu kan tuar a. Tûn lai hunah hian, Jehova chuan hêng hrehawmnate ata a chhiahhlawhte chu thilmak tihtheihna hmangin a hum lo tih Bible chuan a sawi chiang hle a ni.—Thuhriltu 9:11.
8. Engtin nge Setana chuan hrehawm kan tawrhte chu hman ṭangkai dân a zawn theih?
8 Amaherawhchu, Setana chuan hrehawmna kan tawrh chu kan rinna tihchauh nân a hmang thei a. Tirhkoh Paula chuan ‘Setana tirhkoh kut thak hnawih nâna mi hmangtu tisaa hlîng’ a tawrh thu a sawi a. (2 Korinth 12:7) Hei hi mit khawhmuh fiah lohna ang chi tisa lama harsatna a ni emaw, thil dang a ni emaw pawh ni se, Paula chuan he harsatna leh a rah chhuah lunghnualna chu a hlimna leh a rinawmna tihchauhsak nân Setana’n a hmang thei tih a hria a ni. (Thufingte 24:10) Tûn laiah hian, Setana chuan chhûngkhatte, school kalpuite, a nih loh leh sawrkâr sual takte chu Pathian chhiahhlawhte kawng engemawti taka tihduhdah nân a hmang thei a ni.
9. Engvângin nge harsatna leh tihduhdahna chu mak kan tih lutuk loh?
9 Engtin nge hêng harsatnate hi hlawhtling taka kan hma chhawn theih ang? Chûng chu Jehova kan hmangaihna leh a lal chungnunnaa kan intukluhna nghehzia lantîrna hun remchâng anga thlîrna hmangin kan hmachhawn thei a ni. (Jakoba 1:2-4) Engvânga hrehawm tuar pawh lo ni ta ila, Pathian chunga rinawmna pawimawhzia hriat thiamna chuan thlarau lama inbûk tâwk tûrin min ṭanpui ang. Tirhkoh Petera chuan Kristiante hnênah: “Duh takte u, in zînga fiahna nasa tak lo awm, nangmahni fiahna tûra in chunga lo thleng hi, thilmak in chunga lo thleng angin mak ti suh u,” tiin a ziak a. (1 Petera 4:12) Tin, Paula pawhin: “Tupawh Krista Isuaa Pathian ngaihsaka awm tum apiang chuan tihduhdahnate an tuar bawk ang,” tiin a hrilhfiah bawk. (2 Timothea 3:12) Setana chuan Joba chunga a tih ang bawkin, tûn thlengin Jehova Thuhretute rinawmna chu a la cho zêl a. A nihna takah chuan, Bible chuan he ni hnuhnûngah hian Setana’n Pathian mite a bei zual sauh tih a târ lang a ni.—Thu Puan 12:9, 17.
Inhriat Sualna leh Thurâwn Dik Lo Ṭhenkhat
10. Joba chuan eng thil nge a hriat loh?
10 Joba chuan thil hriat loh pakhat a nei a, chu chu kan hriat loh a nih ve kher a ngai lo. Ani chuan hêng chhiatna râpthlâk takte a chunga a thlen chhan a hre lo va. Chuvângin, “LALPAN a pe a, LALPAN a la leh ta” tih ngaih dân dik lo chu kawng engemaw ti takin a siam a ni. (Joba 1:21) A hrehawm tawrhna chu Pathian thlentîr anga lantîr luih dân kawng chu Setana’n a zawng pawh a ni thei ang.
11. Joba’n chhiatna râpthlâk tak a tawrh a chhân lêt dân hrilhfiah rawh.
11 Joba chuan Pathian sawichhe tûra a nupui fuihna chu zâwm lo mah se, ani chu a lunghnual hle a. (Joba 2:9, 10) ‘Mi suaksualte chan chu ka chan aiin a ṭha zâwk mang e,’ a ti a. (Joba 21:7-9) ‘Engvângin nge Pathianin min hrem le?’ tiin a ngaihtuah ngei ang. Thih hmiah mai duh châng pawh a nei hial a ni. “Seolah chuan mi thukru teh la, i thinur reh hma chu mi thukru teh la,” tiin a rûm bawk a ni.—Joba 14:13.
12, 13. Joba ṭhian pathumte thusawi chuan ani chu engtin nge a nghawng?
12 Joba chuan “amah tuarpui tûr leh thlamuan tûra” tlawhtu ṭhian pathum a nei a. (Joba 2:11) Amaherawhchu, “thlamuantu tuar hrehawm” mai an ni. (Joba 16:2) Joba chuan a harsatna tawh a hrilh theih tûr ṭhiante chu a ṭangkaipui mai theih laiin, hêng a ṭhian pathumte hian Joba manganna leh beidawnna chu an tizualkai zâwk mah a ni.—Joba 19:2; 26:2.
13 Joba chuan: ‘Engah nge kei kher kher? Hêng thil ṭha lote tuar tûrin eng thil nge ka tihsual?’ tia a inzawh ngei a rinawm hle. A ṭhiante chuan hrilhfiahna dik lo leh mi bum thei takte chu an pe a. Anni chuan hêng hrehawmnate lo thleng tûrin Joba chuan thil sual nasa tak a ti niin an ngai a ni. Chuvângin Elifaza chuan: “Pawikhawih lo tunge boral? Keia hmuh dân chuan khawlohna lei leta, buaina tuh chuan a ngai vêk an seng leh ṭhîn,” a ti a ni.—Joba 4:7, 8.
14. Engvângin nge hrehawm tawrhna chu nungchang dik loh vâng nia kan puh nghâl ṭhin loh vang?
14 Awle, thlarau lama theh lo va, tisa lama kan theh chuan harsatna kan tâwk ngei ang a. (Galatia 6:7, 8) Mahse, he kalhmangah hian kan nungchang chu engpawh ni sela, buaina kan tâwk thei reng a ni. Chu bâkah, mi dikte chu thil ṭha lo engkim lakah an him a tih theih loh bawk. Isua Krista, “bawlhhlawh kai lo, mi sualte laka awm hrang” chu nghaisakna banah hrehawm takin a thi a; tin, tirhkoh Jakoba pawh martar-in a thi a ni. (Hebrai 7:26; Tirhkohte 12:1, 2) Elifaza leh a ṭhian pahnihte thil chhût dân dik lo chuan Joba chu a hming ṭha humhim tûr leh a thiam thu sawi tûrin a chêttîr a ni. Chutichung pawhin, Joba’n a phu ang ngeiin hrehawm a tuar nia an puh luihna chuan Pathian rorêl dikna chungchâng a thlîr dân chu a nghawng a nih hmêl hle.—Joba 34:5; 35:2.
Hrehawm Tawrh Laia Ṭanpuina Zawng Hmuin
15. Eng ang ngaihtuahnain nge hrehawm kan tawrh hunah min ṭanpui ang?
15 Hetah hian kan tân zir tûr a awm em? Chhiatna râpthlâk takte, natna te, a nih loh leh tihduhdahnate chu âwm ang lo viau pawhin a lang mai thei. Mi dangte chuan chutiang buaina tam tak an pumpelh ni pawhin a lang mai thei bawk. (Sâm 73:3-12) A châng chuan, hêng zawhna pawimawh pahnih: ‘Thil engpawh lo thleng se, Pathian ka hmangaihna chuan a rawngbâwl tûrin min chêttîr em? Jehova hnênah “amah sawi chhetu chhânna” pêktîr ka châk em?’ tia kan inzawh pawh a ngai mai thei a ni. (Thufingte 27:11; Matthaia 22:37) Ngaihtuah chiang mang lova mi dangte thu sawi chuan kan Pa vâna mi chunga rinhlelhna min neihtîr chu kan phal ngai tûr a ni lo. Natna benvawn nei Kristian rinawm pakhat chuan ṭum khat chu: “Jehova’n ka chunga thlentîr a phal apiang chu ka tuar thei dâwn tih ka hria. Ka mamawh chakna min pe dâwn tih pawh ka hria a. Chutiang chuan ka mamawh chakna min pe reng a ni,” a ti.
16. Engtin nge Pathian Thu chuan harsatna tâwkte hnêna ṭanpuina a pêk?
16 Setana thil tih dân chungchângah chuan, Joba neih loh hriatthiamna chu kan nei a. A thiltum sualte, a nih loh leh “a ngamthlêmna chu kan hai si lo.” (2 Korinth 2:11) Chu bâkah, finna tam tak lâk chhuah theih tûr kan nei bawk. Bible-ah hian, hrehawmna chi hrang hrang tuar mi rinawm a hmei a pate chanchin chu kan hmu a. Kristiante zînga hrehawm tuar nasa ber pâwl tirhkoh Paula chuan heti hian a ziak a ni: “Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna tûrin ziak a ni si a,” tiin. (Rom 15:4) Europe rama Thuhretu pakhat, khawvêl indopui pahnihna chhûnga a rinna avânga lung in tâng chuan Bible bu khat chu ni thum chawin a thleng a. “Chu kan inthlengna chu a va manhla tak êm! Tisa lamah ṭâm mah ila, thlarau lam chaw ka dawng a, chu chuan chûng hun khirh chhûng zawngin kei leh mi dangte chu a châwm a. Vawiin nî thleng hian chu Bible chu ka la kawl reng a ni,” a ti.
17. Pathian pêk ruahmanna engte hian nge chhel tûra min ṭanpui thei?
17 Pathian Thu aṭanga thlamuanna bâkah, harsatnate hmachhawn thei tûra kaihhruaina ṭha tak min petu, Bible zirna ṭanpuitu lehkhabu tam tak pawh kan nei bawk a. Watch Tower Publications Index i râwn chuan, i tawh ang harsatna tâwk Kristian dangte thiltawn chu i hmuh a rinawm a ni. (1 Petera 5:9) Tin, i dinhmun chu mi hriatthiamna nei upate emaw Kristian puitlingte emaw sawipui chu a ṭangkai thei bawk. A pawimawh berah chuan, ṭawngṭaina hmangin Jehova leh a thlarau thianghlim ṭanpuina i rinchhan thei a ni. Engtin nge Paula chuan Setana ‘kut thak hnawihna’ chu a do? Pathian thiltihtheihna rinchhan dân zirin a do a ni. (2 Korinth 12:9, 10) “Mi tichaktuah chuan engkim ka ti thei a ni,” tiin a ziak a ni.—Philippi 4:13.
18. Engtin nge kan Kristianpuite chuan thlamuanna hlu tak min pêk theih?
18 Chuvângin, ṭanpuina hi hmuh theihin a awm reng a, i dîl hreh ngai tûr a ni lo. Thufingte bu chuan: “Mangan nîa i chauh mai chuan i chakna a bei tham a ni,” a ti. (Thufingte 24:10) Tlumpi hian thinga sak in a tihtlûk theih angin, lunghnualna hian Kristian rinawmna a tichhe thei a ni. He thil hlauhawm do tûr hian, Jehova chuan kan ṭhian Pathian chhiahhlawh dangte hmangin ṭanpuina min pe a ni. Isua mana a awm zân chuan vântirhkoh pakhat rawn inlârin Isua chu a tichak a. (Luka 22:43) Lung in tâng Paula chuan Rom khaw lam pana a zin kawngah, Appia Dâwr leh Khualbûk Pathum thlenga lo kal unaute a hmuh chuan “Pathian hnênah lâwmthu a sawi a, a muang ta a.” (Tirhkohte 28:15) German Thuhretu nu pakhat chuan a tleirâwl laiin hlau dep dep chunga Ravensbrück concentration camp a va thleng a, chutih laia a dawn ṭanpuina chu a la hre reng a ni. “Thuhretu nu pakhatin min rawn hmu nghâl a, tih tak zetin min lo lâwm a. Unaunu rinawm pakhat dang chuan min vênghim a, ani chu ka tân thlarau lama ka nu ang mai a lo ni,” tiin a sawi a ni.
“Rinawmin Lo Awm Rawh”
19. Engin nge Joba chu Setana thiltih tum do tûra ṭanpui?
19 Jehova chuan Joba chu rinawmna kawngah “a ngai reng” tih a sawi a. (Joba 2:3) Lunghnualin hrehawm a tawrh chhan hre thiam loh mah se, thil pawimawh tak rinawmna chungchângah a rilru a thlâk ngai lo va. Joba chuan a dam chhan zawng zawng chu a hnâwl lo bawk. “Ka thih thlengin ka dikna [a nih loh leh, rinawmna] ka dah bo lo vang,” a ti tlat zâwk a ni.—Joba 27:5.
20. Engvângin nge chhelna chu manhla tak a nih?
20 Chutiang bawka awm kan tum tlat chuan, dinhmun engpawh—thlêmnate, dodâlnate, a nih loh leh harsatnate—hnuaiah kan rinawm reng ang. Isua chuan Smurna kohhranho hnênah: “I tuar tûrte hi hlau suh: ngai teh, fiaha in awm theih nân Diabola chuan in zînga mi ṭhenkhat tân inah a khung dâwn che u a ni; tin, ni sâwm hrehawm [buaina, lungngaihna, a nih loh leh hnehchhiahna] in tuar ang. Thih thlengin rinawmin lo awm rawh, tichuan nunna lallukhum ka pe ang che,” a ti.—Thu Puan 2:10.
21, 22. Hrehawmna kan tawh hian, eng thil hriatnain nge min thlamuan theih?
21 Setana awpna he kal hmangah hian, kan chhelna leh rinawmna chu fiah a ni dâwn a. Amaherawhchu, nakin hun kan thlîr hian, hlauh chhan tûr kan nei lo tih Isua’n min tiam a ni. A pawimawh ber chu lo rinawm hi a ni. Paula chuan kan hrehawmna chu “tûn mit khap kâr chhûng chauhva awm tûr” a nih thu leh “ropuina,” a nih loh leh Jehova min tiam lâwmman erawh chu “chatuan atân . . . [a] nasa tulh tulh” thung tih a sawi a ni. (2 Korinth 4:17, 18) Joba hrehawmna ngei pawh chu fiahna a tawh hma leh a tawh hnua hun hlimawm tak a hmante nêna khaikhin chuan a rei lo hle a ni.—Joba 42:16.
22 Chutichung pawhin, kan fiahna tawrhte hi tâwp nei lo leh kan hrehawm tawrhte hi tawrh theih loh tûr khawpa nasa anga lan châng a awm thei a. A dawta thuziakah chuan, Joba thiltawnin chhelna kawnga thil dang min zirtîr belhte chu kan ngaihtuah ang. Tin, harsatna tâwk mi dangte kan tihchak theih dânte pawh kan en bawk ang. (w06 8/15)
Engtin Nge I Chhân Ang?
• Joba rinawmna chungchângah Setana chuan thu buai pawimawh tak eng nge a chawh chhuah?
• Engvângin nge harsatna kan tawhte hi mak kan tih loh vang?
• Engtin nge Jehova chuan chhel tûra min ṭanpui?
[Zirlai Atâna Zawhnate]
[Phêk 11-naa milemte]
Zir bingna neih te, Kristian mi puitlingte nêna inbiak te, leh ṭawngṭaia kan thinlung leihbuaknate hian chhel tûrin min ṭanpui thei