Jehova Thununna Chu Pawm Reng Rawh
Jehova Thununna Chu Pawm Reng Rawh
“LALPA thununna che ngainêp suh.”—THUFINGTE 3:11.
1. Engvângin nge Pathian thununna kan pawm ang?
HMAN lai Israel Lal Solomona chuan Pathian thununna pawm tûrin min fuih ṭheuh va. Ani chuan: “Ka fapa, LALPA thununna che ngainêp suh la, a zilhhauna che ning hek suh. LALPA chuan a hmangaihte chu a zilhhau ṭhîn a ni, pa in fa a lâwm apiangte a zilhhau ṭhîn ang hian,” a ti. (Thufingte 3:11, 12) Ni e, i Pa vâna mi chuan a hmangaih che avângin a thunun che a ni.
2. Engtin nge “thununna” chu hrilhfiah a nih a, engtin nge mi chu thunun a nih theih?
2 “Thununna” tih hian hremna te, zilhna te, kaihhruaina te, leh zirtîrna te a kâwk a ni. Tirhkoh Paula chuan: “Thununna rêng rêng hi tuar lai chuan lâwmawmin a lang lo va, lungchhiatthlâkin a lang zâwk ṭhîn, tuar hnuah erawh chuan chu mia sawizawia awmte tân chuan rah thlamuanawm tak, felna chu a chhuahsak ṭhîn,” tiin a ziak a. (Hebrai 12:11) Pathian thununna pawm a, nunpuina chuan felna kawng zawh tûrin a ṭanpui thei che a, chu chuan Pathian thianghlim Jehova a hnaih zualtîr che a ni. (Sâm 99:5) Zilhna chu rinpuite hnên aṭang te, Kristian inkhâwmnaa i thil zir aṭang te, Pathian Lehkha Thu leh “sum enkawltu rinawm” hmanga chhuah thu leh hla i zirna aṭang tea lo kal pawh a ni thei. (Luka 12:42-44) Insiamrem i mamawhna lai hriattîr i ni chu a va lâwmawm tak êm! Mahse, sual nasa tak tih a nih chuan eng ang thununna nge ngai mai thei?
Ṭhenkhat Hnawh Chhuah An Nih Chhan
3. Eng hunah nge hnawh chhuahna hi thleng ṭhîn?
3 Pathian chhiahhlawhte chuan Bible leh Kristian thu leh hlate chu an zir a. Jehova tehnate chu an inkhâwmnaahte leh an inkhâwmpuiahte sawi a ni ṭhîn. Chuvângin Kristiante chuan Jehova’n an laka a thil beisei chu an hre thei a ni. Kohhrana mi chu inlamlêt lova sual nasa tak a tih zawm zêl chauhvin hnawh chhuah a ni ṭhîn.
4, 5. Hetah hian Bible-a hnawh chhuah chungchâng entîrna eng nge pêk a nih a, engvângin nge kohhran chu thil tisualtu la lût leh tûra fuih a nih?
4 Bible-a hnawh chhuah chungchâng entîrna pakhat ngaihtuah rawh. Korinth kohhran chuan “chutiang inngaih chu Jentailte zîngah pawh awm ngai hlei lo, [an] zînga mi pakhatin a pa nupui a neih” chu an ngaithei a. Paula chuan Korinth mite chu “mi chutiang chu, a thlarau . . . chhandamin a awm theih nân a tisa tiboral tûrin, Setana pe ila ka ti a ni,” tiin a fuih a ni. (1 Korinth 5:1-5) Mi chu hnawh chhuah a nih a, Setana hnêna pêk a nihin, thil sual titu chu Diabola khawvêla mi a ni leh a. (1 Johana 5:19) Hnawh chhuahna chuan kohhran aṭanga tisa sual thununna chu paih bovin, Pathian “thlarau,” a nih loh leh rilru put hmang chu vênhim a ni.—2 Timothea 4:22; 1 Korinth 5:11-13.
5 Chu mi hnu rei lo têah Puala chuan Korinth khuaa Kristiante chu thil sual titu la lût leh tûrin a fuih a ni. Engvângin nge? Tirhkoh chuan anni—Korinth khuaa Kristiante—chu ‘Setanan a dinchan khalh’ lohna tûrin a ti. Thil tisualtu chu a inlamlêtin, a nun a thianfai tawh niin a lang. (2 Korinth 2:8-11) Korinth mite chuan inlamlêta chu an lâk luh leh duh loh chuan, Setana’n anni chu a dinchan khalhin, Diabola duh anga mi khawngaihna nei lo leh ngaihdamna lantîr duh lo mi an lo ni thei a. Chuvângin, inlamlêta chu ‘ngaidamin an thlamuan’ nghâl a rinawm hle.—2 Korinth 2:5-7.
6. Hnawh chhuahna chuan eng nge a tihhlawhtlin?
6 Hnawh chhuahna chuan eng nge a tihhlawhtlin? Jehova hming thianghlim sawichhiatna a paih bo va, a mite hming ṭhatna chu a humhim a ni. (1 Petera 1:14-16) Kohhran aṭanga inlamlêt duh lo thil tisualtu hnawh chhuahna chuan Pathian tehnate a chawisângin, kohhran thlarau lam thianghlimna a vawng a. Tin, inlamlêt duh lotu chu a sual nasatzia a hriat chhuahtîr thei bawk a ni.
Inlamlêtna Chuan Kawngro A Su
7. Bawhchhiatna inpuan lohna chuan Davida chungah eng nghawng nge a neih?
7 Sual nasa tak ti a tam zâwk chu an inlanlêt tak zet a, kohhran aṭanga hnawh chhuah an ni lo. Dik tak chuan, inlamlêtna tak tak neih chu a awlsam lo mai thei a. Sâm 32-na phuahtu Israel Lal Davida chungchâng hi han ngaihtuah teh. Chu hla chuan Davida’n engemawti chhûng chu Bat-sebi chungchânga a sualna nasa tak a puang lo tih a târ lang a ni. A rah chhuah chu nipui lai khawroin thing a tihkhawro ang chiahin, a sualna avânga a lungngaihna chuan a chakna a tiral a ni. Davida chuan tisa lamah leh rilru lamah a tuar a; mahse, ‘a bawhchhiatna a inpuanin, Jehova chuan a ngaidam’ a. (Sâm 32:3-5) Tichuan ani chu: “Mi, LALPAN khawlohna neia a ruat lohva . . . chu, a eng a thâwl e,” tiin a zai a ni. (Sâm 32:1, 2) Pathian zahngaihna dawn chu a va ropui tak êm!
8, 9. Engtin nge inlamlêtna chu târ lan a nih a, hnawh chhuah lâk luh leh chungchângah chu chu engtiang khawpa pawimawh nge ni?
8 Chutiang a nih chuan, zahngaihna dawng tûrin thil tisualtu chu a inlamlêt a ngai tih a chiang hle. Amaherawhchu, zahzumna leh sual hai lan hlauhna chu inlamlêtna a ni lo. “Inlamlêt” tih awmzia chu miin a nungchang ṭhat lohna chungchânga a inchhîr avânga “a rilru a thlâk” hi a ni. Inlamlêttu chuan ‘thinlung lungchhia leh inchhîr ngawih ngawih a nei’ a, a theih phawt chuan thil dik lo tidik chu a duh a ni.—Sâm 51:17; 2 Korinth 7:11.
9 Inlamlêtna chu Kristian kohhrana lâk luh leh chungchângah thil pawimawh tak a ni a. Hnawh chhuah chu hun engemaw chen a liam hma loh chuan kohhrana lâk luh leh mai a ni ṭhîn lo. Lâk luh leh a nih hmain, a rilru chu nasa takin a inthlâk tûr a ni. A sual khûnkhânna leh Jehova leh kohhran a tih hming hliauna chu a hre tûr a ni a. Thil sual titu chu a inlamlêt a, ngaihdam dîla tih tak zeta ṭawngṭaiin, ani chuan Pathian tehna felte a zâwm tûr a ni. Lâk luh leh a dîl hunah chuan, a inlamlêtzia leh ‘sim hming pu tlâka thil a tihzia’ finfiahna a pe thei tûr a ni.—Tirhkohte 26:20.
Engvângin Nge Thil Sual Tih Kan Inpuan Ang?
10, 11. Engvângin nge sual zêp kan tum loh vang?
10 Thil sual titu ṭhenkhat chuan: ‘Ka sualna tu hnênah pawh sawi ta ila, zawhna zahthlâkte kan chhân a ngaiin, hnawh chhuah ka ni mai thei a. Mahse, ka ngawih bopui chuan chu chu pumpelh theih a niin, kohhrana mi tumahin an hre lo vang,’ an ti mai thei. Chutiang ngaihtuahna chuan thil pawimawh ṭhenkhat a hmaih a ni. Chûngte chu eng nge ni?
11 Jehova chu “Pathian lainatnaa khat, mi khawngaih thei tak, thin nel tak, ngilneihna leh thu tak ngah, mi sâng tam tak chunga khawngaihna lantîr ṭhîn, khawlohna te, bawhchhiatna te, suahsualna te ngaidam ṭhîn,” a ni a. Amaherawhchu, a mite chu “a tâwk lekin” a hrem ṭhîn bawk a ni. (Exodus 34:6, 7; Jeremia 30:11) Sual nasa tak i tih a, sualna zêp i tum chuan engtin nge Pathian zahngaihna chu i dawn theih ang? Jehova’n i thil sual tih chu a hria a, thil sual tih chu a ngaihthah mai mai lo a ni.—Thufingte 15:3; Habakuka 1:13.
12, 13. Thil sualtih thup bo tumna chuan eng nge a rah chhuah theih?
12 Thil sual nasa tak i ti a nih chuan, inpuanna chuan chhia leh ṭha hriatna thianghlim nei lêt leh tûrin a ṭanpui thei che a ni. (1 Timothea 1:18-20) Mahse, sual puan lohna chuan chhia leh ṭha hriatna ṭha lo a thlen theiin, chu chuan sual nasa lehzual tihnaah a hruai thei che a ni. Mi dang emaw, kohhran emaw chunga sual mai i ni lo tih hre reng rawh. Pathian chungah thil i tisual a ni. Fakna hla phuahtu chuan: “LALPA chu, a lalṭhutphah zawng vânah a awm; mihring fate hi a mitin a en a, an thiltihte a hmu. LALPA chuan mi fel chu a fiah ṭhîn a: mi suaksual leh nunrâwnna ngaina erawh chu a nunnain a haw ṭhîn,” tiin a zai a ni.—Sâm 11:4, 5.
13 Jehova chuan sual zêp a, Kristian kohhran thianghlima awm tum tupawh chu mal a sâwm lo vang. (Jakoba 4:6) Chuvângin, sual nasa tak i tih a, insiam ṭhat i duh chuan, tih tak zeta inpuan chu hreh suh. A nih loh chuan, a bîk takin chutiang sual nasa tak chungchâng zilhna i ngaihthlâk hunah leh i chhiar hunah inthiam lohna i nei ang. Jehova’n Lal Saula hnên aṭanga a thlarau a lâksawn angin i hnên ata a thlarau lasawn ve ta se, engtin nge ni ang? (1 Samuela 16:14) Pathian thlarau lâk bo a nih chuan, sual nasa lehzualah i tlu lût thei a ni.
I Unau Mi Rinawmte Ring Rawh
14. Engvângin nge thil sual titu chuan Jakoba 5:14, 15-a fuihna chu a zui ang?
14 A nih chuan, thil sual titu inlamlêt chuan eng nge a tih tâk ang? “Kohhran upa kohtîr sela, anin Lalpa hminga hriak hnawihin a chungah ṭawngṭai rawh se; tin, rinnaa ṭawngṭaina chuan damlo chu a chhandam ang a, Lalpa chuan ani chu a kai tho vang.” (Jakoba 5:14, 15) Upate panna chu ‘sim hming pu tlâka rah’ chhuah theihna kawng khat a ni. (Matthaia 3:8) Hêng mi rinawm leh hmangaihna ngahte hian ‘Lalpa hminga hriak hnawihin a chungah an ṭawngṭai ang.’ Tihdamna hriak angin, Bible aṭanga an zilhna thu chuan inlamlêt tak taktu chu a thlamuan ang.—Jeremia 8:22.
15, 16. Engtin nge Kristian upate chuan Pathian siam entîrna Ezekiela 34:15, 16-a chhinchhiah chu an zawm?
15 Berâm anga min Vêngtu Jehova chuan B.C.E. 537-a Judate Babulon sal tânna ata chhuahin leh C.E. 1919-a thlarau lam Israelte “Babulon Khaw Ropui” ata zalênna pein, hmangaihna kawnga entîrna ṭha a va siam tak êm! (Thu Puan 17:3-5; Galatia 6:16) Hetiang hian a thutiam: “Keimah ngeiin ka berâmte chu ka châwm ang a, ka bawhtîr hle hle ang, . . . A bo chu ka zawng ang a, hnawh bote chu ka hruai kîr ang a, an ke tliakte chu ka tuam ang a, ka tichak ang,” tih chu a hlen a ni.—Ezekiela 34:15, 16.
16 Jehova chuan a entîr nei berâmte chu a châwm a, a bawhtîr hle hle a, a bote chu a zawng a ni. Chutiang bawkin, Kristian berâm vêngtute chuan Pathian berâmte chu thlarau lama châwm ṭhat leh humhim an ni tih chu an chian a. Upate chuan kohhran aṭanga bote chu an zawng chhuak a ni. Pathianin ‘a ke tliakte a tuam’ ang chiahin, upate chuan ṭawngkam emaw, mahni thil sualtih vâng emawa berâm hliamte chu an “tuam” a. Tin, Pathianin ‘a chak lote a tihchak’ ang bawkin, upate chuan mahni thilsual tih avângtea thlarau lama chak lote chu an ṭanpui a ni.
Berâm Vêngtute’n An Ṭanpui Dân
17. Engvângin nge upate thlarau lama ṭanpuina chu kan zawn hreh loh vang?
17 Upate chuan: “Hlau chungin khawngaih rawh u” tih zilhna thu chu lâwm takin an zâwm a ni. (Juda 23) Mipat hmeichhiatna hman khawlohnaah tlu lûtin, Kristian ṭhenkhat chuan sual nasa tak an ti a. Mahse, an inlamlêt tak zet chuan thlarau lama ṭanpui châk upate zahngaihna leh hmangaih taka enkawlna chu an beisei thei a ni. Amah pawh tiamin, Paula chuan chutiang mipate chungchângah: “In rinna chungah lalna kan nei, ka ti lo va, in lâwmna ṭanpuitu kan ni, ka ti zâwk a ni,” tiin a sawi a. (2 Korinth 1:24) Chuvâng chuan, thlarau lama an ṭanpuina chu zawng hreh ngai suh.
18. Engtin nge upate chuan an rinpui thil sual titute chu an dâwr?
18 Sual nasa tak i ti a nih chuan, upate chu engvângin nge i rin theih ang? A bul berah chuan, Pathian berâm vêngtute an nih vâng a ni. (1 Petera 5:1-4) Hmangaihna nei berâm vêngtu tumahin, berâm tihnuam tak, a inhliam avânga bê chu a vaw lo vang. Chuvângin, upate chuan an rinpui thil sual titute an dâwr hian a theih phawt chuan, dân bawhchhiahna leh inhremna lam ni lovin, sual leh thlarau lama tundin lehna chu an ngaihsak a ni. (Jakoba 5:13-20) Upate chuan fel taka rorêlin, “pâwlho chu an zuah,” a nih loh leh ngilneihna nên an enkawl tûr a ni. (Tirhkohte 20:29, 30; Isaia 32:1, 2) Kristian dang zawng zawngte angin, upate chu ‘dik taka ti a, khawngaihna ngainain, Pathian nên thuhnuairawlh takin an lêng dûn’ tûr a ni. (Mika 6:8) Chutiang mizia chu “[Jehova] ran tlatna hmuna berâmhote” nunna leh an rawngbâwlna nêna inkûngkaih thu tlûkna an siam hunah a pawimawh a ni.—Sâm 100:3.
19. Eng rilru put hmang nên nge upate chuan tuemaw chu tundin leh an tum?
19 Kristian berâm vêngtute chu thlarau thianghlima ruat an ni a, chu mi kaihhruaia awm chu an tum a. Mi chu a inhriat hmâa “sual engpawh a tih lai phâwkin awm sela,” thlarau lama puitlingte chuan ‘thuhnuairawlh taka tundin leh’ chu an tum a ni. (Galatia 6:1; Tirhkohte 20:28) Mi ngaihsak tak doctor chuan ke ruh tliak chu ṭûl lo taka tihnatna pumpelh chunga fîmkhur taka a tuahrem ang chiahin, upate chuan Pathian tehnate tâna nghet tlat chungin thuhnuairawlh takin thil sual titu ngaihtuahna tundinsak chu an tum a ni. (Kolossa 3:12) Zahngaihna lantîr engpawh chu ṭawngṭaina leh Bible-a innghat a nih dâwn avângin, upate thu tlûkna siam chuan Pathian thlîr dân a târ lang dâwn a ni.—Matthaia 18:18.
20. Engtikah nge mi chu zilhna pêk a nih thu kohhrana puan a ngaih mai theih?
20 Thil sual tih chu mi hriat zau emaw, an la hre dâwn emaw a nih chuan, kohhran hming chhiatna vênhim nâna kohhrana puan chhuah chu a ṭha ang. Kohhran hriattîr a ngaih chuan, chu chu puan chhuah a ni bawk ang. Zilhna tâwktu thlarau lama hma a lo sâwn chhûng chu rei lo te chhûng engmah ti thei lova siamtu liam tuar dam chhuak lehtu nên a tehkhin theih ang. Hun engemawti chhûng chu inlamlêttu chuan inkhâwmnaa chhâng lo va, ngaihthlâk rih zâwk chu a hlâwkpui ang. Upate chuan a chak lohna lai tihchak nân tuemaw Bible zirpui tûrin ruahmanna an siam mai thei a, chu chuan ‘rinna dik tak,’ a nih loh leh chak tak a neihtîr thei a ni. (Tita 2:2) Hêng zawng zawng hi hmangaihnaa tih a ni a, thil sual titu hrem duh vânga tih a ni lo.
21. Engtin nge thil sual tih ṭhenkhat chu chinfel theih a nih?
21 Upate chuan kawng hrang hrangin thlarau lama ṭanpuina chu an pe thei a. Entîr nân, tûn hmaa zû lama buaina nei unaupa chuan ina amaha a awmin vawikhat emaw, vawihnih emaw nasa takin zû in ta se. A nih loh leh vaihlo kalsan daih tawh tuemaw chuan a chak loh laiin zial chu vawikhat emaw, vawihnih emaw a rûkin lo zu se. A ṭawngṭaiin, Pathianin a ngaidam tih a ring a nih pawhin, chutiang sual chu chîn dawklaka a neih loh nân upate ṭanpuina chu a zawng tûr a ni. Upa pakhat emaw, pahnih emaw chuan dinhmun chu an chingfel thei a. Amaherawhchu, thil dang a kaihhnawih tel theih avângin upa(te) chuan presiding overseer a(n) hriattîr ang.
Jehova Thununna Pawm Zêl Rawh
22, 23. Engvângin nge Pathian thununna chu kan pawm chhunzawm zêl ang?
22 Pathian pawm ni tûr chuan, Kristian tinte chuan Jehova thununna an ngaihsak tûr a ni. (1 Timothea 5:20) Chuvângin, Pathian Lehkha Thu leh Kristian thu leh hla chhuah i zir laia i dawn zilhna engpawh leh Jehova mite inkhâwmna te, assembly te, leh inkhâwmpui tea i ngaihthlâk fuihna engpawh chu nunpui rawh. Jehova duhzâwng tih chungchângah harhvâng reng rawh. Tichuan Pathian thununna chuan thlarau lam kulh—sual laka invênhimna kulh nghet tak—vawng reng tûrin a ṭanpui ang che.
23 Pathian thununna pawmna chuan A hmangaihnaa invawng ṭha reng tûrin a ṭanpui ang che. Ṭhenkhat chu Kristian kohhran aṭanga hnawh chhuah an ni ngei mai a; mahse, ‘i thinlung i vên ṭhat a,’‘mi fingte anga i awm’ pawt chuan chutiang chu i chunga a thlen ve kher a ngai lo. (Thufingte 4:23; Ephesi 5:15) Mahse, hnawh chhuah mêk i nih chuan, lâk luh leh ni tûrin engah nge hma i lâk loh vang? Pathian chuan a hnêna inpumpêk tawh zawng zawngin rinawm tak leh “hlim taka” amah an biak chu a duh a. (Deuteronomy 28:47) Jehova thununna i pawm ziah chuan ani chu chatuanin hlim takin i be reng thei ang.—Sâm 100:2. (w06 11/15)
Engtin Nge I Chhân Ang?
• Engvângin nge ṭhenkhat chu Kristian kohhran aṭanga hnawh chhuah an nih?
• Inlamlêtna dik takah eng nge tel?
• Engvângin nge sual nasa tak chu kan inpuan ang?
• Eng kawngtein nge Kristian upate chuan inlamlêt thil sual titute chu an ṭanpui?
[Zirlai Atâna Zawhnate]
[Phêk 16-naa milem]
Engvângin nge Paula’n Korinth kohhran hnênah hnawhchhuah chungchânga kaihhruaina a thawn?
[Phêk 19-naa milem]
Hmân lai berâm vêngtute angin, Kristian upate chuan Pathian berâm hliam tuarte chu an “tuam”