Pathian Hmangaihnaah Chuan Invawng Ṭha Rawh!
Pathian Hmangaihnaah Chuan Invawng Ṭha Rawh!
“Duh takte u, . . . chatuan nunna neihtîrna khawp . . . Pathian hmangaihnaah chuan invawng ṭha rawh u.”—JUDA 20, 21.
1, 2. Engtin nge Pathian hmangaihnaa i invawn reng theih?
JEHOVA chuan khawvêl a hmangaih êm avângin amah ringtute’n chatuan nunna an neih theih nân a Fapa mal neih chhun chu a pe a. (Johana 3:16) Chutiang hmangaihna dawn chu a va ropui tak êm! Jehova chhiahhlawh i nih chuan, chu hmangaihna chatuana neih chu i duh ngei ang.
2 Zirtîr Juda chuan Pathian hmangaihnaa i invawn theih dân chu a sawi a. “Nangni zawngin in rin chhan thianghlim ber chungah chuan nangmahni leh nangmahni inrem chhovin, thlarau thianghlimah ṭawngṭaiin, chatuan nunna neihtîrna khawp kan Lalpa Isua Krista khawngaihna chu nghâk chungin, Pathian hmangaihnaah chuan invawng ṭha rawh u,” tiin a ziak a ni. (Juda 20, 21) Pathian Thu zirna leh chanchin ṭha hrilhna chuan rinna, a nih loh leh “rin chhan thianghlim ber”—Kristian zirtîrnaa inrem chho tûrin min ṭanpui a ni. Pathian hmangaihnaa invawng rêng tûr chuan, “thlarau thianghlimah,” a nih loh leh chu mi thununna hnuaiah i ṭawngṭai tûr a ni a. Chatuan nunna dawng tûrin, Isua Krista tlanna inthawinaah rinna i lantîr bawk tûr a ni.—1 Johana 4:10.
3. Engvângin nge ṭhenkhat chu Jehova Thuhretute an nih tawh loh?
3 Atîra rinna nei ṭhenkhat chu Pathian hmangaihnaah an invawng reng lo. Anni chuan sual kawng zawh an thlan avângin, Jehova Thuhretute an ni tawh lo. Engtin nge chutiang thil chu i pumpelh theih ang? A hnuaia thute chhût ngunna chuan sual laka inthiar fihlîm tûr leh Pathian hmangaihnaa invawng ṭha tûrin a ṭanpui thei ang che.
Pathian I Hmangaihna Chu Târ Lang Rawh
4. Pathian thuâwih chu eng anga pawimawh nge ni?
4 Pathian i hmangaihna chu a thuâwihna hmangin târ lang rawh. (Matthaia 22:37) “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tiin tirhkoh Johana chuan a ziak a ni. (1 Johana 5:3) Pathian thuâwihna nun kawng chuan thlêmna donaah a tichak thei chein, a tihlim thei che. Fakna hla phuahtu chuan: “Mi suaksualte remruat anga awm ngai lo . . . mi chu, a eng a thâwl e. A lâwmna chu LALPA dânah a ni zâwk a,” tiin a sawi a ni.—Sâm 1:1, 2.
5. Jehova i hmangaihna chuan eng anga thil ti tûrin nge a chêttîr ang che?
5 Jehova i hmangaihna chuan a hming chhiatna thlentu sual lian tak tihna pumpelh tûrin a chêttîr ang che. Agura chuan: “Pachhiatna emaw, neihnunna emaw mi pe hek suh. Ka tâna mamawh chawin min châwm rawh; chutilochuan ka tlaipuar ang a, ka phat ang chia, ‘LALPA chu tunge ni?’ Ka ti dah ang e; a nih loh vêk leh ka lo rethei ang a, rûk ka ru ang a, ka Pathian hming ka tihliau dah ang e,” tiin a ṭawngṭai a ni. (Thufingte 30:1, 8, 9) Pathian hming tichhiaa a hming tihhliau loh chu tum tlat rawh. A hming chawimawina thlentu thil dik tih chu tum reng bawk rawh.—Sâm 86:12.
6. Hre reng chunga thil sual i tih chuan eng thil nge thleng thei?
6 Sual ti tûra thlêmna do thei tûrin, hmangaihtu che i Pa vâna mi hnênah ṭawngṭai fo rawh. (Matthaia 6:13; Rom 12:12) I ṭawngṭainate chu dâl a nih loh nân Pathian zilhna chu zâwm tlat rawh. (1 Petera 3:7) Jehova chuan helte ṭawngṭaina chu a hnêna a kal tlang theih lohna tûrin entîr nei chhûma a dan tlat avângin, hre reng chunga thil sual ti i nih chuan a rah chhuah chu a râpthlâk hle ang. (Jeremia Ṭah Hla 3:42-44) Chuvângin inngaihtlâwmna lantîr la, Pathian i panna kawng dang thei thil rêng rêng ti lo tûrin ṭawngṭai rawh.—2 Korinth 13:7.
Pathian Fapa I Hmangaihna Lantîr Rawh
7, 8. Engtin nge Isua zilhna thu ngaihsakna chuan mi chu sual kawng hnâwl tûra a ṭanpui theih?
7 Sual kawng hnâwl tûra a ṭanpui dâwn che avângin, Isua Krista thupêkte zâwmin amah i hmangaihna lantîr rawh. Isua chuan: “Nangnin ka thupêkte in zawm chuan ka hmangaihin in awm reng ang; keiin ka Pa thupêkte ka zâwm a, a hmangaihin ka awm reng ang bawk hian,” a ti. (Johana 15:10) Engtin nge Isua thute mila nunna chuan Pathian hmangaihnaa invawng reng tûra a ṭanpui theih che?
8 Isua thute ngaihsakna chuan nungchang nghehna vawng tûrin a ṭanpui thei che a. Pathian Dân chuan: “I uire tûr a ni lo,” a ti. (Exodus 20:14) Mahse, Isua chuan: “Tupawh ngaih châka hmeichhe melh apiang chu, a thinlungah a uirê tawh reng a ni,” tia sawiin, chu thupêk phêna awm thu bul chu a târ lang a ni. (Matthaia 5:27, 28) Tirhkoh Petera chuan kum zabi khatna kohhrana mi ṭhenkhat chuan “mit uirêa khat” an nei a, anni chuan “mi nghet lote” an thlêm thlûk thu a sawi a. (2 Petera 2:14) Mahse, anmahni ang lo takin, Pathian leh Krista i hmangaih a, an thu i âwih bawk a; tin, anmahni nêna in inlaichînna vawn ṭhat i tum tlat chuan mipat hmeichhiatna lama sual chu i pumpelh thei a ni.
Jehova Thlarau Chuan Kaihruai Che Rawh Se
9. Thlarau thianghlim chungchângah, miin thil a tihsual chhunzawm zêl chuan eng nge thleng thei?
9 Pathian thlarau thianghlim dîla ṭawngṭaiin, chu chu inkaihhruaitîr rawh. (Luka 11:13; Galatia 5:19-25) Thil sual i tih chhunzawm zêl chuan, Pathianin i hnên aṭang a thlarau chu a la kîr thei a ni. Bat-sebi nêna inkûngkaiha Davida’n thil sual a tih hnuah, ani chuan Pathian hnênah: “I hnên ata hi mi paih bo suh la, i thlarau thianghlim hi mi lâksak suh ang che,” tiin a ngên a ni. (Sâm 51:11) Saula chu inlamlêt lo thil sualtitu a nih avângin, Pathian thlarau a chân a. Saula chuan hâlral thilhlan a hlannaah leh berâm leh sebâwng te, leh Amalek lal chu a zuahnaah thil sual a ti a ni. Chu mi hnu chuan Jehova’n a thlarau thianghlim chu Saula hnên ata a la kîr a ni.—1 Samuela 13:1-14; 15:1-35; 16:14-23.
10. Engvângin nge thil sual tih ngaihtuahna ngei chu i hnâwl ang?
10 Thil sual tih ngaihtuahna ngei chu hnâwl rawh. Tirhkoh Paula chuan: “Thutak hriatna famkim chu kan chan hnua thil kan tihsual luih si chuan sualte tâna inthawina a awm tawh hauh lo vang,” tiin a ziak a. (Hebrai 10:26-31) Chutiang thleng khawpa hre reng chunga thil sual i tih chuan a va pawi dâwn êm!
Mi Dangte Hmangaihna Dik Lantîr Rawh
11, 12. Eng kawngin nge hmangaihna leh zahna chuan mipat hmeichhiatna lama nungchang bawlhhlawhna aṭang mi chu a dan ang?
11 Mahni mihringpuite hmangaihna chuan mipat hmeichhiatna lama nungchang bawlhhlawhna ata a dang ang che. (Matthaia 22:39) Chutiang hmangaihna chuan pawmlai neite hmangaihna rûksak lo tûra i thinlung vêng ṭha tûrin a tur ang che. Chutianga pawmlai neite hmangaihna rûkna chuan, uirêna sualah min hruai lût thei a ni. (Thufingte 4:23; Jeremia 4:14; 17:9, 10) Hmeichhe dangte ni lova mahni nupui chauh ngaihsaktu, mi dik Joba ang ni ang che.—Joba 31:1.
12 Inneihna thianghlim zahna chuan sual nasa tak pumpelh tûrin a ṭanpui thei che a. Inneihna chawimawi tlâk leh nau neih nâna mipat hmeichhiatna hman chu Pathian thiltum a ni. (Genesis 1:26-28) Serh chu thil thianghlim tak nunna nên a inkûngkaih tih hre reng rawh. Inngaih hmangte leh uirête chuan Pathian thu an âwih lo va, mipat hmeichhiatna hmanna chu an chawimawi lo va, inneih thianghlimna chu an zah lovin, leh anmahni taksa chungah thil an tisual a ni. (1 Korinth 6:17) Mahse, Pathian leh ṭhenawmte hmangaihna leh, Pathian lawmzâwng thuâwihna chuan mi chu Kristian kohhran aṭanga hnawhchhuah nihna thlentu nungchang lak aṭangin a vêng ṭha thei a ni.
13. Mi bawlhhlawh chuan eng kawngin nge ‘a sum a tihrîral’ ṭhin?
13 Kan hmangaihte kan tihlungngaih lohna tûrin kan ngaihtuahna sualte chu kan dang bet tûr a ni. “Nawhchizuar pâwltu chuan a sum a tirîral ṭhîn,” tiin Thufingte 29:3 chuan a sawi. Uirê inlamlêt duh lo chuan Pathian nêna an inlaichîna leh chhûngkaw inzawmna a tichhia a. A thiam zâwk chuan a ṭhen thei a ni. (Matthaia 19:9) Thil ti sualtu chu pasal emaw, nupui emaw pawh ni se, inṭhenna chuan pawi khawih lo a kawppui, an fate, leh mi dangte tân lungngaihna nasa tak a thlen a ni. Nungchang ṭhat lohnain thil a tihchhiat theihzia hriatna chuan thlêmna chu do tûrin min chêttîr tûr a ni tih i pawm lâwm ni?
14. Thufingte 6:30-35 aṭangin thilsual tih chungchângah eng nge kan zir theih?
14 Uirêna sual atâna zângna dawmna a awm theih loh avângin, chu chuan he nungchang bawlhhlawhna hi pumpelh tûrin min chêttîr tûr a ni. Thufingte 6:30-35 chuan miin a ril a ṭâm avânga rûk a rûk chuan khawngaih ni mai thei mah se, uirê chu a rilru sual avângin an hmuhsit tih a târ lang a. Ani chuan “ama nunna tichhe tûrin thil a ti a ni.” Mosia Dân hnuaiah chuan, ani chu tihhlum tûr a ni. (Leviticus 20:10) Uirê chuan a hurna phuhru tûr ringawtin mi dangte a tilungngai a, inlamlêt duh lo uirêtu chu Pathian hmangaihnaah a awm lo, Kristian kohhran thianghlim ata hnawhchhuah a ni.
Chhia leh Ṭha Hriatna Thiang Vawng Rawh
15. Eng nge “thîr linga deh ang” chhia leh ṭha hriatna awm dân chu?
15 Pathian hmangaihnaa invawng ṭha tûr chuan, thil sual lama kan chhia leh ṭha hriatna a chawlawl chu kan phal thei lo. Chiang takin, khawvêl nungchang tehna hniam takte chu kan pawm tûr a ni lo va; tin, kan ṭhian kawm duhzâwng te, kan thil chhiar te, leh intihhlimna te chungchângah kan fîmkhur a ngai a ni. Paula chuan: “Nakin hunah chuan mi ṭhenkhatte chu, mi dawtheite vervêkna avângin hruaibona thlaraute leh ramhuaite zirtîrna thu ngaihsakin rinna chu an la bânsan ang. . . . Chûng mi dawtheite chu anmahni chhia leh ṭha hriatna ngeia thîr linga deh ang an ni,” tiin a vaukhân a. (1 Timothea 4:1, 2) “Thîr linga deh ang” chhia leh ṭha hriatna chu pangti kâng ser ang a ni a, khawiha hriat theihna a nei lo. Chutiang chhia leh ṭha chuan kalpêngte leh rinna kalsanna thlen thei dinhmunte laka inthiar fihlîm tûrin min vaukhân lo vang.
16. Engvângin nge chhia leh ṭha hriatna thianghlim neih chu a pawimawh?
16 Kan chhandamna chu kan chhia leh ṭha hriatna thianghlim neihah a innghat a. (1 Petera 3:21) Isua thisena kan rinna chuan “Pathian nung rawng bâwl tûrin” thiltih thite lak aṭang kan chhia leh ṭha hriatna chu a tithianghlim a ni. (Hebrai 9:13, 14) Duhrêng vânga thil sual kan tih chuan, kan chhia leh ṭha hriatna chu a lo bawlhhlawhin, Pathian rawngbâwl tlâk mi thianghlimte kan ni tawh lo vang. (Tita 1:15) Mahse, Jehova ṭanpuinain chhia leh ṭha hriatna thianghlim kan nei thei a ni.
Nungchang Ṭha Lo Pumpelh Dân Kawng Dangte
17. ‘Jehova pawm tlatna’ chuan eng hlâwkna nge a thlen?
17 Hmân lai Israel mi Kaleba angin ‘Jehova pawm tlat’ rawh. (Deuteronomy 1:34-36) Pathianin i laka a phût che chu ti la, “ramhuai dawhkâna mi” ei chu tum ngai suh. (1 Korinth 10:21) Kal pêngte chu hnâwl rawh. Jehova dawhkân chauhva hmuh theih thlarau lam chaw chu lâwm takin kîl la, tichuan zirtîrtu derte emaw, thlarau sualhote emaw hruai sualin i awm lo vang. (Ephesi 6:12; Juda 3, 4) Bible zir te, inkhâwm te, leh thlawhhma rawngbâwlna ang chi thlarau lam thilahte hian i rilru pe rawh. Jehova i pawm tlat a, Lalpa hna ṭhahnemngai taka i thawh fo chuan i hlim ngei ang.—1 Korinth 15:58.
18. Engtin nge Jehova ṭihna chuan i nungchang a nghawng ang?
18 ‘Zah leh ṭih dêk chunga Pathian rawng bâwl’ chu tum tlat rawh. (Hebrai 12:28) Jehova ṭihna chuan kawng ṭha lo engpawh hnâwl tûrin a chêttîr ang che. Chu chuan Petera’n a hriak thihpuite a fuihna: “Thlei bîk nei lova mi tin hnathawh ang ṭheuhva ngaihtuah ṭhîntu chu Pa anga in lam chuan heta in châm chhûng zawng ṭih dêkin awm rawh u,” tih mila awm tûrin a ṭanpui ang che.—1 Petera 1:17.
19. Engvângin nge Pathian Lehkha Thu aṭanga i thil zirte chu i nunpui reng ang?
19 Pathian Lehkha Thu aṭanga i thil zirte chu nunpui reng rawh. ‘Chhia leh ṭha fiah tûra an hriat theihna sawizawi tawhte’ zînga mi i nih tawh dâwn avângin, chu chuan sual nasa tak pumpelh tûrin a ṭanpui ang che. (Hebrai 5:14) Ṭawngkam leh nungchang lama mi fîmkhur lo nih ai chuan, hêng ni ṭha lovahte hian mi fing anga harhvângin, “remchânnate lei zêl rawh.” ‘Jehova duhzâwng eng nge ni tih hre rengin,’ ti zêl bawk ang che.—Ephesi 5:15-17; 2 Petera 3:17.
20. Engvângin nge awhna chu kan pumpelh ang?
20 Awhna—mi dang thil neih châk ngawih ngawiha duhâmna— chu pumpelh hmak rawh. Thu Sâwm Pêk zînga pakhat chuan: “I vêngte chhûngte chu i awt tûr a ni lo va, i vêngte nupui chu i awt tûr a ni lo, a bâwihpa emaw, a bâwihnu emaw, i vêngte ta rêng rêng chu engmah i awt tûr a ni lo,” a ti a. (Exodus 20:17) He Dân hian mi a chhûngte, a nupui, a chhiahhlawhte, a rante, leh thil dangte chu a humhalh a ni. Mahse, a pawimawh zâwk chu Isua sawi anga awhnain mihring a tibawlhhlawh hi a ni.—Marka 7:20-23.
21, 22. Sualna pumpelh tûrin Kristian chu engtin nge a invên theih?
21 Châknain suala a hruai loh nân che invêng rawh. Zirtîr Jakoba chuan: “Mi tin mahni châknaa hruai bo leh hîpa an awm chuan thlêmna an tâwk a ni zâwk e. Tin, châkna chuan no a pai a, sual a hring ṭhîn a; tin, sual chuan a lo puitlinin thihna a hring ṭhîn,” tiin a ziak a. (Jakoba 1:14, 15) Entîr nân, miin tûn hmaa zû lama harsatna a neih chuan, a ina zu kawl loh chu a duh mai thei a. Mipat hmeichhiatpui ni lote laka thlêmna pumpelh tûrin, Kristian chuan a hnathawhna hmun emaw, a hna emaw chu a thlâk a ngai mai thei bawk.—Thufingte 6:23-28.
22 Sual lam panin pên khat pawh pên hlek suh. Inchhai derna leh nungchang bawlhhlawhna ngaihtuahna chuan inngaihna emaw, uirêna emaw a thlen thei a. Dâwt tê tham sawina chuan mi chu dâwt lian tak pawh sawi tûrin a tihuangtau thei a, thil ṭha lo tak, dawthei a nihtîr thei a ni. Thil hotê rûkna chuan thil lian tham ru ṭan tûrin mi chhia leh ṭha hriatna chu a tichawlawl thei bawk a. Kalpêngte ngaihtuahna tlêm têa lo ngaihtheihna chuan a tâwpah kalpêng ṭhakna a thlen thei bawk a ni.—Thufingte 11:9; Thu Puan 21:8.
Thil Sual Lo Ti Ta La?
23, 24. Chronicles pahnihna 6:29, 30 leh Thufingte 28:13 aṭangin eng thlamuanna nge hmuh theih a nih?
23 Mihring zawng zawng hi mi ṭha famkim lo vek an ni a. (Thuhriltu 7:20) Mahse, sual nasa tak i tih chuan, Jehova biak in hlannaa Lal Solomona ṭawngṭaina aṭangin thlamuanna i dawng thei a ni. Solomona chu Pathian hnênah: “An hri vei emaw, an lungngaihna emaw hria apiangin, he in lam hawia bân phara mi mal emaw, Israel mipui hovin emaw ṭawngṭaina leh dîlna an rawn thlen chu i awmna vânan lo ngaithla la, ngaidam la, mi tin an awm dân ang ṭheuh zêlin hlawhtlintîr ang che, an thinlung i hre ṭheuh si a; (nangmah chauh hi mihring fate thinlung hretu i ni si a)” tiin a ṭawngṭai a ni.—2 Chronicles 6:29, 30.
24 Ni e, Pathian chuan thinlung a hria a, a ngaidam a ni. Thufingte 28:13 chuan: “Bawhchhiatna zêptute chu an hmuingîl lo vang a, zêp lova inpuanga hawisantute chuan zahngaihna an hmu ang,” a ti. Inlamlêt chunga sual inpuanga kalsantu chuan Pathian zahngaihna a dawng thei a ni. Mahse, i thlarau lam dinhmun a chau hle a nih chuan, Pathian hmangaihnaa invawng ṭha reng thei tûrin eng dangin nge ṭanpui thei che? (w06 11/15)
Engtin Nge I Chhân Ang?
• Engtin nge Pathian hmangaihnaah chuan kan invawn ṭhat theih ang?
• Engtin nge Pathian leh Krista kan hmangaihna chuan sual kawng hnâwl tûra min ṭanpui theih?
• Engtin nge mi dangte hmangaihna tak tak chuan mipat hmeichhiatna lama nungchang bawlhhlawhna ata min dan theih?
• Nungchang dik lo pumpelh dân kawng ṭhenkhat chu engte nge ni?
[Zirlai Atâna Zawhnate]
[Phêk 7-naa milem]
Juda chuan Pathian hmangaihnaa invawn ṭhat dân min kawhhmuh
[Phêk 9-naa milem]
Inṭhenna chuan pawi khawih lo kawppui leh fate tân lungngaihna nasa tak a thlen thei
[Phêk 10-naa milem]
Kaleba angin ‘Jehova pawm tlat’ chu i tum em?
[Phêk 11-naa milem]
Thlêmna do thei tûrin ṭawngṭai ziah rawh