Sâm Bu 5-na Aṭanga Thu Pawimawh Hrilhfiahna
Jehova Thu Chu A Nung
Sâm Bu 5-na Aṭanga Thu Pawimawh Hrilhfiahna
MI HAUSATE chuan: “Thlai ṭhang duang ang maiin kan fapate ṭhang duang sela; kan fanute pawh lal in kil lung chher mawi ang lo ni se; kan buhzêmte lo khatin . . . kan berâmte pawhin no sâng tam tak . . . hring sela,” an ti mai thei a. Chu bâkah, a hausa pâwl chuan an thil neih chunga an lâwmzia an sawi mai thei bawk. Chu mi nêna inkalh takin, fakna hla phuahtu erawh chuan: “LALPA Pathiana nei mite chu lâwm takin an awm ṭhîn,” a ti thung a ni. (Sâm 144:12-15) Lâwmna bâk chu eng dang nge an neih theih tehrêng ang? Jehova chu fak tlâk Pathian, a nih loh leh atîra ziakin a târ lan angin Pathian hlim a ni a, hlimna chu amah betute chanpual a ni miau si a. (1 Timothea 1:10, 11) He thudik hi Pathian thâwk khum hla thlan khâwm hnuhnûng ber, Sâm 107 aṭanga 150 chuan a târ lang chiang hle.
Sâm Bu 5-na pawhin Jehova mize ṭha chungchuang, a ngilneihna te, a thutak te, leh a ṭhatna ang chi te chu a sawi uar bawk. Pathian mizia kan hriat tam poh leh amah hmangaih leh ṭih chu kan duh zual ang a. Chu chuan hlimna min pe chhâwng a ni. Sâm Bu 5-na aṭangin thu manhla kan va hmu tak êm!—Hebrai 4:12.
JEHOVA NGILNEIHNA AVANGA HLIMNA
(Sâm 107:1–119:176)
“Aw, mihringte hian LALPA chu a ngilneihna avâng leh, mihring fate chunga a thilmak tihte avâng hian fak teh sela aw!,” tiin Babulon sal tânna ata kîr lehte chu an zai a. (Sâm 107:8, 15, 21, 31) Davida chu Pathian fakin: “I thutak chuan vân dumte khi a tawng hial,” tiin a zai a ni. (Sâm 108:4) A dawta hlaah chuan: “Aw LALPA, ka Pathian, mi ṭanpui la; Aw i ngilneihna avângin mi chhandam ang che,” tiin a ṭawngṭai a. (Sâm 109:18, 19, 26) Sâm 110 hi Messia lalna hrilh lâwkna a ni. Sâm 111:10 chuan: “LALPA ṭihna chu finna bul a ni,” a ti. A dawta fakna hlain a sawi dân chuan, “LALPA ṭih mi chu a eng a thâwl” a ni.—Sâm 112:1.
Sâm 113 aṭanga 118 chuan “LALPA chu fak rawh u,” a nih loh leh “Halleluia,” tih a hman tam êm avângin, chûng chu Hallel Fakna Hlate tia koh a ni a. Kum zabi thumnaa lehkhabu siam Mishnah an tih tûn hmaa thurochhiahte ziaknain a sawi dân chuan, Judate chuan hêng hlate hi Kalhlen Kût leh kum tina kût vawi thum an neih hunah an sa ṭhîn. Fakna hlate zînga sei ber leh Bible-a bung sei ber Sâm 119-na chuan Jehova thuchahte chu a chawimawi a ni.
Bible Chungchânga Zawhnate Chhânna:
109:23—Davida’n: “Hlim ral lam tung tawh ang hian ka ral,” a tih khân eng a tihna nge ni? Davida chuan hla thu hmanga a thih hun a hnaih tawhzia a sawina a ni.—Sâm 102:11.
110:1, 2—“[Davida] lalpa,” Isua Krista chuan Pathian ding lama a ṭhut chhûngin eng nge a tih? Isua chuan a thawhleh hnua vâna a lâwn khân, Lal anga rorêl tûrin kum 1914 thleng Pathian ding lamah a nghâk reng a. Chutih chhûng chuan, Isua chuan hriak thih a hnungzuitute chungah rorêlin, thu hrilh leh zirtîr siamna hnaah anni chu a kaihruai a, a Lalrama rorêlpui atân anni chu a buatsaih bawk a ni.—Matthaia 24:14; 28:18-20; Luka 22:28-30.
110:4—Jehova chuan eng thilah nge ‘chhia a chham a, a lamlêt tawh loh vang’? He chhechham hi Lal leh Puithiam Lal anga rawngbâwl tûra Isua Krista nêna Jehova siam thuthlung hi a ni.—Luka 22:29.
113:3—Eng kawngin nge Jehova hming chu “ni chhuahna aṭanga a tlâkna thlengin” fak tûr a nih? Hei hi mihring awmkhâwm ho khatin nî tina Pathian chibai an bûkna mai a ni lo. Ni chhuahna khawchhak aṭanga a tlâkna khawthlang thlengin, ni chuan leilung zawng zawng chu a ên vek a. Chutiang bawkin, Jehova chu leilung zawng zawnga fak tûr a ni. Hei hi a huhova ṭan lâkna tel lova tih theih a ni lo va. Jehova Thuhretute kan nih angin, Pathian chawimawi theihna leh Lalram puanchhuahnaa ṭhahnemngai taka tel theihna chanvo hlu tak chu kan nei a ni.
116:15—Eng kawngin nge ‘Jehova mi thianghlimte [a nih loh leh, a mi rinawmte] thihna chu a ngaih chuan hlut tak a nih’? Jehova betu a mi rinawm zawng zawngte thih mang vek chu atân chuan thil hlu tak, a nih loh leh man to tak a nih avângin chânna ropui tak a ni dâwn a. A mi rinawm zawng zawngte thihna chu thlentîr phal ta se chuan, a hmêlmate chuan a aiin thil an tithei zâwk tihna a ni ang. Chu bâkah, leiah hian khawvêl thar din ṭantu tûr tumah an awm thei bawk lo vang.
119:71—Tihhrehawma awm a ṭhat chhan chu eng nge ni thei ang? Harsatna chuan Jehova chunga innghat lehzual tûr te, tih tak zeta ṭawngṭai tûr te, leh taima lehzuala Bible zir tûr leh a thusawite nunpui tûr tein min zirtîr thei a ni. Chu bâkah, hrehawmna kan chhân lêt dân chuan siam ṭhat ngai kan ṭhat famkim lohna laite chu a phawrh chhuak thei a. Hrehawm tawrhnain min siam ṭhat kan phal phawt chuan, chu chuan min tilunghnual lo vang.
119:96—“Ṭhat famkimna zawng zawng tâwp” tih chu eng tihna nge ni? Fakna hla phuahtu chuan mihringte thlîrna aṭanga ṭhat famkimna chungchâng a sawi a ni. Mihringte’n ṭhat famkimna an hriat dân hi a famkim lo tih rilrua a pai reng a rinawm. Inkalh takin, Pathian thupêkte chuan chutiangin tiam chin tâwk a nei ve lo. A kaihhruaina chu nun kawng engkimah a hman theih vek a ni.
119:164—Pathian chu ‘ni khata vawi sarih’ faknaah hian eng nge chhinchhiah tlâk? Number sarih chuan famkimna a entîr fo va. Chuvângin, fakna hla phuahtu chuan Jehova’n fakna zawng zawng a phu a tihna a ni.
Kan Zir Tûrte:
107:27-31. Armageddon a lo thlen hunah chuan, he khawvêl finna hian ‘awm ngaihna rêng rêng a hre lo’ vang. (Thu Puan 16:14, 16) Chu chuan boralna ata tumah a chhan chhuak thei lo. Chhandamna atâna Jehova nghâktute chauh chu ‘a ngilneihna fak’ thei tûrin an dam khawchhuak ang.
109:30, 31; 110:5. Ngûnhnâm vaina sipai kut ding lam chu kut vei lama ken ṭhin phâw chuan a vênghim thei lo tlângpui a. Jehova chu a chhiahhlawhte “ding lamah” an tâna râl dosak tûrin a awm tih theih a ni. Chutiang chuan humhimna leh ṭanpuina a pe a—chu chu ‘lâwm thu nasa taka sawi’ chhan tûr a va ni êm!
113:4-9. Jehova chu a sân êm avângin ‘vâna thil awmte pawh en tûra’ a intihhnuai a ngai a ni. Chutichung chuan, rethei te, pachhia te, leh hmeichhe ching te chungah khawngaihna a nei a. Lal Chungnungber Jehova chu a inngaitlâwm a, amah chibai bûktute pawh inngaitlâwm ve tûrin a duh a ni.—Jakoba 4:6.
114:3-7. Jehova’n a mite tâna Tuipui Sen te, Jordan Lui te, leh Sinai Tlâng tea a thilmak tihte hriatna chuan nasa takin min nghawng tûr a ni. ‘Leilungin’ a entîr mihringte chuan Lalpa avângin mak tihna an nei tûr a ni a, tehkhin thua han sawi chuan an “khûr” tûr a ni.
119:97-101. Pathian Thu aṭanga finna leh hriat thiamna kan dawn chuan thlarau lama chhiatna lakah min vênghim a ni.
119:105. Pathian Thu chu kan kê atân khâwnvâr a ni a; chu chu tûn laia buainate chingfel tûrin min ṭanpui thei tihna a ni a. Nakin hun atâna Pathian thiltum a sawi lâwk avângin, kan kawng a ên a tih theih a ni.
HARSATNA KARA HLIMNA
(Sâm 120:1–145:21)
Engtin nge dinhmun hrehawm takte hmachhawn theiin, harsatnaah kan dam khawchhuah theih ang? Sâm 120 aṭanga 134 hian chhânna fiah tak a pe a ni. Jehova ṭanpuina beiseina hmangin, harsatna kan pal tlang a, hlimna kan chhawmnung a ni. Hêng fakna hla, Chhoh Hla an tihte hi Israelte’n an kum tin kûtte hmang tûra Jerusalem an panna kawnga an sak a nih a rinawm.
Sâm 135 leh 136 chuan Jehova chu a duh ang apiang Titu angin a târ lang a, chu chu engmah tithei lo milemte nên chuan a inthlau hle. Sâm 136-na hi hla inchhâng atâna phuah a ni a, châng hnuhnûng lam chu a hmasa lam chhângtu atâna sak a ni. A dawta fakna hla chuan Zion tlânga Jehova be châk Babulon rama awm Judate rilru hrehawmna chu a târ lang a. Sâm 138 aṭanga 145 chu Davida phuah a ni. Ani chuan ‘thinlung zawng zawngin Jehova hnêna lâwm thu sawi’ a duh a ni. Engvângin nge? “Hlauhawm tak leh mak taka siam ka ni si a,” a ti. (Sâm 138:1; 139:14) Sâm 140 aṭanga 144-ah chuan, Davida chuan mi sual laka vênhimna te, zilhna fel te, tiduhdahtute laka chhan chhuahna te, leh nungchang lama kaihhruaina te a dîl a ni. Tin, Jehova mite hlimna chu a sawi uar bawk. (Sâm 144:15) Pathian ropuina leh ṭhatna a ennawn hnuah, Davida chuan: “Ka kâ hian LALPA fakna thu a sawi ang; tin, tîsa zawng zawng hian a hming thianghlim chu kumkhaw tlaitluanin fak rawh se,” a ti a ni.—Sâm 145:21.
Bible Chungchânga Zawhnate Chhânna:
122:3—Engtin nge Jerusalem chu ‘khawpui, rinawm taka rem’ a nih? Hmân lai khawpui dangte ang bawkin, Jerusalema inte chu a bichilh hle a. Khawpui chu a sakhat avângin humhim a awlsam a ni. Chu bâkah, inte a inhnaihna chuan khawpuia chêngte chu inṭanpui tûr leh invênghim tûra in rinchhan tawnna a awmtîr a. Hei hian Pathian be tûra Israel hnam 12-te an lo kal khâwm huna thlarau lama an inlungrualna chu a entîr a ni.
123:2—Chhiahhlawhte mit tehkhin thu hian eng nge a kawh? Chhiahhlawhte leh chhiahhlawhnute chuan an pu emaw, an pi emaw kut chu chhan pahnih—a duhzâwng hriat nân leh humhimna leh nuna thil mamawhte dawn nân—an en a ni. Chutiang bawkin, Jehova duhzâwng hriat nân leh a duhsakna dawng tûrin a lam chu kan en a ni.
131:1-3—Engtin nge Davida chuan ‘naupang hnute hne bâng tawh a nu hnêna awm angin, a nunna chu awi tleiin a tihkhui’? Naupang hnute hne bâng tawh chuan a nu ṭângah thlamuanna leh lungawina hmuh dân a zir ang chiahin, Davida chuan ‘naupang hnute hne bâng tawh a nu hnêna awm angin’ a nunna duhzâwng tihreh dân a zir a ni. Engtin nge? Rilru leh mit chapo neih lohna leh atâna thil ropui lutukte ûm lohna hmangin. Challanna zawn ahnêkin, Davida chuan a tlin lohnate chu hriain, inngaihtlâwmna a lantîr zâwk mah a. A bîk takin kohhrana rawngbâwlna chanvote kan chan hian, a rilru put hmang entawn chu a finthlâk a ni.
Kan Zir Tûrte:
120:1, 2, 6, 7. Mi sawichhiatna leh deuna ṭawngkamte chuan mi dangte chungah tawrh theih loh khawp lungngaihna a thlen thei a. Kan lei vên ṭhat hi ‘inrem kan duhzia’ lantîrna kawng khat a ni.
120:3, 4. “Lei bumhmang” nei tuemaw kan dawh a ngai a nih chuan, Jehova chuan a hun ruatah thil a chingfel dâwn tih hriatnaah chuan thlamuanna kan nei thei a ni. Sawichhetute chuan “mi chak” kut an tuar ang. Anni chuan “Juniper thing lingte” hian a entîr Jehova rorêlna mei chu an dawng ngei ngei ang.
127:1, 2. Kan thiltih apiangah, Jehova kaihhruaina kan zawng tûr a ni.
133:1-3. Jehova mite inlungrualna chu a ṭhain, mi a titlei a, min tihahdam sawng sawng a ni. Mi sualna zawn te, inhau te, a nih loh leh phunnawina te hmangin chu inlungrualna chu kan tichhe tûr a ni lo.
137:1, 5, 6. Sala hruai Jehova betute chuan an hun laia Pathian inawpna pâwl lei lam pêng, Zion chu an ngaina hle a. Keini hian kan ngaina ve em? Jehova hian tûn laia a hman inawpna pâwl chu rinawm takin kan vuan tlat em?
138:2. Jehova chuan ‘a thu chu a hming rêng rêng ai chuan a tilian’ a; chu chu a hminga a thutiam zawng zawngte thlen famkimna chuan kan beiseina engpawh a khûm vek dâwn tihna a ni. Kan hmaa awm beiseina chu a ropui ngei mai.
139:1-6, 15, 16. Jehova chuan kan thiltih, kan ngaihtuahna, leh thu kan sawi hmaa kan ṭawngkam chhuak tûrte thlengin a hre vek a. Ani chuan nu pum chhûnga rîruang la famkim lova kan awm lai ata min hria a ni. Pathianin a mi mala min hriatna chu hriat thiam phâk bâka “mak lutuk” a ni. Jehova chuan hrehawmna kan tawhte a hmu mai ni lovin, chu miin kan chunga nghawng a neih dân thlengin a hre thiam tih hriat chu a va thlamuanthlâk tak êm!
139:7-12. Kan kalna tûr khawi hmun pawh hi Pathian tân min tihchak phâk lohna tûr khawpin a hla lutuk lo.
139:17, 18. Jehova hriatna chu kan tân tui tak, a nih loh leh hlimawm tak a ni em? (Thufingte 2:10) A nih chuan, hlimna kangchat thei lo tuihna kan hmu tihna a ni. Jehova ngaihtuahnate chu “ṭiau vaivut aiin a tam zâwk” a. Chuvângin, a chanchin zir belh tûr kan nei reng ang.
139:23, 24. Jehova chuan chhûng rila “suahsualna kawng”—ngaihtuahna, duhna, leh châkna ṭha lote—kan neih leh neih loh min en fiah a, chûng chu paih chhuak tûra min ṭanpui chu kan duh tûr a ni.
143:4-7. Harsatna nasa takte chu engtin nge kan tawrh theih? Fakna hla phuahtu chuan tawrh theih dân min hrilh a ni, chûng chu: Jehova thiltihte ngaihtuahna te, a kut hnathawhte chhûtna te, leh ṭanpuina dîla ṭawngṭaina te a ni.
“LALPA Chu Fak Rawh U”
Fakna hla thlan khâwm bu hmasa palite chu Jehova fakna thuin a tâwp ṭheuh va. (Sâm 41:13; 72:19, 20; 89:52; 106:48) Hla thlan khâwm hnuhnûng ber pawh hi a bâng bîk lo. Sâm 150:6 chuan: “Engkim, thaw thei tawh phawt chuan LALPA chu fak rawh se. Lalpa chu fak rawh u,” a ti. Chu chu Pathian khawvêl tharah a tak a lo ni ngei ang.
Chu hlimna leh lâwmna hun kan nghah lai hian, Pathian dik chawimawi chhan tûr leh fak chhan tûr tam tak kan nei a. Jehova kan hriat leh ani nêna inlaichînna ṭha kan neih avânga hlimna kan neihte han ngaihtuah hian, thinlung hlim tak chunga amah fak tûra chêttîrin kan awm a ni lâwm ni? (w06 9/1)
[Phêk 19-naa milem]
Jehova thilmak tihte chu a hlauhawm hle
[Phêk 20-naa milem]
Jehova ngaihtuahnate chu “ṭiau vaivut aiin a tam zâwk”