Bible Zirtîrna Chiah Chu Zirtîr Rawh
Bible Zirtîrna Chiah Chu Zirtîr Rawh
“Hnam tina mi zirtîrahte siam ula, . . . zirtîr rawh u.”—MATTHAIA 28:19, 20.
1. Bible awlsam taka hmuh theih a nih dân chungchângah eng nge sawi theih a nih?
JEHOVA THU, Bible Thianghlim hi he khawvêla lehkhabu upa ber leh sem chhuah tam ber zînga mi a ni a. A ṭhen lai tal hi chu ṭawng 2,300 aia tama lehlin a ni. He leilunga chêng mi zaa 90 aia tamte chuan mahni ṭawng ngeiin an hmu thei a ni.
2, 3. (a) Engvângin nge Bible zirtîrna chungchângah buaina a awm? (b) Eng zawhnate nge kan ngaihtuah tûr chu?
2 Mi maktaduai tam takte chuan Bible châng ṭhenkhat tal chu nî tin an chhiar a. Ṭhenkhatte phei chuan a bul aṭanga a tâwp thlengin vawi tam tak an chhiar chhuak vek tawh a ni. Sakhaw pawl sâng tam takte chuan an zirtîrna chu Bible ṭanchhan niin chhâl ṭheuh mah se, an thu zirtîr chu a thuhmun chuang lo. Buaina tizualkai tûrin sakhaw thuhmun vuantute zîngah ngei pawh ngaih dân inkalh tak tak a awm lehnghâl. Ṭhenkhat chuan Bible, a lo chhuahna, leh a hlutna chungchângah ngaih dân dik lo an nei a. Tin, tam takte chuan Bible chu intiamkam nân emaw, thu dik sawi tûra chhe chham nân emawa hman tûr lehkhabu thianghlim ang lekah an ngai bawk.
3 Dik takin, Bible-ah hian mihringte tâna thiltithei tak Pathian thu, a nih loh leh thuchah a tel a. (Hebrai 4:12) Chuvâng chuan, Jehova Thuhretute kan nih angin, mite chuan Bible thu zirtîrte an hriat chu kan duh a. Isua Krista’n: “Kal ula, . . . hnam tina mi zirtîrahte siam ula, . . . zirtîr rawh u,” tia amah zuitute thu a pêk chu hlen kan duh hle a ni. (Matthaia 28:19, 20) Kan vântlâng rawngbâwlnaah hian, tûn lai khawvêl sakhaw lama buaina darhzau tak avânga mangang mi rilru ṭhate kan tawng a. Chûng mite chuan min Siamtu nihna dik tak chu hriat an duh a, nun awmzia chungchâng Bible sawi chu hriat an duh bawk. Mi tam takte ngaihven zawhna pathum i lo ngaihtuah ang u. Zawhna tinahte hian, sakhaw hruaitute’n dik lo taka an sawite chu kan hria ang a; tichuan, Bible zirtîrna chiah chu kan ennawn bawk ang. Chûng zawhnate chu: (1) Pathian hian min ngaihsak em? (2) Eng nge kan pian chhan? (3) Kan thihin kan chungah eng nge lo thleng?, tihte hi a ni.
Pathian Hian min Ngaihsak Em?
4, 5. Engvângin nge mite’n Pathianin min ngaihsak lo nia an hriat?
4 Pathian hian min ngaihsak em?, tih zawhna hmang hian i han ṭan teh ang u. Lungchhiatthlâk takin, mi tam tak chuan Pathianin min ngaihsak lo niin an hria a ni. Engvângin nge chutianga an ngaih le? A chhan pakhatah chuan, an hawina lam apiangah indona te, inhuatna te, leh hrehawm tawrhna tea khat khawvêl an hmuh vâng a ni a. ‘Pathianin min ngaihsak tak tak se chuan, chutiang thil ṭha lote a thlentîr hauh lo vang,’ tiin an ngaihtuah a ni.
5 Pathianin min ngaihsak lo nia mite’n an ngaih nachhan dang leh chu, sakhaw hruaitute’n chutianga an ngaihtîr tlat vâng a ni. Vânduaina a lo thlenin sakhaw hruaitute chuan eng nge an sawi fo ṭhin? Nu pakhatin motor accident-a a fa naupang tê pahnih a han chân chuan, a kohhrana rawngbâwltu chuan, “Pathian Jakoba 1:13) Pathian Jehova chuan thil ṭha lo chu a thlentîr ngai lo. “Pathian chuan thil suaksual . . . a ti teuh lo vang.”—Joba 34:10.
duhzâwng a nih hi. Pathianin vântirhkoh pahnih dang a duh belh a ni,” tiin a sawi a. Sakhaw hruaitute’n hetianga an sawi hian, a nihna takah chuan vânduaina thlengah Pathian an mawhpuh a ni. Mahse, zirtîr Jakoba chuan: “Tuman thlêmna an tawh laiin, ‘Pathian thlêm ka ni’ ti suh se; Pathian chu sual thlêm rual a ni lo, amah pawhin tumah a thlêm ngai lo,” tiin a sawi. (6. He khawvêl suahsualna leh hrehawm tawrhna phênah hian tunge awm?
6 A nih leh, engvângin nge suahsualna leh hrehawm tawrhna a tam êm êm? A chhan pakhatah chuan, mihring nâwlpuite chuan Pathian Rorêltu nihna chu an hnâwl a, a dân leh thu bul felte laka intukluh an duh loh vâng a ni. ‘Khawvêl pumhlûm hi mi sual thu thua a awm’ avângin, mihringte chu Pathian Hmêlma, Setana hnênah tum loh deuhvin an inpe a ni. (1 Johana 5:19) He thudik hriatna hian dinhmun ṭha lo tak a awm chhan hriat thiam chu a tiawlsam sawt a ni. Setana chu sual tak, mi huathmang, mi bumhmang, leh nunrâwng tak a ni a. Chuvângin, khawvêlin a chunga rorêltu mizia a lan chhuahtîr chu kan beisei tûr a ni. Tûn laia suahsualna a nasa hle pawh hi a mak lo ve!
7. Hrehawm kan tawrh chhan ṭhenkhatte chu eng nge ni?
7 Hrehawm kan tawrh chhan dang leh chu mihringte ṭhat famkim loh vâng a ni a. Sual nei mihringte hian mite hnuaichhiah tumin an bei ṭhîn a, chu chuan indona te, awpbehna te, leh hrehawm tawrhna te a thlen fo ṭhîn. Thuhriltu 8:9 chuan: “Mi, mi dang chungah pawi khawpin a intilal ṭhîn,” tiin inhmeh takin a sawi a. Tin, hrehawm tawrhna a awm chhan dang leh chu, Bible-in “hun leh khawrêl” tia a sawi a thlen ṭhin vâng hi a ni. (Thuhriltu 9:11) Mite chuan a hun lo leh a hmun lova an awm palh avângin chhiatna an tuar fo ṭhîn.
8, 9. Jehova’n min ngaihsak tak zet tih engtin nge kan hriat theih?
8 Jehova’n hrehawm tawrhna a thlentîr lo tih hriat chu a thlamuanthlâk hle a. Mahse, Pathianin kan nuna thilthlengte hi a ngaihsak tak zet em? Chu zawhna chhânna hlimawm tak mai chu Pathianin min ngaihsak tih hi a ni! Pathian thâwk khum Thu chuan mihringte’n kawng dik lo an zawh a phal chhan a sawi avângin, Jehova’n min ngaihsak tih kan hria a ni. Pathianin a phal chhante zîngah chuan thu buai pahnih a tel: a Lal Chungnunna leh mihringte rinawmna chu. Siamtu engkimtithei a nih avângin, Jehova chuan kan hnênah hrehawm tawrhna awm a phal chhan min hrilh kher a ngai lo. Mahse, min ngaihsak avângin min hrilh a ni.
9 Pathian min ngaihsakzia fiahna dang leh chu ngaihtuah teh. Nova hun laia suahsualnain khawvêl a tuam khân, Pathian chuan “rilru nat nân a hman phah” a ni. (Genesis 6:5, 6) Tûn laiah hian min tawrhpui ve ang em? Jehova chu a danglam loh avângin chutiang tho chuan min tawrhpui a ni. (Malakia 3:6) Jehova chuan rorêl dik lohna chu a hua a, mihringte hrehawm tuar lai pawh a hmu hreh a. Bible chuan mihringte rorêl avâng leh Setana thununna avânga hrehawm tawrhna awm zawng zawngte chu a tireh thuai dâwn tih a zirtîr a ni. Chu chu Pathianin min ngaihsak tih finfiahna rin tlâk tak a ni lâwm ni?
10. Engtin nge mihringte hrehawm tawrhna chungchâng Jehova’n a thlîr?
10 Sakhaw hruaitute’n nuna thil lungchhiatthlâk kan tawhte hi Pathian duhzâwng ni anga an sawi hian, Pathian chu an puh dik lo hle a ni. Chu mi nêna inkalh takin, Jehova chuan mihringte hrehawm tawrhna tihtâwp hlân chu a nghâkhlel hle a. “A ngaihsak che u,” tiin 1 Petera 5:7 chuan a sawi a ni. Chu tak chu a ni Bible zirtîrna chiah chu!
Eng Nge Kan Pian Chhan?
11. Khawvêl sakhuate chuan mihringte leia an pian chhan chungchângah eng nge an sawi?
11 Tûnah chuan mi tam takte mak tih zawhna a pahnihna, Eng nge kan pian chhan? tih hi i lo ngaihtuah ang u. Khawvêl sakhuate chuan mihringte hi leia mikhual châm mai niin an sawi fo ṭhîn a. Lei chu hmun dang khawi emaw laia nung tûra kawng laka chawlh lawkna, a nih loh leh inhlânkaina hmun ang lekah an thlîr a ni. Sakhaw hruaitu ṭhenkhat chuan dik lo takin engtik nîah emaw chuan Pathianin he lei hi a tichhe vek dâwn niin an zirtîr a. Chutiang zirtîrnate avângin, mi tam tak chuan thihna chauhvin a nghâk a nih si chuan an dam chhûng hun a nuam thei ang bera chen chu an titlu a ni. Kan pian chhan chungchânga Bible zirtîrna chiah chu eng nge ni?
12-14. Bible-in lei leh mihringte tâna Pathian thiltum eng nge a zirtîr?
12 Pathian chuan lei leh mihringte tân thiltum ropui tak a nei a. Ani chuan leilung hi “engmah lovah a siam lo va, mihring awm nân a din zâwk a ni.” (Isaia 45:18) Tin, Jehova chuan “leilung nghahchhante chu a phûm a, kumkhuaa a nghîn loh nân.” (Sâm 104:5) Pathianin lei leh mihringte tâna a thiltumte hriatna chuan he leia kan pian chhan hre thiam tûrin min ṭanpui thei a ni.
13 Genesis bung 1 leh 2-ah hian Pathianin mihringte chênna atân lei chu fîmkhur takin a siam tih kan hmu a. Kan lei pawh tela thilsiam hun a tâwp khân thil zawng zawng chu ‘a ṭha êm êm’ a ni. (Gen. 1:31) Pathianin mipa leh hmeichhe hmasa ber, Adama leh Evi chu huan mawi takah a dah a, ei tûr ṭha hnianghnâr tak a pe bawk a. An hnênah: “Chi tam tak thlaha lo pungin, leilung hi luah khat ula,” tia hrilh an ni. Fa ṭha famkim nei a, an awmna huan mawi tak ramri chu kâwlkil thlenga zauh zêl tûr an ni a, tin ramsate chungah pawh hmangaihna nên thu an nei bawk tûr a ni.
14 Mihring ṭha famkimte lei paradis-a chatuana an nun chu Pathian thiltum a ni a. Pathian Thu chuan: “Mi felte chuan ram hi an luah ang a, a chhûngah hian kumkhuain an awm ang,” tiin a sawi. (Sâm 37:29) Ni e, mihringte chu lei Paradis-a chatuana nung tûra siam an ni. Chu chu Pathian thiltum a ni a, Bible zirtîrna chiah pawh a ni bawk!
Kan Thihin Kan Chungah Eng Nge Lo Thleng?
15. Khawvêla sakhua zawng zawng deuhthaw hian kan thih huna kan chunga thilthleng chungchângah eng nge a zirtîr?
15 Tûnah hian mi tam takte ngaih ven zawhna pathumna: Kan thihin kan chungah eng nge lo thleng? tih chu i lo ngaihtuah ang u.
Khawvêla sakhua zawng zawng deuhthaw hian mi a taksa a thih hnuah a chhûnga thil engemaw chu la nung chhunzawm zêl angin an zirtîr a. Sakhaw pâwl ṭhenkhatte chuan Pathianin mi sual chu hremhmun meidîlah chatuanin a hrem tih ngaih dân an la vuan tlat bawk. Mahse, chu chu thu dik a ni em? Thihna chungchâng Bible zirtîrna chiah chu eng nge ni?16, 17. Bible sawi dânin, mitthite dinhmun chu eng nge ni?
16 Pathian Thu chuan: “Mi nungdamte chuan an la thi dâwn tih an hre si a, mitthite erawh chuan engmah an hre lo va, lâwmman an nei tawh ngai lo,” tiin a sawi. ‘Mitthite chuan engmah an hriat loh’ avângin, thil an hre thei lo va, an hmu thei lo va, an ṭawng thei lo va, thil an ngaihtuah thei hek lo. Lâwmman an nei thei tawh ngai lo bawk. Engtin nge an theih tehlul ang? Hna engmah an thawk thei tawh si lo! Chu bâkah, “an hmangaihna te, an huatna te, an îtsîknate a boral daih tawh a ni,” an rilru engmah an phawrh chhuah theih tawh loh avângin.—Thuhriltu 9:5, 6, 10.
17 He mi chungchânga Bible sawi chu a mâwlmangin, a fiah hle—mitthite chu khawi emaw laiah an nung chhunzawm zêl lo. Thih huna kan taksa chhuahsana nung chhunzawm zêl thei thil engmah a awm lo va, chanchhâwnna ringtute sawi angin, taksa dang pua piang leh thei eng mah a awm hek lo. Hetiang hian kan tehkhin thei ang: Kan nun hi mombati alh ang a ni a. Kan chhêm mih chuan, mei alh chu khawiah mah a kal lo. A awm tawh lo mai a ni.
18. Bible zirlaiin mitthite chuan engmah an hre lo tih a han hriat chuan, eng thu tâwp nge a insiam theih?
18 He thutak mâwlmang tak, thiltithei tak si a hmanna hi han ngaihtuah teh. Bible zirlaiin mitthite chuan engmah an hre lo tih a han hriat chuan, a thlahtu thi tawhte chu an dam chhûngin eng ang pawhin thinur mah se, tûnah chuan amah an tibuai thei tawh lo tih awlsam takin thu tâwp a insiam thei a ni. A hmangaih tak thi tawhte pawhin thâwm an hre thei lo va, an hmu thei lo va, an ṭawng thei lo va, thil an hre thei lo va, an ngaihtuah thei tawh hek lo tih pawh a hre thiam nghâl tûr a ni bawk. Chuvângin, chawlh lawkna hmunah an mal ngawih ngawih emaw, hremhmun meidîlah nghaisakna an tuar emaw thei lo. Amaherawhchu, mitthi tawh Pathian hriatrengnaa awmte chu kaihthawh an ni leh dâwn tih Bible chuan a zirtîr a ni. Beiseina ropui a va ni êm!—Johana 5:28, 29.
Kan Hman Tûr Lehkhabu Thar
19, 20. Kristian kan nih angin, eng mawhphurhna nge kan neih a, eng Bible zirna ṭanpuitu nge rawngbâwlnaa hman atân bîka ruahman a nih?
19 Mi tam takte mak tih zawhna pathum chauh kan la ngaihtuah ho va. Hêng zawhna tinah hian, Bible zirtîrna chu a fiahin, a chiang hle tih kan hmu a ni. Bible zirtîrna chiah hre duhte hnêna chutiang thu dikte han hrilh chu a va hlimawm tehrêng êm! Mahse, mi ngîlte’n a chhânna lungawithlâk an mamawh zawhna pawimawh dang tam tak a la awm a. Kristian kan nih angin, hêng zawhnate chhânna hmu tûra mite ṭanpui tûrin mawhphurhna kan nei a ni.
20 Bible thutak mâwlmang tak leh chiang taka zirtîr leh mite thinlung hîp tûrzâwnga zirtîr hi thil harsa tak a ni a. Chu thil harsa tak hmachhawn tûr chuan ‘bâwih rinawm leh fing tak’ chuan Jehova Thuhretute’n Kristian rawngbâwlnaa an hman atâna ruahman bîk lehkhabu pakhat a buatsaih a. (Matthaia 24:45-47) He phêk 224 nei lehkhabu hming chu What Does the Bible Really Teach? tih a ni.
21, 22. What Does the Bible Really Teach? bu hmêlhmang chhinchhiah tlâk tak ṭhenkhatte chu eng nge ni?
21 Kum 2005/06 “Pathian Lawmzâwng Thuâwihna” Jehova Thuhretute District Inkhâwmpuia tih chhuah, he lehkhabu hian hmêlhmang hrang hrang chhinchhiah tlâk tak a nei a. Entîr nân, he lehkhabu thar hian thuhmahruai phêk nga a nei a, chu chu Bible zirna neih ṭan nân a ṭangkai hle. He thuhmahruaia kan hmuh milemte leh Bible bung leh chângte sawipui chu awlsam i ti hle ang. He mi zînga tel thute hi Bible zirpuite hnêna Bible bung leh chângte zawn chhuah dân hrilhfiah nân i hmang thei bawk ang.
22 He lehkhabu inziak dân phung hi a mawlmangin, a fiah ṭha hle a. A theih lai apianga zirlaite teltîrna hmanga an thinlung thleng ngei tûra tih tak zeta buatsaih a ni. Bung tinah hian a tîrlamah zawhna leh a tâwpna apiangah “Bible Zirtîrna Chu” tih thupui nei bâwm a awm a. He bâwmah hian atîra zawhna siamte chu Bible ṭanchhana chhân a ni. He thuchhuaha milem leh a hrilhfiahna thuziak ṭha tak tak te, leh tehkhinthute chuan Bible zirlai chu ngaih dân thar pawm nghâl thei tûrin a ṭanpui ang. He lehkhabua thute hi mâwlmang taka ziak ni mah se, zirlaiin chanchin kimchang zâwk a mamawh huna hman theih tûr thu pawimawh chipchiar tak 14 chuanna thu belhna a awm a ni.
23. Bible zirpui neihnaa Bible Teach bu hman chungchângah eng rawtnate nge pêk a nih?
23 Bible Teach bu hi lehkha thiam dân inang lote leh sakhaw chi hrang hrang vuantute ṭanpui nâna buatsaih a ni a. Bible zirlai chuan Bible chungchâng hriatna a neih loh chuan, bung khat zir zo tûr chuan vawi khat aia tam zir a ngai mai thei a ni. Zir liam pui puat suh, zirlai thinlung thlen ngei tum tlat zâwk ang che. Tehkhin thu ṭhenkhatte chu a hriat thiam loh chuan, hrilhfiahin emaw, a tlukpui tehkhin thu dang emaw pe rawh. Ṭha takin inbuatsaih la, chu lehkhabu thiam taka hmang tûr chuan theihtâwp chhuah ang che; tin, Pathian ṭanpuina dîl la, tichuan ‘thutak thu chu fel takin i hmang’ thei ang.—2 Timothea 2:15.
I Chanvo Hlu Takte Avângin Lâwm Rawh
24, 25. Jehova’n a mite hnênah eng chanvo ropui tak nge a pêk?
24 Jehova chuan a mite chu chanvo ropui takte a pe a. A chungchânga thudik hre thei tûrin min siam a ni. Chu chanvo hlu tak chu i ngainêp ngai lo vang u! Tihah chuan, Jehova chuan a thiltumte chu inngaitlâwmte hnênah puangin, mi chapote hnênah a zêp thung si a. He mi chungchângah hian, Isua chuan: “Aw ka Pa, lei leh vân Lalpa, nangin mi fing leh mi bengvârte hnênah hêng thu hi i zêp a, nausênte hnênah i puan avâng hian ka fak a che,” tiin a sawi a ni. (Matthaia 11:25) Lei leh Vân Lalber, Jehova rawngbâwltu mi inngaitlâwmte zînga chhiar tel kan ni hi chawimawina vâng tak a ni.
25 Pathian chuan a chanchin mi dangte zirtîr theihna chanvo dang min pe bawk a. Ani chu a chungchâng dâwtthu zirtîrtute chuan dik lo takin an chhuah a ni tih hre reng ang che. Chuvângin, mi tam tak chuan an hre sual hle a, mite ngaihsak lo leh hmangaihna tlachham niin an hria a ni. Chutianga ngaih dân dik lo an neih chu siam ṭhatsak i inhuamin, i châk bawk em? Hmun tina mi rilru ṭha pute’n Jehova chungchâng thudik an hriat chu i duh em? I duh chuan, thu hrilhna leh thu pawimawh tak chungchânga Pathian Lehkha Thu-in a sawite chu zirtîrin, Pathian lawmzâwng thuâwihna i neih chu lantîr ngei ngei ang che. Thutak zawngtute chuan Bible zirtîrna chiah chu an zir a ngai si a. (w07 1/15)
Engnge I Chhânna Chu?
• Pathianin min ngaihsak tih engtin nge kan hriat?
• Engvângin nge leia kan pian?
• Kan thihin kan chungah eng nge lo thleng?
• Bible Teach bu hmêlhmang eng nge ṭangkai i tih ber?
[Zirlai Atâna Zawhnate]
[Phêk 13-naa milem]
Mi felte chu Paradis-ah kumkhuain an chêng ang