Rinna Leh Pathian Ṭihna Hmangin Huaisen Rawh
Rinna Leh Pathian Ṭihna Hmangin Huaisen Rawh
“Chak tak leh huai takin awm rawh . . . LALPA i Pathian chu . . . i hnênah a awm.”—JOSUA 1:9.
1, 2. (a) Mihring thlîrna aṭang chuan Israelin Kanaan a hneh theih a rinawm em? (b) Eng tiamkamna nge Josua’n a dawn?
ISRAEL hnam chu B.C.E. 1473 khân, Ram Tiama lût tûrin a inpeih a. An hmaa lo awm tûr harsatnate chungchângah, Mosia chuan mipui chu: “‘Anak-ho chu tuin nge chelh ang i?’ an tih ṭhin, in aia ropui leh thiltithei zâwk hnam, khawpui vân tawnga kulh nei leh ropui tak, mi lian tak sâng pui pui, in hriat tawh sa Anaka thlahte ram chu va luah tûrin tûnah chuan Jordan lui chu in kân dâwn ta a,” tiin a hriattîr a ni. (Deuteronomy 9:1, 2) Ni e, hêng mi hrâwl indo mite hi an hmingthang tak zet a ni! Chu bâkah, Kanaan hnam ṭhenkhat chuan sakawr leh thîr tawlailîrte hmanga ṭha taka thuam sipaite chu an nei a ni.—Rorêltute 4:13.
2 Kawng leh lamah chuan, Israel hnam chu bâwih ni tawh ṭhîn, thlalêrah kum 40 thang hlim hlawl kha a ni a. Chuvângin, mihring thlîrna aṭang chuan an hneh theih a rinawm lo hle. Mahse, Mosia chuan rinna a nei a; Jehova’n anmahni a kaihruai tih a ‘hmu’ thei a ni. (Hebrai 11:27) Mosia chuan mipuite hnênah: “LALPA in Pathian chu . . . in hmaa kal ṭhîna chu a ni . . . ani chuan anni chu a tiboral ang a, a tihtlâwmsak ang che u,” tiin a hrilh a. (Deuteronomy 9:3; Sâm 33:16, 17) Mosia thih hnu chuan, Jehova’n Josua hnênah: “Tho la, nang leh hêng mipuiho zawng zawngte nên hian Jordan lui hi kân ula, anmahni, Israela thlahte ka pêk ramah chuan kal rawh u. I dam chhûng zawng tumah rêng rêngin an chelh lo vang che: Mosia hnêna ka awm ang khân i hnênah pawh ka awm ve dâwn e,” tia sawiin ṭanpui A tiam a ni.—Josua 1:2, 5.
3. Engin nge Josua chu rinna leh huaisenna neihtîr?
3 Jehova ṭanpuina leh a kaihhruaina dawng tûrin, Josua chuan Pathian Dân chu a chhiarin, a chhût ngun tûr a ni a, a nunpui tûr a ni bawk. Jehova chuan: “Tichuan i kawngte chu i lo titluang zel ang a, i lo hmuingîl zêl dâwn nia. Thu ka pe che a ni lâwm ni? Chak tak leh huai takin awm rawh; hlau suh la, zâm hek suh: LALPA i Pathian chu i kalna apiangan i hnênah a awm zêl dâwn alâwm,” a ti. (Josua 1:8, 9) Josua’n Pathian thu a ngaihthlâk avângin, huaisen tak leh chak takin a awm a, a kawng chu a tluang a ni. Mahse, a dam rualpui a tam zâwkte chuan Pathian thu an ngaithla lo. Chu mi avâng chuan, an kawng a tluang lo va, thlalêrah an boral a ni.
Rinna Nei Lote Chuan Huaisenna An Tlachham
4, 5. (a) Engtin nge enthlatu sâwmte rilru put hmang leh Josua leh Kaleba te rilru put hmang chu a inan loh? (b) Engtin nge Jehova’n mipuite rinna tlâkchhamna chu a chhân lêt?
4 A hma kum sawmli-a Israelte’n Kanaan an luh dâwn khân, Mosia chuan ram enthla tûrin mi 12 a tîr a. Sâwmte chu hlau chungin an lo kîr leh a. Anni chuan: “A awmte kan hmuh chu mi âwmkhauh pui pui an ni a. Tin, chutah chuan Anaka thlahte, mi lianho, âwmkhauh pui pui kan hmu a; khau ang lekin kan in hmu,” tiin an rûm a ni. Anaka thlahte chauh ni lovin, chuta “a awmte” zawng zawng chu mi lianho hlîr an ni em? Ni lo ve. A nih leh, Anaka thlahte chu Tuilêt hmaa Nephilim mi lianho thlah an ni em? An ni rêng rêng lo! Hêngtianga thil a nihna bâka an sawi avâng hian mipuite chu nasa takin an hlau va. Sal an tânna ram, Aiguptaa kîr leh chu an duh ta hial a ni.—Number 13:31–14:4.
5 Amaherawhchu, enthlatute zînga pahnih, Josua leh Kaleba chuan Ram Tiama luh chu an nghâkhlel hle a. Anni chuan Kanaanho chu “kan chaw tûr an ni mai a: LALPA chu kan hnênah a awm alâwm, anni chu hlau suh u,” an ti a. (Number 14:9) Josua leh Kaleba te khân thil âwm lo tak an beisei lek a ni lo maw? Beisei hauh lo ve! Anni chuan a hnam pum rualin, Jehova’n Aigupta chak tak a tihtlâwm leh Hri Sâwm hmanga an pathiante a tihmualpho chu an lo hmu tawh a. Tin, Jehova’n Pharaoa leh a sipai rual Tuipui Sena a tihpil vek pawh an hmu tawh bawk a ni. (Sâm 136:15) Hlauhna lantîrtu enthlatu sâwmte leh an tihhlauha awmte chuan chhuan lam tûr an nei lo chiang hle. Jehova chuan: “An zînga chhinchhiahna ka tih ṭhin chung pawhin eng chen nge mi rin loh dâwn?,” tia sawiin a tawrh natzia a târ lang a ni.—Number 14:11.
6. Eng kawngin nge huaisenna leh rinna a inkûngkaih a, engtin nge chu chu tûn lai hunah a lan?
6 Jehova chuan mipuite dâwihzep chhan chu rinna an tlâkchham vâng a nihzia sawiin, buaina lo chhuahna bul ber chu a sawi lang a ni. Ni e, rinna leh huaisenna chu a inkûngkaih hnai hle a, chuvângin tirhkoh Johana chuan Kristian kohhran leh chu miin a hmachhawn thlarau lam indona chungchângah: “Hei hi a ni, khawvêl hneha ngamna chu, kan rinna hi,” tiin a ziak thei hial a ni. (1 Johana 5:4) Tûn laiah hian, Josua leh Kaleba te neih ang rinna chuan Jehova Thuhretu apui apang, a chak leh chak lo maktaduai ruk chuangte hmanga khawvêl puma Lalram chanchin ṭha hrilhna chu a awmtîr a ni. Hmêlma tumah hian he pâwl chak tak leh huaisen tak hi an ngawihtîr thei lo.—Rom 8:31.
“Hnungtawlh” Suh
7. “Hnungtawlh” tih hi eng tihna nge ni?
7 Tûn laia Jehova chhiahhlawhte chuan: “Keini zawng boral tûra hnungtawlh pâwla mi kan ni lo va; nunna humhim tûra rinna nei pâwla mi kan ni zâwk,” tia ziaktu tirhkoh Paula rilru put hmang ang an neih avângin, chanchin ṭha chu huaisen takin an hril a ni. (Hebrai 10:39) Pathian chhiahhlawh rinawm tam takte chuan hlauh châng an neih avângin, “hnungtawlh,” tih sawi nâna Paula Grik thu mal hman hian, rei lo te chhûng hlauhna avânga hnungtawlhna a kâwk lo. (1 Samuela 21:12; 1 Lalte 19:1-4) Chu chu “thutak chelhnaa inthlahdah” sawina a ni tih Bible dictionary pakhat chuan a hrilhfiah a. Tin, Pathian rawngbâwlna chungchângah “lawng puanzâr tihhniamna hmanga lawng kal lai tihmuanna” thiltih sawina ṭawngkam a hmang a ni thei bawk tih a sawi belh a ni. Dik takin, rinna chak tak neite chuan tihduhdahna emaw, natna emaw, a nih loh leh fiahna dangte emaw pawh ni se, harsatna a lo thlenin ‘lawng kal lai tihmuan,’ a nih loh leh inthlahdah chu an ngaihtuah lo. Chu aimah chuan, Jehova’n a ngaihsak tak zet tih leh an tlin lohna a hria tih hre reng chungin rawngbâwlnaah hma lam an pan zêl a ni. (Sâm 55:22; 103:14) Chutiang chi rinna chu i nei em?
8, 9. (a) Engtin nge Jehova’n Kristian hmasate rinna chu a tihchak? (b) Kan rinna tichak tûrin eng nge kan tih theih?
8 Ṭum khat chu tirhkohte chuan rinna tlachham nia an inhriat avângin, Isua hnênah: “Kan rin tiphui deuh vang che,” an ti a. (Luka 17:5) Tih tak zeta an dîlna chu chhânsak a ni a, a bîk takin, thlarau thianghlim pêk tiam chu C.E. 33 Pentikost-a tirhkohte chunga a lo thlen a, Pathian Thu leh a thiltum hriatthiamna thûk zâwk a pêk khân, chhânsak a ni. (Johana 14:26; Tirhkohte 2:1-4) An rinna tihchak a nih tâkah chuan, zirtîrte chuan thu hrilhna beihpui an thlâk ṭan a, tihduhdahna an tâwk chung pawhin chanchin ṭha chu ‘vân hnuaia thil siam zawng zawngte zîngah’ an hrilh a ni.—Kolossa 1:23; Tirhkohte 1:8; 28:22.
9 Kan rinna tichak tûr leh kan rawngbâwlnaa hma lam pan zêl tûr chuan keini pawhin Pathian Lehkha Thu kan zirin, leh kan chhût ngunin, thlarau thianghlim chu kan dîl tûr a ni. Josua, Keleba, leh Kristian zirtîr hmasate tih anga kan rilru leh thinlunga Pathian thutak nemkaina hmang chauhvin, thlarau lam indonaa chhel nân leh hnehna chan nâna kan mamawh huaisenna min petu rinna chu kan nei ang.—Rom 10:17.
Pathian A Awm Tih Rin Mai A Tâwk Lo
10. Rinna dikah hian eng nge tel?
10 Hman laia rinawmna vawng nghettute târ lan angin, huaisenna leh chhelna awmtîrtu rinnaah chuan Pathian a awm tih rin satliah mai aia tam a tel a. (Jakoba 2:19) Jehova chu mi tak tak anga kan hriat leh amaha rinna pumhlûm kan neih chu a ngai a ni. (Sâm 78:5-8; Thufingte 3:5, 6) Chu mi awmzia chu, Pathian dânte leh a thu bulte ngaihsak chu kan tâna thil ṭha ber a ni tih kan thinlung zawng zawnga rin hi a ni. (Isaia 48:17, 18) Rinnaah chuan Jehova’n a thutiam zawng zawng a hlen ang a, “zawngtute hnêna lâwmman pêk hmang a ni” dâwn tih rin thlapna a tel bawk.—Hebrai 11:1, 6; Isaia 55:11.
11. Eng kawngin nge Josua leh Kaleba chu an rinna leh huaisenna avânga malsâwm an nih?
11 Chutiang rinna chu thil che châng lo a ni lo. Thutak kan nunpui a, a hlâwkna kan ‘tem chhin’ a, kan ṭawngṭaina chhânna kan hmuh a, leh kawng danga Jehova’n kan nun a kaihruai tih kan hriat hian kan rinna chu a ṭhang chho a ni. (Sâm 34:8; 1 Johana 5:14, 15) Josua leh Kaleba te’n Pathian ṭhatna an tem chhin khân, an rinna chu tihchak lehzualin a awm ngei ang tih kan chiang thei a ni. (Josua 23:14) Hêng hi han ngaihtuah teh: Pathian tiam ang ngeiin, thlalêra kum 40 chhûng an thangnaah an dam khawchhuak a. (Number 14:27-30; 32:11, 12) Kum ruk chhûnga Kanaan ram lâknaah a challang pâwl an ni a. A tâwpah chuan, dam reina leh hrisêlna ṭha tak pêk an niin, anmahni puala rochan tûr pawh an dawng hial a ni. Jehova chuan rinawm tak leh huaisen taka a rawngbâwltute chu mal a va sâwm tak êm!—Josua 14:6, 9-14; 19:49, 50; 24:29.
12. Engtin nge Jehova’n ‘a thu a tihlen’?
12 Josua leh Kaleba chunga Pathian ngilneihna chuan fakna hla phuahtu thu: “I thu chu i hming rêng rêng ai chuan i tilian ta si a,” tih a dikzia min hriat chhuahtîr a. (Sâm 138:2) Jehova’n a hming chhâla thu a tiam hian, a thlen famkimna chu kan beiseina engpawh khûmin a “tilian” a ni. (Ephesi 3:20) Ni e, Jehova chuan a ‘chunga lâwmte’ chu a tilunghnual ngai lo.—Sâm 37:3, 4.
“Pathian Lâwmzâwng” Mi Pakhat
13, 14. Engvângin nge Enoka chuan rinna leh huaisenna a mamawh?
13 Kristian hun hmaa thuhretu, Enoka entîrna siam ngaihtuahin, rinna leh huaisenna chungchâng tam tak kan zir thei a. Enoka chuan thu a hrilh lâwk hma aṭang rêngin a rinna leh huaisenna chu fiah a ni dâwn tih a hriat ngei a rinawm. Engtin nge a hriat? Jehova chuan Eden huanah khân Pathian rawngbâwltute leh Diabol Setana rawngbâwltute inkâra inhmêlmâkna, a nih loh leh inhuatna a awm tûr thu a sawi vâng a ni. (Genesis 3:15) Enoka chuan Kaina’n a unaupa Abela a thah khân chu inhuatna chu mihring chanchin tîr lamah a chhuak nghâl tih a hre bawk. Dik takin, Kaina leh Abela pa, Adama chu Enoka pian hnu kum 310 dâwn lai thleng a dam a ni.—Genesis 5:3-18.
14 Mahse, chûng thilte hre chung pawhin Enoka chu ‘Pathian dik nên an lêng dûnin,’ mite’n Jehova chunga “thu khauh tak” an sawi chu huaisen takin a dem a ni. (Genesis 5:22; Juda 14, 15) Biakna dik atâna chutianga huaisen taka a dinna chuan Enoka chu mi tam takte hmêlmaah siamin, a nunna hial pawh hlauhawmah a dah a. Chu mi ṭumah chuan Jehova’n a zâwlnei chu thihna a temtîr lo a ni. Jehova chuan Enoka hnêna “Pathian lâwmzâwng mi a ni tih” a hriattîr hnuah, nunna ata thihnaah a ‘la bo’ a ni, chu chu inlârnaa a rilru zawng zawng a pêktîr laiin a ni thei ang.—Hebrai 11:5, 13; Genesis 5:24.
15. Eng entîrna ṭha nge tûn laia Jehova chhiahhlawhte tân Enoka’n a siam?
15 Paula chuan Enoka lâk bo a nih thu a târ lan zawh ve leh rinna a pawimawhzia sawi lehin: “Nimahsela rinna lovin [Pathian] lâwmzâwng mi nih rual a ni lo,” a ti a. (Hebrai 11:6) Ni e, Enoka rinna chuan Pathian nêna lêng dûn tûr leh Pathian ngaihsak lo khawvêl chunga A rorêlna thu puang chhuak tûrin huaisenna a pe a ni. Chu mi chungchângah chuan, Enoka’n kan tân entawn tûr ṭha a siam a. Biakna dik dodâlna leh sual tinrênga khat khawvêlah hian chutiang hna bawk chu thawh tûr kan nei a ni.—Sâm 92:7; Matthaia 24:14; Thu Puan 12:17.
Pathian Ṭihna Aṭanga Neih Huaisenna
16, 17. Tunge Obadia chu ni a, eng dinhmunah nge a din?
16 Rinna bâkah, huaiseina awmtîrtu mize dang a awm a, chu chu Pathian ṭihna a ni. Zâwlnei Elija hun lai leh Lal Ahaba’n Israel hmâr lam lalram a awp laia awm Pathian ṭih mi entîrna siam langsâr tak chu ilo ngaihtuah ang u. Ahaba lal lai chuan, Baala biakna chuan hmâr lam lalram chu a chiahpiah hneh hle a. Baal zâwlnei 450 leh Aseri zâwlnei 400-te chuan Ahaba nupui ‘Jezebeli dawhkânah chawhlui an kîl a ni.’—1 Lalte 16:30-33; 18:19.
17 Jehova hmêlma râwng tak Jezebeli chuan ram chûng ata biakna dik nuaibo vek chu a tum a. Jehova zâwlnei ṭhenkhat chu a that a, Elija ngei pawh thah a tum a, ani chu Pathian kaihhruainain Jordan lui râlah a tlân chhia a ni. (1 Lalte 17:1-3; 18:13) Chutih hun laia hmâr lam lalrama biakna thianghlim vawn a harsat dân tûr chu i suangtuah phâk em? Chu achhapah, lal in ngeia hna thawk ni ta la, engtin nge ni ang? Chu chu Pathian ṭih mi Obadia, * Ahaba in enkawltu dinhmun chiah chu a ni.—1 Lalte 18:3.
18. Jehova betu a nih angin, engin nge Obadia chu tidang lam bîk riau?
18 Obadia chu Jehova a biakna kawngah a fîmkhurin a fing thiam bawk tih chu rinhlelh rual a ni lo. Chuti chung pawh chuan Pathian a biakna chu a thlahthlam lo va. Lalte bu khatna 18:3 chuan: “Obadia chu LALPA ṭih mi tak a ni,” tih min hrilh a ni. Ni e, Obadia Pathian ṭihna chu a dang lam bîk riau! Chu chuan Jezebeli’n Jehova zâwlneite a thah hnu lawka a târ lan angin, huaisenna nasa tak a pe a ni.
19. Obadia’n a huaisenzia târ langtu eng thil nge a tih?
19 Heti hian kan chhiar a ni: “Jezebelin LALPA zâwlneite a râwt chiam lai khân Obadia chuan zâwlnei za a hruai a, pûkah sawmnga têlin a thukru a, chhang leh tuiin a châwm ṭhîn a ni,” tiin. (1 Lalte 18:4) Mi za lai a rûka châwm a hlauhawm dân tûr chu i ngaihruat thei ngei ang. Obadia tân chuan Ahaba leh Jezebeli bâkah lal ina kal fo zâwlnei suak 850-te hmuh chhuah chu pumpelh a ngai a ni. Chu achhapah, a rama milem betu dang tam tak—a mi chhe ber aṭanga a hausa ber thleng—chuan lalber leh lalnu duhsakna an hlawh theih nân, Obadia thiltih laih lan chu an duh ngei a rinawm. Mahse, chûng milem betu zawng zawngte hmuh phâk chin ngeiah Obadia chuan huaisen takin Jehova zâwlneite chu a châwm a ni. Pathian ṭihna chuan thil a va ti thei tak êm!
20. Engtin nge Obadia Pathian ṭihna chuan amah a ṭanpui a, engtin nge a entîrna hian a ṭanpui che?
20 Pathian ṭihna hmanga Obadia’n huaisenna a târ lan avângin, Jehova chuan a hmêlmate lak aṭangin a vênghim niin a lang. Thufingte 29:25 chuan: “Midang ngaih dân pawisak luat a hlauhawm a, LALPAa innghah erawh chu a him,” a ti. Obadia chu mi narân ve mai a ni a; kan hlauh tûr ang bawkin, man chhuah leh tihhlum chu a hlau ve tho a ni. (1 Lalte 18:7-9, 12) Chutichung chuan, Pathian ṭihna chuan mihring hlauhna a neihte chu hneh tûrin huaisenna a pe a. Obadia chuan kan za atân entawn tûr ṭha tak a siam a, an zalênna emaw, an nunna hial emaw chân hlauhawm khawpa Jehova betute tân entawn tûr ṭha a ni bîk a ni. (Matthaia 24:9) Aw le, kan vaiin “zah leh ṭih dêk chungin” Jehova rawngbâwl chu i tum tlat ang u.—Hebrai 12:28.
21. A dawta thuziakah eng nge kan ngaihtuah ang?
21 Huaisenna awmtîrtu chu rinna leh Pathian ṭihna mai a ni lo; hmangaihna pawhin a awmtîr lehzual thei a ni. “Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zâwk si a,” tiin Paula’n a ziak a. (2 Timothea 1:7) A dawta thuziakah chuan, hêng ni hnuhnûnga hun khirh tak chhûng hian hmangaihnain huaisen taka Jehova rawngbâwl tûra min ṭanpui theih dân kan hmu ang.—2 Timothea 3:1. (w06 10/1)
[Footnote]
^ par. 17 Zâwlnei Obadia ni lo zâwk kha.
I Chhâng Thei Em?
• Engin nge Josua leh Kaleba chu huaisen taka awmtîr?
• Rinna dik takah eng nge tel?
• Engvângin nge Enoka chuan Pathian rorêlna thu chu hlau lova a puan chhuah?
• Engtin nge Pathian ṭihna chuan huaisenna a awmtîr?
[Zirlai Atâna Zawhnate]
[Phêk 19-naa milem]
Jehova’n Josua hnênah: “Chak tak leh huai takin awm rawh,” a ti
[Phêk 20-naa milem]
Obadia chuan Pathian zâwlneite chu ngaihsakin, a vênghim
[Phêk 21-naa milem]
Enoka chuan Pathian thu huai takin a sawi