Kan Inkhâwmna Thianghlimte Zahna Lantîr Rawh
Kan Inkhâwmna Thianghlimte Zahna Lantîr Rawh
“Anni ngei chu ka tlâng thianghlimah chuan ka hruai ang a, ka ṭawngṭaina inah ka tihlim ang.”—ISAIA 56:7.
1. Pathian Lehkha Thu-ah hian kan inkhâwmte zahna dik tak lantîr chhan tûr eng nge kan neih?
JEHOVA chuan a mi, hriak thih Kristiante leh an ṭhiante chu amah be tûrin a “tlâng thianghlimah” a hruai khâwm a. Anni chu a “ṭawngṭaina inah” chuan a tihlim a, chu in chu “mi tinreng tân ṭawngṭaina in,” a thlarau lam biak in hi a ni. (Isaia 56:7; Marka 11:17) Hêng a thiltihte hian Jehova kan biakna a thianghlimzia, a ṭhatzia, leh a chungnunzia a târ lang. Zirna leh Pathian biak nâna kan inkhâwmna neihte zahna dik tak târ langin, Jehova thil thianghlimte thlîr dân kan ṭâwmpuizia kan lantîr a ni.
2. Jehova’n amah biakna hmun atâna a thlan chu thil thianghlim angin a ngai tih engin nge târ lang a, Isua’n ani pawhin a ngai thianghlim ve tih engtin nge a târ lan?
2 Hmân lai Israel ramah chuan, Jehova’n amah biakna hmun atâna a thlan chu hmun thianghlim anga ngaih a ni a. Biak bûk leh a cheimawinate leh bungbêlte chu “thianghlim tak an lo nih theih nân” hriak thih a, tihthianghlim tûr a ni. (Exodus 30:26-29) Biak bûk chhunga pindan pahnih chu “Hmun Thianghlim” leh “hmun Thianghlim Ber” tia vuah a ni a. (Hebrai 9:2, 3) A hnuah chuan biak bûk chu Jerusalema Biak in chuan a rawn thlâkthleng ta a. Jehova biakna hmunpui ber a nih angin, Jerusalem chu “khawpui thianghlim” tia koh a ni. (Nehemia 11:1; Matthaia 27:53) Isua ngei pawhin leia rawng a bâwl lai khân biak in chungah a phu tâwk zahna a lantîr a. Biak in hung chhûng chu sumdâwn nân leh bungraw phurh tlangna kawng kual hêl nâna zahpah lo taka an hman avângin, mipuite chungah chuan a thinrim hle a ni.—Marka 11:15, 16.
3. Engin nge Israelte inkhâwmna thianghlimzia chu lantîr?
3 Israelte chu Jehova be tûr leh a Dân an chhiar chhuahte ngaithla tûrin an inhmu khâwm ziah ṭhîn a. An kût lai nî ṭhenkhat chu inkhâwmpui thianghlimte tih emaw, inkhâwmna urhsûnte ti emawa koh a ni a, chu chuan an inkhâwmna a thianghlimzia a târ lang a ni. (Leviticus 23:2, 3, 36-38) Ezra leh Nehemia hun laia mipui vântlâng kal khâwmna hmunah, Levihote chuan “mipuite chu dân an hrilhfiah a.” “Dân thu chu an hriatin mipui zawng zawng an ṭap an ṭap mai si a,” chuvângin Levi-hote chuan: “Vawiin nî hi LALPA in Pathian tâna ni thianghlim a ni a; lungchhe suh ula, ṭap hek suh u,” tiin thu an pe a ni. Tichuan, Israelte chuan ni sarih chhûng an neih Bâwkte Kût chu ‘nasa takin an lâwm a.’ Chu bâkah, “nî tin, a ṭantirh nî aṭanga a tâwp thlengin Pathian dân bua mi an chhiar bawk a. Tin, ni riat nî chu kût ṭiak nî a ni a, thupêk angin inkhâwmna urhsûn takin an titâwp thîn.” (Nehemia 8:7-11, 17, 18) Hêng hunte hi hun thianghlim, a chhimtute tâna zahna lantîr ngai tak chu a ni tak zet a ni.
Kan Inkhâwmte Hi Inkhâwmna Thianghlim A Ni
4, 5. Kan inkhâwmna hmêlhmang engin nge inkhâwmna thianghlim a nihzia târ lang?
4 Tûn hunah hian Jehova chuan khawpui thianghlim leh amah biakna tûr hmun bîk a nei tawh lo ngei mai. Amaherawhchu, Jehova be tûra kan inkhâwmte hi inkhâwmna thianghlim a ni tih erawh chu kan theihnghilh tûr a ni lo. Chawlhkâr khatah vawi thum chu Pathian Lehkha Thute chhiar tûr leh zir tûrin kan inhmu khâwm a. Jehova Thu chu ‘fiah taka chhiar’ a ni a, Nehemia hun laia an tih dân ang bawkin, “a awmzia an hrilhfiah” bawk. (Nehemia 8:8) Kan inkhâwm zawng zawng chu ṭawngṭaia ṭan leh tihtâwp a ni ziah a, Jehova fakna hlate kan sa bawk ṭhîn. (Sâm 26:12) Kohhran inkhâwmte hi kan Pathian biakna pêng a ni tak zet a, ṭawngṭaina rilru put hmang nêna zahawm taka inkhâwm kan ngaihsak chu a ngai a ni.
5 Jehova chuan a mite chu amah be tûr, a Thu zir tûr, leh Kristian inkawm khâwmna duhawm tak nei tûra an kal khâwm hian anni chu mal a sâwm a. Kan Sâm 133:1, 3) Chu mi hmuna kan tel a, thlarau lam thusawite ngun taka kan ngaihsak chuan chu malsâwmna chu kan chang ve ang. Chu bâkah, Isua chuan: “Mi pahnih emaw pathum emaw ka hminga an inkhâwmna apiangah chuan an zîngah ka awm si ṭhîn a,” tiin a sawi. A chung leh a hnuaia thu awmte aṭanga kan en chuan, he thu hian mi mal inkâra harsatna lian tham tak chingfel tûra Kristian upate inhmuh khâwmna a kâwk nachungin, kan inkhâwmnate pawh a kâwk tel thei tho a ni. (Matthaia 18:20) Krista chu thlarau thianghlim hmanga a hminga Kristiante inhmuh khâwmna apianga a tel chuan, chutiang inkhâwmnate chu thil thianghlim anga ngaih tûr a ni dâwn lâwm ni?
inkhâwm hun a lo thlen hian, chutah chuan “LALPAN malsâwmna thu a pe” tih kan ring nghet tlat thei a ni. (6. Kan inkhâwmna hmun a lian leh a tête chungchâng eng nge kan sawi theih?
6 Jehova chu mihring siam biak inahte a chêng lo tih chu a dik a. Amaherawhchu, kan Kingdom Hall-te hi biakna dik awmna hmun a ni. (Tirhkohte 7:48; 17:24) Chutah chuan Jehova Thu zir tûr te, a hnêna ṭawngṭai tûr te, leh a fakna hla sa tûr tein kan inhmu khâwm a. Chutiang tho chu Assembly Hall-ah te pawh kan ti a ni. Kan inkhâwmpuina atâna kan hawh hmun lian zâwk auditorium te, thil thar pho chhuahna in lian te, a nih loh leh infiamna khêlmual liante chu, kan inkhâwmna thianghlim atâna kan hman chhûng chuan Pathian biakna hmun an ni mai a. Inkhâwmna lian emaw, tê emaw pawh ni se, chutianga Pathian biakna hun kan neihte chuan kan zah a phu a, chu chu kan rilru put hmang leh nungchangah a lang chhuak tûr a ni.
Kan Inkhâwmte Zahna Lantîr Theih Dân Kawngte
7. Eng kawng chiang takin nge kan inkhâwmte zahna kan lantîr theih?
7 Kan inkhâwmte zahna lantîr theih dân kawng tam tak a awm a. Kawng khat chu Lalram hlate sak laia tel hi a ni. Hêng hla tam takte hi ṭawngṭaina thu a ni a, chuvângin zah tak chunga sak tûr a ni. Tirhkoh Paula chuan Sâm 22-na la chhuakin, Isua chungchângah: “Ka unaute hnênah i hming ka hril ang a; awm khâwm zîngahte chuan hla sain ka fak ang che,” tiin a ziak a. (Hebrai 2:12) Chuvângin, chairman-in hla sak tûr a puan hmaa kan ṭhutna tûra ṭhut fel a, hla sak laia a hla thute ngun taka ngaihtuah chu kan tum tlat tûr a ni. Kan hla sak chuan fakna hla phuahtu: “LALPA chu fak rawh u. Mi dik takte inrâwn khâwmnaah leh inkhâwmnaah chuan ka thinlung zawng zawngin LALPA hnênah lâwm thu ka hrilh ang,” tia zaitu rilru ngaihtuahna hi lantîr lul rawh se. (Sâm 111:1) Ni e, Jehova fakna hla sak hi kan inkhâwmna hmun hma taka thlen leh a tâwp thlenga awm chhan tûr ṭha tak a ni.
8. Bible-a entîrna engin nge kan inkhâwmnaa ṭawngṭainate’n zahna nêna kan ngaihsakna a phu tih târ lang?
8 Kan inkhâwm zawng zawngte thlarau lam hlutna tipungtu dang leh chu kal khâwm zawng zawngte aiawha thinlung tak zeta ṭawngṭaina hlan hi a ni. Ṭum khat chu, kum zabi khatnaa Kristiante chu Jerusalemah an inhmu khâwm a; tichuan, “arualin aw ring takin Pathian hnênah” an ṭawngṭai a. Chu mi avâng chuan, tihduhdahna an tuar chung pawhin, “huai takin Pathian thu an hril ta” zêl a ni. (Tirhkohte 4:24-31) Chuta tel tuemaw chuan ṭawngṭai laiin a rilru hmun danga a vahkualtîr chu i ring em? Ring lo ve, “a rualin” an ṭawngṭai a ni. Kan inkhâwmnaa ṭawngṭaina thu chham chuan inkhâwmnaa tel zawng zawngte Pathian zahna chu a târ lang a. Zahna nêna ngaihsakna kan pêk chu a phu a ni.
9. Engtin nge kan thuamhnaw leh nungchang hmangin inkhâwmna thianghlimte kan zahna chu kan lantîr theih?
9 Chu bâkah, kan inkhâwmna thianghlim zahna thûk tak kan neihzia chu kan inthuam dân hmangin kan lantîr thei a. Kan thuamhnaw hâk leh kan sam put hmang, leh kan lan dân chuan nasa takin kan inkhâwmnate chu a tizahawm lehzual thei a ni. Tirhkoh Paula chuan: “Mipahovin hmun tinah kut thianghlim pharin, thinrim lo leh inhnial lovin ṭawngṭai sela ka duh a ni. Chutiang bawkin hmeichheho pawh inthlahdah lo leh inbel lutuk lovin, thuam inchawih tâwkin inchei sela, sam phiarin emaw, rangkachakin emaw, tuikeplungin emaw, puan man tam tak taktein emaw inchei lovin; amaherawhchu (hmeichhia, Pathian ngaihsak intite chu inphu tâwkin) . . . inchei sela ka duh,” tiin a fuih a. (1 Timothea 2:8-10) Khêlmual lian tham taka neih inkhâwmpuiahte kan tel hian, kan thuamhnawte chu sik leh sa mil tûra kan ha chung pawhin a zahawm tho tûr a ni. Chu bâkah, chu hun kan zahna chuan inkhâwmpui laia thil ei leh ṭhelrêt ṭhial ang chite pumpelh tûrin min ṭanpui ang. Kan inkhâwmnaa ṭha taka inchei leh nungchang ṭha putna chuan Pathian Jehova, amah biakna, leh kan biakpuite a chawimawi a ni.
Pathian Chhûngte Nihna Nêna Inchawih Nungchang
10. Engtin nge tirhkoh Paula chuan kan Kristian inkhâwmnaah nungchang ṭha a ngaihzia a târ lan?
10 Korinth thawn khat, bung 14-ah chuan Kristian inkhâwmna kaihhruai dân tûr chungchânga tirhkoh Paula zilhna thu fing tak kan hmu a. “Engkim mawi tak leh fel taka tih ni rawh se,” tia sawiin a titâwp a ni. (1 Korinth 14:40) Kan inkhâwmte hi Kristian kohhran thiltih pêng pawimawh tak a ni a, Jehova chhûngte nihna nêna inchawih nungchang kan put a ngai a ni.
11, 12. (a) Kan inkhâwmnaa tel naupangte thinlungah eng nge tuh tûr a nih? (b) Eng kawng inâwm takin nge naupangte’n kan inkhâwmnaah an rinna an sawi chhuah theih?
11 A bîk takin naupangte chu inkhâwm laia awm dân tûr zirtîr an ngai a. Kristian nu leh pate chuan an fate hnênah Kingdom Hall leh Kohhran Lehkhabu Zirna Inkhâwm neihna hmunte hi infiamna hmun a ni lo tih an hrilhfiah tûr a ni. Hêng hmunte hi Jehova kan biakna hmun leh a Thu kan zirna hmun a ni. Lal fing Solomona chuan heti hian a ziak a ni: “Pathian ina i kal laiin i kê vêng ṭha rawh; . . . ngaithla tûra rawn hnaih hi a ṭha,” tiin. (Thuhriltu 5:1) Mosia chuan Israel puitlingte leh “fanau tê tê te” chu kal khâwm tûrin a zirtîr a. Tichuan: “Mipuiho . . . chuan an ngaihthlâk a, an zir a, LALPA in Pathian chu an ṭih a, he dân thu zawng zawng hi fîmkhur taka an zawm theih nân leh an fate la hre ve lote pawhin an hriat a, . . . LALPA in Pathian ṭih an zir theih nân ko khâwm rawh u,” tiin thu a pe a ni.—Deuteronomy 31:12, 13.
12 Chutiang bawkin tûn laiah pawh, thu ngaihthlâk leh zir chu kan fanau tê tê te an nu leh pate ruala an inkhâwm chhan ber a ni a. Naupangte chuan an ngaihthlâk thiam leh, a lo berah Bible thutak bulte an hriat thiam veleh, anni pawhin an rinna chu tawi têa chhânna pêin, an ‘kâin an ṭan’ ve thei a ni. (Rom 10:10) Naupang chuan a zawhna hriat thiam chhân nân thu tâwi tê a sawi chhuak ṭan thei a. Atîrah chuan a chhânna chu a chhiarin a chhiar chhuak mai thei a, mahse a hnuah chuan ama ir-âwm chhuak ngeia sawi chhuah chu a tum ang. Hei hi naupang tân a ṭangkaiin hlimawm hle a, chutianga rilru puak chhuaka rinna sawi chhuahna chuan inkhâwm zînga a upa zâwkte thinlung chu a tilâwm hle a ni. Nu leh pate chuan chhânnate pêin entawn tûr an siam tlângpui a. A theihna hmunah chuan naupang chu mahnia Bible te, hlabu te, leh thu leh hla chhuah zirlai te neih hrantîr thlap chu a ṭha bawk. Chutiang lehkhabute enkawl dân dik chu an zir tûr a ni. Hêng zawng zawngte hian naupangte thinlungah kan inkhâwmte hi inkhâwmna thianghlim a ni tih a tuh nghet tlat ang.
13. A vawikhatna atâna inkhâwm rawn chhimtute laka kan beisei chu eng nge?
13 Kan inkhâwmte chu Kristianna ram kohhran inkhâwm dân nêna inantîr erawh kan duh lo va. An inkhâwmte chu puithu tak leh kulmûk taka neih ruih emaw, zaia intihhlimna ang maia ri nuai nuai emaw a ni thei. Kingdom Hall-a kan inkhâwmna chu hlimawm tak leh kal châkawm tak ni se kan duh a; mahse, tualchhûng intihhlimna hmun ang hial a nih erawh kan duh lo. Jehova be tûra inhmu khâwm kan nih avângin, kan inkhâwmte chu engtik lai pawhin a zahawm tûr a ni. A vawikhatna atâna inkhâwm rawn chhim tute’n thu sawite an ngaihthlâk hnuah leh keimahni leh kan fate nungchang an thlîr hnuah: “Pathian in zîngah a awm tak zet,” an tih chu kan thil duh ber a ni.—1 Korinth 14:25.
Kan Biakna Hmêlhmang Nghet
14, 15. (a) Engtin nge ‘Jehova in thlahthlamna’ chu kan pumpelh theih ang? (b) Engtin nge Isaia 66:23 chu a thlen famkim mêk?
14 Kan sawi tawh ang khân, Jehova chuan a mite a hruai khâwm a, a ‘ṭawngṭaina in,’ a thlarau lam biak inah chuan anni chu a tihlim a. (Isaia 56:7) Mi rinawm Nehemia chuan a Judapuite hnênah an thil neihte hmanga an biak in ṭanpuia zahna dik lantîr a ngaih thu a hrilh a. ‘Kan Pathian in chu kan thlahthlam tûr a ni lo,’ tiin a sawi a ni. (Nehemia 10:39) Chu bâkah, Jehova’n a ‘ṭawngṭaina in’ chhûnga amah be tûra min sâwmna chu kan thlahthlam tûr a ni lo bawk.
15 Pathian be tûra inkhâwm ziah a pawimawhna târ langin, Isaia chuan: “Tin, heti hi a ni ang a, thla thar aṭanga thla thar dang thlengin, chawlhni aṭanga chawlhni dang thlengin mi zawng zawng ka hmâah chibai mi bûk tûrin an lo kal zut zut ang, LALPAN a ti,” tiin a lo hrilh lâwk a ni. (Isaia 66:23) Hei hi tûn laiah a thleng mêk a. Kristian inpumpêkte chu Jehova be tûrin thla tina chawlhkâr tinah chuan an kal khâwm ziah ṭhîn. Hei hi thil dang tam tak kârah Kristian inkhâwmte leh vântlâng rawngbâwlnaah te telin an ti a ni. ‘Jehova hmaa chibai bûk tûra kal’ ziahte zînga mi i ni em?
16. Engvângin nge tûnah hian kan inkhâwmna thianghlima tel chu kan nuna hmêlhmang nghetah kan siam ang?
16 Isaia 66:23 chu chu Jehova tiam khawvêl tharah chuan a thleng famkim tak zet ang. Chutih huanah chuan, “mi zawng zawng” chu a ngial a nganin chawlhkâr tin leh thla tin chatuana Jehova be tûr, a nih loh leh ‘chibai bûk tûrin an kal zut zut ang.’ Jehova be tûra inkhâwmna chu khawvêl thara kan thlarau lam nun hmêlhmang nghet a nih dâwn avângin, tûnah pawh hian kan inkhâwmna thianghlima tel ziah hi kan nuna hmêlhmang nghetah kan siam tûr a ni lâwm ni?
17. Engvângin nge kan inkhâwmte hi “ni chu a lo hnai telh telh a kan hriatin kan tih nasat lehzual sauh’ a ngaih?
17 Tâwpna a hnaih zêl hian, kan biakna atâna Kristian inkhâwmnaa tel hi kan tum ruh lehzual sauh tûr a ni a. Kan inkhâwmte nihphung thianghlim zahna avângin, kan hnathawhte, kan school homework te, a nih loh leh tlai lama class lâk te chuan kan rinpuite nêna inkhâwmna min ṭhulhtîr chu kan phal lo. Inkawmhona aṭanga kan dawn chakna chu kan mamawh a. Kan kohhran inkhâwmte hian mi dangte hriat chian theihna te, fuih theihna te, leh “hmangaih leh thil ṭha tiha” inchawh thawh tawn theihna hun remchâng te min pe a ni. Hei hi ‘ni chu a lo hnai telh telh a kan hriatin kan ti nasa lehzual sauh’ tûr a ni. (Hebrai 10:24, 25) Chuvâng chuan, kan inkhâwmna thianghlim zahna dik tak chu inkhawm ziahna te, thuamhnaw inâwm hâkna te, leh nungchang ṭha putna te hmangin i lantîr reng ang u. Chutianga tiin, Jehova thil thianghlimte thlîr dân kan ṭâwmpuizia kan lantîr a ni. (w06 11/01)
Ennawn Nân
• Engin nge Jehova mite inkhâwmna chu thil thianghlim anga ngaih tûr a ni tih târ lang?
• Kan inkhâwmna hmêlhmang engin nge inkhâwmna thianghlim a ni tih târ lang?
• Engtin nge naupangte’n kan inkhâwmte thianghlimna an zahzia an lantîr theih?
• Engvângin nge inkhâwmnaa tel ziah chu kan nuna hmêlhmang nghet kan nihtîr ang?
[Zirlai Atâna Zawhnate]
[Phêk 30-naa milemte]
Khawi hmuna neih pawh ni se, Jehova biak nâna inkhâwmna hi inkhâwmna thianghlim a ni