Pathian leh Mihringte Mit Hmuha Chawimawi Tlâk Inneihna
Pathian leh Mihringte Mit Hmuha Chawimawi Tlâk Inneihna
“Kana khuaah lawi chaw a awm a, . . . Isua leh a zirtîrte pawh lawi chaw eiah an sâwm a.”—JOHANA 2:1, 2.
1. Kana khuaa Isua thiltih chuan eng nge min ngaihsaktîr?
ISUA leh a nu, leh a zirtîr ṭhenkhat chuan inneihna chawimawi tlâkin Pathian mite zîngah hlimna a thlen dân chu an hria a. Krista chuan a thilmak tih theihna hmasa ber chu inneihna pakhat ropui taka siam nâna hmangin, chu hun hlimawmna chu a belhchhah hial a ni. (Johana 2:1-11) Nupa hlim tak nia Jehova rawngbâwl duh Kristiante inneihnaah chuan i tel tawh mai thei a. A nih loh leh mahni nupui pasal neih nî emaw, i ṭhian pakhat inneihna hlawhtling tûra ṭanpui emaw chu i nghâkhlel mai thei bawk. Chutiang inneihna hlawhtling nei tûr chuan tih theih eng nge awm?
2. Bible-ah inneihna chungchâng eng thu nge chuang?
2 Kristiante chuan Pathian thâwk khum Thua thurâwn chu nupui pasal neih tumte tân ṭangkai an ti hle a. (2 Timothea 3:16, 17) A hmun leh a hun a zira hnam dân leh sawrkâr dânin a phûtte ngei pawh a inan loh avângin, Bible-in Kristian inneihna atâna tihdân tûr chipchiar taka a sawi lang lo hi hriatthiamawm tak a ni. Entîr nân, hmân lai Israel ramah chuan mo lawm dân tûr bîk a awm hran lo va. Inneih nî chuan, mopa chuan monu chu a inah emaw, a pa inah emaw a hruai lût mai a ni. (Genesis 24:67; Isaia 61:10; Matthaia 1:24) Tûn lai inneihna tam taka an neih ṭhin mo lawmna tel lovin, he vântlâng hmuha an thiltih hi an inneih dân chu a ni mai.
3. Kana khuaa eng thilthlengah nge Isua a tel?
3 Israelte chuan chu hma lâkna chu inneihna thiltih a ni tih an hria a. A hnuah chuan, Johana 2:1-a târ lan angin, lawi chawte pawh an buatsaih mai thei a ni. Bible lehlin tam takin he châng hi: “Kana khuaah chuan inneihna a awm a.” titein a letling a. Mahse, atîra ziak thu mal chu “lawi chaw” emaw, “inneihna ruaiṭheh” emaw tiin inhmeh taka lehlin a ni. * (Matthaia 22:2-10; 25:10; Luka 14:8) Thuziak chuan Isua chu Juda inneihna nêna inzawm lawi chaw buatsaihnaah a tel a, hlimna a belhchhah tih chiang takin a târ lang. A pawimawh ber zâwk chu, chutih hun laia inneihna leh tûn laia inneih dân tlângpui inan lohna chu a ni.
4. Eng ang inneihna nge Kristian ṭhenkhatin an thlan a, engvângin nge?
4 Tûn lai ram tam takah, innei duh Kristiante chuan dânin a phût eng engemawte chu an tlin a ngai a. Chu mi an tlin tawh chuan, dânin a pawm Jeremia 33:11; Johana 3:29) Chutiang bawkin, Kristian dangte chuan ruahman lâwkna leh sum ṭhahnem tâwk tak sên ngai inneihna ruai ropui tak siam loh chu an thlang mai thei a. Ṭhian ṭha ṭhenkhat nêna chaw kîlho tûrin ruahmanna an siam mai thei a ni. He mi chungchânga kan duh thlanna chu engpawh ni se, Kristian puitling dangte chuan thlîr dân hrang an nei ang tih chu kan hre tûr a ni.—Rom 14:3, 4.
kawng eng ang pawhin an innei thei a ni. Chu chu mi tlêm tê, rorêltu emaw, mayor emaw, a nih loh leh sawrkârin thuneihna a pêk sakhaw rawngbâwltu emawin a kaihhruai inneihna pângngai tak pawh a ni thei. Ṭhenkhat chuan dân lama an inneihna hriatpuitua ṭang tûr emaw, he hun pawimawh taka an hlimna ṭâwmpui tûr emawin an chhûngkhatte leh an Kristian ṭhian ṭhenkhat sâwma inneihna buatsaih chu an thlang a ni. (5. Engvângin nge Kristian tam tak chuan an inneih nîa thusawi neih chu an duh a, thusawiah chuan eng chungchâng nge tel?
5 Kristian innei tûr a tam zâwkte chuan an inneihnaa Bible ṭanchhan thusawi neih chu an thlang a. * Anni chuan inneihna bul ṭantu chu Jehova a ni tih leh a Thu Bible-ah hian inneihna hlawhtling leh hlimawm neih theih dân thurâwn fing tak tak A pe tih an hria a ni. (Genesis 2:22-24; Marka 10:6-9; Ephesi 5:22-33) Tin, innei tûr a tam zâwk chuan an Kristian ṭhiante leh chhûngkhatte’n an hun hlimawm tak an ṭâwmpui chu an duh a. Mahse, dânin a phût thil chi hrang hrangte leh tih dânte, leh tualchhûng hnam dân nghette chungchâng chu eng angin nge kan thlîr ang? He thuziak hian hmun hrang hranga tih dânte chu a târ lang dâwn a ni. Ṭhenkhat chu i hriat ṭhan emaw, i awmna hmuna tih dân emaw nên a inang lo hle thei a. Amaherawhchu, Pathian chhiahhlawhte tâna pawimawh thu bul emaw, hmêlhmang emaw tlânglâwn takte chu i chhinchhiah thei a ni.
Inneihna Chawimawi Tlâk —Dân Anga Inneihna Chu
6, 7. Engvângin nge inneihna nêna inkûngkaih dân zamte chu kan ngaihven ang a, engtin nge chu chu kan lantîr ang?
6 Inneihna hi Jehova bul ṭan a nih laiin, mihring sawrkârte chuan innei tûrte chungah thuneihna ṭhenkhat an nei a. Chu chu a âwm a ni. Isua chuan: “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a. (Marka 12:17) Chutiang bawkin, tirhkoh Paula chuan: “Mi tin an chunga rorêltute thu thuin awm rawh se. Pathian thu lovin tumah rorêltu an awm si lo; rorêltua awmte hi Pathian ruat an ni,” tiin a kawhhmuh bawk a ni.—Rom 13:1; Tita 3:1, 2.
7 Ram tam zâwkah chuan Kaisara, a nih loh leh sawrkâr thuneitute chuan innei tûra tling chin chu an ruat a. Chuvângin, Pathian Lehkha Thu anga zalên inneih tum Kristian pahnihte chuan, inneih chungchânga an awmna ram dân zawm chu an tum tlat a ni. Chu dân zawmnaah chuan phalna lâk te, Sawrkârin mite inneihtîr thei tûra thuneihna a pêk hman te, leh inneihna hming ziak luh te pawh a tel thei a. Kaisara Awgusta’n “hming ziak” tûra a phût khân, chu thupêk chu zâwmin Mari leh Josefa chu Bethlehem-ah “hming ziak tûrin” an zin a ni.—Luka 2:1-5.
8. Inneihna chu eng anga nghet nge ni a, chu mi hriatthiamna chu Jehova Thuhretute thil tih dân engin nge târ lang?
8 Dân ang tak leh sawrkâr pawm tlâka Kristian pahnih an inneih hian, chu inneihna chu Pathian mit hmuhah a nghet a ni. Chuvângin, Jehova Thuhretute chu dân angin an innei nawn fo lo va, inneih champha 25-na emaw, 50-na emawahte chuan inneih thutiam chu an tiam nawn kher lo bawk. (Matthaia 5:37) (Kohhran ṭhenkhat chuan puithiam emaw, sakhaw hruaitu emawin a inneihtîr a, mipa leh hmeichhia chu nupaa a puan chauh loh chuan inneihna chu inneih dân dik a ni chiah lo tia chhâlin, sawrkâr dân ang thlapa inneihna chu a ngaihthah a ni.) Ram tam takah chuan, Jehova Thuhretute zînga rawngbâwltu pakhat chu sawrkârin mite inneihtîr thei tûrin thuneihna a pe a ni. Chutiang a theih a nih chuan, ani chuan Kingdom Hall-a inneihna thusawi ruala inkut suihtîr chu a duh mai thei a. Kingdom Hall chu tualchhûnga biakna dik hmunpui a ni a, chu chu Pathian Jehova bul ṭan inneihna atân hmun inâwm tak a ni.
9. (a) Sawrkâr dân anga inneih chungchângah, Kristian nupate chuan eng tih nge an thlan mai theih? (b) Engtin nge inneihna buatsaihnaah upate an tel mai theih?
9 Ram dangahte chuan, nupa tûrte chu city hall ang sawrkâr office emaw, sawrkâr ruat palai mithmuh emawa an inneih chu dânin a phût a ni. Kristiante chuan sawrkâr dân anga an inneih zawhah chu mi nî vêk emaw, a tûk emawa Kingdom Hall-a 1 Korinth 14:33, 40) Innei tûrte’n an dîl hall buatsaih an duh dânte chu an ennawnin, hall hman tûr chungchâng puan a ngaih leh ngaih loh chungchângah thu tlûkna an siam bawk ang.
inneihna thusawi neih chu an thlang fo va. (Anni chuan Kristian kohhran pawh tiama Pathian leh mihring hmaa innei an nih avângin, sawrkâr dân anga an inneihna leh Bible ṭanchhan thusawi inkâra ni tam tak tlâktîr chu an duh lo vang.) Sawrkâr dân anga innei tûrte chuan khawi lai Kingdom Hall emaw bera inneihna thusawi neih an duh chuan, Kohhran Service Committee-a upate phalna an dîl lâwk tûr a ni. Hêng enkawltute hian innei tûrte’n hming ṭha an nei tih an chian bâkah, an inneihna hian inkhâwmna hun pângngai a tibuai lo vang tih endikin, hun duan chu an siam tûr a ni. (10. Sawrkâr dân anga inneih a ngaih chuan, chu chuan engtin nge inneihna thusawi chu a nghawng ang?
10 Inneihna thusawi sawitu upa chuan a thusawi chu phûrawm tak, thlarau lama mite tichak thei tak, leh zahawm taka sawi chu a tum tlat ang a. Sawrkâr dân anga an inneih hmasak chuan, Kaisara dân anga an inneih tawh thu thusawitu chuan chiang takin a sawi lang ang. Sawrkâr dân anga an inneih laia inneihna thutiam an chham lo a nih chuan, thusawi neih laia chham chu an duh mai thei bawk. * Innei tharte chuan chu sawrkâr dân anga an inneih laiin thutiam chham tawh mah se, Jehova leh kohhran hmaa thu an tiam leh duh chuan, ‘Pathian zawm’ an nih tawhzia lantîr nân an thu chham chu an sâwi danglam ang.—Matthaia 19:6; 22:21.
11. Hmun ṭhenkhatah mite chu engtin nge an inneih a, chu chuan inneihna thusawi chu engtin nge a khawih danglam?
11 Hmun ṭhenkhatah chuan dân chuan innei tûrte hnênah inneih dân tûr bîk phût a nei lo va, sawrkâr ruat palai hmaa inneih pawh a phût kher lo mai thei bawk. Sawrkâr thuneitu pakhat hnêna inneihna hming ziak luh sa form an pêk hian an innei tihna a ni a. Chutaṭang chuan, innei anga an hming ziak luh a ni. Chutiang kawng chuan inneite chu nupui pasal anga thlîr an lo niin, chu an hming ziak luh nî chu an inneih nî a lo ni ta a ni. A chunga târ lan tawh angin, chutiang kawnga innei nupate chuan an inneihna hming an ziak zawh ve leh, Kingdom Hall-a Bible ṭanchhan thusawina neih chu an duh ang. Thu sawi tûra thlan thlarau lama puitling unaupa chuan tûnah mai khân innei anga hming an ziak luh avângin, anni chu an innei tawh tih lo tel zawng zawng hnênah a hriattîr ang. Thu tiam engpawh chu paragraph 10-na leh footnote-a târ lan nêna inmila tih a ni ang. Kingdom Hall-a lo tel zawng zawngte chuan nupate hlimna chu ṭâwmpuiin, Pathian Lehkha Thu aṭanga fuihna pêk chu an hlâwkpui ang.—Hla Thlan Khâwmte 3:11.
Hnam Dân leh Sawrkâr Dân Anga Inneihna
12. Hnam dân anga inneih chu eng nge ni a, chutianga inneih hnuah chuan eng nge tih âwm a nih?
12 Ram ṭhenkhatah chuan, mi chu hnam dân tia sawi theih tûr ang chiin an innei a. Chu chuan mi pahnih khawsa dûn mai a kâwk lo va, engemaw chena tualchhûng ṭhenkhata pawm theih, dân anga inneihna ni si lo sawina lah a ni hek lo. * Kan sawi hnam dân anga inneihna chu hnam khat emaw, khaw khat emawa khawtlâng pawm theih inneihna a ni a. Chutah chuan mite dân ang leh Pathian Thu anga an inneihna, mo man inhlanna leh dawnna a tel thei a ni. Sawrkâr chuan chutiang hnam dân anga inneihna chu a pawmin, a phal a, a nemnghet bawk a ni. Chu mi hnuah chuan, hnam dân anga an inneihna chu chhinchhiah emaw, ziak luh emaw a ni a, hetianga an tih hian innei tharte chuan inneihna lehkha an dawng thei a ni. Hming ziak luhna chu nupa tân emaw, a pasal a sûn palhin nupui tân emaw, a nih loh leh nakina an fate tân emaw dân anga humtu a ni thei. Kohhran chuan chutiang hnam dân anga inneite chu an inneihna a rang thei ang bera ziak lût nghâl tûrin a fuih ang. Ngaihvenawm takin, Mosia Dân hnuaiah inneihna leh naupiangte chu dân ang thlapin an chhinchhiah zêl niin a lang.—Matthaia 1:1-16.
13. Hnam dân anga inneih hnuah, inneihna thusawi chungchângah eng nge tih âwm a nih?
13 Chutiang hnam dân zuia dân ang taka inneite chu an inneih nî aṭang chuan nupui leh pasal an lo
ni a. Kan hmuh tawh angin, chutiang dân anga innei Kristiante chuan Kingdom Hall-ah inneihna thu tiam telna thusawi chu an nei duh ngei ang. Chutianga tih a nih chuan, thusawitu chuan anni chu Kaisara dân anga innei tawh an ni tih a puang ang. Chutiang thusawi chu vawi khat chauh neih tûr a ni a. Nupa tuak khat tân inneihna vawi khat leh Pathian Lehkha Thu ṭanchhan thusawi vawi khat chauh neih tûr a ni a; tûn ṭumah hi chuan hnam dân anga inneihna chungchângah a ni. He thiltih pahnihte hi ni khata neih theih a nih loh pawha a inhnaih thei ang bera neihna chuan khawtlângah Kristian inneihna a chawimawi a ni.14. Hnam dân leh sawrkâr dân anga inneih a theih ve ve chuan, Kristianin eng nge a tih ang?
14 Hnam dân anga inneih phal a nihna ram ṭhenkhatah chuan, sawrkâr dân ang pawha inneih theih a ni a. Sawrkâr dân anga inneihna chu sawrkâr ruat palai hmaa neih a ni ṭhîn a, inneihna thutiam sawina leh hming ziak luhna neih ṭhin a ni. Kristian ṭhenkhat chuan he sawrkâr dân anga inneihna hi hnam dân anga inneihna aiin an duh zâwk mai thei. A pahniha ti kawp tûra phûtna dân a awm lo; dânin a enga pawh a pawm ve ve a ni. Paragraph 9 leh 10-naa sawi lan inneihna thusawi leh thutiam chu hetah pawh hian hman tûr a ni a. A pawimawh ber chu innei tûrte chu Pathian leh mihringte mit hmuha chawimawi tlâka an inneih hi a ni.—Luka 20:25; 1 Petera 2:13, 14.
Inneihnaah Chawimawina Vawng Rawh
15, 16. Engtin nge chawimawina chu inneihnaah thil pawimawh tak a nih ang?
15 Persia lal leh lalnu inkâra buaina a chhuah khân, upa-min Memukana chuan rah ṭha tak—‘nupuiten an pasalte an pawisakna’—thlen thei tûr thurâwn chu a pe a. (Estheri 1:20) Kristian inneihnaah chuan chu thupêk chu lalin a tihchhuah a ngai lo; nupuite chuan an pasalte chawimawi chu an duh a. Chutiang bawkin, Kristian pasalte chuan an kawppuite an chawimawiin, an fak bawk a ni. (Thufingte 31:11, 30; 1 Petera 3:7 ) Kawppuite chawimawina chu kum tam tak a liam hnua tihlan ṭan chauh tûr a ni lo. Chu chu atîr aṭang—in inneih nî aṭang—ngeia tihlan nghâl tûr a ni.
16 Mipa leh hmeichhia—pasal leh a nupui—chu inneih nîa chawimawina lantîrtu tûr awmchhun an ni lo. Kristian upa pakhatin inneihna thusawi a sawi dâwn chuan, chu thusawi pawh chu chawimawi tlâk a ni tûr a ni. Thusawi chu innei tharte tân bîk tûr a ni a. Innei tharte chawimawina a nih avângin, thusawitu chuan fiamthu emaw, khual thuthang mai mai emaw lam chi chu a telh lo vang. Ani chuan innei tharte leh a ngaithlatute tizak thei tûr mi mal thil engmah a sawi tûr a ni lo. Chu ai chuan, inneihna Bul Ṭantu leh A thurâwn langsâr takte sawi uarin, nêlawm tak leh mi chawkphûr thei tak nih chu a tum zâwk ang a. A ni, upain zahawm taka inneihna thusawi a sawi chuan Pathian Jehova chawimawi inneihna a nihtîr lehzual ang.
17. Engvângin nge Kristian inneihnaah dân lam thil a tel?
17 He thuziak aṭang hian inneihna nêna inkaihhnawih dân lam thil chipchiar tak ilo hmuh ngei a rinawm a. A ṭhen phei chu in awmna ram atân a hman tlâk kher lo vang. Chutichung pawhin, Jehova Thuhretute zînga inneihna hian Kaisara thil phûtte tlin nâna kan awmna ram dân zahna lantîr a pawimawhzia kan hre ṭheuh tûr a ni. (Luka 20:25) Paula chuan: “Mi zawng zawng hnênah pêk tûr apiang pe rawh u; leiman pêkna tûra hnênah chuan leiman pe ula; chhiah chawina tûra hnênah chuan chhiah chawi ula; . . . pawisak tûra chu pawisa rawh u,” tiin min fuih a. (Rom 13:7) Ni e, Kristiante chuan an inneih nî phat aṭanga Pathianin tûn hun atâna ruahmanna a siam an zah chu a âwm hle a ni.
18. Inneihnaa tel thei thil dang engte hian nge kan ngaihsak phu a, he mi chungchângah hian khawiah nge chanchin kan hmuh belh theih ang?
18 Kristian inneihna tam tak chu intihhlimna—lawi chaw, chawhlui, a nih loh leh mo lawmnain a zui ṭhîn a. Isua chu chutiang lawi chaw eina pakhatah a tel tih hre chhuak leh ang che. Chutiang intihhlimna a awm a nih chuan, engtin nge Bible-a zilhna thute’n Pathian chawimawi tûr leh innei tharte leh Kristian kohhran tihming ṭha tûrin min ṭanpui theih? A dawta thuziak chuan chu mi chungchâng ngei chu a sawi a ni. * (w06 10/15)
[Footnote-te]
^ par. 3 Chu atîra ziak thu mal chu inneihna nêna inkûngkaih lo ruaiṭheh sawi nân pawh a hman theih a ni.—Estheri 9:21, 22.
^ par. 5 Jehova Thuhretute chuan inneihna thusawi atân, “Pathian Mit Hmuha Chawimawi Tlâk Inneihna” tih thupui minute 30 daih outline chu an hmang a. Chu chuan Jehova Thuhretute chhuah The Secret of Family Happiness tih lehkhabu leh thu leh hla chhuah danga awm Bible thurâwn ṭha tak takte chu a la chhuak a ni. Thusawi chu inneite leh inneihnaa tel ve zawng zawngte tân a ṭangkai hle a ni.
^ par. 10 Ram chhûng dânin thil dang a phût a nih chauh loh chuan, Pathian chawimawi hêng a hnuaia thu tiam hi hman a ni. Mopa tân: “Kei [mopa hming] hian nang [monu hming] hi Kristian Pasalte tâna Pathian Lehkha Thu Thianghlima târ lan Pathian dân nêna inremin, he leia kan dam chhûng atâna Pathian remruat a nih ang ngeiin, hmangaih atân leh hlut atân nupuiah ka nei a che.” Monu tân: Kei [monu hming] hian nang [mopa hming] hi Kristian nupuite tâna Pathian Lehkha Thu Thianghlima târ lan Pathian dân nêna inremin, he leia kan dam chhûng atâna Pathian remruat a nih ang ngeiin, zah thiam tûr leh hmangaih leh hlut atân pasalah ka nei a che.”
^ par. 12 May 1, 1962, chhuak Vênnainsâng, (English) phêk 287 chuan tualchhûng dân anga inneihna chungchâng a sawi.
^ par. 18 “I Inneih Nî Hlimawmna leh Zahawmna Tipung Rawh” tih thuziak phêk 20-a inṭan chu en bawk rawh.
I Hre Chhuak Em?
• Engvângin nge inneihna chungchânga dân lam leh thlarau lam pang thilte chu kan ngaihven ang?
• Kristian pahnih chu sawrkâr dân anga an inneih chuan, a hnu lawkah eng nge tih an duh mai theih?
• Engvângin nge inneihna thusawi chu Kingdom Hall-a neih a nih?
[Zirlai Atâna Zawhnate]
[Phêk 12-naa milem]
Hmân lai Israelte inneihnaah chuan, mopa chuan monu chu a inah emaw, a pa inah emaw a hruai mai ṭhîn