Jehova Thu Chu A Nung

Thufingte Bu Aṭanga Thu Pawimawh Hrilhfiahna

HMAN lai lal Solomona chuan “thufing sângthum a sawi” thei a. (1 Lalte 4:32) Chûng a thufing sawite chu kan nei thei em? Nei thei e. B.C.E. 717 vêla ziak zawh Bible-a Thufingte bu-ah chuan Solomona thufing tam tak a chuang a ni. Bung hnuhnûng ber pahnihte chauh chu mi dang ziah nia sawi a ni a, Jakeha fapa Agura leh lal Lemuela ziak a ni. Amaherawhchu, Lemuela tih hi Solomona hming dang mai nia ring an awm nual bawk.

Thufingte bua lâkkhâwm thâwk khum thute chuan tum pahnih a nei a, chu chu ‘finna leh zirtîrna hriat theih nân’ a ni. (Thufingte 1:⁠2) Hêng thufingte hian finna, thil hmuh fiahna leh harsatna tihven nâna hriatna hmanna chu nei tûrin min ṭanpui a ni. Hêngte hmang hian keini pawhin zirtîrna, a nih loh leh nungchang lama sâwizawina chu kan dawng a. Hêng thufingte ngaihsakna leh a thu min râwnte zawmna chuan kan thinlung a khawih thei a, hlimna min neihtîrin, hlawhtlinnaah min hruai thei a ni.​—⁠Hebrai 4:⁠12.

‘FINNA NEIIN, ZIRTIRNA CHU VUAN TLAT RAWH’

(Thufingte 1:​1–9:⁠18)

Solomona chuan: “Kawtthlêrah finna chu ring takin a au” a ti a. (Thufingte 1:20) Engvângin nge a aw ring tak leh fiah tak chu kan ngaihthlâk ang? Bung 2-na chuan finna neih a hlâwkna tam tak a târ lang a. Jehova nêna inṭhianna hnai tak neih theih dân chu bung 3-nain a sawi a ni. Tichuan, Solomona chuan: “Finna hi thupui ber a ni a; chuvângin finna hi nei rawh; a ni, i thil neih zawng zawng chân pawhin finna hi nei rawh. Zirtîrna chu vuan tlat la, chhuah suh,” a ti.​—⁠Thufingte 4:​7, 13.

Engin nge khawvêl nungchang bawlhhlawhna kawngte chu hnâwl tûrin min ṭanpui ang? Thufingte bung 5-na chuan: Ngaihruat thiamna hmang la, khawvêlin min thlêm dân kawngte chu hre rawh, tiin a chhâng a ni. Nungchang bawlhhlawhna rah chhuah râpthlâk tak pawh hi han ngaihtuah bawk teh. Bung 6-na chuan Jehova nêna kan inlaichînna kawng tichhe thei thiltihte leh rilru put hmangte lakah min vaukhân a ni. Bung 7-na chuan mi bawlhhlawh thiltih dânte chu a hai lang a. Bung 8-ah chuan, finna hlutna leh a thil min ngen chu mak danglam taka târ lan a ni. Mi chêttîr thei tak bung 9-na thlenga sawiho thufing tâwpna chu finna ûm tûra min turtu tehkhin thu phûr awm tak hmanga târ lan a ni.

Bible Chungchânga Zawhnate Chhânna:

1:7; 9:​10​—⁠Eng kawngin nge Jehova ṭih hi “finna bul” a nih? Jehova chu thil zawng zawng Siamtu leh Bible Ziaktu a nih avângin, amah ṭihna tel lo chuan finna a awm thei lo. (Rom 1:20; 2 Timothea 3:​16, 17) Ani chu hriatna dik zawng zawngte lo chhuahna Hnâr a ni a. Chuvângin, hriatna chu Jehova ṭihna ṭha nên a inṭan a ni. Hriatna tel lo chuan finna a awm theih loh avângin, Pathian ṭihna chu finna bul a ni thei bawk. Chu bâkah, Jehova ṭihna nei lo mi chuan a hriatna neih rêng rêng chu Siamtu chawimawi nân a hmang dâwn lo a ni.

7:​1, 2​—⁠“Ka thu” leh “ka thupêkte” tihah hian eng nge tel? Bible zirtîrnate bâkah, hêng thu leh thupêkahte hian nu leh pate zam chhûngkaw dânte a tel a. Naupangte chuan hêng dânte leh an nu leh pate hnên aṭanga an dawn Bible zirtîrnate chu an zâwm tûr a ni.

8:30​—⁠Tunge “mi themthiam” chu? Mihring anga chantîr finna chu mi themthiam  angin a insawi a. Hei hi finna nihna hrilhfiah nâna thu leh hla ziak thiamte’n mi rilru khawih tûra an hman ṭhin ṭawngkam mai ni lovin, mihring anga chantîr he finna hian mihring anga a lo pian hmaa Pathian Fa tîr, Isua Krista chu a kâwk a ni. Lei mihring anga a lo pian hma hun rei takah khân, ani chu ‘Pathian thil siam bul ber anga siam’ a ni a. (Thufingte 8:22) Mi themthiam a nih angin, thil engkim siam chhûng khân a Pa nên hna an thawk dûn tlat a ni.​—⁠Kolossa 1:​15-17.

9:​17​—⁠Eng nge “rûk tui” chu ni a, engvângin nge a “thlum”? Bible chuan nupa inkâra mipat hmeichhiatna hmanga nuam chen chu tuichhunchhuah aṭanga khai chhuah tui tuihnai tak in nêna a tehkhin avângin, rûk tui chu a rûka mipat hmeichhiatna hmanna bawlhhlawh tak sawina a ni. (Thufingte 5:​15-17) A rûka mipat hmeichhiatna hman chu thlum tak, a nih loh leh thil nuam tak niin a lang a ni.

Kan Zir Tûrte:

1:​10-14. Hausak min tiamnate avânga kawng sual lama thlêm luh ni lo tûrin kan invêng tûr a ni.

3:⁠3. Khawngaihna leh thutak chu kan ngaihlu hle tûr a ni a, ṭhi man to tak kan awrh chhuah angin mi dangte mithmuhah kan lantîr tûr a ni. Tin, hêng miziate hi kan thinlungah ziakin, kan chhûngrila mi kan nihtîr a ngai bawk.

4:18. Thlarau lam thil hriat thiamna chu zawi zawia pung chho zêl a ni a. Ênga awm reng tûr chuan, inngaihtlâwmna leh thuhnuairawlhna kan lantîr zêl tûr a ni.

5:⁠8. Nungchang bawlhhlawhna thlen thei thilte chu rimawi te, intihhlimna te, Internet te, a nih loh leh lehkhabu leh magazine te hmanga lo kal pawh ni se, chûng thil zawng zawng lakah chuan inthliarfihlîm âwm kan ni.

5:21. Jehova hmangaihtu chuan Pathian dik nêna an inlaichînna chu rei lo te chhûng nawmsip bâwlna nên a thlâkthleng phal ang em? A phal miah lo vang! Jehova chuan kan kawngte a hmu a, kan kal dân chungah mawh min phurhtîr a ni tih hriat hi nungchang thianghlimna min vawntîrtu ber a ni.

6:​1-5. Hêng Bible chângte hian mi dang tâna ‘mawhphurtua ṭanna,’ a nih loh leh sum leh pai lama intiamkamna lakah vaukhânna ṭha min va pe tak êm! Kan han bih chian a, a finthlâk lo nia kan hriat chuan, tlai khawmuang lovin ‘kan ṭhenawm chu kan luh ngut ngut’ tûr a ni a, beidawng lova ngenna siam tlut tlutin, thil awm dân siam ṭha tûrin kan tih theih ang apiang kan ti ang.

6:​16-19. Heta thil bulpui pasarihah hian thil sual tih engkim deuhthaw a tel a. Chûng thilte huat dân chu kan zir tûr a ni.

 6:​20-24. Naupan lai ata Bible dânte zirtîrna chuan mi chu nungchang bawlhhlawhna sualah âwk lo tûrin a vêng thei a. Nu leh pate chuan chutiang zirtîrna pêk chu an ngaihthah tûr a ni lo.

7:⁠4. Finna leh hriatna chu kan ngaina tûr a ni.

MIN HRUAITU TUR THUFING TAWITE

(Thufingte 10:​1–29:⁠27)

Solomona thufing a la bâng zawng chu thufing tawi awmze nei tak a ni hlawm a. A inan lohna laih lanna te, a inanna lai sawi lanna te, leh khaikhinna thute hmangin, chûng thufingte chuan nungchang lamah te, ṭawngkam hman dânah te, leh rilru put hmangah te zir tûr thiltithei tak a pe a ni.

Bung 10 aṭanga 24 hian Jehova ṭihna dik lantîr a hlutna chu a sawi uar a. Bung 25 aṭanga 29 chhûnga thufingte chu “Juda lal Hezekia miten an ziak chhâwn” a ni. (Thufingte 25:⁠1) Hêng thufingte hian Jehova chunga innghahna leh thu pawimawh dangte min zirtîr a ni.

Bible Chungchânga Zawhnate Chhânna:

10:​6​—⁠Engtin nge ‘mi suaksual kâ chu nunrâwnnain a tuam’? A tlângpui thuin mi suaksualte chuan mi huat an hlawh a, mi dangte hnên aṭanga an dawn inhmêlmâkna chuan anni chu a ngawihtîr a ni thei ang. Atîra Hebrai ṭawnga ziak chu: ‘Misual kâ chuan nunrâwnna a tuam’ ti pawha lehlin theih a ni a. Chu chu misualte chuan an ṭawngkam thlum tak hmangin mi dang tihchhiat an duhna sual tak chu an khuh bo tihna a ni thei ang.

10:​10​—⁠Engtin nge “mit siaitu” chuan lungngaihna a thlen? “Mi tlâktlai lo” chuan “ṭawng chaltlai” mai ni lovin, ‘mit siai’ ang chi a zaizirin an ngaihtuahna sual chu thup an tum mai thei. (Thufingte 6:​12, 13) Hetiang chi inbumna hi a tuartu tân lungngaihna thlentu a ni thei a ni.

10:​29​—⁠Eng nge “LALPA kawng” chu? Hei hi Jehova’n mihringte a dâwr dân kawng a ni a, kan zui tûr nun kawng sawina a ni lo. Pathianin mihringte a dâwr dân chu sawisêl bote tân kulhbîng anga himna petu a ni a, mi suaksualte tân erawh boralna a ni thung.

11:​31​—⁠Engvângin nge mi suaksual chu mi fel aia thungrulh lehzual tûr a nih? Heta thungrûl tih hi mi tinin an tawh hremna hi a ni. Mi felin thil a tihsual hian, zilhna hmanga thungrulh a ni a. Mi suaksual chuan duh rêng vângin thil a tisual lui a, thil ṭha tih a duh lo. Chuvângin nasa taka hrem a phu a, chu hremna chu a tâwk ta rêng a ni.

12:​23​—⁠Engtin nge miin “finna a thup”? Finna thup tih chu miin finna a lantîr lo rêng rêng tihna a ni lo. Chu ai mah chuan, miin hriatna chu a lang a pauva uanpui lovin, a rûk têin a lantîr tihna a ni zâwk a ni.

18:​19​—⁠Engtin nge inhauna chuan kawngka khârna a thlen? Inhauna chuan inngaidam duh lo mi pahnihte inkârah intihbuaina a thlen a. Chutianga inhauna chu ‘kawngkâ inkhâr’ hnan ang maia daidangtu a ni.

Kan Zir Tûrte:

10:​11-14. Kan ṭawngkam chhuak chu mi tichak thei tak ni tûr chuan, kan rilru chu hriatna dikin a khat tûr a ni a, kan thinlung chu hmangaihnaa chêttîr a ni tûr a ni bawk a; tin, finna chuan kan kâ aṭanga thu lo chhuak chu a thunun tûr a ni bawk.

10:19; 12:18; 13:3; 15:28; 17:28. Thu kan sawi hmain kan ngaihtuah lâwk tûr a ni a, kan sawi pur pur tûr a ni lo.

11:1; 16:11; 20:​10, 23. Jehova chuan sum dâwnna kawnga rinawm tûrin min duh.

11:⁠4. Mahnia Bible zir te, inkhâwm te, ṭawngṭai te, leh thlawhhma rawngbâwl te ngaihthah khawpa hausak ûm chu a âtthlâk hle.

13:⁠4. Kohhrana mawhphurhna emaw, khawvêl thara nunna emaw neih ‘duhna’ mai chu a tâwk lo va. Thil phûtte tlin tûrin taihmâk kan chhuah bawk tûr a ni.

 13:24; 29:​15, 21. Hmangaihna nei nu leh pate chuan an fa an duat sual lo va, a thil sual tih an haider hek lo. Pa emaw, nu emaw chuan chutiang thil sualin nghet taka zung a kaih hmaa paih bosak nân hma a la zâwk a ni.

14:10. Chhûngrila kan rilru veizâwng chu sawifiah thiam a ni ṭhîn lo va, mi dangte hriatthiam theih lah a ni ṭhîn hek lo. Chuvângin, mi dangin min thlamuan theih loh châng a awm thei a. Harsatna ṭhenkhat chu Jehova chunga innghahna ringawt hmanga kan tawrh chhuah a ngai mai thei a ni.

15:⁠7. Lo nei mi chuan a buhchi chu hmun khatah a theh vek lo ang bawkin, mi pakhat hnênah kan thil hriat zawng zawng chu vawilehkhatah kan pe chhuak tûr a ni lo. Mi fing chuan a ṭûl dân ang zêlin vawi khatah tlêm tê têin hriatna chu a tidarh a ni.

15:15; 18:14. Nakin hun beiseina nei rilru put hmang vawn rengna chuan dinhmun hrehawm takah pawh hlimna hmu tûrin min ṭanpui ang.

17:24. Thil pawimawhte en tlat lova an mitte lên ruai ṭhîntu “mi â” ang lo takin, finnaa thil kan tih theih nân hriatthiamna kan zawng tûr a ni.

23:​6-8. Khual chhawn thiamna der lakah chuan kan invêng tûr a ni.

27:21. Fakna thu chuan kan nihna a târ lang thei a. Fakna thu hian Jehova chunga lâwm tûr kan nihzia min hriattîr a, a rawngbâwl zêl tûra min chêttîr hian, chu chuan inngaihtlâwmna a târ lang a ni. Faknain mi aia chungnung zâwk nia inhriatna a neihtîr hian chu chuan inngaihtlâwmna tlâkchhamzia a târ lang thung.

27:​23-27. Ran rual vêngtu tih dân chu hmangin, hêng thufingte hian taihmâkna zâra nun tluang taka nunna aṭanga lungawina hmuh a hlutna chu a sawi uar a ni. Hêng hian a bîk takin, Pathian chunga innghah a pawimawhzia min hriattîr tûr a ni. *

28:⁠5. Ṭawngṭaina leh a Thu zirna hmanga ‘Jehova kan zawn’ chuan, a pawm tlâka rawngbâwl nâna thil mamawh ‘engkim kan hre thiam thei’ a ni.

THU PAWIMAWHTE

(Thufingte 30:​1–31:⁠31)

Bible-a Thufingte bu chu thu pawimawh pahniha tihtâwp a ni a. Ngaihtuahna chawk thotu khaikhinna thu hmangin, Agura thu chuan duhâmna tihlungawi theih a nih lohzia a sawi a; tin, chu chuan nula thlêmtu thil tihdân hriatthiam harsa tak chu a târ lang a ni. * Tin, mahni inchawimawina thusawi leh thinur chunga thusawi lakah min vaukhân bawk.

Lemuela’n a nu hnên aṭanga a dawn thu pawimawh takah chuan uain leh ruih theih zû hman dân chungchâng leh felnaa rorêl dân chungchâng thurâwn ṭha tak a tel a ni. Nupui ṭha chungchâng sawina chu hetianga tihtâwp a ni: “A kutkawih chhuah chu pe la, a thiltihin . . . fak rawh se,” tiin.​—⁠Thufingte 31:⁠31.

Finna neiin, zilhna pawm la, Pathian ṭihna neiin, Jehova chungah innghat rawh. Thâwk khum thufingte chuan zir tûr hlu min va pe tak êm! Theih tâwp chhuaha a thurâwnte nunpuiin, “LALPA ṭih mi” engthâwlna chu i tawng ve ang u.​—⁠Sâm 112:⁠1. (w06 9/15)

[Footnote-te]

[Phêk 4-naa milemte]

Jehova chu hriatna dik zawng zawngte lo chhuahna Hnâr a ni

[Phêk 6-naa milem]

‘Hriatna tidarh’ tih chu eng tihna nge ni?