Jehova Chu Beiseina Nen Nghak Reng La, Huaisen Rawh

“LALPA chu [beiseina nên] nghâk reng rawh; chak takin awm la, i thinlung chu intihuai rawh se; a ni, LALPA chu [beiseina nên] nghâk reng rawh.”​—⁠SAM 27:⁠14.

1. Beiseina chu engtianga pawimawh nge a nih a, Bible-ah chu thu mal chu engtia hman nge a nih?

BEISEINA dik tak chu êng fîm tak ang a ni a. Chu chuan fiahna awm mêkte piah lam hmu tûr leh huaisenna leh hlimna nêna nakin hun hmachhawn tûrin min ṭanpui a ni. Jehova chauhvin beiseina chiang tak min pe thei a, chu chu a thâwk khum Thu hmangin min pe a ni. (2 Timothea 3:16) Dik tak chuan “beisei” leh “beiseina” tih thumal hi Bible-ah vawi tam tak a chuang a, chu chu thil ṭha engemaw nghahhlelh leh a thlen ngei beiseina chiang tak sawina leh chu thil beisei ngei sawina chu a ni. * Chutiang beiseina chu nghahchhan nei lo leh thlen famkim pawh rinawm lêm lo duhzâwng sawina mai aiin a chungnung zâwk a ni.

2. Beiseina chuan Isua nunah eng hmun nge a luah?

² Isua chuan fiahna leh harsatna a tawhin, tûn hun mai piah lam enin, Jehova chu a beisei a. “Ani chuan a hmaa hlimna awm avâng chuan mualphona chu ngainêpin kraws [“nghaisakna ban,” NW] chu a tuar a, Pathian lalṭhutphah ding lamah khian a han ṭhu ta a.” (Hebrai 12:​1, 2) Isua chuan Jehova lal chungnunna thiam chantîrna leh A hming tihthianghlimna beiseina chu a ngaihsak tlat avângin, a Pathian thuâwihna nun kawng chuan chhiatna nasa tak pawh thlen mah se, chu kawng chu a pênsan ngai lo.

3. Pathian chhiahhlawhte nunah beiseina chuan eng hmun nge a luah?

³ Lal Davida chuan: “LALPA chu [beiseina nên] nghâk reng rawh; chak takin awm la, i thinlung chu intihuai rawh se; a ni, LALPA chu [beiseina nên] nghâk reng rawh,” tia sawiin beiseina leh huaisenna inkûngkaih dân chu a târ lang a. (Sâm 27:14) Kan thinlung tichak tûr chuan, kan beiseina chu chiang lo takin kan dah ngai tûr a ni lo va, chu beiseina chu rilrua vawng rengin kan hlut reng tûr a ni. Chutianga tihna chuan Isua’n thawh atâna min pêk zirtîr siamna hnaa  kan telnaah huaisenna leh ṭhahnemngaihna lantîrna kawnga amah entawn tûrin min ṭanpui ang. (Matthaia 24:14; 28:​19, 20) Dik takin, Bible-ah beiseina chu Pathian chhiahhlawhte nun chhinchhiahna mize pawimawh leh daihrei tak rinna leh hmangaihna nêna dah kawp a ni.​—⁠1 Korinth 13:⁠13.

‘Beiseina I Ngah’ Em?

4. Hriak thih Kristiante leh an ṭhian “berâm dang” chuan eng nge nghâkhlel taka an thlîr?

⁴ Pathian mite chuan hmabâk ropui tak an nei a. “Berâm dang” chuan ‘chhiatna bâwih ata tihchhuaha awm a, [lei lama] Pathian fate zalênna ropuia luh’ an inbeisei laiin, hriak thih Kristiante chuan vâna Krista nêna rawngbâwl chu an nghâkhlel hle a ni. (Johana 10:16; Rom 8:​19-21; Philippi 3:20) Chu “zalênna ropuiah” chuan sual leh chu miin a rah chhuah râpthlâk takte aṭanga chhanchhuahna a tel a ni. Dik takin, Jehova​—⁠“thilpêk ṭha leh thilpêk famkim zawng zawng” Petu⁠​—⁠​chuan a mi rinawmte hnênah hêng aia nêp zâwk chu a pe hauh lo vang.​—⁠Jakoba 1:​17; Isaia 25:⁠8.

5. Engtin nge ‘beiseina kan ngah’ theih?

⁵ Kristian beiseina chuan kan nunah engtiang khawpin nge hmun a chan ang? Rom 15:​13-ah heti hian kan chhiar a ni: “Thlarau thianghlim thiltihtheihna zârah beiseina in ngah theihna tûrin, beiseina Pathian chuan in rin avângin, lâwmna leh remna tinrêngin tikhat che u rawh se,” tiin. Ni e, beiseina chu thim zînga khâwnvâr chhit ên ang mai ni lovin, zîng ni êng tak nêna khaikhin theih a ni a, chu chuan kan nun chu remna te, hlimna te, thiltum te, leh huaisenna tein a tikhat a ni. Pathian Thu ziak kan rin a, a thlarau thianghlim kan dawn hian ‘beiseina kan ngah’ tih hi chhinchhiah rawh. Rom 15:4 chuan: “Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna turin ziak a ni si a,” a ti. Chuvâng chuan: ‘Bible zirlai taima tak leh nî tina chhiartu nihna hmangin ka beiseina chu kan dah nung em? Pathian thlarau ka dîl fo em?’ tiin inzâwt rawh.​—⁠Luka 11:⁠13.

6. Kan beiseina tifiah tûrin, eng lakah nge kan invên ang?

⁶ Kan Entawn tûr, Isua chuan Pathian Lehkha Thu aṭangin chakna a hmu a. Amah ngaihtuah tlatna hmangin, ‘thlarau lama inthlahdahna leh hahna’ kan pumpelh a ni. (Hebrai 12:⁠3) Pathian pêk kan beiseina hi kan rilru leh kan thinlunga a fiah loh emaw, thil dang​—⁠hausakna lam emaw, khawvêla thiltumte emaw​—⁠lama rilru pêkna emaw chuan rei lo têah thlarau lama chauhna min thlen theiin, a tâwpah phei chuan nungchang tehnate mila nun nâna mamawh chakna leh huaisenna min hlohtîr ang tia thutâwp siam chu a âwm a ni. Chu rilru put hmang chuan ‘rinna kawnga lawng keh anga keh chhiatna’ a thlen thei hial a ni. (1 Timothea 1:19) Kawng leh lamah chuan, beiseina dik tak chuan kan rinna a tichak thung.

Beiseina​—⁠Rinna Atâna Thil Pawimawh

7. Eng kawngin nge rinna atân beiseina chu a pawimawh?

⁷ “Rinna hi thil beiseite awm ngeia hriatna, thil hmuh lohte hriatfiahna a ni,” tih Bible-in a sawi a. (Hebrai 11:⁠1) Chuvângin, beiseina chu rinna kaihhnawih thil mai ni lovin, a pêng pawimawh tak pakhat a ni zâwk a ni. Abrahama kha han ngaihtuah teh. Jehova’n ro luahtu tûr a tiam khân, Abrahama leh a nupui Sarite chu mihring thlîrna aṭang chuan fa nei thei rual an ni tawh lo va. (Genesis 17:​15-17) Engtin nge Abrahama’n a chhân lêt? “Beiseina âwm a awm loh pawhin ani chuan beisei takin a ring a, chi tam takte pa a lo nih theih nân.” (Rom 4:​18) Ni e, Pathian pêk Abrahama beiseina chuan fa a nei dâwn tih rinna nghet tak a pe a ni. A rinna chuan, a beiseina chu tifiahin, a tichak lehchhâwng a. Chuvâng chuan, Abrahama leh Sarite chuan an in leh lo leh an chhûngkhatte kalsan a, an dam chhûng zawng mi ram puan ina khawsa tûrin huaisenna an nei hial a ni!

8. Engtin nge rinawm taka chhelna chuan beiseina a tihchak?

 ⁸ Abrahama chuan Jehova thuâwih a harsat hle châng pawha âwih tlatna hmangin a beiseina chu a tichak a ni. (Genesis 22:​2, 12) Chutiang bawkin, Jehova rawngbâwlnaa kan thuâwihna leh chhelna hmangin, malsâwmna dawn chu kan inring tlat thei a ni. “Chhelna” chuan “hriatfiahna” a siam a, chu chuan beiseina a siam leh a, “beiseina chuan a timualpho lo,” a nih loh leh lunghnualna a thlen loh thu Paula chuan a ziak a. (Rom 5:​4, 5) Chuvângin Paula chuan: “Tâwp thlenga beiseina famkim hmu tûrin in taihmâk pângngai ang khân taihmâk chhuah ṭheuh fo ula kan ti êm êm mai,” tiin a ziak bawk a ni. (Hebrai 6:11) Jehova nêna inlaichînna hnai taka innghat, chutiang rilru put hmang duhawm tak chuan harsatna eng pawh huaisen tak leh hlim taka hmachhawn tûrin min ṭanpui thei a ni.

‘Beiseina Kawngah Chuan Lâwm Rawh’

9. Eng thil tih ṭhinnain nge “beiseina kawngah chuan lâwm” tûra min ṭanpui thei?

⁹ Pathian min pêk kan beiseina chu khawvêlin min pêk theih thil eng ang ai pawhin a chungnung zâwk daih a. Sâm 37:34 chuan: “LALPA chu [beiseina nên] nghâk la, a kawng chu zawh rawh, tichuan ram hi luah tûrin a chawimawi ang che: mi suaksualte tihborala an awm lai chu i la hmu ang,” a ti. Ni e, “beiseina kawngah chuan lâwm” chhan tûr kan nei a ni. (Rom 12:⁠12) Amaherawhchu, chutianga lâwm tûr chuan kan beiseina chungchâng chu kan ngaihtuah reng tûr a ni a. Pathian pêk i beiseina chu i ngaihtuah ziah em? Hrisêlna ṭha neiin, lungkhamna laka fihlîm, i hmangaihte hual vêla awm, leh hna lungawithlâk tak thawhnaa tela Paradise-a awm angah i inmitthla thei em? Kan thu leh hla chhuaha târ lan Paradis lemte chungchâng chu i ngaihtuah neuh neuh vem? Chutiang ngaihtuah ṭhinna chu miin khaw mawi tak a thlîrna tukverh tihfai nên tehkhin theih a ni. Chu tukverh dârthlalang kan tihfai loh chuan a bâl chuan kan khaw thlîr a tifiah lovin, a mawina a tinêp thei a. Chuti chuan thil dangin kan ngaihsakna a la pêng thei a ni. Chutiang thil chu i thlentîr ngai lo vang u!

10. Engvângin lâwmman tûr kan beiseina chuan Jehova nêna kan inlaichînna ṭhatzia a târ lan?

¹⁰ Jehova rawng kan bâwl chhan ber chu amah kan hmangaih vâng a ni ngei mai a. (Marka 12:30) Chutichung chuan, lâwmman chu nghâkhlel takin kan thlîr tûr a ni. A nihna takah chuan, Jehova ngei chuan chutianga ti tûrin min beisei tlat zuk nia! Hebrai 11:6 chuan: “Rinna lovin ama lâwmzâwng mi nih rual a ni lo; Pathian hnêna lo kal chuanin, ani chu a awm tih leh zawngtute hnêna lâwmman pêk hmang a ni tih rin tûr a ni,” a ti. Engvângin nge Jehova chuan amah chu Lâwmman Petu anga kan thlîr a duh? Chutianga kan thlîr chuan kan Pa vâna mi kan hriat chianzia kan târ lang tihna a ni a. Ani chu thil phal tak leh a fate hmangaihtu a ni. Nakin hun “beiseina” nei lo ta ila chuan, kan hlim loh dân tûr leh kan lunghnual hma dân tûr hi han ngaihtuah teh.​—⁠Jeremia 29:⁠11.

11. Engtin nge Pathian pêk beiseina chuan Mosia chu thu tlûkna fing tak siam tûra a ṭanpui?

 ¹¹ Pathian pêk beiseina ngaihtuah tlattu entîrna langsâr tak pakhat chu Mosia hi a ni a. ‘Pharaoa fanua fapa’ a nih angin, Mosia chuan Aigupta rama thuneihnate, nihnate, leh hausaknate chu a hmang thei a. Hêng thilte hi a ûm dâwn nge, Jehova rawng a bâwl zâwk dâwn? Mosia chuan a hnuhnûng zâwk hi huaisen takin a thlang a ni. Engvângin nge? “Lâwmman pêk tûr chu a thlîr ṭhin avângin.” (Hebrai 11:​24-26) Ni e, Mosia chuan a hmaa Jehova dah beiseina chu a ngaihsak tlat a ni.

12. Engvângin nge Kristian beiseina chu lukhum ang a nih?

¹² Tirhkoh Paula chuan beiseina chu lukhum nên a tehkhin a. Kan entîr nei lukhum hian thu tlûkna fing siam tûr te, thil pawimawh dân indawta siam tûrte, leh rinawmna vawng tlat tûr tein kan rilru a vêng a ni. (1 Thessalonika 5:⁠8) Engtik lai pawhin i entîr nei lukhum chu i khum reng em? I khum a nih chuan, Mosia leh Paula angin, i beiseina chu ‘sum rinawm lovah nghat lovin, thil zawng zawng lâwmna tûra tam taka min petu Pathian chungah i nghat’ dâwn a ni. Mahni hmasialna kawng hnâwlna hmanga tûn lai chîn dân lârte kalh tûr chuan huaisen a ngai tak zet a; mahse, thawhrim a phu hle! Dik tak chuan, Jehova beiseitute leh hmangaihtute dawn tûr “nunna taktak” aia nêp zâwk thil chu engvângin nge kan pawm ang?​—⁠1 Timothea 6:​17, 19.

‘Ka Thlahthlam Tawp Lo Vang Che’

13. Jehova’n a chhiahhlawh rinawmte chu eng tiamkamna nge a pêk?

¹³ He kal hmanga an beiseina nghattute chuan khawvêlin ‘nau veina’ a tawrh chhoh zêl hian, thil râpthlâk tak an hmachhawnte chu an ngaihtuah mûk tûr a ni. (Matthaia 24:⁠8) Mahse, Jehova beiseitute chuan chutiang hlauhna an nei lo. Anni chu “him takin an awm ang a, thil ṭha lo hlau lovin an awm hle hle” zêl dâwn a ni. (Thufingte 1:⁠33) He khawvêla beiseina an nghah loh avângin, Paula zilhna hi lâwm takin an pawm a ni: “In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u; amah ngeiin, ‘Engtikah mah ka thlahthlam tawp lo vang chia, kal pawh ka kalsan tawp lo vang che,’ a ti si a,” tih hi.​—⁠Hebrai 13:⁠5.

14. Engvângin nge Kristiante chuan an tisa lam mamawh chu an lungkham lutuk a ṭûl loh?

¹⁴ “Engtikah mah,” “tawp lo vang”​—⁠hêng uarna ṭawngkamte hian Pathianin min ngaihsak dâwn tih a nemnghet a. Isua pawhin: “A ram leh a felna chu zawng hmasa zâwk rawh u, tichuan chûng zawng zawng [nun atâna mamawh thilte] chu a pêk belhchhah dâwn che u nia. Chutichuan atûk atân lungkham suh u, atûk chuan ama tân a lungkham chawp dâwn si a,” tia sawiin, Pathianin min ngaihsak dâwn tih min tiam bawk a ni. (Matthaia 6:​33, 34) Jehova chuan Lalram tâna ṭhahnemngai tak nih ruala kan taksa mamawh phuhru tûra mawhphurhna rit tak phurh chu kan tân a harsa tih a hria a ni. Chuvângin, kan mamawhte phuhru tûra a thiltihtheihna leh a duhna chu i ring thlap ang u.​—⁠Matthaia 6:​25-32; 11:​28-30.

15. Engtin nge Kristiante chuan ‘mit fîm’ an neih?

¹⁵ Kan ‘mit kan tihfîm’ hian Jehova chunga kan innghahzia kan târ lang a ni. (Matthaia 6:​22, 23) Mit tifîmtu chu a tak a, rilru thianghlim a nei a, duhâmna leh mahni ropuina ûmna lak aṭangin a fihlîm a ni. Mit fîm nei tih chu rethei taka nun emaw, tisa lam mamawh ngaihsak tûra kan Kristian mawhphurhna ngaihthah emaw tihna a ni lo. Jehova rawngbâwlna dah hmasak paha “rilru fel tak neihna” a ni zâwk.​—⁠2 Timothea 1:⁠7.

16. Engvângin nge mit fîm nei tûr chuan rinna leh huaisenna a ngaih?

¹⁶ Mit fîm nei reng tûr chuan rinna leh huaisenna neih a ngai a. Entîr nân, hna ruaitu chuan Kristian inkhâwm hun chhûnga hna thawk ziah tûrin a ngiat che a nih chuan, huaisen takin thlarau lam thil i dah pawimawh hmasa zâwk ang em? Jehova’n A chhiahhlawhte ngaihsak tûra A thutiam a hlen ringhleltu chuan Setana nêksâwrna a zual deuh hian inkhâwm zawng zawng a ṭhulh thei a ni. Ni e, keimahni lama rinna thlâkchhamna chuan kan thil dah pawimawhte chu Jehova ni lovin, Setana’n a thunun thei a ni. Chu chu a va râpthlâk dâwn êm!​—⁠2 Korinth 13:⁠5.

‘Jehova Chu Beiseina Nên Nghâk Rawh’

17. Engtin nge Jehova rinchhantute chu tûnah ngei pawh malsâwm an nih?

¹⁷ Pathian Lehkha Thu chuan Jehova beisei leh rinchhantute chu an hlawhchham ngai lo tih a târ lang fo va. (Thufingte 3:​5, 6; Jeremia  17:⁠7) A châng chuan, rethei deuhva awm châng an nei ngei ang; mahse, an dawn tûr malsâwmnate nêna khaikhin chuan, he an inpêkna hi thil tê tham takah an ngai a ni. Chuvângin, ‘Jehova chu beiseina nên an nghâk’ tih an lantîr a, a tâwpah chuan a mi rinawmte thinlung duhzâwng fel zawng zawng chu a pe dâwn tih an ring tlat a ni. (Sâm 37:​4, 34) Chuvângin, tûnah ngei pawh hian an hlim tak zet a ni. “Mi fel nghahfâk chu lâwmna a ni ang a, mi suaksual hmachhuan erawh chu a boral ang.”​—⁠Thufingte 10:⁠28.

18, 19. (a) Eng tiamna duhawm tak nge Jehova’n min pêk? (b) Engtin nge Jehova chu kan “ding lama” kan awmtîr?

¹⁸ Mipa naupang tê chuan a pa nêna kut invuana an kalin, him hle niin a inhria a. Kan Pa vâna mi nêna kan kal dun hian, kan tân pawh chutiang bawk chu a ni. Jehova chuan Israelte hnênah: “Hlau suh u, kei in hnênah ka awm si a: . . . ka ṭanpui ang che u; . . . Kei LALPA in Pathian hian, ‘Hlau suh u, ka ṭanpui dâwn a che u,’ tiin, in kut ding lam chu ka chelh dâwn si a,” tiin a sawi a ni.​—⁠Isaia 41:​10, 13.

¹⁹ Jehova’n kan kut a chelhna chuan hmangaihna chu a va phawk chiang tak êm! Davida chuan: “LALPA chu ka hmâah ka awmtîr fo va: ka ding lama a awm avângin ka nghîng lo vang,” tiin a ziak a ni. (Sâm 16:⁠8) Engtin nge Jehova chu kan “ding lama” kan awmtîr? A lo berah kawng hnihin kan awmtîr a ni. Kawng khatnaah chuan, kan nun kawng zawng zawng chu a Thu inkaihhruaitîrna; leh kawng hnihnaah chuan, Jehova’n kan hmaa a dah lâwmman ropui tak chu thlîrna hmangin a ni. Fakna hla phuahtu Asapha chu: “I hnênah ka awm fo va: ka kut ding lam hi i lo chelh ṭhîn a. Nangin i remruatnain mi hruai ang a, chu mi hnuah chuan ropuinaah khian mi lâwm ang,” tiin a zai a ni. (Sâm 73:​23, 24) Chutianga tiamna nên chuan, inring tâwk takin nakin hun chu kan hmachhawn thei tak zet a ni.

‘In Tlanna Tûr Chu A Hnai’

20, 21. Jehova beiseitute chuan eng hma bâk nge an neih?

²⁰ Nîte a liam zêl angin, kan ding lama Jehova awmtîr chu a hmanhmawhthlâk lehzual a. Rei lo têah, sakhaw dik lo tihtâwpna aṭanga inṭanin, Setana khawvêl chuan a la tawn ngai loh hrehawm nasa tak chu a tawng ang. (Matthaia 24:21) Rinna nei lote chu hlauhnain an khat ang. Mahse, chu buaina hun chhûng chuan, Jehova chhiahhlawh huaisen takte chu beiseinaah an hlim ang! Isua chuan: “Chûng thil chu a lo thlen tirhin, en chho ula, dâk chhuak rawh u; in tlanna tûr chu a hnaih tâk avângin,” tiin a sawi a ni.​—⁠Luka 21:⁠28.

²¹ Chuvângin Pathian pêk kan beiseinaah chuan i hlimin, rilru lâkpênna fing tak hmanga Setana bum emaw, thlêm emawin i awm lo vang u. Chutih rual chuan, rinna te, hmangaihna te, leh Pathian ṭihna te nei tûrin i thawkrim ang u. Chutianga kan tih chuan, dinhmun engpawh hnuaiah Jehova thuâwih tûr leh Diabola dodâl tûrin huaisenna kan nei ang. (Jakoba 4:​7, 8) Ni e, “LALPA beisei zawng zawngte u, chak takin awm ula, in thinlung chu intihuai rawh se.”​—⁠Sâm 31:⁠24. (w06 10/1)

[Footnote]

I Chhâng Thei Em?

• Eng kawngin nge Isua beiseina chuan huaisenna nei tûra a ṭanpui?

• Engtin nge rinna leh beiseina chu an inkûngkaih tawn?

• Engtin nge beiseina leh rinna chuan Kristian chu nuna ngaih pawimawh hmasak tûr ṭha tak insiam tûra huaisenna a pêk?

• Engvângin nge ‘beiseina nêna Jehova nghâktute’ chuan nakin hun chu inrin tâwkna nêna an thlîr theih?

[Zirlai Atâna Zawhnate]

[Phêk 29-naa milem]

Tar emaw, naupang emaw pawh ni la, Paradise-a awm angah i inmitthla thei em?