‘Vâna Mi Angin Leiah Pawh’

“Katholik thurin chuan Thil Hnuhnûngber Pali a sawi: Thihna, Rorêlna, Hremhmun, Vân Ram.”​—⁠Catholicism, edited by George Brantl.

MIHRINGTE tâna sawi he thil palite zîngah hian, lei chungchâng a tel lo tih chhinchhiah ang che. Chu chu a mak rêng rêng lo, Katholik Kohhran pawhin sakhaw dangte ang bawka leilung hi engtik nîah emaw tihchhiat a nih a rin avângin. Chu chu Katholik thurin ziakna Dictionnaire de Théologie Catholique tih lehkhabu chuan “Khawvêl Tâwpna” tih hnuaiah heti hian a târ lang: “Katholik Kohhran chuan Pathian siam leh tûna awm mêk khawvêl hi kumkhuain a awm reng lo vang tih a ringin, a zirtîr bawk a ni,” tiin. Tûn hnaia Katholik sakhaw thurin thu-in-chhâng pawhin he ngaih dân a chhawm bawk: “Kan khawvêl . . . hi boral tûra ruat a ni,” tiin. Mahse kan leilung hi boral dâwn ta sela, Bible tiam lei paradis chungchâng chu engtin nge ni ang?

Bible chuan nakina leia lo thleng tûr paradis chungchâng chiang takin a sawi a. Entîr nân, zâwlnei Isaia chuan lei leh a chhûnga chêngte chungchângah heti hian a sawi: “Inte an sa ang a, chûngah chuan an awm reng . . . ang; grêp huante an siam ang a, a rah an ei bawk ang. Mi  dang awmna tûrin in an sa tawh lo vang a, mi dang eiah grêp huan an siam tawh lo vang: thing dam chhûng nîte ang hian ka mite dam chhûng nîte chu a awm dâwn si a, ka mi thlante chu rei tak an thawh chhuah chungah chuan an lâwm dâwn a ni,” tiin. (Isaia 65:​21, 22) Pathianin hêng thutiamte a pêkna Judate chuan an ram​—⁠a ni, leilung zawng zawng⁠​—⁠​hi engtik nîah emaw chuan mihringte chatuan hamṭhatna tûrin paradis a lo ni ang tih an hre chiang a ni.

Sâm 37 chuan he beiseina hi a nemnghet a. “Thuhnuairawlhte . . . chuan ram hi an luah ang,” a ti. (Sâm 37:11) He Bible châng hian Ram Tiama Israel hnamte rei lo te chhûng din thar lehna thu a sawi lo. Fakna hla chuan: “Mi felte chuan ram hi an luah ang a, a chhûngah hian kumkhuain an awm ang,” tiin a hrilhfiah a ni. (Sâm 37:29) * He fakna hla hian leia chatuana nun hi “thuhnuairawlhte” dawn tûr lâwmman angin a sawi tih chhinchhiah ang che. He Bible châng chungchângah French ṭawng Bible pakhat chuan, “thuhnuairawlh” tih hian “ṭawng lehlinnaa a lan dân bâkin awmze zau zâwk a nei a; chutah chuan mi vânduai te, Yahweh avânga hrehawm tuarte leh tihduhdahte, Pathian laka intulût mi inngaitlâwmte chu an tel a ni,” a ti.

Leiah Nge Vânah?

Tlâng Chunga Thusawiah, Isua chuan a chunga kan târ lan tâk Bible châng min hriat chhuahtîrtu thutiam chu a siam a ni: “Thuhnuairawlhte chu an eng a thâwl e; lei hi an la rochung dâwn si a,” tiin. (Matthaia 5:⁠5) Lei hi mi rinawmte chatuan lâwmman tûr a ni leh ta. Amaherawhchu, Isua chuan a tirhkohte hnênah ‘a Pa inah’ an tân awmna tûr hmun a siamin, amah nên vânah an awm dâwn tih a sawi chiang hle. (Johana 14:​1, 2; Luka 12:32; 1 Petera 1:​3, 4) Chuti a nih chuan, lei lam malsâwmna thutiamte chu engtianga hriatthiam tûr nge ni ang? Chûng chuan kan tân pawimawhna a nei em? Chûng chu tute tân nge ni?

Bible lama mi thiam tam takte chuan Tlâng Chunga Isua Thusawia “lei” tih leh Sâm 37-a sawi lan hi leilung tak tak sawina a ni lo an ti a. Bible de Glaire lehkhabua ngaih dân a sawinaah, F. Vigouroux-a chuan hêng Bible chângte hi “tehkhin thua vân leh Kohhran a sawina” niin a hre tlat a. France mi Bible lama zir bingna nei, M. Lagrange-a sawi dân chuan, he thutiam hi “thuhnuairawlhte hnêna tûna an chênna lei rochun tiamna a ni lo va, tûn kal hmang emaw, nakina lei ṭha famkim tûr emaw tiamna lah a ni hek lo; a tiam chu khawi lai pawh lo ni se, vân ram hi a ni.” Bible zir bingna nei mi dang sawi leh dân chuan, chu chu “vân lam thil sawi nâna lei lam thil hmanna mai a ni.” Mi dang lehte tân chuan, “ram tiam, Kanaan chu tehkhinna anga hman a ni a, chu chuan thuhnuairawlhte luah atâna tiam chung lama mi Pathian ram a entîr a. Chu chu Sâm 37 leh hmun dang danga sawite awmzia chu a ni.” Mahse, Pathian thutiam ata leilung hi kan paihbo nghâl mai tûr a ni em?

Lei Atâna Chatuan Thiltum

Atîrin, leilung hian mihringte tâna Pathian thiltum nên tlang takin inkûngkaihna a nei a. Fakna hla phuahtu chuan: “Vânte khi LALPA vânte a ni a; leilung erawh hi chu mihring fate a pe a ni,” tiin a ziak. (Sâm 115:16) Chuvângin, mihringte tâna atîra Pathian thiltum chuan vân nên ni lovin, lei nên inzawmna a nei a ni. Jehova chuan mihring nupa hmasa te hnênah Eden huan chu lei pum puia zauh tûrin hna a pe a. (Genesis 1:28) He thiltum hi rei lo te tân mai a ni lo. Jehova chuan Bible-ah leilung hi chatuanin a awm dâwn tih a nemnghet a ni: “Chhuan khat an liam a, chhuan dang an lo chhuak a, lei hi erawh chu a awm reng mai,”  tiin.​—⁠Thuhriltu 1:4; 1 Chronicles 16:30; Isaia 45:⁠18.

Pathian thutiamte chu thleng famkim lovin a awm ngai lo, Chungnungbera a ni a, a tihthlen famkim ngei ngei ṭhin avângin. Vân aṭanga ruah leh vûr sûr chu tehkhin thua hmangin, Bible chuan Pathian thutiamte a thlen famkim ngei ngei dân a hrilhfiah a ni: “Ruah leh vûr chu vân aṭangin a sûr ṭhîn a, khi lamah khian a kîr leh ngai lo va, lei hi a châwm zâwk a, thil a ṭotîrin a chawrtîr a, . . . chutiang bawkin ka kâ aṭanga ka thu [Pathian thu] chhuak chu a awm ang: engmah tih nei lovin ka hnênah a kîr leh lo vang a, ka duh ang chu a tizo zâwk ang a, thil ti tûra ka tirhnaah chuan a hlawhtling bawk ang,” tiin. (Isaia 55:​10, 11) Pathianin mihringte hnênah thu a tiam a. Chu thutiamte a thlen famkim hmain hun engemaw zât chu a liam mai thei; mahse, thleng famkim lovin a awm ngai lo. A sawi zawng zawng ti zovin a hnênah a “kîr” ṭhîn zâwk a ni.

Jehova chuan leilung hi mihringte tâna siam chu a “duh” chiang hle a. Thil siam nî, a ni rukna tâwpah a thil siam engkim hi ‘ṭha a tih êm êm’ thu a sawi a ni. (Genesis 1:31) Leilung hi chatuan daih paradis-a siam chu Pathian thiltum la thleng famkim rih lote zînga mi a ni a. Mahse, Pathian thutiam chu ‘engmah tih nei lovin a hnênah a kîr leh lo vang.’ Mihringte remna leh muanna neia chatuana an nunna tûr, leia nun ṭha famkim tiamna zawng zawng chu a lo thleng famkim ang.​—⁠Sâm 135:6; Isaia 46:⁠10.

Pathian Thiltum Chu Mathei Lovin A Hlawhtling

Kan nu leh pa hmasa ber, Adama leh Evi te sualna chuan lei hi paradis-a chantîr tûra atîra Pathian thiltum chu rei lo te chhûng a tikhaihlak a. An thuawih loh hnuah, huan ata hnawhchhuah an ni. Chutichuan mihring ṭha famkimte lei paradis-a awmtîr tûra Pathian thiltuma an chanvo neih chu an hloh a ni. Chutichung chuan, Pathianin a thiltum tihpuitlin nân ruahmanna a siam zêl a ni. Engtin nge a siam?​—⁠Genesis 3:​17-19, 23.

Eden huna dinhmun chu in hmun ṭha taka in sak tum mi pakhat dinhmun nên a inang a. A lungphûm a han phûm hnuah, tuemaw lo kalin a lungphûm phûm chu a rawn tichhia a ni. In satu chuan a in sak tum tihtâwp aiin, sak zawh ngei tumin hma a la zâwk a. Chu hna thawh belh ngai atân pawisa sên tam zâwk pawh ngai mah sela, atîra sak a tum anga sak zawh ngei chu a finthlâk a ni tih rinhlelh rual a ni lo.

Chutiang bawkin, Pathian chuan a thiltum hlen nân ruahmanna a siam a. Kan nu leh pa hmasa berte’n thil sual an tih hnu lawkah, an thlahte tân beisei tûr​—⁠chhiatna thlengte sût lêttu tûr “thlah” chungchâng​—⁠a puang nghâl a ni. He hrilh lâwkna thlen famkimnaah hian, thlah bul ber chu mihringte tlan nâna leia lo kala a nunna hlântu Pathian Fapa, Isua hi a ni. (Galatia 3:16; Matthaia 20:28) Vâna a thawhleh hnu chuan, Isua chu Lalrama Lalber a lo ni ang a. A bul berah chuan ani hi thuhnuairawlh lei rochungtu ber a ni a, Lalrama a rorêlpui ni tûra vân lama kaihthawh mi rinawm thlan bîkte chu a rochunpui ang. (Sâm 2:​6-9) Nakinah chuan, he sawrkâr hian atîra Pathian thiltum tifamkim tûr leh leilung hi paradis-a chantîr tûrin, lei a rawn awp ang. Mi thuhnuairawlh chhiarsên lohte pawhin Isua Krista leh a rorêlpuite rorêlna he Lalram awpna hlâwkpuina hmangin, “lei an rochung” ang.​—⁠Genesis 3:15; Daniela 2:44; Tirhkohte 2:​32, 33; Thu Puan 20:​5, 6.

 ‘Vâna Mi Angin Leiah Pawh’

Tirhkoh Johana inlârna hmuhah chuan he vân lam leh lei lama chhandamna chi hnih hi târ lan a ni a. Ani chuan Krista zirtîr mi rinawmte zîng ata thlan chhuah vân lalṭhutphaha ṭhu lalte chu a hmu a. Bible chuan hêng Krista ṭhiante chungchângah “leiah chuan ro an rêl a,” tiin a sawi fak a ni. (Thu Puan 5:​9, 10) Thuah hniha Pathian thiltum thlen famkimna hi chhinchhiah teh​—⁠Isua Krista leh a ro luahpuite hmanga din vân Lalram kaihhruaina hnuaia lei siam thar chu. Hêng Pathian thil ruahmante hian atâwpah chuan atîra Pathian thiltum nêna inmila lei lam Paradis din thar lehna chu a awmtîr dâwn a ni.

Lal ṭawngṭainaah, Isua chuan a zirtîrte chu Pathian duhzâwng ‘vâna mi anga leiah pawh’ tih ni tûra dîl tûrin a sâwm a. (Matthaia 6:​9, 10) Lei hi a boral emaw, vân ram sawina mai emaw a nih chuan hêng thute hian awmzia a nei ang em? Chutiang bawkin, mi fel zawng zawngte hi vânah lâwn ta se, he ṭawngṭaina hian awmzia a nei ang em? Lei atâna Pathian duhzâwng chu Bible-a thil siam chanchin aṭanga Thu Puan bua inlârna thlengin, chiang takin a lang a. Lei hi Pathian tum ang ngeiin paradis a lo ni ngei ang. Hei hi Pathian duhzâwng a thutiam lo thleng famkim tûra chu a ni a. Leia mi rinawmte chuan chu a duhzâwng chu thleng famkim tûrin an ṭawngṭai a ni.

Leia chatuana nunna hi atîra Siamtu Pathian ‘danglam lova’ thiltum chu a ni. (Malakia 3:6; Johana 17:3; Jakoba 1:17) He magazine, Vênnainsâng hian kum zabi khat chuang chhûng chu Pathian thiltum thlen famkimnaa he hmêlhmang pahnih hi a hrilhfiah tawh a. Hei hian Bible-a awm lei siam ṭhat lehna thutiamte hre thiam tûrin min ṭanpui a ni. He mi chungchâng hi Jehova Thuhretute nêna sawihona emaw, he magazine chhuahtute biak pawhna emaw hmanga bih chiang lehzual tûrin kan sâwm a che. (w06 8/15)

[Footnote]

[Phêk 4-naa milem]

Bible chuan nakina leia Paradis din chungchâng chiang takin a sawi

[Phêk 7-naa milem]

Lei hi boral tûr a nih chuan Isua Lal ṭawngṭaina hian awmzia a nei ang em?