I Inneih Nî Hlimawmna leh Zahawmna Tipung Rawh

“KAN inneih nî kha ka nuna hun pawimawh ber leh hlimawm ber a ni,” tiin kum 60 dâwn lai innei tawh Gordon-a chuan a sawi a. Engin nge Kristian dikte tân inneih nî chu ni pawimawh ber nihtîr? Chu mi nî chu an duh tak​—⁠an kawppui leh Pathian Jehova​—⁠hnênah thu thianghlim an tiamna nî a ni. (Matthaia 22:37; Ephesi 5:​22-29) Ni e, inneih rilrûkte chuan an inneih nî nuam taka hman chu an duh a; chutih rual chuan inneihna Bul Ṭantu chawimawi pawh an duh bawk a ni.​—⁠Genesis 2:​18-24; Matthaia 19:​5, 6.

He hun hlimawm tak hi mopa chuan engtin nge a tihzahawm zual theih? Monu chuan a pasal leh Jehova chawimawi nân eng nge a tih theih? Mo lawmnaa telte chuan engtin nge a hlimawmna an belhchhah theih? Bible thu bul ṭhenkhat ngaihtuahna chuan hêng zawhnate chhâng tûr hian min ṭanpui ang a; tin, a thu bulte nunpuina chuan a pawimawhna tibotu buaina lo thleng theite chu a titlêm ang.

Tuin Nge Mawhphur Ber?

Ram tam takah chuan, Jehova Thuhretute rawngbâwltu pakhat chuan dân angin mite chu a inneihtîr thei a. Sawrkâr mi hmanin a inneihtîr a ngaihna hmunah pawh nupa tuak thar chuan Bible ṭanchhan thusawi neih chu an duh mai thei. Chutiang thusawiah chuan a tlângpui thuin mopa chu Pathian ruat anga chhûngkaw lû a nihna ngaihtuah tûra fuih a ni ṭhîn. (1 Korinth 11:⁠3) Chuvângin, inneih nîa thilthleng chungchângah mopa chuan mawh a phur ber a ni. Inneihna leh a hnua thiltih engpawh chu a hma aṭanga ruahman lâwk a ni ṭhîn a. Engvângin nge mopa tân chûng ruahmanna siam chu a harsat theih?

A harsat chhan pakhat chu a tuemaw lam lama chhûngkhatte chuan inneih ruahmanna chunga thu neih an duh vâng a ni thei. Mi tam tak lo inneihtîr tawh Rodolfo-a, chuan: “A châng chuan, mopa chuan chhûngte nêksâwrna nasa tak a tâwk a, a bîk takin inneihna ruai atâna sênsote an tumpui phei chuan a tâwk lehzual a ni. Anni chuan inneihna leh a hnua ruaiṭheh chhûnga thil tihâwm chungchângah ngaih dân nghet tak an nei bur thei a. Hei hian Pathian thu anga mopa mawhphurhna chu a tiderthâwng thei a ni,” tiin a sawi.

Kum 35 chhûng lai mite lo inneihtîr tawh ṭhîn Max-a chuan: “Monu hian inneihna leh ruaiṭheh chungchângah thu a nei zâwk mah ṭhîn a, mopa chuan a ngaih dân sawi vena hun a nei tlêm ṭhîn hle tih ka hmu,” a ti. Mi tam tak inneihtîr tawh David-a pawh hian: “Mopate hi hma lâktîr an ni ṭhîn lo va, inneih ruahmannaah an innamhnawih tâwk ṭhîn lo,” a ti bawk. Engtin nge mopa hian a kova innghat mawhphurhna chu ṭha taka a hlen theih ang?

Inbiakpawhnain Hlimna A Tipung

Mopa chuan inneih ruahmanna siam tûra a mawhphurhna hlawhtling taka hlen tûrin, mite chu ṭha takin a bepawp tûr a ni. Bible chuan chiang takin: “Remruat lâwk lova thil tih a hlawhtling duh lo,” a ti. (Thufingte 15:22) Amaherawhchu, mopa chuan inneih ruahmanna chungchâng chu monu, an chhûngte, leh Bible ṭanchhan kaihhruaina pe thei tûr mi dangte a sawipui chuan a hlawhtling thei a ni.

Ni e, inhual tawhte chuan an ruahmanna siam leh an tih theih âwmte an sawiho hmasak chu a pawimawh hle. Engvângin nge? Aw  le, hnam inang lo an ni chung pawha kum tam tak chhûng hlim taka innei tawh Ivan-a leh a nupui Delwyn-i te thusawi ṭhenkhat hi lo ngaithla teh. An inneihna tûr ruahmanna chungchângah Ivan-a chuan: “Kan inneih nî atân duhzâwng chiang tak mai ka nei a, chûngah chuan ka ṭhian zawng zawng sâwma ruaiṭheh te, inneih cake te, leh monu hian inneih kawrvâr ngei ha se tih ang chite a tel a ni. Delwyn-i erawh chuan inneihna tênau, ropui lutuk lo, inneih cake pawh tel lova inneih mai chu a duh thung. Tin, inneih kawrvâr aia thuamhnaw pângngai hâk mai chu a duh zâwk bawk a ni,” a ti.

Engtin nge he nupa tuak thar tûr hian an ngaih dân inan lohna chu an siam rem? Ngilnei tak leh tlang taka inbiakpawhna hmangin an siam rem a ni. (Thufingte 12:18) Ivan-a chuan: “Inneih chungchânga Bible ṭanchhan thuziak, Vênnainsâng April 15, 1984 (English) ang chite chu kan zir dûn a. * He thuziak hian inneih nî chungchânga thlarau lam thlîr dân nei tûrin min ṭanpui a ni. Ṭobul inang lo kan nih avângin kawng tam takah mahni mi mal duh dân kalpui loh a ngai a. Kan pahnih hian kan rilru put hmang kan siam rem ve ve a ni,” tiin a sawi belh a ni.

Aret-a leh Penny-i chuan chutiang bawk chuan an ti a. An inneih nî chungchângah, Aret-a chuan: “Inneih nî atâna kan duhzâwng inang lote chu Penny-i nên kan sawi dûn a, kan inlungrual thei ta a ni. Kan inneih nî atân Jehova malsâwmna dîlin kan ṭawngṭai a. Kan nu leh pate hnênah leh kohhrana nupui pasal nei mi puitlingte hnênah thurâwn ka la bawk. An thurâwn min pêkte chu a ṭangkai kher mai. Chuvâng chuan, kan inneihna chu a duhawmin a hlawhtling a ni,” a ti.

Silhfên leh Inchei Dânah Zahawmna Lantîr Rawh

Mopa leh monu chuan an inneih nîa nalh taka inchei an duh chu a hriatthiam awm hle a. (Sâm 45:​8-15) An thuamhnaw atân hun, tha leh zung, leh sum an sêng ngei ang. Eng Bible thu bulte hian nge thawmhnaw zahkai tak leh nalh tak thlang tûra ṭanpui thei?

Inneih nîa monu thawmhnaw hâk hi ngaihtuah ta ila. Duhzâwng chu a mihring a zir leh a ram a zirin danglam ṭhîn mah se, Bible fuihna thu chu hmun tinah a hman tlâk a ni. Hmeichhiate chu ‘inthlahdah lo leh inbel lutuk lovin, thuam inchawih tâwkin an inchei tûr’ a ni a. Hei hi an inneih nî pawh tiamin Kristian hmeichhiate tân a ni reng a ni. A nihna takah chuan inneihna hlimawm tak ni tûrin “puan man tam tak” a ngai kher lo. (1 Timothea 2:9; 1 Petera 3:​3, 4) He thurâwn zawm a nih hian a va lungawithlâk tak êm!

 A hmaa kan sawi tâk David-a chuan: “Innei thar apiang deuhthaw hian Bible thu bulte an zâwm a, an fakawm hle. Mahse, monute leh mo ṭhiante chuan thuam inchawih tâwk lo, âwm zau lutuk emaw, lang tlang thei emaw hâk châng an nei,” a ti. Kristian upa puitling tak pakhat chuan monu leh mopa tûr nêna an inhmuh lâwknaah thlarau lam thlîr dân nei tûrin a ṭanpui a ni. Engtin nge? An thuamhnaw hâk tum hi Kristian inkhâwmnaa hâk atâna a inchawih tâwk leh tâwk loh zawhna hmangin. An thuamhnaw hâk tûr hi inkhâwmnaa hâk ṭhin nên chuan a pian hmang a inang lovin, tualchhûng hnam dân a hnaih deuh ngei ang; mahse, Kristian tehna zahawm tak nên a inchawih tâwk tûr a ni. Khawvêl mi tuemaw hian Bible nungchang dân chu khirh deuh luaa a ngaih pawhin, Kristian dikte chu khawvêl thununna dolêtnaah an lungawi a ni.​—⁠Rom 12:2; 1 Petera 4:⁠4.

Penny-i chuan: “Thuamhnaw leh ruaiṭheh lam ngaih pawimawh ber aiin, Aret-a nên chuan kan inneihna, thlarau lam hun chu kan ngai pawimawh zâwk a. Chu chu kan inneih nîa thilthleng pawimawh ber a ni. Thil danglam bîk ka hriat reng chu, ka thuamhnaw hâk emaw, ka thil ei emaw lam ni lovin, chu mi nîa hun ka hmanpuite leh ka hmangaih tak ka neih avânga ka hlimna hi a ni,” a ti. Kristian innei tûrte hian an inneih dân tûr ruahmanna an siam hunah chutiang thil chu an ngaihtuah tûr a ni.

Kingdom Hall​—⁠Hmun Zahawm Tak Chu

Kristian innei tûr tam tak chuan a theih phawt chuan Kingdom Hall-a inneih chu an duh a. Engvângin nge? Tuak khat chuan an ngaihtuahna chu heti hian an sawi: “Inneih hi Jehova ruahmanna siam thianghlim tak a ni tih kan hria a. Kan biakna hmun, Kingdom Hall ngeia inneihna chuan atîr aṭanga kan inneihnaa Jehova teltîr a ngaihzia rilrua tuh nghet tûrin min ṭanpui a ni. Hmun dang aia Kingdom Hall-a inneih a hlâwkna dang pakhat chu, ringtu ni lo kan chhûngkhatte hnênah kan tân Jehova biak a pawimawhzia a lantîr hi a ni,” a ti.

Kingdom Hall chunga mawhphurhna nei kohhran upate’n chuta inneih phalna an pêk chuan, nupa tuak thar tûr hian an inneih dân tûr chu an hriattîr lâwk tûr a ni. Monu leh mopa hian an mi sâwmte zahna an lantîr theih dân kawng khat chu a hun taka inneihna hmun thlen tum tlat hi a ni a. Tin, thil engkim hi zahawm taka tih ni tûrin an endik duh ngei ang. * (1 Korinth 14:40) Chutiang chuan khawvêl mite anga hleihhluak taka inneihna chu an pumpelh ang.​—⁠1 Johana 2:​15, 16.

Mo lawmnaa telte pawhin inneihna chunga Jehova thlîr dân an neihzia an lantîr thei a. Entîr nân, mo lawmna ropui zâwk nih inchuh ang hrimin, Kristian dangte inneihna aia ropui zâwka an tih chu an beisei lo vang. Kristian puitlingte chuan Kingdom Hall-a Bible ṭanchhan inneihna thusawinaa tel chu inneih ruaiṭhehna emaw, a hnua intihhlimna emawa tel ai chuan a pawimawh zâwkin a ṭangkai zâwk tih an hre bawk. Kristian chu remchân lohna avângin hmun khatah chauh tel thei dâwn ta se, Kingdom Hall-a va tel chu a duhawm zâwk ngei ang. Upa anga rawngbâwl William-a chuan: “Sâwmte chu ṭûl lêm lova Kingdom Hall-a an tel lohva, ruaiṭhehnaa an tel leh  si chuan, hei hian inneihna thianghlimna an hre thiam lo tih a târ lang. Ruaiṭhehnaa sâwm kan nih loh pawhin, Kingdom Hall-a telin, mopa leh monu kan thlâwpzia kan lantîr thei a, chuta awm ringtu ni lo an chhûngkhatte hnêna thu hriattîrna ṭha tak a ni thei bawk a ni,” a ti.

Inneih Nî Hnu Lam Thleng Daih Hlimna

Sumdâwnna khawvêl hian mo lawmna chu pawisa deh chhuahna nasa takah a chantîr a. Tûn hnaia report pakhat sawi dân chuan, United States-a inneihna pângngai tak atân hian “dollar 22,000, a nih loh leh America ram chhûngkaw pângngai pakhat tâna [kum khat] hlawh chanve vêl a ngai a ni.” Sumdâwngtute ngaih dân theh lârnain a thunun avângin, innei thar hlim tam tak emaw, an chhûngte emaw chuan chu mi ni khat atân a hnu kum tam tak chhûnga an rulh tûr leiba nasa tak chu an nei a ni. Chutiang chu inneihna bul ṭanna finthlâk a ni em? Bible thu bul hre lote leh ngaihsak lote chuan chutiang a hleihluaka tih chu an thlang mai thei; mahse, Kristian dikte chu an va danglam tak êm!

Kristian nupa tuak tam tak chuan an inneihna chu mi a âwm tâwk leh an tlin ang tâwk lek sâwmna, leh an hun hman hian thlarau lama pawimawhna a neihte ngaihsakin, an hun leh sum leh pai neihte chu Pathian hnêna an inpumpêkna milin an hmang thei a ni. (Matthaia 6:33) Kum 17 chhûng innei tawh, an inneih aṭanga hunbi kima rawngbâwl Lloyd-a leh Alexandra-i entîrna hi ngaihtuah teh. Lloyd-a chuan: “Ṭhenkhat chuan kan inneih dân chu ho viau-ah an ngai mai thei, mahse Alexandra-i nên chuan kan lungawi hle a ni. Kan inneih nî chu sum leh pai lama phurrit min siamtu ni lovin, mi pahnih nasa taka tihlim tûra Jehova ruahmanna siam lawmna nî ni tûrah kan ngai,” a ti.

Alexandra-i pawh chuan: “Kan inneih hma aṭangin pioneer ka lo ni tawh a, inneihna ropui tak neih nân ringawta pioneer bânsan chu ka duh lo. Kan inneih nî chu ni pawimawh tak a ni ngei mai a. Mahse, chu chu kan dam chhûng nî lo la awm tûrte inṭanna mai a la ni. Inneih nî ngawr ngawr ngaihtuah lo tûra rawtna pêk chu kan zâwm a, kan nupa nun atân Jehova kaihhruaina kan zawng a. Hei hian Jehova malsâwmna min dawntîr tak zet a ni,” a ti. *

A ni, in inneih nî chu ni pawimawh tak a ni a. Chu mi nîa lang rilru put hmang leh thiltih langsâr takte chuan nupa anga in hun lo la awm tûr atân kawng a sial a ni. Chuvângin, Jehova kaihhruaina ring rawh. (Thufingte 3:​5, 6) Chu mi nîin thlarau lama pawimawhna a neih chu rilruah dah ber rawh. Pathian pêk in chanvo tihna kawngah inṭanpui tawn ang che u. Chutiang chuan in inneihna atân lungphûm ṭha tak i phûm thei ang a, Jehova ṭanpuinain in inneih nî hnu lam thleng daih hlimna chu i nei ngei ang.​—⁠Thufingte 18:⁠22. (w06 10/15)

[Footnote-te]

[Phêk 21-naa milem]

Nupa tuak thar ni tûrte chu an inneih dân tûr an ruahman hunah tlang tak leh zahawm takin an inbepawp tûr a ni

[Phêk 23-naa milem]

In inneih nîin thlarau lama pawimawhna a neih chu rilruah dah ber rawh