“I Tleirawl Lai Nupuiah Chuan Hlim Rawh”
“I Tleirawl Lai Nupuiah Chuan Hlim Rawh”
“I tleirâwl lai nupuiah chuan hlim rawh . . . Eng atân nge, nang, ka fapa chuan hmeichhe sual i lawm ang?”—THUFINGTE 5:18, 20.
1, 2. Engvângin nge nupa inkâra hmangaihna awm chu malsâwmna a ni a tih theih?
BIBLE chuan mipat hmeichhiatna chungchâng a sawi hreh lo va. Thufingte 5:18, 19-ah chuan heti hian kan chhiar a ni: “I tuichhunchhuah chu malsâwmin awm sela, i tleirâwl lai nupuiah chuan hlim rawh. Zukpui duhawm tak leh zukchal nalh tak angin englai pawhin a ṭâng chhûng chuan tilungawi fo che sela, a hmangaihnaah chuan lâwm fo rawh,” tiin.
2 Heta “tuichhunchhuah” tih thu mal hian mipat hmeichhiatna lama lungawina hnâr a kâwk a. Nupa inkâra inhmangaihna leh lungawina chu Pathian thilpêk a nih avângin chu chu malsâwmna a ni. Mahse, he inlaichînna hi inneihna huang chhûng chauhva hman tûr a ni a. Chuvângin Thufingte ziaktu hmân lai Lal Solomona chuan heti hian a zâwt a ni: “Eng atân nge, nang, ka fapa chuan hmeichhe sual i lawm ang a, a ṭâng i pawm ang?” tiin.—Thufingte 5:20.
3. (a) Inneihna tam takte chunga thilthleng duhawm lo tak hi eng nge ni? (b) Pathianin uirêna hi engtin nge a thlîr?
3 An inneih nî chuan, mipa leh hmeichhia chuan inhmangaih tûr leh rinawm tawn tûrin thu an intiam a. Mahse, inneihna tam tak chu uirênain a tichhia a ni. Thil zir chîk mi pakhat chuan ngaih dân lâkna 25 lai a ennawn hnuah “nupuite zînga zaa 25 leh pasalte zînga zaa 44 te chuan an kawppui ni lote nên mipat hmeichhiatna an hmang” tiin thu tâwp a siam a ni. Tirhkoh Paula chuan: “Bumin awm suh u; inngaih hmangte emaw, milem betute emaw, uirête emaw, mi hurte emaw, mawngkawhurte . . . emawin Pathian ram an luah lo vang,” a ti. (1 Korinth 6:9, 10) Hei hi rinhlelh tûr a awm lo. Uirê hi Pathian mit hmuhah sual khûnkhân tak a ni a, betu dikte chu inneihnaa rinawm lohna lakah an invêng tûr a ni, tih hi. Engin nge ‘inneihna chawimawi tûr leh khum pawh tibawlhhlawh lo’ tûrin min ṭanpui ang?—Hebrai 13:4.
Thinlung Bumhmang Lakah Fîmkhur Rawh
4. Pawm lai nei Kristianin a hriat loh hlâna mi dang a ngaihzâwn theih dân kawng ṭhenkhat chu engte nge ni?
4 Tûn lai nungchang tlâk chhiatna boruakah hian, mi tam tak chuan “mit uirêa khat, sual bân thei lote an nei” a. (2 Petera 2:14) Anni chuan an kawppui ni lo mi dang ngaihzâwn tûr an melh a ni. Ram ṭhenkhatah chuan hmeichhe tam tak chuan hna an thawk a, mipa leh hmeichhia hnathawh tlânna chuan âwm lo taka office-a inngaihzâwnna hun ṭha a siamsak a. Chutah Internet chat room-te a awm leh a, chûng chuan mi zakzum thei ber tân pawh Internet hmanga mi dangte nên inṭhianna neih chu a tiawlsam hle. Pawm lai nei tam tak chu an chunga thilthleng pawh hre lovin, chutiang thangah chuan an âwk a ni.
5, 6. Engtin nge Kristian nu pakhat chu dinhmun hlauhawm taka a awm a, chuta ṭang chuan eng nge kan zir?
5 Mary tia kan koh mai tûr Kristian nu pakhat chu mipat hmeichhiatna suala a inhnamhnawih teuhzia han ngaihtuah ta ila. Thuhretu ni lo a pasal chuan a chhûngkaw chungah ngainatna a lantîr mang meuh lo va. Mary chuan kum engti emaw liam taa a pasal hnathawhpuite zînga pakhat a tawh chungchâng a ngaihtuah lêt a. Chu pa chu a hawihhâwm viau va, a hnu lamah phei chuan Mary sakhuana a ngaihven thu a sawi hial. Mary chuan: “Mi ṭha tak a ni, ka pasal lakah chuan a danglam hle mai,” a ti. A hnu lawkah Mary leh a pasal hnathawhpui pa chu an inngaizâwng ta a. “Ka uirê pawh a ni lo va, ani hian Bible lam thu a ngaihven bawk si. Ka ṭanpui thei mai thei asin,” tiin Mary chu a inngaihtuah a ni.
6 An inngaihzâwnnain uirêna a thlen hmain, Mary chu a inhmu chhuak a. (Galatia 5:19-21; Ephesi 4:19) A chhia leh ṭha hriatna chuan hna a thawk ṭanin, thil awm dân chu a siam ṭha a ni. Mary thiltawn hian “thinlung hi thil zawng zawng aiin bumhmang ber, chhe lailet dêr a ni” tih a hril chiang hle. (Jeremia 17:9) Bible chuan: “Thil dang bera aiin i thinlung vêng ṭha rawh,” tiin min fuih a ni. (Thufingte 4:23) Engtin nge kan vên theih?
‘Mi Hmanghria Chu A Biru Ṭhîn’
7. Inneihna lama harsatna tâwk tuemaw ṭanpui hunah, eng Bible thurâwn zuina nge invênhimna a nih?
7 Tirhkoh Paula chuan: “Dinga inring chu fîmkhur rawh se, chutilochuan a tlu dah ang e,” tiin a ziak a. (1 Korinth 10:12) Tin, Thufingte 22:3 chuan: “Mi hmanghria chuan thil ṭha lo chu a hmuhin a biru ṭhîn,” a ti bawk. Mahni inring tâwk taka, ‘Engtin mah ka awm lo vang,’ tih ai chuan, buaina thlen thei dinhmunte ngaihtuah chu a finthlâk a ni. Entîr nân, inneihnaa harsatna namên lo tâwktu mipatpui leh hmeichhiatpui ni lote’n harsatna an hrilhna ber ni suh ang che. (Thufingte 11:14) A hnênah chuan nupa nuna harsatnate chu a kawppui sawipui te, an inneihna tihchangtlun duhtu Kristian puitling mipain a mipatpui leh hmeichhiain a hmeichhiatpuite sawipui te, a nih loh leh upate sawipui te chu a ṭha ber tih hrilh ang che. (Tita 2:3-5) He mi kawngah hian Jehova Thuhretute kohhrana upate hian entawn tûr ṭha tak an siam a. Upa pakhatin Kristian unaunu pakhat a mala a biak a ngaih hian, vântlâng hmuh theihin, Kingdom Hall hmun angahte a be ṭhîn a ni.
8. Hnathawhna hmunah eng anga fîmkhur nge pawimawh?
8 Hnathawhna hmun leh hmun danga inlaichînna awmtîr thei dinhmunte lakah fîmkhur rawh. Entîr nân, mipatpui leh hmeichhiatpui ni lote nêna hnathawh bân hnua hun rei tak chhûng hna thawh belhna chuan thlêmna a awmtîr thei a. Pawm lai nei i nih angin, i ṭawngkam chhuak leh i khawsa zia hmangin nangmahah beisei tûr a awm tawh lo tih lantîr ang che. Pathian ngaihsakna ûmtu i nih angin, inchhai derna emaw, silhfên leh inchei dân hmanga mi dangte ngaihsakna lâk emaw chu i duh lo ngei ang. (1 Timothea 4:8; 6:11; 1 Petera 3:3, 4) I pawm lai leh i fate thlalâk hnathawhna hmuna târna chuan ngaihsak zâwk tûr i nei tih nangmah leh mi dangte chu a hriattîr ang. Mi dang ngaihzâwn theih tûra awm loh leh an rawn ngaihzâwnna lo ngaihzamsak mai mai loh chu tum tlat rawh.—Joba 31:1.
“I Nupui, I Hmangaih Hnênah Chuan Nun Nuam Takin Awm Rawh”
9. Eng thil thleng chho hian nge inngaihzâwnna thar chu dolêt theih loh tûr khawp hial nihtîr thei?
9 Thinlung vêngṭha tûr chuan dinhmun hlauhawm pumpelh mai aia tam a ngai a. An kawppui ni lote ngaihvenna ringawt pawh chu nupa inkâra mamawh inngaihsak tawn tâwk lohzia lantîrtu a ni thei. Nupui chuan ngaihsak a hlawh lo reng emaw, pasal chuan sawisêl a hlawh reng emaw pawh a ni thei a. Vawilehkhatah—hnathawhna hmun emaw, Kristian kohhran emawa—mi dang chuan i kawppui laka i hmuh loh mizia ngei mai chu a nei tlat niin a lang thei bawk. Rei lo têah inngainatna a lo awm a, chu inlaichînna thar chu dolêt theih loh tûr khawp hial a lo ni ṭhîn. He thil thlen chhoh dân hian Bible thu: ‘Mi tin mahni châknaa hruai bo leh hîpin an awm a ni’ tih a dikzia a nemnghet a ni.—Jakoba 1:14.
10. Engtin nge nupate chuan an inlaichînna an tihngheh sauh theih?
10 Hmangaihna dawn nân a ni emaw, inṭhianna atân a ni emaw, a nih loh leh hun khirh tawh chhûnga thlâwptu atân a ni emaw pawh ni se, nupate chuan an châknate tireh tûra pâwn lama mi zawn ai chuan an inlaichînna tihngheh tumin ṭan an la zâwk tûr a ni. Chuti chu, hunte hmang dûnin, theih tâwp chhuahin inhnaih sauh tum ang che u. Atîra i hmangaih chhante ngaihtuah rawh. Tûna i kawppui lo ni ta i duhnate kha neih leh chu tum rawh. Hun nuam tak in hman laite ngaihtuah lêt rawh. He mi chungchângah Pathian hnênah ṭawngṭai rawh. Fakna hla phuahtu Davida chuan Jehova hnênah: “Aw Pathian, keimahah hian thinlung thianghlim tak siam la; ka kawchhûngah hian thlarau dik tak siam thar leh ang che,” tiin a ngên a ni. (Sâm 51:10) ‘Ni hnuaia a pêk che i hun chhûng zawng chuan i nupui, i hmangaih hnênah chuan nun nuam taka awm’ chu tum tlat rawh.—Thuhriltu 9:9.
11. Hriatna te, finna te, leh hriat thiamna te hian inneihna tihnghehna kawngah eng chanvo nge a neih?
11 Inneihna tihnghehna kawnga hmuh hmaih hauh loh tûr chu hriatna te, finna te, leh hriat thiamna te hlutna hi a ni. Thufingte 24:3, 4 chuan: “Finna in chu sak a ni a, hriat thiamnain tihngheh a ni. Tin, hriatna avângin pindan chu sum hlu tak leh duhawm taka tihkhahin a awm,” a ti. Chhûngkaw hlim awmtîrtu thil hlu dangte zîngah chuan hmangaihna te, rinawmna te, Pathian ṭihna te, leh rinna ang chi mizia te a tel a ni. Hêngte nei tûr hian Pathian hriatna neih a ngai a. Chuti chu, nupa kawpte chu Bible zirlai taima tak an nih a ngai a ni. Tin, finna leh hriat thiamna hi eng anga pawimawh nge a nih? Nî tina buainate hlawhtling taka tiveng tûr chuan finna, Bible hriatna hman thiamna chu neih a ngai a. Hriat thiamna neitu chuan a kawppui ngaihtuahna leh rilru veizâwngte chu a hre thei a ni. (Thufingte 20:5) Jehova chuan Solomona hmangin: “Ka fapa, ka finna ngaithla la, ka hriatnaah i beng dawh rawh,” tiin a sawi.—Thufingte 5:1.
‘Hrehawmna’ A Awmin
12. Engvângin nge nupate’n harsatna an tawh hi thil mak a nih loh?
12 Inneihna hi duhthusâma famkim a awm lo. Bible chuan nupui leh pasalte chuan “tisaah chuan hrehawm an tuar ang” a ti hial a ni. (1 Korinth 7:28) Lungkhamna te, natna te, tihduhdahna te, leh thil dang dangte chuan nupate chungah harsatna a thlen thei a. Mahse, Jehova tihlâwm tum nupa rinawm in nih angin, harsatna a lo thlen hian a tihven dân in zawn dun a ngai a ni.
13. Eng thilahte nge nupate chuan mahni an inenfiah ang?
13 Mahse, nupate an incheibâwl dân avângin harsatna lo awm ta se engtin nge ni ang? A tihven dân zawng tûr chuan ṭan khawh a ngai a ni. Entîr nân, ṭawngkam ngilnei lo tak chu nupa inkârah lo tlazepin, tûnah chuan tih ṭhin dân lo ni tawh ta se. (Thufingte 12:18) Thuziak hmasaa sawiho tawh angin, hei hian nghawng ṭha lo tak a nei thei a ni. Bible thufing pakhat chuan: “[Nupui] ân hmang leh phunchiar nêna awm ai chuan thlalêr rama awm a ṭha zâwk,” a ti. (Thufingte 21:19) Chutiang nupui i nih chuan, heti hian inzâwt rawh, ‘Ka rilru put hmang hian ka pasal tân ka kianga awm a tiharsa em?’ tiin. Bible chuan pasalte hnênah: “In nupuite hmangaih ula, an lakah vîn suh u,” a ti a. (Kolossa 3:19) Pasal i nih chuan, heti hian inzâwt rawh, ‘Ka khawsa zia chu khawngaihna tel lo tak a niin, ka nupui chu hmun danga thlamuanna zawn duhna a neihtîr em?’ tiin. A chhan chu engpawh ni sela, mipat hmeichhiatna sual atân inthiam chawp theihna tûr a awm lo rêng rêng. Chutichung pawhin, chutiang chhiatna râpthlâk tak a thleng thei hi inpawh taka harsatna sawiho chhan tûr ṭha tak a ni.
14, 15. Engvângin nge inneihna pâwn lama mi zawn chu nupa buaina tihvenna a nih loh?
14 Mi dang va ngaihzâwnna hmanga inhnem tum chu nupa buaina tihvenna a ni lo. Chutiang inlaichînna chuan khawiah nge min hruai theih? Inneihna thar leh ṭha zâwkah hian em ni? Ṭhenkhat chuan chutiang a nih chu an ring mai thei. ‘Tihah chuan, ani hian ka kawppui neih atâna ka duh tak miziate a nei alâwm,’ an ti ṭhîn. Mahse, chutiang ngaihtuahna chu a dik lo, a kawppui kalsan theitu—a nih loh leh i kawppui kalsan tûra fuihtu che—chuan inneihna thianghlimna chu a zah lo rêng rêng a ni. Chutiang inlaichînnain inneihna ṭha zâwk a thlen beisei chu a finthlâk lo.
15 Atîra kan sawi tâk Mary chuan a thiltihin amah ngei emaw, mi dang emaw chu Pathian duhsakna a hlohtîr theihzia pawh tiamin, a rah chhuah tûr chu mûk takin a ngaihtuah a. (Galatia 6:7) Ani chuan: “Ka pasal hnathawhpui chunga ka rilru put dân ka han chhût hian, he pa hian thutak hriat theihna hun ṭha a nei ngai dâwn a nih chuan, chu mi kalhin thil ka ti a ni dâwn tih ka hre chhuak a. Thil sual tihna hian a tel zawng zawngte chungah nghawng ṭha lo tak a nei ang a, mi dang a titlu bawk dâwn a ni,” a ti.—2 Korinth 6:3.
Chêttîrtu Chak Ber
16. Nungchang bawlhhlawhna sawh khâwk ṭhenkhat chu engte nge ni?
16 Bible chuan: “Hmeichhe sual hmui ata khawizû a far a, a hmui chu hriak aiin a nâl si; a tâwpna erawh chu sai angin a kha a, khandaih hriam tawn angin a hriam,” tiin a vaukhân a. (Thufingte 5:3, 4) Nungchang bawlhhlawhna sawh khâwk chu a hrehawmin, chu chuan thihna hial a thlen thei a ni. Chûng zîngah chuan chhia leh ṭha hriatna tihbuai te, mipat hmeichhiatna avânga inkaichhâwn theih natna kai te, a rinawm zâwk rilru nasa taka tihhrehawm te a tel a ni. Hei hi nupa rinawm lohna thlen thei kawng zawh ṭan loh chhan tûr a ni chiang hle.
17. Nupa inkâra rinawmna vawn chhan ber chu eng nge ni?
17 Inneihnaa rinawm lohna hi thil dik lo a nih chhan bul ber chu, inneihna Bul ṭantu leh nupa inpâwl theihna Petu, Jehova’n a dem vâng a ni. Zâwlnei Malakia hmangin, Ani chuan: “Rorêl tûrin ka rawn hnaih dâwn a che u; dawithiamte, uirête . . . chungah chuan thu hretu ṭuanṭha tak ka ni ang,” a ti a ni. (Malakia 3:5) Jehova thil hmuh chungchângah, Thufingte 5:21 chuan: “Mihring kawngte chu LALPA mithmuhah a awm,” a ti. A ni, “kan chanchin kan thlenna tûra mithmuhah chuan engkim saruak leh inhawng sain a awm zâwk a ni.” (Hebrai 4:13) Chuti chu, a rûk thei ang berin lo rinawm lo mah ila, a sawh khâwk chu tisa lam leh khawtlâng atâna eng anga tê tham pawhin lang sela, nupa inkâra rinawmna vawng tûra min chêttîrtu ber chu mipat hmeichhiatna lama bawlhhlawhna thiltih engpawh hian Jehova nêna kan inlaichînna a tichhia tih hriatna hi a ni.
18, 19. Potiphara nupui laka Josefa thiltawn aṭangin eng nge kan zir?
18 Thlahtu Jakoba fapa, Josefa entîrna chuan Pathian nêna inrem duhna chu chêttîrtu thiltithei tak a ni tih a târ lang a. Pharaoa mi lian Potiphara mit a tlun avângin, Josefa chuan Potiphara in chhûngah duhsakna a dawng a ni. Tin, Josefa chu Potiphara nupuiin a hriat ngei angin “mi tlâwntlai ṭha tak a ni a, a hmêl pawh a ṭha hle a.” Nî tin mai hian Josefa chu a thlêm a, mahse a hlawhtling si lo. Engin nge Josefa chu chutiang thil sual dotîr? “Ani erawh chuan a duh lo va, a pu nupui hnênah chuan, ‘Ngai teh, ka pu chuan . . . a nupui i nih avângin nangmah chauh lo chu ka lakah engmah ui a nei . . . lo: chutichuan engtin nge he sual lian tak hi tiin Pathian chunga thil ka tihsual theih ang?’ a ti a,” tih Bible chuan min hrilh a ni.—Genesis 39:1-12.
19 Tlangvâl Josefa chuan mi dang nupui mutpui duh lovin nungchang thianghlimna chu a vawng a. Thufingte 5:15 chuan nupui neite hnênah: “Nangma tuibêl ata tui in la, nangma tuichhunchhuaha tui tharlâm chu,” a ti a ni. Hriat loh hlâna inneihna pâwn lama mi ngaihzâwnna lakah invêng rawh. In nupa inkâra inhmangaihna tihngheh tumin ṭan khawh la, in inkâra harsatna in tawh apiang chu tiveng tûrin thawkrim ang che. Chutichuan, ‘i tleirâwl lai nupuiah chuan hlim tum tlat rawh.’—Thufingte 5:18. (w06 9/15)
Eng Nge I Zir?
• Engtin nge Kristian chuan a hriat loh hlânin mi dang a ngaihzâwn theih?
• Inneihna pâwn lama mi ngaizâwng lo tûrin eng invênnain nge min ṭanpui thei?
• Nupate chuan harsatna an tawh hunah, eng nge an tih ang?
• Nupa inkâra rinawmna vawng tûra min chêttîrtu ber chu eng nge ni?
[Zirlai Atâna Zawhnate]
[Phêk 14-naa milem]
Lungchhiatthlâk takin, hnathawhna hmun chu âwm lo taka office-a inngaihzâwnna hmun ṭha tak a lo ni
[Phêk 15-naa milem]
‘Hriatna avângin pindan chu thil duhawm taka tihkhahin a awm ang’