“Eng Nge Kan Pian Chhan?”

NOBEL Prize dawngtu leh Nazi Mihring Sâmnaa dam khawchhuak Elie Wiesel-a chuan ṭumkhat chu “mihringte ngaihtuah tûr zawhna pawimawh ber” a sawi a. Chu chu eng nge ni? He zawhna, “Eng nge kan pian chhan?” tih hi a ni.

He zawhna hi i ngaihtuah tawh ngai em? Mi tam tak chuan an ngaihtuah tawh ṭhîn a; mahse, a chhânna dawng erawh an tlêm hle thung. Nun awmzia hriat a tumna lamah, Britist thilthleng chanchin ziaktu Arnold Toynbee-a chuan: “Mihring thiltum ber chu Pathian chawimawi leh A hnên ata chatuana hlimna hmuh hi a ni,” tiin a ziak a ni.

Ngaihven awm takin, kum sângbi thum liam ta khân, nuna thilthlengte a bih chianna avânga hriat hlawh tak Lal fing Solomona chuan chu zawhna chhânna bul ber chu a lo pe tawh a ni: “Hêng thu zawng zawng khaikhâwmna hi i ngaithla teh ang: Pathian ṭih la, a thupêkte vawng rawh; hei hi mihring zawng zawng tih tûr chu a ni mai,” tia sawiin.​—⁠Thuhriltu 12:⁠13.

He thu bul hi Pathian Fapa, Isua Krista ngei pawhin a lo thlâwp tawh a. Isua chuan leia a awm laiin a Pa vâna mi chu theihtâwp chhuahin a chawimawi a ni. Chutianga amah Siamtu rawng a bâwlna chuan Isua nun chu a tihausa a. Chu chuan a chhawmdâwl êm avângin: “Mitîrtu duhzâwng tih . . . hi ka chaw a ni,” tiin a sawi thei hial a ni.​—⁠Johana 4:⁠34.

Chuvângin, eng nge kan pian chhan? Isua, Solomona, leh Pathian chhiahhlawh dangte ang bawkin, Pathian duhzâwng tihna aṭangin nunah hian awmze dik tak leh hlimna daih rei tak kan hmu thei a ni. ‘Thlarau leh tih tak zeta’ Pathian biak dân hriat belh i duh em? (Johana 4:24) In vêng chhûnga awm Jehova Thuhretute chuan, “Eng nge kan pian chhan?” tih zawhna chhânna hre thiam tûra ṭanpui che chu an châk ngawt ang. (w06 10/15)