Hmangaihnain A Tihchak Huaisenna
Hmangaihnain A Tihchak Huaisenna
“Pathianin hlauhna thlarau min pe lova, thiltihtheihna leh hmangaihna leh rilru fel tak neihna thlarau min pe zâwk si a.”—2 TIMOTHEA 1:7.
1, 2. (a) Hmangaihnain mi chu engti tûrin nge a tur theih? (b) Engvângin nge Isua huaisenna chu a danglam bîk?
INNEI hlim nupa tuak khat chuan Australia khawchhak lam tuipui kama khaw pakhat bulah chuan oxygen bûr nên tui an liluh a. An rawn chhuah dâwn ṭêpah chuan, hring ei sangha lian (white shark) chuan a hmeichhia zâwk chu chak takin a rawn pan a. Huaisen taka chêt lain, a mipa chuan a nupui chu a nawr kiang a, a aiah sanga pui chu a ineitîr ta zâwk a ni. A vuinaah a nupui chuan: “Ka tân a nunna a pe a ni,” tiin a sawi a ni.
2 Ni e, hmangaihna chuan mihringte chu huaisenna langsâr tak lantîr tûrin a tur thei a ni. Isua Krista ngei chuan: “Mihringin a ṭhian aia a nun a paih aliama hmangaihna nasa zâwk tuman an nei lo,” tih a sawi a. (Johana 15:13) Hêng thute a sawi hnu dârkâr 24 pawh a ral hmain, mi pakhat tân chauh ni lovin, mihring zawng zawng tân ama nunna ngei chu a pe a ni. (Matthaia 20:28) Chu bâkah, Isua chuan a nunna chu thâwklehkhata huaisenna avânga pe a ni lo. Ani chuan nuihsawh te, sawisak te, a chunga dik lo taka rorêl te, leh nghaisakna bana tihhlum a nih tûr te chu a hre lâwk sa a. He thilthleng tûr atân hian a zirtîrte pawh buatsaihin, heti hian a sawi a ni: “Ngai teh u, Jerusalem khuaah kan chhoh dâwn hi; Mihring Fapa hi puithiam lalte leh lehkhaziaktute hnênah mantîrin a awm dâwn a ni; tin, anni chuan thi tûrin a chungah thu an titlu ang a, Jentailte hnênah an pe ang; tin, anni chuan nuihza siam nân an hmang ang a, chil an chhâk ang a, an vua ang a, an tihlum ang,” tiin.—Marka 10:33, 34.
3. Engin nge Isua chu huaisenna nasa tak neihtîr?
3 Engin nge Isua chu huaisenna danglam bîk tak neihtîr? Rinna leh Pathian ṭihna chuan hmun pawimawh tak a chang a. (Hebrai 5:7; 12:1, 2) Mahse, a pawimawh berah chuan Isua huaisenna chu Pathian leh a mihringpuite a hmangaihna aṭanga lo chawr chhuak a ni. (1 Johana 3:16) Rinna leh Pathian ṭihna bâkah chutiang hmangaihna kan neih ve chuan, Krista neih ang huaisenna chu kan lantîr ve thei ang. (Ephesi 5:2) Engtin nge chutiang hmangaihna chu kan neih theih ang? A lo Chawr Chhuahna Hnâr chu kan hriat a ngai a ni.
“Hmangaihna Hi Pathian Laka Chhuak A Ni”
4. Engvângin nge Jehova chu hmangaihna lo Chhuahna Hnâr tia sawi theih a nih?
4 Jehova chu hmangaihna chhinchhiahna ber leh chu mi lo Chhuahna Hnâr a ni. Tirhkoh Johana chuan: “Duh takte u, i inhmangaih tawn ṭheuh ang u; hmangaihna hi Pathian laka chhuak a ni si a; mi tin hmangaihna nei apiang Pathian hrin an ni tawh a, Pathian an hre bawk a. Hmangaihna nei lo chuan Pathian a hre lo; Pathian chu hmangaihna a ni si a,” tiin a ziak a ni. (1 Johana 4:7, 8) Chuvângin, miin hriatna dik hmanga Jehova a hnaih hunah leh thinlung taka thuawihna hmanga chu hriatna mila thil a tih hunah chauh chuan Pathian neih ang hmangaihna chu a nei thei a ni.—Philippi 1:9; Jakoba 4:8; 1 Johana 5:3.
5, 6. Engin nge Isua zuitu hmasate kha Krista neih ang hmangaihna nei tûra ṭanpui?
5 A tirhkoh rinawm 11-te nêna a ṭawngṭaina hnuhnûng berah, Isua chuan Pathian hriatna leh hmangaihnaa ṭhan chhohna inkûngkaih dân târ langin: “An hnênah i hming ka hriattîr a, ka hriattîr leh fo vang; nangin kei min hmangaihna kha anmahniah a awm a, kei pawh anmahnia ka awm theihna tûrin,” a ti a. (Johana 17:26) Isua chuan a zirtîrte chu amah leh a Pa inkâra awm ang hmangaihna nei tûra ṭanpuiin, Pathian hmingin a entîr—Pathian mize ropui takte—chu a ṭawngkam chhuak leh entawn tûr siamna hmangin a târ lang a ni. Chuvâng chuan, Isua chuan: “Tupawh mi hmu chu Pa hmu a ni,” tiin a sawi thei a ni.—Johana 14:9, 10; 17:8.
6 Krista neih ang hmangaihna chu Pathian thlarau thianghlim rah chhuah a ni a. (Galatia 5:22) Kristian hmasate’n C.E. 33 Pentikost nia thlarau thianghlim pêk tiam an dawn khân, Isua’n anmahni a zirtîr thil tam takte an hre chhuak mai ni lovin, Pathian Lehkha Thu awmzia chu an hre thiam lehzual bawk a ni. He hriat thiamna thûk zâwk hian Pathian an hmangaihna chu a tipung a ni tih a chiang hle. (Johana 14:26; 15:26) Eng nge a rah chhuah? An nunna ngei pawh chân huamin, huaisen tak leh taima takin chanchin ṭha chu an hril a ni.—Tirhkohte 5:28, 29.
Huaisenna leh Hmangaihna Lantîr A Ni
7. Paula leh Barnabate khân an missionary zinnaah eng nge an tawrh?
7 Tirhkoh Paula chuan: “Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zâwk si a,” tiin a ziak a. (2 Timothea 1:7) Paula chuan ama thiltawn ngei a sawi a ni. Barnaba nêna missionary-a an zin laia an thiltawn kha han ngaihtuah teh. Antiokei, Ikonion, leh Lustra pawh tiamin khaw tam takah thu an hril a. Khaw tinah chuan, ṭhenkhat chu ringtu an lo ni a; mahse, mi dangte chu dodâltu kawlh tak an lo ni ṭhîn. (Tirhkohte 13:2, 14, 45, 50; 14:1, 5) Lustra khuaah phei chuan mipui thinur chuan Paula chu lungin an dêng a, a thi emaw tiin an kalsan hial a nih kha! “Nimahsela zirtîrhote chu a vêla an din laiin, a lo tho va, khuaah chuan a lût leh ta a. Tin, a tûkah chuan Barnaba nên Derbe khuaah an kal ta a.”—Tirhkohte 14:6, 19, 20.
8. Engtin nge Paula leh Barnabate lantîr huaisenna chuan mite an hmangaihzia a târ lan?
8 Mipuiin Paula tihhlum an tumna chuan thu hrilhna chawlhsan tûr khawpin amah leh Barnaba chu a tihlau em? Tihlau lo ve! Derbe khuaah “zirtîr tam tak an siam hnuin,” anni chu “Lustra khuaah te, Ikonion khuaah te, Antiokei khuaah te an kîr leh zêl a.” Engvângin nge an kîr? Mi tharte chu rinnaa chak reng tûra fuih nân a ni. Paula leh Barnaba chuan: “Hrehawm tam tak tuarin Pathian ramah kan lût tûr a ni rêng a ni,” an ti. An huaisenna chu Krista “berâmte” an hmangaihna thûk tak aṭanga lo awm a ni tih a chiang hle. (Tirhkohte 14:21-23; Johana 21:15-17) Kohhran thara upate an ruat hnuah chuan, an pahnih chuan ṭawngṭaiin, upa tharte chu “an rin Lalpa hnênah chuan an kawltîr zêl ṭhîn a.”
9. Eng kawngin nge Ephesi khuaa upate chuan Paula hmangaihna chu an chhân lêt?
9 Paula chu mi dangte ngaihsak tak leh huaisen tak a nih avângin, Kristian hmasa tam takte chuan amah an hmangaih hle a. Paula chuan Ephesi khuaa kum thum a thang lai khân dodâlna nasa tak a tâwk a, chu mi khuaa upate a kawm laia thilthleng kha hre chhuak teh. (Tirhkohte 20:17-31) An hnêna kawltîr Pathian berâmte ngaihsak tûra a fuih hnu chuan, an ruala ṭhingṭhiin Paula chu a ṭawngṭai a. Tichuan, “an za chuan an ṭap zawih zawih a, Paula chu pawmin an fâwp ngawih ngawih a, a hmêl an hmuh leh tawh loh tûr thu a sawi chu an lungngaihna ber a ni.” Hêng unaute hian Paula an va hmangaih tak êm! An kal hun a lo thlen meuh chuan, Paula leh a zinpuite chuan ‘an ṭhen’ a ngai a, tualchhûng upate chuan kaltîr an hreh hle a ni.—Tirhkohte 20:36–21:1.
10. Engtin nge tûn laia Jehova Thuhretute chuan hmangaihna huaisen an inlantîr?
10 Tûn laiah, bial kantu te, kohhran upa te, leh mi dang tam takte chu Jehova berâmte tâna huaisenna an lantîr avângin hmangaih an hlawh a. Entîr nân, tualchhûng indonain a tihchhiat ramte emaw, thu hrilh rawngbâwlna khapna ramte emawa bial kantute leh an nupuite chuan an nunna leh an zalênna chân huamin kohhrante chu an tlawh a ni. Chutiang bawkin, Thuhretu tam tak chuan Thuhretu dangte an hêk loh emaw, thlarau lam chaw an dawnna an puan duh loh emaw avângin rorêltu râwng takte leh an hnuaia mite kut chu an tuar a ni. Mi dang sâng têlte chuan chanchin ṭha hrilhna leh Kristian inkhâwmnaa an rinpuite nêna inhmuh khâwmna an bânsan duh loh avângin tihduhdahna te, nghaisakna te, leh tihhlumna hial te pawh an tâwk a ni. (Tirhkohte 5:28, 29; Hebrai 10:24, 25) Chûng unau huaisen takte rinna leh hmangaihna chu i entawn ang u!—1 Thessalonika 1:6.
In Hmangaihna Dai Suh Se
11. Eng kawngtein nge Setana’n Jehova chhiahhlawhte chu thlarau lamah a do va, eng nge an tih ngai?
11 Setana leia paih thlâk a nih khân, Jehova chhiahhlawhte’n ‘Pathian thupêkte zâwma Isua hriattîrna thu an pawm’ avângin an chunga a thinurna hrîkthlâk chu a tum nasa hle a. (Thu Puan 12:9, 17) Diabola thil hman pakhat chu tihduhdahna a ni. Mahse, Pathian mite chu Kristian hmangaihnaa insuih khâwm tûr leh an zînga tam tak chu ṭhahnemngai lehzual tûra a chêttîr avângin, he tih dân hian a tum lohzâwngin nghawng a nei lêt fo ṭhîn. Setana thil hman dang leh chu mihring sual ngaihtuahna hîp nân a ni a. Hei hi kan thinlung ‘bumhmang ber leh chhe lailet dêr’ chhûnga awm duhna ṭha lote dona, chhûng lam indona a nih avângin, he ngamthlêmna do tûr hian huaisenna chi dang neih a ngai a ni.—Jeremia 17:9; Jakoba 1:14, 15.
12. Engtin nge Setana chuan Pathian kan hmangaihna tichau tûrin “khawvêl thlarau” a hman?
12 Setana râlthuam zînga thiltithei tak dang leh chu—“khawvêl thlarau” a ni a, chu chu Pathian thlarau thianghlim kalh chiah khawvêl rilru put hmang leh chêttîrtu bul ber hi a ni. (1 Korinth 2:12) Chu khawvêl thlarau chuan duhâmna leh hausak âtchilhna—“mit châkna”—chu a chawisâng a. (1 Johana 2:16; 1 Timothea 6:9, 10) Khawvêl thil leh sum leh pai chu amah mai chuan sual ni hran lo mah se, Pathian kan hmangaihna a luahlân chuan, Setana’n hnehna a chang tihna a ni. Khawvêl thlarau thiltihtheihna, a nih loh leh “thuneihna” chu tisa sual a hîpnaah te, a ngamthlêmnaah te, a nunrâwnnaah te, leh boruak anga a darhzaunaah te hian a lang a ni. In thinlung chu khawvêl thlarau inkaitîr suh ang che u!—Ephesi 2:2, 3; Thufingte 4:23.
13. Engtin nge nungchang thianghlimna vawng tûra kan huaisenna chu fiah a nih theih?
13 Mahse, khawvêl thlarau sual do nân leh hnâwl nân, kan nungchang thianghlimna vawng tûra huaisenna a ngai a. Entîr nân, lem dukdak lo a lan huna ennawm chhuahna hmun chhuahsan tûr emaw, a nih loh leh computer emaw, TV emaw hmet hlum tûr chuan huaisen a ngai a ni. Ṭhiante nêksâwrna hlauhawm hnâwl tûr leh ṭhian sual thlah tûr chuan huaisen a ngai bawk a. Chutiang bawkin, school-a ṭhiante emaw, hnathawhpuite emaw, ṭhenawmte, a nih loh leh chhûngkhatte emawin min nuihsawh hian Pathian dânte leh thu bulte vawng tlat tûrin huaisen a ngai a ni.—1 Korinth 15:33; 1 Johana 5:19.
14. Khawvêl thlarau kan kai a nih chuan eng nge kan tih ang?
14 A nih chuan, Pathian leh thlarau lama unaute kan hmangaihna tihpun sauh chu a va pawimawh tak êm! Kawng engemawti taka khawvêl thlarau i kai leh kai loh hre tûrin, i thil tumte leh i nun dân bih chiang ṭhîn rawh. I kai hlek a nih pawhin, phawi chhuaka paih bo tûrin Jehova hnênah huaisenna dîl rawh. Jehova chuan chutianga tih tak zeta ṭawngṭaina chu a ngaihthah lo vang. (Sâm 51:17) Chu bâkah, a thlarau chuan khawvêl thlarau aiin thil a tithei zâwk daih a ni.—1 Johana 4:4.
Mi Mala Kan Tawh Fiahnate Huaisenna Nêna Hmachhawnin
15, 16. Engtin nge Krista neih ang hmangaihna chuan mi mala kan tawh fiahnate hmachhawn tûra min ṭanpui? Entîrna pakhat pe rawh.
15 Jehova chhiahhlawhte hmachhawn fiahna dangte zîngah chuan, natna te, ramtuileilova awmna te, lunghnualna te, leh buaina dang tam takte awmtîrtu ṭhat famkim lohna leh tarna rahchhuahte a tel a ni. (Rom 8:22) Krista neih ang hmangaihna chuan hêng fiahnate hmachhawn tûr hian min ṭanpui thei a. Zambia rama Kristian chhûngkuaa sei lian Namangolwa-i entîrna hi han ngaihtuah teh. Kum hnih mi a nihin ramtuileilovin a awm ta mai a. Ani chuan: “Ka lan dânin mite a tihthlabâr ka rin avângin ka zak thei hle a. Mahse, ka thlarau lam unaute chuan ka ngaih dân thlâk tûrin min ṭanpui a ni. Chuvângin, ka zahna chu hnehin, a tâwpah chuan baptisma ka chang ta a ni,” a ti.
16 Namangolwa-i chuan ṭhutlirh (wheelchair) nei mah se, ṭiauvut awmna kawngah chuan a kut leh a khûp rinchhana a kal a ngai fo va. Mahse, a lo berah kum khatah thla hnih tal chu auxiliary pioneer thawkin rawngbâwlnaah a tel a ni. Namangolwa-i’n thu a han hrilh chuan in neitu pakhat chu a ṭap hlawl mai a. Engvângin nge? Kan unaunu rinna leh huaisenna chuan a rilru a khawi êm vâng a ni. Jehova’n mal a sâwm hle tih lantîrtu chu, Namangolwa-i Bible zirpui pangate chuan baptisma an chan a, an zînga pakhat chuan kohhran upa nia rawng a bâwl hi a ni. Ani chuan: “Ka ke nâ chuan min tur vawng vawng ṭhîn a; mahse, chu chuan ka thu hrilhna a dang chuang lo,” a ti. He unaunu hi taksa lama derdêp hle chung pawha Pathian leh ṭhenawmte hmangaihna avânga huaisen taka rawngbâwlnaa tel khawvêl puma Thuhretu tam takte zînga pakhat mai chauh a ni. Hêng mite hi Jehova tân an va duhawm tak êm!—Hagaia 2:7.
17, 18. Engin nge mi tam tak chu natna leh fiahnate tuar thei tûra ṭanpui? Tualchhûng entîrna ṭhenkhat pe rawh.
17 Natna benvawn vei chu a beidawnthlâkin, min tilunghnual hial thei a ni. Kohhran upa pakhat chuan: “Lehkhabu zirnaa ka telna group-a unaunu pakhat chuan zun thlum a veiin, a kal a ṭha lo bawk a, a dang pakhat chuan cancer a vei a, a dang pahnihte chuan ruhseh natna nasa tak an tuar a, a dang leh pakhat chuan vun natna chi khat lupus an tih leh tihrâwl natna chi khat fibromyalgia an tih chu a vei a ni. A châng chuan an lunghnual ve ṭhîn hle. Chutichung chuan, an na hle emaw, damdawi inah an awm emaw a nih chauh loh chuan inkhâwm an ṭhulh ngai lo. An vaiin thlawhhma rawngbâwlnaah an tel ziah a ni. Anni chuan: ‘Ka chak loh apiangin a ni ka chak ṭhin ni,’ tih Paula thusawi hi min hriat chhuahtîr a ni. An hmangaihna leh an huaisenna chu kan ngaisâng khawp mai. An dinhmun chuan nun leh thil pawimawh berte a ngaihsaktîr a ni ta ve ang,” a ti.—2 Korinth 12:10.
18 Dam lohna te, natna te, a nih loh leh buaina dang ṭhenkhat i tâwk a nih chuan, i lunghnual loh nân ‘bâng lova ṭawngṭaiin’ ṭanpuina dîl rawh. (1 Thessalonika 5:14, 17) Dik takin, rilru hnual châng leh ziaawm deuh châng i nei ngei ang a; mahse, thil phûrawm, thlarau lam thil, a bîk takin kan Lalram beiseina hlu tak chu ngaihtuah tum tlat rawh. Unaunu pakhat chuan: “Ka tân chuan thlawhhma rawngbâwlna chu damdâwi a ni,” a ti. Mi dang hnêna chanchin ṭha hrilhna chuan hlim hmêl pu tûrin a ṭanpui a ni.
Hmangaihnain Thil Tisualtute Chu Jehova Hnêna Kîr Leh Tûrin A Ṭanpui
19, 20. (a) Engin nge suala tlute chu Jehova hnêna kîr leh tûra huaisenna neihtîr? (b) A dawta thuziakah eng nge ngaihtuah a nih ang?
19 Thlarau lama chau emaw, thil tisual emaw tam tak chuan Jehova hnêna kîr leh chu awlsam an ti lo va. Mahse, chutiang mite chu an inchhîr tak zet a, Pathian an hmangaihna an tihthar chuan an mamawh huaisenna chu an nei ang. United States-a awm Mario-a * hi ngaihtuah teh. Mario-a chuan Kristian kohhran a chhuahsanin, zû leh damdawi ngawl vei a lo ni a, kum 20 hnuah chuan lung inah a tâng a ni. Mario-a chuan: “Ka nakin hun tûr leh Bible chhiar leh chu ngun takin ka ngaihtuah ṭan a. A hnuah chuan, Jehova miziate, a bîk takin ṭawngṭaia ka dîl ṭhin a khawngaihna chu ka hlut ṭan a ni. Lung in aṭanga chhuah ka nih hnu chuan, ka ṭhian hluite chu ka pumpelh a, Kristian inkhâwmnaah telin, a tâwpah chuan lâk luh leh ka ni a. Ka tisaah chuan ka tuh ang chu ka seng a; mahse, tûnah chuan beiseina ropui tak chu ka nei thei a ni. A lainatna leh a ngaihdamna avânga Jehova chunga ka lâwmna chu sawiin a siak lo,” a ti.—Sâm 103:9-13; 130:3, 4; Galatia 6:7, 8.
20 Dik tak chuan, Mario-a dinhmun anga dingte chuan Jehova hnêna kîr leh tûrin an thawhrim a ngai ngei mai a. Bible zirna te, ṭawngṭaina te, leh chhût ngunna te aṭanga an neih thar leh hmangaihna chuan an mamawh huaisenna leh tumruhna a pe dâwn a ni. Mario-a chu Lalram beiseina pawhin a tihchak bawk a ni. Ni e, hmangaihna te, rinna te, leh Pathian ṭihna te rualin, beiseina chu kan nun atâna ṭangkai chakna thiltithei tak a ni thei. A dawta thuziakah chuan he thlarau lam thilpêk hlu tak hi bihchian lehzual a ni ang. (w06 10/1)
[Footnote]
^ par. 19 Hming thlâk a ni.
I Chhâng Thei Em?
• Engtin nge hmangaihna chuan Isua huaisenna langsâr takah hmun a chan?
• Engtin nge unaute hmangaihna chuan Paula leh Barnaba chu huaisenna namên lo a neihtîr?
• Eng hmangin nge Setana’n Kristian hmangaihna tihreh a tum?
• Jehova hmangaihna chuan eng fiahnate nge tuar thei tûra huaisenna min pêk theih?
[Zirlai Atâna Zawhnate]
[Phêk 23-naa milem]
Paula’n mite a hmangaihna chuan beidawng lova thawk zêl tûrin huaisenna a pe
[Phêk 25-naa milem]
Pathian tehnate vawng tûr chuan huaisen a ngai
[Phêk 25-naa milem]
Namangolwa Sututu-i