Thuhnuairawlhte Chuan Lei An Rochung Ang

“Leilung hi inthlâkthlengin din thar leh a nih ka ring. . . . Tûnah tut tut ni lovin, tûn aṭanga hun rei tak, lei thar leh vân thar a awm hunah a ni ang.”​—⁠Jean-Marie Pelt, French environmental specialist.

CHHEHVEL leh mihring khawsak dân phungin a tihlungngaih mi tam tak chuan kan leilung hi paradis-a a chan chu an hmu duh ngei ang. Mahse, he beiseina hi kum zabi 21-na duhthusâm thil mai a ni lo. Hmân ata tawhin Bible chuan leia Paradis din thar leh a lo tiam a. Isua thu puan chhuah, ‘thuhnuairawlhte chuan lei hi an la rochung ang’ tih leh “i duhzâwng vâna an tih angin leia mi’n ti rawh se,” tih thute hi Bible bu chhûnga hriat hlawh ber pâwl a ni. (Matthaia 5:5; 6:10) Mahse, tûn lai hian thuhnuairawlhte rochun tûr lei paradis ringtu chu an beitham hle. Kristiana inchhâl tam takte tân Paradis beiseina chu a bo tawh a ni.

France rama chawlhkâr tina chhuak La Vie chanchinbu chuan, paradis chu lei emaw, vân emawa awm tûr pawh ni se, chu rinna chu hnuchhawn a nih chhan a hrilhfiah a, a lo berah Katholik Kohhranin a hnuchhawn dân chu sawiin: “Katholik zirtîrna chu kum 1900 vêl chhûng a thunun hnuah, paradis [ngaih dân] chu hmun fianriala an neih ṭawngṭaina hunah te, Chawlhni thusawiah te, Bible school-ah te, leh Katholik thurin thu-in-chhâng zirnaah te hian a lang tawh lo,” a ti. A thu mal hrim hrim pawh hi “hriatthiam theih loh leh buaina” “chhûmpui” hian a tuam vek niin a sawi bawk. Thuhriltu ṭhenkhat phei chuan a thu malin “lei lam hlimna ngaih dân tam tak a pêk avângin” an hmang lo lui tlat a ni.

Mipui vântlâng khawsak dân zirtu sakhaw lama mi thiam Frédéric Lenoir-a tân chuan paradis ngaih dân chu thil tlânglâwn tak leh ninawm tak a ni. Chutiang bawkin, Jean Delumeau-a, thilthleng chanchin ziaktu leh paradis chungchâng lehkhabu engemaw zât ziaktu chuan, Bible thutiamte hi a taka thleng famkim tûrah a ngai lo. Ani chuan: “He zawhna, ‘Paradis beiseina eng nge la awm?’ tih chungchângah hian Kristian rinna chuan: Chhandamtu thawhlehna zârah, engtik nîah emaw chuan la inzawm khâwmin, hlimna kan la hmu ta ve ang, tiin a chhâng a ni,” tiin a ziak a ni.

Lei lam paradis chanchin hi a la pawimawh zêl em? Eng nge kan leilungin a hmabâk chu? Kan nakin hun chu a fiah lo vem? Chu chu hmuh fiah theih a ni em? A dawta thuziak hian hêng zawhnate hi a chhâng ang. (w06 8/15)

 [Phêk 2-naa Thlalâk Hawhtîrtu]

COVER: Emma Lee/​Life File/​Getty Images