Rorêltu Chu Thunun Theih A Ni Ang Em?

CROATIA rama Jehova Thuhretute zînga pakhat, Sladjana-i chu pawisa lam thilah rorêlna hmaa inlan tûra tih a ni a. Ani chu rorêlna ṭan a nih hmain rorêltu hmaah a hun takah a thleng a. Amaherawhchu, a thu buai neihpui chu a tlai a ni. Sladjana-i chuan thu hrilh a châk et et avângin mi zawng zawngin an nghah ṭhup lai chuan, intihuaisenin rorêltu chu a be ṭan a.

“Ka pu, nakin lawkah he leiah hian rorêltute leh rorêlna inte a awm tawh dâwn lo tih i hria em le?” tiin a zâwt a.

Rorêltu chuan engmah sawi lovin, mak ti takin a en ringawt a. Tichuan, rorêlna chu neih ṭan a ni ta a. Rorêlna tihtâwp a niha Sladjana-i chu lehkha pawimawh pakhata hming ziak tûra a din chuan, rorêltu chu a lama rawn thle pheiin: “Nakin lawkah he leiah hian rorêltute leh rorêlna inte a awm tawh dâwn lo tih nichin lawka min hrilh kha i hre chiang tak zet maw?” tiin zâwi têin a rawn zâwt a.

“Aw ka Pu. Ka hre chiang khawp mai!” tiin a lo chhâng a ni.

“Chu mi atân chuan finfiahna eng nge i neih?” tiin rorêltu chuan a zâwt a.

“Chu chu Bible-ah a hmuh theih alâwm,” tiin Sladjana-i chuan a chhâng leh a ni.

Rorêltu chuan chutiang finfiahna chu chhiar a duh thu leh Bible erawh a neih loh thu a hrilh a. Tichuan, Sladjana-i chuan Bible bu khat pêk a tiam a ni. Thuhretute chuan rorêltu chu va tlawhin, Bible chu an va pe a; tin, chawlhkâr tina Bible zirna nei tûrin an fuih bawk a. Rorêltu chuan Bible zirna neih chu a remti a, a hnu lawkah chuan Jehova Thuhretute zînga mi a rawn ni ta thuai a ni.

Hrilh lâwknaah, Sâm 2:10 chuan: “Aw lalte u, fing tawh ula: leia rorêltute u, thununin awm tawh rawh u,” a ti a ni. Chutiang rorêltute’n inngaitlâwm taka Jehova kaihhruaina an han pawm chu a va hlimawm tak êm! (w06 12/01)

[Phêk 32-naa milem]

Sladjana-i leh rorêltu